Aksi fu leisiman

Di na apostel Yohanes ben skrifi taki ’volmaakti lobi e puru frede’, dan san a ben wani taki nanga „volmaakti lobi”, èn sortu „frede” a e puru?

Na apostel Yohanes ben skrifi: „Te wan sma abi lobi, dan a no e frede, ma te wan sma abi volmaakti lobi, dan dati e puru frede, bika frede e tapu sma fu du sani. Iya, a sma di e frede, no man sori lobi na wan volmaakti fasi.”—1 Yohanes 4:18.

Den vers na fesi e sori taki Yohanes ben e taki fu a fasi fa sma e taki fri sondro fu frede. A ben e taki spesrutu san lobi gi Gado abi fu du nanga a taki di wan sma kan taki fri nanga En. Wi kan si disi te wi leisi vers 17: ’Disi na fa wi man sori lobi na wan volmaakti fasi, so taki wi kan taki fri na a krutudei.’ Te wan Kresten e begi Gado, dan a kan du dati sondro frede, noso a kan taki a no man du dati na wan fri fasi. Dati abi langalanga fu du nanga o dipi a lobi fu en de gi Gado, èn sosrefi efu a e firi taki Gado lobi en.

Den wortu „volmaakti lobi” wani taki furu. Te Bijbel e gebroiki a wortu „volmaakti”, dan a no ala leisi a wani taki volmaakti neleki fa Gado de volmaakti. Fu eksempre, na ini a Bergitaki, Yesus ben taki: „Fu dati ede unu musu de volmaakti, neleki fa un Tata na hemel de volmaakti.” Yesus ben taigi den bakaman fu en taki efu den ben lobi soso den sma di ben lobi den, dan dati no ben o de nofo; wan sani ben o mankeri na a lobi fu den. Den ben musu lobi den feanti sosrefi, èn na so fasi den ben o meki a lobi fu den kon de volmaakti. We, na a srefi fasi, di Yohanes ben skrifi fu „volmaakti lobi”, dan a ben sori taki wi musu lobi Gado nanga wi heri ati, èn taki a lobi disi musu de fu si na ini ala afersi fu wi libi.—Mateyus 5:46-48; 19:20, 21.

Te wan Kresten e begi Gado, dan a sabi heri bun taki en na wan sondu sma èn taki a e meki fowtu. Ma efu a lobi Gado trutru èn a e firi taki Gado lobi en trutru, dan a no e frede taki Gado sa krutu en, noso drai baka gi en. Na presi fu dati, a e prisiri taki a man taki fri nanga Gado fu san de tapu en ati èn taki a kan aksi pardon fu di a e bribi na ini a frulusu-ofrandi, di Gado seti na wan lobi-ati fasi nanga yepi fu Yesus Krestes. A abi a frutrow taki Gado e arki den begi fu en.

Fa wan sma kan „sori lobi na wan volmaakti fasi”, èn fa dati kan yepi en fu „puru” a frede taki Gado sa krutu en, noso drai baka gi en? „A lobi fu Gado kon de volmaakti trutru na ini a sma di e du san [Gado] e taki”, na so na apostel Yohanes ben taki (1 Yohanes 2:5). Prakseri a sani disi: Efu Gado ben lobi wi aladi wi ben de sondari ete, dan a no sa lobi wi moro te wi abi berow trutru èn te wi e ’du san a e taki’? (Romesma 5:8; 1 Yohanes 4:10) Iya, solanga wi e tan getrow, wi kan abi a srefi dyaranti di na apostel Paulus ben abi di a ben taki fu Gado: „En eigi Manpikin a no ben kibri srefi fu ogri miti en, ma a gi en abra gi a bun fu wi alamala; we, efu a gi wi en Manpikin, dan fu san ede a no ben sa gi wi ala tra sani tu fu sori wi bun-ati?”—Romesma 8:32.