„Un musu abi dipi firi gi makandra”
„Un musu abi dipi firi gi makandra”
„Un musu abi dipi firi gi makandra, neleki fa brada lobi makandra.”—ROMESMA 12:10.
1, 2. Sortu banti wan zendeling fu a ten disi, èn sosrefi na apostel Paulus, ben abi nanga den brada nanga sisa fu den?
NA INI ala den 43 yari di Don ben de wan zendeling na den kondre na ini a birti fu Owstu Asia, sma ben sabi en leki wan man di ben lobi den wan di a ben dini. Ne a kon siki so hebi, taki a ben de fu dede. Fu dati ede wan tu fu den sma di a ben gi leri, reis omeni dusun kilometer fu kon taigi en: „Kamsahamnida, kamsahamnida!” san wani taki: „Grantangi, grantangi!” na ini Koreatongo. Don ben abi dipi firi gi sma, èn disi ben naki den ati.
2 A no soso na eksempre disi fu Don wi sabi. Na ini a fosi yarihondro, na apostel Paulus ben sori taki a abi dipi firi gi den sma di a ben dini. Paulus ben du ala san a ben man fu yepi trawan. A ben de wan man di ben abi wan tranga bribi, ma toku a ben abi safrifasi èn a ben broko en ede nanga tra sma, „neleki te wan mama di e gi en pikin bobi, e boboi den eigi pikin fu en”. A ben skrifi a gemeente na ini Tesalonika: „Fu di wi abi dipi firi gi unu, meki nanga ala prisiri wi ben prati no wawan a bun nyunsu fu Gado nanga unu, ma sosrefi wi eigi sili, bika unu ben kon de sma di wi lobi” (1 Tesalonikasma 2:7, 8). Bakaten, Paulus taigi den brada fu en na Efeise taki den no ben o si en moro. Fu dati ede „den alamala bari krei, èn den ben brasa Paulus èn ben bosi en na wan lobi fasi” (Tori fu den Apostel 20:25, 37). A de krin taki Paulus nanga den brada fu en ben abi wan tranga banti nanga makandra, ma disi no ben kon nomo fu di den ben abi a srefi bribi. Den ben abi dipi firi gi makandra.
Dipi firi nanga lobi
3. San den Bijbel wortu gi dipi firi nanga lobi abi fu du nanga makandra?
3 Na ini Bijbel, te wan sma e sori dipi firi gi wan trawan, te a broko en ede nanga trawan, èn te a abi sari-ati, dan disi abi furu fu du nanga a moro warti fasi di wan Kresten musu abi, namku lobi (1 Tesalonikasma 2:8; 2 Petrus 1:7). Neleki fa wan moi dyamanti abi difrenti sei, na so ala den eigifasi disi fu Gado e horibaka gi makandra so taki wan bun sani kan kon fu en. Den eigifasi disi e meki taki Kresten e kon moro krosibei na makandra, ma a no dati wawan, den e kon krosibei na a hemel Tata fu den sosrefi. Fu dati ede na apostel Paulus ben gi den Kresten brada nanga sisa fu en, a deki-ati disi: „Meki un lobi de sondro hoigrifasi. . . . Un musu abi dipi firi gi makandra, neleki fa brada lobi makandra.”—Romesma 12:9, 10.
4. San den wortu „dipi firi” wani taki?
4 A Griki wortu di Paulus gebroiki gi „dipi firi” abi tu pisi: wán pisi wani taki matifasi èn a tra pisi wani taki lobi makandra leki fa brada lobi makandra. Wan Bijbel sabiman e tyari kon na krin taki „wan fu den moro prenspari fasi fa sma kan kon sabi suma na wan [Kresten], na taki den kan si fa [den Kresten] e wroko tranga fu abi wan osofamiri pe lobi de, pe den osofamiri memre abi wan tranga banti nanga makandra, èn pe ala memre fu na osofamiri e yepi makandra”. Na dati yu e firi gi den Kresten brada nanga sisa fu yu? Na ini a Kresten gemeente yu musu man si taki sma abi wan tranga banti nanga makandra èn taki den e libi nanga makandra leki wan famiri (Galasiasma 6:10). Fu dati ede a Nyun Testamenti e taki en so na ini Romesma 12:10: „Un mus lobi makandra leki brada nanga sisa.” Iya, a lobi di Kresten abi gi makandra a no soso wan plekti, noso wan sani di den e du soso nanga den frustan. Efu wi abi „brada firi fu lobi di no e hoigri, dan [wi] musu lobi makandra tranga, nanga lobi di komoto na a ati”.—1 Petrus 1:22.
’Gado e leri wi fu lobi makandra’
5, 6. (a) Fa Yehovah gebroiki den internationaal kongres fu leri a pipel fu en fa den leki Kresten musu abi firi gi makandra? (b) Fa a banti di de na mindri brada nanga sisa kan kon moro tranga baka wan pisi ten?
5 Aladi ’a lobi fu furu sma kon kowru’ na ini a grontapu disi, toku Yehovah e leri a pipel fu en na ini a ten disi fu „lobi makandra” (Mateyus 24:12; 1 Tesalonikasma 4:9). Den internationaal kongres di Yehovah Kotoigi e hori, na moi okasi pe sma kan leri lobi makandra. Na den kongres disi, Kotoigi fu a kondre pe den kongres e hori miti nanga brada di komopo fu tra kondre. Furu fu den ben meki den brada nanga sisa di kisi wan kari fu kon na den internationaal kongres, tan na ini na oso fu den. Na wan fu den kongres di hori no so langa pasa, yu ben abi brada nanga sisa di komopo fu kondre pe den sma no e sori den firi fu den so makriki. „Di den brada nanga sisa disi doro na a kondre pe a kongres ben e hori, dan den ben senwe ete èn den ben syen”, na so wan Kresten e fruteri, di ben e yepi den brada fu feni wan tanpresi. „Ma siksi dei baka dati di den ben musu gowe baka, dan den brada disi brasa den brada pe den ben tan, èn den ben e krei. Den ben kon sabi san na Kresten lobi èn noiti moro den o frigiti disi.” Te wi lobi fu kari wi brada nanga sisa kon na wi oso, awansi suma den de, dan a sa meki a fisitiman firi bun èn den wan di gi en a kari o firi bun tu.—Romesma 12:13.
6 A tru taki sma e ondrofeni tumusi prisiri sani na tapu den sortu kongres disi, ma Kresten kan kisi wan moro tranga banti te den e dini Yehovah makandra wan heri pisi ten kaba. Te wi sabi wi brada bun, dan wi kan kisi moro warderi gi den moi eigifasi fu den. Wi kan warderi en taki den e taki sani di tru, taki wi kan frutrow den, taki den de loyaal. Wi kan warderi en sosrefi taki den abi safrifasi, taki den lobi fu gi sma sani, taki den e hori trawan na prakseri, taki den abi sari-ati, èn taki den no e prakseri densrefi nomo (Psalm 15:3-5; Odo 19:22). Markus di ben de wan zendeling na ini Owstu Afrika, taki: „Te wi e wroko makandra leki wán man nanga den brada nanga sisa fu wi, dan wi e kisi wan tranga banti nanga den di no man broko.”
7. San wi musu du te wi wani firi a waran lobi na ini a gemeente?
7 Efu den brada nanga sisa fu wan gemeente wani abi so wan banti, dan den musu kon krosibei na makandra. Efu wi e go doronomo na den Kresten konmakandra, dan disi o meki taki a banti di wi abi nanga wi brada nanga sisa, sa kon moro tranga. Te wi de na tapu den konmakandra èn wi e taki nanga sma bifo a konmakandra bigin èn baka te a kaba, dan wi e gi makandra deki-ati „fu abi lobi èn fu du bun wroko”. Na so a de tu te wi e teki prati na den konmakandra srefi (Hebrewsma 10:24, 25). Wan owruman na Amerkankondre e fruteri: „Nanga prisiri mi kan memre ete taki di mi ben de wan pikin, na osofamiri fu wi ben komopo na ini a Kownukondre zaal leki lastiwan, fu di wi ben wani gebroiki ibri okasi fu taki switi tori nanga trawan fu gi makandra deki-ati.”
A de so taki yu musu ’opo yu ati bradi’?
8. (a) San Paulus ben abi na prakseri di a ben gi den Korentesma deki-ati fu ’opo den ati bradi’? (b) San wi kan du taki sma na ini a gemeente lobi makandra moro?
8 Efu wi wani sori trawan a waran firi disi, dan kande wi musu ’opo wi ati bradi’. Na apostel Paulus ben skrifi a gemeente na Korente: „Wi ati opo bradi. Unu abi wan bigi presi na ini wi ati.” Paulus ben gi den deki-ati fu ’opo na ati fu den bradi’ tu (2 Korentesma 6:11-13). Yu sosrefi kan ’opo yu ati bradi’ èn sori trawan taki yu lobi den? Yu no abi fu wakti teleki trawan fosi e sori lobi gi yu. Di Paulus ben skrifi den Romesma wan brifi, dan a ben skrifi taki den ben musu abi dipi firi gi makandra. A ben gi den a rai disi: „No wakti fu sori trawan lespeki, ma un musu sori trawan lespeki fosi” (Romesma 12:10). Efu yu wani sori trawan lespeki, dan yu fosi kan go na den fu taki den odi te yu de na den konmakandra. Yu kan aksi den tu fu go nanga yu na ini a preikiwroko, noso fu sreka wan konmakandra makandra nanga yu. Te wi e du disi, dan a sa de moro makriki fu abi dipi firi gi makandra.
9. San son sma du fu tron moro bun mati fu den Kresten brada nanga sisa fu den? (Gi wan tu eksempre fu a presi dyaso.)
9 Osofamiri èn sma di de den wawan na ini a gemeente kan ’bradi den ati’ te den e go luku makandra, kande fu di den e nyan nanga makandra, noso fu di den e du prisiri sani nanga makandra (Lukas 10:42; 14:12-14). Wanwan leisi, Hakop e aksi wan pikin grupu fu go nanga en na wan presi pe den kan de na dorosei e nyan èn e meki prisiri nanga makandra. „Owrusma nanga yongusma de drape, èn sosrefi osofamiri di abi soso a papa noso a mama”, na so a e fruteri. „Te den sma e go na oso baka, den e firi prisiri èn den abi wan moro tranga banti nanga makandra.” Wi leki Kresten musu du muiti fu no de Kresten brada nanga sisa fu makandra nomo, ma fu de trutru mati tu.—3 Yohanes 14.
10. San wi kan du te wi abi problema nanga wi brada nanga sisa?
10 Ma son leisi, den fowtu di wi leki libisma abi, kan meki taki a de wan problema fu feni mati èn fu abi waran firi gi trawan. San wi kan du? Na a fosi presi, wi kan begi Gado fu abi wan bun banti nanga wi brada nanga sisa. Gado wani taki den futuboi fu en musu libi switi nanga makandra, èn a sa gi wan piki tapu den sortu opregti begi disi (1 Yohanes 4:20, 21; 5:14, 15). Wi musu du san wi aksi na ini den begi fu wi. Ric, wan opziener di e reis èn di e libi na ini Owstu Afrika, kan memre taki a ben miti wan brada di ben grofu nanga sma, èn fu dati ede a ben muilek fu meki mati nanga en. „Mi no ben wai pasi gi a brada disi, ma na presi fu dati mi ben bosroiti fu leri sabi en moro bun”, Ric e taki. „Mi ben kon sabi taki di a brada disi ben de wan pikin, dan en papa ben poti wan lo hebi wet gi na osofamiri. Di mi kon frustan taki a brada disi feti nanga a fasi disi fa en papa ben kweki en èn taki a ben go na fesi bun furu kaba, dan mi ben kisi warderi gi en. Wi ben tron bun mati.”—1 Petrus 4:8.
Opo yu ati gi trawan!
11. (a) San de fanowdu fu meki a waran firi na mindri brada nanga sisa na ini a gemeente kon moro tranga? (b) Fu san ede a kan abi takru bakapisi na yeye fasi te wi no e sori trawan fa wi e firi?
11 Na ini a ten disi, furu sma de di noiti no ben abi wan bun mati. Dati na wan sari sani! A sani disi no abi fu de so na ini a Kresten gemeente, èn a no musu de so tu. Te brada nanga sisa lobi makandra trutru, dan disi no wani taki nomo dati den e taki nanga makandra na wan lespeki fasi, èn taki den abi bun maniri. A no wani taki tu dati te den e miti makandra, dan den e sori den firi fu den na wan tumusi bradyari fasi noso nanga wan lo opo-opo. Na presi fu dati, wi musu de klariklari fu opo wi ati gi trawan, soleki fa Paulus ben du gi den Korentesma, èn wi musu sori den brada nanga sisa fu wi taki wi wani sabi trutru fa a e go nanga den. A no ala sma feni en wan prisiri sani fu de nanga tra sma, noso fu taki furu, ma te wi no e bumui srefisrefi nanga trawan dan dati kan abi takru bakapisi. „Wan sma di e hori ensrefi aparti, sa suku en eigi wini nomo”, na so Bijbel e warskow. „A sa handri na wan fasi di e sori taki a no e poti prakseri kwetikweti na koni rai.”—Odo 18:1.
12. Fu san ede a de prenspari taki brada nanga sisa e taki nanga makandra, fu kan tranga a banti na ini a gemeente?
12 A de prenspari taki trutru mati e taki nanga makandra na wan eerlijk fasi (Yohanes 15:15). Wi alamala abi mati fanowdu di wi kan fruteri den prakseri fu wi nanga den dipi firi fu wi. Boiti dati, o moro betre wi sabi makandra, o moro makriki a o de fu yepi makandra te a de fanowdu. Te wi e hori den firi fu trawan na prakseri na a fasi disi, dan wi e meki taki a dipi firi di brada nanga sisa abi gi makandra, e kon moro tranga. Wi o si sosrefi taki den wortu fu Yesus tru, namku: „Wan sma sa de moro koloku te a e gi sani, leki te a e kisi sani.”—Tori fu den Apostel 20:35; Filipisma 2:1-4.
13. San wi kan du fu sori taki wi abi trutru waran firi gi wi brada?
13 Wi musu sori trawan taki wi abi waran firi gi den, efu wi wani kisi wini fu dati (Odo 27:5). Te wi abi trutru waran firi gi trawan, dan den sa man si disi na wi fesi, èn a sa meki taki den sosrefi e kisi waran firi gi sma. „Te den ai e brenki, dan na ati e prisiri”, na so wan koni man ben skrifi wan leisi (Odo 15:30). Te wi e du sani gi trawan fu di wi poti prakseri na san den abi fanowdu, dan dati e meki tu taki wi e kisi dipi firi gi makandra. Aladi nowan sma kan dwengi wan trawan fu abi waran firi gi en, toku wan sma sa warderi en te wi e gi en wan kado nanga wan opregti ati. Wan karta, wan brifi, noso ’wan wortu di taki na a yoisti ten’, na sani di kan meki wi kisi moro dipi firi gi makandra (Odo 25:11; 27:9). Te wi tron mati nanga trawan kaba, dan wi musu tan sori taki wi abi trutru waran firi gi den efu wi wani hori den bun. Wi wani yepi wi mati, spesrutu te den de na nowtu. Bijbel e taki: „Wan trutru mati abi lobi ala ten, èn a de wan brada di en mama meki fu te banawtu de.”—Odo 17:17.
14. San wi kan du efu a gersi leki wan sma no wani tron wi mati, aladi wi e pruberi fu sori waran firi gi en?
14 A tru taki wi no kan fruwakti taki wi sa abi wan tranga banti nanga ala sma na ini a gemeente. A no de fu taki, dati wi sa abi wan moro tranga banti nanga son sma, leki fa wi abi dati nanga trawan. Sobun, kande yu abi a firi taki wan sma no e sori yu someni switifasi leki fa yu ben sa wani, ma yu no musu prakseri so gaw taki wan sani no bun nanga yu, noso nanga a sma dati. No pruberi fu dwengi a sma dati fu tron wan mati fu yu. Efu yu e tan sori a sma switifasi sondro fu dwengi en, dan kande a sma sa tron yu mati te a de a yoisti ten gi dati.
„Mi feni yu bun”
15. Sortu bakapisi a abi tapu trawan te sma e prèise den, noso te sma no e prèise den?
15 Na a ten di Yesus teki dopu, a ben musu fu prisiri di a yere wan sten na ini hemel, taki: „Mi feni yu bun”! (Markus 1:11) Den wortu disi ben sori taki Yehovah ben feni Yesus bun, èn fu dati ede Yesus ben de moro seiker now taki en Tata ben abi waran firi gi en (Yohanes 5:20). Na wan sari taki son sma noiti e kisi prèise fu den wan di den e lespeki èn di den lobi. „Furu yongu sma leki mi no abi famiriman nanga suma den man taki fu a Kresten bribi fu den”, na so Ann e taki. „A wan-enkri sani di wi e yere te wi de na oso, na taki sma e krutu na wi tapu. Disi e meki wi firi sari trutru.” Ma te den e tron wan memre fu a gemeente, dan den e firi a waran fu wan yeye famiri, dati na papa nanga mama, èn brada nanga sisa na ini a bribi, di e horibaka gi den èn di e broko den ede nanga den.—Markus 10:29, 30; Galasiasma 6:10.
16. Fu san ede a no wan bun sani fu krutu tumusi tapu wan sma?
16 Furu tron a de so na ini son kulturu, taki papa nanga mama, bigisma, skoromisi noso skoromeester, no e taigi den yonguwan taki den feni den bun. Disi de so fu di den e prakseri taki te den o prèise den yonguwan, dan den yonguwan o prakseri tumusi fu den densrefi, noso taki den o kisi bigimemre. Kresten osofamiri èn sma na ini a gemeente kan teki a denki disi abra. Te bigisma o taki wan sani fu wan lezing di wan yonguwan hori, noso fu wan tra sani di a du, dan kande den bigisma e taki: „A ben bun, ma yu kan du en moro bun!” Noso kande den e taki srefi dati den no e prisiri nanga a yonguwan. Furu sma di e du disi, e denki taki na so fasi den e yepi yonguwan fu du sani moro bun. Ma nofo tron disi no de so, fu di a kan meki taki den yonguwan no wani du nowan sani moro, noso den kan kisi a firi taki den no man du san sma e fruwakti fu den.
17. Fu san ede wi musu suku okasi fu prèise trawan?
17 Ma a no musu de so taki wi e prèise wan sma, soso te wi wani gi en rai bakaten. Te sma na ini na osofamiri èn na ini a gemeente e prèise makandra na wan opregti fasi, dan den e kisi dipi firi gi makandra, èn na so fasi yongusma e kisi a deki-ati fu go aksi rai na brada nanga sisa di abi ondrofeni. Sobun, na presi taki wi e meki den gwenti na ini a libimakandra sori wi fa fu handri nanga trawan, wi musu „tron wan nyun sma, so taki [wi] kan kon de soleki fa Gado wani, akruderi trutru regtfardikifasi èn loyaalfasi”. Prèise trawan soleki fa Yehovah e du dati.—Efeisesma 4:24.
18. (a) Un yonguwan, fa un musu si a rai di bigisma e gi unu? (b) Fu san ede bigisma musu luku bun fa den e gi trawan rai?
18 Na a tra sei, unu leki yonguwan no musu denki taki te den bigisma e sori unu fa fu du wan sani moro bun, noso te den e gi unu rai, taki den bigisma no lobi unu (Preikiman 7:9). Kwetikweti! A kan taki den e broko den ede nanga unu èn taki den abi dipi firi gi unu. Noso fu san ede den ben o teki a muiti fu taki nanga unu fu a tori? Fu di bigisma, spesrutu den owruman na ini a gemeente, nofo tron sabi sortu krakti, wortu kan abi tapu trawan, meki den e teki furu ten fu prakseri fu sani èn fu begi, bifo den o gi wan sma rai, fu di den wani yepi en.—1 Petrus 5:5.
„Yehovah abi trutru dipi firi gi sma”
19. Fu san ede den sma di ben ondrofeni fruferi sani kan suku a yepi fu Yehovah?
19 Kande fruferi sani pasa nanga wan sma di a ben wani sori trawan taki a abi dipi firi gi den. Fu dati ede a sma disi frede taki te a o du disi baka, dan trawan o hati den firi fu en baka. Den sma disi abi deki-ati nanga tranga bribi fanowdu fu opo den ati gi trawan baka. Ma noiti den no musu frigiti taki Yehovah „no de fara fu ibriwan fu wi”. A e gi wi a kari fu kon krosibei na en (Tori fu den Apostel 17:27; Yakobus 4:8). A e frustan tu taki wi e frede taki wan sma o hati den firi fu wi, èn a e pramisi wi taki a o horibaka gi wi èn o yepi wi. A psalm skrifiman David e gi wi a dyaranti: „Yehovah de krosibei fu den wan di lasi-ati; èn den wan di e firi brokosaka, a e frulusu.”—Psalm 34:18.
20, 21. (a) Fa wi sabi taki wi kan abi wan tranga banti nanga Yehovah? (b) San de fanowdu fu abi wan bun banti nanga Yehovah?
20 Wan tranga banti nanga Yehovah na a moro prenspari sani di wi kan pruberi fu kisi. Ma wi man abi so wan banti nanga en trutru? Iya. Bijbel e sori wi taki regtfardiki man nanga uma ben abi wan tranga banti nanga wi hemel Tata. A fasi fa den ben firi, skrifi na tapu papira, so taki wi kan abi a frutrow taki wi sosrefi kan kon krosibei na Yehovah.—Psalm 23, 34, 139; Yohanes 16:27; Romesma 15:4.
21 Iniwan sma kan doro den markitiki di Yehovah poti fu tron wan mati fu en. „O Yehovah, suma sa de wan fisitiman na ini yu tenti?”, na so David ben aksi. „A sma di e waka sondro fowtu èn e du retidu èn di e taki waarheid na ini en ati” (Psalm 15:1, 2; 25:14). Efu wi e si den bun bakapisi di wi e kisi te wi e dini Gado, èn wi e si taki a e tiri wi èn e kibri wi, dan wi sa kon sabi taki „Yehovah abi trutru dipi firi gi sma”.—Yakobus 5:11.
22. Sortu banti Yehovah wani taki en pipel musu abi?
22 Wi de wan blesi pipel trutru, fu di Yehovah wani abi so wan tranga banti nanga onvolmaakti libisma! We, wi no musu abi dipi firi gi makandra dan? Yehovah kan yepi ibriwan fu wi fu abi dipi firi gi makandra, so taki sma kan si taki wi e libi leki trutru Kresten brada nanga sisa. Te wi de na ini a Kownukondre fu Gado, dan ibriwan sma na grontapu sa sori makandra den waran firi disi fu têgo.
Yu kan tyari disi kon na krin?
• Fa sani musu de na ini a Kresten gemeente?
• San ibriwan fu wi kan du so taki wi kan abi dipi firi gi makandra na ini a gemeente?
• Fa a du kon taki a waran firi di Kresten abi gi makandra, e kon moro tranga te trawan e prèise den na wan opregti fasi?
• Fa Yehovah e horibaka gi wi èn e yepi wi fu di a abi dipi firi gi wi?
[Aksi fu a tori disi]
[Prenki na tapu bladzijde 15]
Lobi na mindri Kresten a no soso wan plekti
[Prenki na tapu bladzijde 16, 17]
Yu kan ’opo yu ati bradi’ èn sori trawan taki yu abi waran firi gi den?
[Prenki na tapu bladzijde 18]
Yu na wan sma di e krutu tumusi tapu trawan, noso yu na wan sma di e gi trawan deki-ati?