Kownukondre preikiman e fruteri

Wan brifi fu Alejandra

LANGA ten kaba sma gebroiki brifi na wan bun fasi fu gi kotoigi. Son leisi a no de seiker san sa de a bakapisi te wan sma e gi kotoigi nanga yepi fu wan brifi, ma den sma di e tan gebroiki a wrokosani disi fu gi kotoigi, kisi furu blesi. Den e memre a koni rai fu Bijbel: „Sai yu siri na mamanten èn no meki yu anu rostu teleki neti doro; bika yu no sabi pe disi sa abi bun bakapisi, a kan de dyaso noso a kan de drape, noso taki ala tu sa bun a srefi.”—Preikiman 11:6.

Alejandra, wan yongu Kotoigi di ben dini sowan tin yari na a bijkantoro fu Yehovah Kotoigi na ini Meksikow, ben kisi chemotherapie fu di a ben abi kanker. A ben kon moro siki èn a ben kon swaki so te, taki a no ben man du den sani di a ben gwenti fu du ala dei. Ma fu di Alejandra no ben wani meki a diniwroko fu en go na baka, meki a ben teki a bosroiti fu skrifi brifi. A skrifi fu a seti di den Kotoigi abi fu gi sma wan oso-bijbelstudie sondro taki den abi fu pai gi dati, èn a skrifi a telefon-nomru fu en mama na ini den brifi tu. Ne a gi en mama den brifi, so taki te en mama ben de na ini na oso-fu-oso wroko, a ben kan libi den na den oso pe a no miti nowan sma.

Na a srefi ten dati, Diojany, wan yongu umapikin di komoto fu Gwatemala, ben go wroko na wan trowpaar fu yepi den nanga oso-wroko, na ini a foto Kankun, na Meksikow. Na ini a pisi ten di a ben de drape, a miti Yehovah Kotoigi èn a ben prisiri fu abi Bijbel takimakandra nanga den. Bakaten, den sma pe a ben wroko teki a bosroiti fu froisi go na Meksikow City, èn den ben wani en fu go nanga den. Diojany ben draidrai fu froisi fu di a ben frede taki a no ben o man miti nanga Kotoigi moro.

Den sma pe a ben e wroko gi en a dyaranti: „No broko yu ede, den Kotoigi de na ala presi. Wi sa suku den, so esi leki wi doro drape.” Nanga a howpu dati, Diojany agri fu go nanga den. Di den doro Meksikow City, dan den wrokobasi fu Diojany bigin suku den Kotoigi. Wi no sabi fu san ede den no ben man feni den, aladi pasa 41.000 Kotoigi nanga 730 gemeente de na ini a foto dati.

Heri esi, Diojany ben lasi-ati fu di a no ben feni den kotoigi fu go doro nanga den Bijbel takimakandra fu en. Wán dei, na uma pe a ben e wroko, kon na en, èn a taki: „Mi abi wan moi sani gi yu! A Gado fu yu yere den begi fu yu.” A gi en wan brifi, èn a taki: „Den Kotoigi libi a brifi disi gi yu.” A ben de wan brifi fu Alejandra.

Diojany miti a mama èn a pikin sisa fu Alejandra, di nen Blanca, èn Diojany teki wan bijbelstudie. Baka wan tu wiki, a miti Alejandra èn den ben prisiri srefisrefi fu miti makandra. Alejandra ben gi en deki-ati fu du den sani di a ben leri na a bijbelstudie fu en so taki a ben kan go na fesi na yeye fasi.

Wan tu mun baka dati, na ini yuli 2003, Alejandra dede, èn a gi den brada nanga sisa fu en wan moi eksempre fu bribi nanga deki-ati. Na a beri fu Alejandra, a naki na ati fu furu sma di den miti Diojany èn di den yere san a taki, namku: „Alejandra nanga en famiri na wan tumusi moi eksempre gi mi. Mi abi a fasti bosroiti fu dini Yehovah èn fu teki dopu heri esi. Mi e angri trutru fu si Alejandra baka na ini a Paradijs di e kon!”

Iya, aladi wan brifi na wan pikin sani nomo, toku a kan abi bun furu krakti tapu a libi fu wan sma, en heri libi langa!