Yu e wakti na a yoisti fasi?

NA INI a disiten grontapu, furu sma no lobi wakti wan tra sma, noso wan sani. A muilek gi den fu abi pasensi. Ma den Buku fu Bijbel e gi a pipel fu Gado deki-ati fu „tan wakti”. Tra fasi leki den sma lontu en, a profeiti Mika ben taki: „Mi sa sori taki mi e tan wakti a Gado fu mi frulusu.”—Mika 7:7; Kragisingi 3:26.

Ma san a wani taki fu wakti Yehovah? Fa wan Kresten musu wakti Gado? A de so taki wan sma kan wakti na wan yoisti fasi èn sosrefi na wan fasi di no bun? Na ondrofenitori fu a profeiti Yona di ben e libi na ini a di fu neigi yarihondro b.G.T., e leri wi wan sani fu a tori disi.

Wan sma di no ben e wakti na a yoisti fasi

Yehovah Gado ben seni Yona fu go preiki gi a pipel fu Ninefei, a mamafoto fu a Gran Kownukondre Asiria. Sma ben sabi Ninefei leki „a foto di e trowe brudu”, fu di den sma drape ben e du ala sortu ogri-ati sani sondro fu syen srefi. Furu historia sabiman èn sabiman di e ondrosuku owruten sani, e taki dati den sma fu Ninefei ben e libi so trutru (Nahum 3:1). Biginbigin, Yona no ben wani du a wroko disi, ma toku Yehovah sorgu taki a profeiti disi go na Ninefei te fu kaba.—Yona 1:3–3:2.

„Yona ben bigin go na ini a foto, nanga futu a e teki so wan dei fu waka, èn a ben tan meki bekènti, taki: ’Ete fotenti dei, èn Ninefei sa drai tapu’” (Yona 3:4). Den muiti di Yona ben du, ben abi heri moi bakapisi: „Den man fu Ninefei ben bigin poti bribi na ini Gado, èn den ben meki bekènti fu hori wan faste èn den ben weri saka leki krosi, fu a moro bigiwan fu den te a moro mendriwan fu den” (Yona 3:5). Èn fu di Yehovah na wan Gado di „no wani taki wan sma e kisi pori, ma a wani taki ala sma musu abi berow”, meki a no ben pori a foto moro.—2 Petrus 3:9.

Fa Yona ben feni dati? A tori e taki: „Ma disi no ben plisi Yona srefisrefi, èn a ben kisi bigi atibron” (Yona 4:1). Fu san ede? Kande Yona ben firi taki en fesi fadon leki profeiti, fu di a foto no kisi pori na a dei di a ben taki. Soleki fa a sori, dan a bigin feni taki a nen di a ben abi leki profeiti, ben moro prenspari leki fu abi sari-ati gi tra sma èn fu meki den kisi frulusu.

A no de fu taki dati Yona no go so fara taki a tapu fu de wan profeiti. Ma toku a ben de so taki a ben wakti fu „si san ben o pasa nanga a foto”. Iya, Yona ben kisi atibron fu di a ben feni taki den sma ben musu kisi pori. Dati meki a no go doro nanga en wroko, ma a ben e wakti nomo fu si san ben o pasa nanga a foto. Di a si taki sani no ben pasa soleki fa a ben fruwakti, dan a bow wan pikin kampu, a go sidon na ini a  skaduw, èn nanga atibron a go sidon wakti fu si san ben o pasa. Ma Yehovah no ben lobi a fasi fa Yona ben handri, sobun na wan lobi-ati fasi a kenki a fowtu denki fu en profeiti.—Yona 4:5, 9-11.

Fu san ede Yehovah abi pasensi

Aladi den sma fu Ninefei ben abi berow èn den no ben kisi pori, toku den drai go du den ogri sani fu den baka. Nanga yepi fu den profeiti Nahum nanga Sefanya, Yehovah ben taki na fesi taki a ben o pori a foto. Di Yehovah ben taki fu „a foto di e trowe brudu”, dan a ben meki bekènti taki a ben o pori Asiria èn a ben o meki Ninefei tron wan leigi presi di no bun fu sma libi na ini (Nahum 3:1; Sefanya 2:13). Ninefei ben kisi pori na ini 632 b.G.T. èn noiti moro sma bow en baka.

Na a srefi fasi, sma na ini a disiten grontapu e kiri makandra fu pikinpikin sani ede, èn den e du dati omeni tron moro furu leki den sma fu owruten Ninefei. A sani disi èn tra sani sosrefi meki taki Yehovah bosroiti taki a disiten seti fu sani sa kon na wan kaba na ini wan „bigi banawtu” di noiti no pasa ete.—Mateyus 24:21, 22.

Ma Yehovah no tyari a pori kon ete soleki fa a ben taki, bika na so fasi opregti sma na ini a ten disi kan sori berow èn kan tan na libi, neleki den sma fu Ninefei di ben abi berow. Di na apostel Petrus ben taki fu a pasensi fu Gado, dan a gebroiki den wortu disi: „Yehovah no e draidrai nanga a pramisi fu en, soleki fa son sma e denki taki a e draidrai, ma a abi pasensi nanga unu fu di a no wani taki wan sma e kisi pori, ma a wani taki ala sma musu abi berow.”—2 Petrus 3:9, 10, 13.

Fa fu wakti na a yoisti fasi

Petrus e taki moro fara: „Now di ala den sani disi sa smèlter, sortu sma unu musu de fu tyari unsrefi na wan santa fasi èn fu tan du sani di e sori taki unu e dini Gado na wan getrow fasi, aladi unu e fruwakti èn e hori a denoya fu a dei fu Yehovah bun na prakseri” (2 Petrus 3:11, 12). Luku taki aladi wi e fruwakti a dei fu Yehovah, wi musu ’tyari wisrefi na wan santa fasi èn wi musu tan du sani di e sori taki wi e dini Gado na wan getrow fasi’. Sobun, a fiti taki wi du wan sani, wi no musu sidon luku nomo san o pasa.

Iya, te wi e wakti na a yoisti fasi, dan wi e sori taki wi abi ala frutrow taki a dei fu Yehovah o kon soifri na a momenti di Yehovah wani. A bribi disi o meki taki wi o tyari wisrefi na wan santa fasi èn wi o du sani sosrefi di e plisi Gado. Wan fu den moro prenspari sani dati, na fu preiki a bun nyunsu fu Gado Kownukondre. Yesus ben de wan heri moi eksempre fu wan fayafaya preikiman, èn a ben gi den salfu bakaman fu en a komando disi: „Un musu tai un bere èn un musu meki un lampu bron; un musu de leki sma di e wakti den masra teleki a drai kon baka fu a trow-oso, so taki te a doro èn a e naki na tapu a doro, dan den kan opo a doro gi en wantewante. Koloku fu den srafu te a masra doro èn a e si taki den de na ai!”—Lukas 12:35-37.

Na ini a fosi yarihondro, wan srafu ben gwenti fu ’tai en bere’ te a ben o du wan hebi  wroko. A ben hari den ondrosei lanki fu en krosi kon na tapusei èn a ben tai den nanga wan banti na en mindribere, so taki a ben kan du en wroko fayafaya èn moro makriki. Sobun, wan Kresten musu de fayafaya fu du bun wroko. A musu kakafutu gi iniwan sani di kan meki a kon „lesi” na yeye fasi, kande fu di a e gi en krakti fu feti baka prisiri nanga gudu. Na presi fu dati, a musu abi „furu fu du na ini a wroko fu Masra” aladi a e wakti a bigi dei fu Yehovah di e meki sma frede.—Romesma 12:11; 1 Korentesma 15:58.

Tan wroko fayafaya aladi yu e wakti

Yehovah Kotoigi tan wroko fayafaya aladi den e wakti a dei fu Yehovah. Fu eksempre, na ini a dienstyari 2003, den gebroiki sowan 3.383.000 yuru ibri dei fu preiki a wortu fu Yehovah. Prakseri nomo: Efu wan sma ben musu doro den yuru di den Kotoigi wroko na ini wán dei nomo, dan a ben o abi fu preiki sowan 386 yari sondro fu tapu!

Toku, a bun fu aksi wisrefi: ’Mi e wakti na a yoisti fasi?’ Yesus ben gi wan agersitori di e sori taki a e fruwakti fu den salfu Kresten taki den e wroko fayafaya. A ben taki fu dri srafu: „A [masra] gi wan srafu feifi talenti, wan trawan a gi tu talenti, ete wan trawan a gi wán talenti; a gi ibriwan fu den akruderi san den ben man du; baka dati a go na wan tra kondre. Wantewante a srafu di ben kisi den feifi talenti gowe go wroko nanga den talenti, èn a kisi ete feifi talenti. A srafu di ben kisi den tu talenti, du a srefi sani èn a kisi ete tu talenti. Ma a srafu di ben kisi soso wán talenti gowe go diki wan olo èn a kibri a solfru moni fu en masra. Baka wan heri pisi ten a masra fu den srafu kon èn a kon seti moni afersi nanga den.”—Mateyus 25:15-19.

Ala dri srafu ben e wakti fu a masra drai kon baka. Di a masra doro, dan den tu srafu di ben e wroko fayafaya aladi den ben e wakti a masra fu den, ben yere den wortu disi: „Heri bun, yu na wan bun èn getrow srafu!” Ma a masra ben handri tra fasi nanga a srafu di ben wakti sondro fu du wan sani. A masra taki: „Trowe a srafu di no warti noti, go na dorosei na ini a dungru.”—Mateyus 25:20-30.

Aladi na agersitori disi abi fu du nanga salfu Kresten, toku wi alamala kan leri wan sani fu dati awinsi sortu howpu wi abi. A Masra, Yesus Krestes, e fruwakti taki ibriwan fu wi e wroko  fayafaya na ini a diniwroko di wi e du gi en, aladi wi e wakti en fu kon na a bigi dei fu Yehovah. A e warderi a wroko di ibriwan fu wi e du ’akruderi san wi man du’ na ini a situwâsi fu wi. Na a kaba fu a pisi ten di wi e wakti, a sa de wan bigi prisiri fu yere a Masra taigi wi: „Heri bun”!

A pasensi fu wi Masra wani taki frulusu gi libisma

Fa a de efu a seti fu sani disi tan moro langa leki san wi ben denki noso fruwakti? Wan reide de fu san ede a seti fu sani disi tan so langa. Na apostel Petrus ben skrifi: „Teki a pasensi fu wi Masra leki frulusu” (2 Petrus 3:15). Te wi sabi soifri san Gado abi na prakseri fu du, èn te wi abi a sakafasi fu frustan taki wi no de so prenspari leki den prakseri fu Gado di musu kon tru, dan dati sa meki wi abi pasensi solanga Yehovah abi pasensi nanga na owru seti fu sani disi.

A Bijbel skrifiman Yakobus ben gi wan agersitori fu gi Kresten deki-ati fu abi pasensi. A ben skrifi: „Luku! A gronman e tan wakti a switi froktu fu a gron, èn e hori pasensi nanga en teleki a e kisi a fruku alen nanga a lati alen. Unu sosrefi, hori pasensi; meki un ati kon de stanfaste, fu di a denoya fu Masra kon krosibei.”—Yakobus 5:7, 8.

Yehovah Gado no wani wi fu kon weri noso fu lasi-ati aladi wi e wakti. A gi wi wan wroko fu du, èn a e prisiri srefisrefi te wi e gebroiki a ten di wi e wakti, fu du a wroko dati fayafaya. A wani wi fu de leki den sma di Paulus ben kari na ini en brifi gi den Hebrewsma: „Wi wani taki ibriwan fu unu musu sori a srefi faya fu wroko, fu kan de seiker fu a howpu te na a kaba, so taki unu no e kon lesi, ma tron sma di e waka na baka den wan di nanga bribi èn nanga pasensi e kisi den pramisi.”—Hebrewsma 6:11, 12.

Sobun, no meki wi kon weri. Na presi fu dati, meki a de so taki a banti di wi abi nanga Yehovah Gado, a bribi di wi abi na ini a frulusu-ofrandi fu Yesus, èn a tumusi moi howpu fu wan nyun seti fu sani, gi wi krakti fu tan go doro. Meki wi de neleki den „bun èn getrow” srafu fu na agersitori fu Yesus èn sori taki wi warti fu kisi prèise nanga blesi. Dati o pasa te wi e tan prèise wi Gado fayafaya, neleki a psalm skrifiman di ben taki: „Mi fu mi sei, mi sa wakti doronomo, èn mi sa prèise yu moro nanga moro.”—Psalm 71:14.

[Prenki na tapu bladzijde 21]

Nanga atibron Yona ben sidon wakti fu si san ben o pasa nanga Ninefei

[Prenki na tapu bladzijde 22, 23]

Meki wi sori taki wi e dini Gado getrow, aladi wi e wakti a dei fu Yehovah