Aksi fu leisiman

Yesus ben gi den bakaman fu en a rai fu ’leni sma wani sani sondro fu aksi rente, èn fu no howpu taki den o kisi wan sani baka’. Ma disi wani taki dati den no ben musu aksi srefi a moni di den ben leni a sma?

Wi sa man frustan moro bun san Yesus taki na ini Lukas 6:35 te wi luku san a Wet fu Moses ben taki. Na ini a Wet fu Moses, Gado ben komanderi den Israelsma fu leni tra Israelsma moni te den ben abi yepi fanowdu na monisei. Ma te den ben e du dati, dan den no ben musu aksi rente (Exodus 22:25; Lefitikus 25:35-37; Mateyus 5:42). Te sma ben e leni trawan moni na so wan fasi, dan a no bisnis den ben e du. Na presi fu dati, dan sma ben kan leni trawan moni sondro fu aksi rente, fu yepi den wan di ben pôti, noso fu puru den na nowtu. Te yu luku en bun, dan wan sma no ben o sori lobi srefisrefi te a ben o pruberi fu meki moni tapu wan tra sma di ben abi problema na moni sei. Toku, a sma di ben leni wan trawan moni ben abi a reti fu kisi a srefi moni dati baka, èn son leisi a ben teki wan sani leki panti.—Deuteronomium 15:7, 8.

Yesus ben hori ensrefi na a Wet, èn di a ben taki dati wan sma di e yepi wan trawan no musu howpu „fu kisi wan sani baka”, dan a ben e sori taki a komando disi ben abi fu du nanga moro sani. Neleki den Israelsma, dan son leisi Kresten kan kisi problema na moni sei, noso tra situwâsi kan meki taki den kon pôti. Efu wan Kresten brada ben o suku yepi na moni sei fu di a de na ini wan muilek situwâsi, dan a ben o den wan lobi-ati sani fu yepi en, a no so? Fu tru, wan Kresten di abi trutru lobi sa wani yepi wan brada di kon de na ini problema na moni sei, aladi a brada dati no poti ensrefi na ini den problema dati (Odo 3:27). Kande wan sma kan gi so wan brada di de na ini nowtu wan moni leki wan kado, awansi a moni dati ben o moro mendri leki te a ben o leni a brada wan moni.—Psalm 37:21.

Na ini a fosi yarihondro G.T., na apostel Paulus nanga Barnabas ben kisi a wroko fu tyari sani fu den Kresten na ini Pikin Asia, go na den brada nanga sisa na ini Yudea fu di angriten ben de (Tori fu den Apostel 11:28-30). Na ini a ten disi sosrefi, furu tron Kresten e seni sani gi den brada nanga sisa fu den di de na nowtu, fu di wan rampu miti den. Te den e du dati, dan den e gi wan bun kotoigi na tra sma tu (Mateyus 5:16). A tru taki wi musu luku fa a sma di e suku yepi e tyari ensrefi, èn na ini sortu situwâsi a de. Fu san ede a abi yepi fanowdu? A bun fu hori den wortu fu Paulus na prakseri: „Efu wan sma no wani wroko, dan no meki a nyan tu.”—2 Tesalonikasma 3:10.

Efu wan brada di wani leni moni, no de na ini bigi nowtu ma a wani kisi yepi fu wan pisi ten nomo so taki a kan komoto na ini wan problema na moni sei, dan a ben sa fiti fu leni en wan moni sondro fu aksi rente. Na ini a situwâsi dati, wan sma ben kan leni wan trawan moni nanga a prakseri fu kisi a moni dati baka. Te a sma ben o du dati, dan a no ben o handri kontrari den wortu fu Yesus di skrifi na ini Lukas 6:35. Den musu meki wan kruderi tapu papira, èn a sma di e kisi a moni musu meki ala muiti fu pai a moni dati baka, soleki fa den ben meki mofo. Fu tru, neleki fa a lobi fu a wan Kresten e pusu en fu leni a trawan a moni, na so a lobi fu a tra Kresten musu pusu en fu pai a trawan baka.

A sma di e prakseri fu leni wan trawan moni (noso fu gi en wan moni leki kado), musu luku fosi fa a de nanga en eigi osofamiri. Fu eksempre, a musu aksi ensrefi efu a ben o meki en moro hebi gi ensrefi fu sorgu gi den sani di den memre fu en osofamiri abi fanowdu, bika disi na wan frantwortu di a abi soleki fa Bijbel e taki (2 Korentesma 8:12; 1 Timoteyus 5:8). Toku, Kresten e suku okasi fu sori lobi gi makandra, fu di den e du sani fu yepi makandra akruderi Bijbel gronprakseri.—Yakobus 1:27; 1 Yohanes 3:18; 4:7-11.