Aksi fu leisiman

Fa a Kresten gemeente e prakseri fu a gwenti di sma abi fu nyan pasa marki?

Gado Wortu e krutu a gwenti di sma abi fu dringi sopi pasa marki èn fu nyan pasa marki. A no fiti gi wan sma di e dini Gado, fu tyari ensrefi na so wan fasi. Fu dati ede, a Kresten gemeente e si wan sma di abi a gwenti fu nyan pasa marki èn di no wani kenki, na a srefi fasi fa den e si wan sma di abi a gwenti fu dringi sopi pasa marki. Wan sma di e dringi sopi pasa marki, èn sosrefi wan sma di e nyan pasa marki no kan de wan memre fu a Kresten gemeente.

Odo 23:20, 21 e taki: „No kon na mindri sma di e dringi win pasa marki, na mindri den wan di e nyan meti na wan gridi fasi. Bika wan drunguman nanga wan sma di e nyan tumusi furu, sa kon pôti, èn sribi sa meki wan man weri broko krosi.” Na ini Deuteronomium 21:20, wi e leisi fu wan sma di ’trangayesi èn di ben e opo ensrefi teige trawan’. So wan sma ben musu kisi dedestrafu soleki fa a Wet fu Moses ben taki. Soleki fa a tekst disi e sori, dan a sma di ben e opo ensrefi teige trawan èn di no ben abi berow, ben e du tu sani, namku a ben e ’nyan pasa marki èn a ben e dringi pasa marki’. A de krin, taki na ini Israel fu owruten, wan sma di ben wani dini Gado no ben musu abi a gwenti fu nyan pasa marki.

Ma o ten wi kan taki dati wan sma e nyan pasa marki, èn san den Kresten Griki Buku fu Bijbel e taki fu a tori disi? Wan sma di e nyan pasa marki na „wan sma di abi a gwenti fu nyan èn dringi na wan gridi fasi èn di noiti no abi nofo”. Sobun, na a fosi presi wan sma di e nyan pasa marki e sori gridifasi, èn Gado Wortu e sori taki „gridiman” no sa kisi a Kownukondre fu Gado (1 Korentesma 6:9, 10; Filipisma 3:18, 19; 1 Petrus 4:3). Boiti dati, di na apostel Paulus ben warskow Kresten fu no  du „den wroko fu a skin”, dan a ben kari sani soleki „dringi sopi te fu drungu, bradyari fesa, nanga den sortu sani disi” (Galasiasma 5:19-21). Furu tron, te sma e dringi te fu drungu èn te den e go na bradyari fesa, dan den e nyan pasa marki tu. Boiti dati, di Paulus ben taki fu „den sortu sani disi”, dan a no de fu taki dati den wortu disi e sori go sosrefi na sma di e nyan pasa marki. Soleki fa a de nanga den tra „wroko fu a skin”, dan wan Kresten di furu sma sabi leki wan sma di abi a gwenti fu nyan pasa marki èn di e tan weigri fu kenki a gridi fasi fa a e handri, musu puru fu a gemeente.—1 Korentesma 5:11, 13. *

Aladi Gado Wortu e sori taki wan drunguman takru a srefi leki wan sma di e nyan pasa marki, toku a moro makriki fu si te wan sma na wan drunguman, leki te wan sma gwenti fu nyan pasa marki. Nofo tron wi kan si krin o ten wan sma drungu. Ma a moro muilek fu sabi o ten wan sma bigin kisi a gwenti fu nyan pasa marki, bika wi no man si dati na a skin fu a sma. Fu dati ede, te owruman na ini a gemeente e kisi fu du nanga a problema disi, dan den musu luku bun fa den o lusu a problema na wan yoisti fasi, èn den musu gebroiki koni fu si krin fa sani de trutru.

Fu eksempre, a kan de so taki wan sma fatu fu di a e nyan pasa marki, ma dati no abi fu de so ala ten. A kan taki wan sma kon fatu fu di a abi wan siki. Wan sma kan fatu tu te a sani dati de na ini en famiri. Wi musu hori na prakseri tu taki a fatu di wan sma fatu abi fu du nanga en skin, ma a nyan di wan sma e nyan pasa marki abi fu du nanga a fasi fa a sma e denki. Wan wortubuku e taki dati wan fatu sma na wan sma di „abi tumusi furu fatu na en skin”, ma na a tra sei a e taki dati wan sma di e nyan pasa marki, „e du dati na wan gridi fasi èn a e prisiri fu dati”. Sobun, fu man sabi efu wan sma abi a gwenti fu nyan pasa marki, dan wi no musu luku o bigi a skin fu a sma de, ma wi musu luku a fasi fa a sma e tyari ensrefi te a e si nyanyan. Kande wan sma en skin no bigi tumusi, noso kande a mangri srefi, ma toku a kan de wan sma di e nyan pasa marki. Moro fara a de so, taki na a wan presi sma kan feni taki wan sma fatu, noso taki a bigi, ma na wan tra presi sma e feni taki a sma bun leki fa a de.

Fa wi kan si taki wan sma abi a gwenti fu nyan pasa marki? Wan sma di e nyan pasa marki e sori doronomo taki a no man dwengi ensrefi, iya, a e nyan na wan gridi fasi. So wan sma e nyan go doro nomo teleki a no e firi bun moro, noso teleki a e kon siki. Fu di a no e dwengi ensrefi, meki a e sori na a fasi disi taki a no abi bisi srefisrefi nanga a porinen di a e gi Yehovah èn a pipel fu En (1 Korentesma 10:31). Na a tra sei, wan sma di e nyan tumusi furu wanwan leisi nomo, no abi fu de wan „gridiman” (Efeisesma 5:5). Ma toku, te wi e hori Galasiasma 6:1 na prakseri, dan so wan Kresten kan abi yepi fanowdu. Paulus ben taki: „Brada, srefi efu wan sma e meki wan fowtu bifo a sabi dati, dan unu di abi eigifasi na yeye fasi, pruberi na wan safri-ati fasi fu meki so wan sma kon bun baka.”

Fu san ede a rai fu Bijbel di e taigi wi fu no de sma di e nyan pasa marki, de prenspari na ini a ten disi? Disi de so fu di Yesus ben gi wan warskow di abi fu du spesrutu nanga a ten fu wi: „Poti prakseri na unsrefi taki noiti un ati musu kon hebi nanga nyan pasa marki èn dringi pasa marki èn den broko-ede fu a libi, èn a dei dati e kon na un tapu wantronso, na ini wán momenti leki wan trapu” (Lukas 21:34, 35). Wán prenspari fasi fa wi kan sorgu taki wi no e libi na wan fasi di sa pori wi na yeye fasi, na fu no abi a gwenti fu nyan pasa marki.

Wan fu den tumusi moi fasi di Kresten musu abi, na taki den musu man dwengi densrefi fu no du sani pasa marki (1 Timoteyus 3:2, 11). Fu dati ede, Yehovah seiker sa yepi ala sma di e meki muiti fu fiti a rai di Bijbel e gi fu no nyan èn dringi pasa marki.—Hebrewsma 4:16.

[Futuwortu]