Oiti wi sa abi wan libi sondro broko-ede?

FURU sma lobi fu luku fa pikin-nengre e prisiri te den e prei nanga den lobi-ati papa nanga mama. Den pikin no e frede noti te den de nanga den papa nanga mama di e sorgu den bun. Ma furu yonguwan no man prisiri na so wan fasi kwetikweti. Na presi fu dati, son pikin musu broko den ede ibri dei fu feni wan presi fu sribi te neti. Howpu de gi den sortu pikin disi di no abi wan tanpresi, èn sosrefi gi tra sma di no abi wan bun libi?

Aladi a gersi leki howpu no de gi a tamara, toku Gado Wortu e gi howpu. A profeiti Yesaya ben taki na fesi dati a dei sa kon pe ala sma sa abi wan bun libi sondro broko-ede. A ben skrifi: „Den sa bow oso trutru èn libi na ini, èn den sa prani droifidyari trutru èn nyan fu den froktu fu den. Den no sa bow èn wan tra sma go libi na ini; den no sa prani èn wan tra sma go nyan fu en.”—Yesaya 65:21, 22.

Ma buweisi de gi a howpu disi? Bika te yu luku en bun, dan a wortu „howpu” no wani taki ala ten dati a sani o pasa trutru. Fu eksempre, nofo tron sma na ini Brasyonkondre e taki: „A esperança é a última que morre.” Den wortu disi wani taki trutru, „Howpu na a lasti sani di e dede gowe”. Disi e sori taki furu sma e tan howpu taki sani sa waka bun, srefi te den no abi buweisi taki dati o pasa trutru. Ma a howpu di a libi Gado e gi wi de tra fasi. Na apostel Paulus ben skrifi: ’Nowan sma di e bribi na ini [Gado], sa kisi syen’ (Romesma 10:11). Den Bijbel profeititori di kon tru kaba, e gi wi a dyaranti taki ala den tra sani di Yehovah Gado pramisi sa kon tru sosrefi. Te den pramisi disi sa kon tru, dan den sani di e meki taki pikin-nengre musu libi na tapu strati, no sa de moro.

Srefi na ini a ten disi, a bun rai di de fu feni na ini Bijbel kan yepi den wan di de sondro howpu, fu libi wan moro bun libi èn fu abi wan trutru howpu. Fa dati kan? Yehovah Kotoigi na ini yu birti sa breiti fu yepi yu feni a piki tapu na aksi disi.