Aksi fu leisiman

Pe den ogri yeye sa de na ini a pisi ten fu a Dusun Yari Tiri fu Krestes?

Bijbel no e gi wan krin piki tapu na aksi disi. Ma toku wi kan kon frustan pe den ogri yeye sa de na ini a pisi ten fu a Dusun Yari Tiri fu Krestes.

Na apostel Yohanes e fruteri na fesi san o pasa na a bigin èn na a kaba fu a Dusun Yari Tiri disi. A e taki: „Mi ben si wan engel e saka komoto na hemel nanga a sroto fu a dipi peti nanga wan bigi keti na en anu. Èn a ben grabu a draak hori, a fosi sneki, di de Didibri nanga Satan, èn ben tai en wan dusun yari. Èn a ben fringi en go na ini a dipi peti èn ben tapu en èn a ben sroto en bun na en tapu, so taki a no ben sa kori den nâsi moro teleki den dusun yari ben kon na wan kaba. Baka den sani disi a musu lusu en gi wan syatu pisi ten” (Openbaring 20:1-3). Den vers disi e taki fu Satan wawan taki a o sroto na ini a peti di no abi gron, èn taki te fu kaba a o lusu fu wan syatu pisi ten baka. Noti no taki dyaso fu den ogri yeye, ma wi kan fruwakti taki na engel di abi a sroto fu a peti, namku Yesus Krestes di kisi glori, o du a srefi sani nanga den ogri yeye te a o grabu Didibri èn sroto en na ini a peti.—Openbaring 9:11.

Di Yesus Krestes tron Kownu na hemel na ini 1914, dan a ben du wan sani di ben abi furu krakti tapu Satan nanga den ogri yeye. Openbaring 12:7-9 e taki: „Feti ben broko na hemel: Mikaèl nanga den engel fu en ben feti nanga a draak, èn a draak nanga den engel [den ogri yeye] fu en ben feti, ma a no ben wini, sosrefi nowan presi no ben feni moro gi den na ini hemel. Fu dati ede den ben fringi a bigi draak go na ondro, a fosi sneki, a wan di den e kari Didibri nanga Satan, di e kori sma na heri grontapu; den ben fringi en go na grontapu, èn den engel fu en den ben fringi go na ondro makandra nanga en.” Sensi a ten dati, Satan nanga den ogri yeye fu en de na ini a birti fu grontapu èn den no man go na hemel moro. Sobun, wi kan fruwakti taki te Yesus Krestes o tai Satan bakaten so taki grontapu sa de fri fu na ogri makti fu en, dan Yesus o du a srefi sani nanga den ogri yeye tu.

Luku sosrefi a fosi profeititori fu Bijbel. A e taki: „Mi [Gado] sa poti feantifasi na mindri yu [Satan] nanga na uma [a hemel organisâsi fu Yehovah] èn na mindri yu [Satan] siri nanga en siri [Yesus Krestes]. A sa masi yu na yu ede èn yu sa masi en na en bakafutu” (Genesis 3:15). Wan fasi fa a siri fu na uma o masi a sneki na en ede, na taki a o sroto Satan na ini a pisi ten fu a Dusun Yari Tiri fu Krestes. A profeititori e taki moro fara dati feantifasi de na mindri a siri fu Satan èn a Sma di o masi Satan. Satan en siri, noso en organisâsi, abi wan pisi di no de fu si nanga ai. A pisi dati na den ogri engel, noso ogri yeye. Sobun, te Yesus o sroto Satan, dan wi kan frustan taki a o tai èn sroto den ogri yeye tu. Den ogri yeye sori kaba taki den frede srefisrefi fu go na ini a peti di no abi gron, èn disi e sori taki den sabi taki na ini a ten di e kon den no o man du moro san den wani.—Lukas 8:31.

Ma a kan taki Openbaring 20:1-3 no e taki fu den ogri yeye fu di den o kisi pori na ini Armagedon,  makandra nanga a pisi fu a siri fu Satan di wi man si nanga wi ai? Bijbel e sori taki disi no abi fu de so. A e fruteri san o pasa nanga Satan te fu kaba: „Den ben fringi Didibri, di ben e kori den, go na ini a se fu faya nanga swarfu, pe a werdri meti èn sosrefi a falsi profeiti ben de kaba; èn den sa kisi skin-ati dei nanga neti fu têgo èn fu ala ten” (Openbaring 20:10). A werdri meti nanga a falsi profeiti na politiek grupu, èn den de wan pisi fu na organisâsi fu Satan di wi man si nanga wi ai (Openbaring 13:1, 2, 11-14; 16:13, 14). Den o kisi pori na ini Armagedon, te Gado Kownukondre o broko ala den kownukondre fu grontapu èn o tyari wan kaba kon na den (Danièl 2:44). Bijbel e taki fu „a têgo faya di sreka gi Didibri nanga den engel fu en” (Mateyus 25:41). Den sa trowe Satan nanga den ogri yeye fu en na ini a srefi „se fu faya nanga swarfu” neleki a werdri meti nanga a falsi profeiti. Dati wani taki dati den sa kisi pori fu têgo sosrefi. Efu a moro makti yeye pisi disi fu a siri fu Satan ben kisi pori na ini Armagedon, dan a tekst ben o taki fu den ogri yeye taki den ben de kaba na ini na agersi se dati, makandra nanga a werdri meti èn nanga a falsi profeiti. Fu di den ogri yeye no kari na ini Openbaring 20:10, meki wi kan frustan taki den ogri yeye no sa kisi pori na ini Armagedon.

Soleki fa a tekst no taki krin taki Yesus o trowe den ogri yeye na ini a peti di no abi gron, na so a no taki krin tu taki den o lusu komoto fu a peti. Ma te fu kaba, a srefi sani o pasa nanga den leki san o pasa nanga Didibri. Den sa kon fri makandra nanga Didibri èn den sa wroko makandra nanga en fu tesi libisma fu a lasti leisi na a kaba fu den dusun yari, ma baka dati Yesus o trowe den ogri yeye disi sosrefi na ini a se fu faya èn na so den sa kisi pori fu têgo.—Openbaring 20:7-9.

Fu dati ede, awinsi Openbaring 20:1-3 e taki fu Satan wawan taki wan engel sa sroto en èn fringi en go na ini a peti pe a no man du noti, toku wi kan frustan taki a sa sroto den engel fu Satan tu èn taki a sa trowe den go na ini a peti sosrefi. Satan nanga en legre fu ogri yeye no o man tapu Gado kwetikweti fu du san a abi na prakseri, namku fu kenki grontapu tron wan paradijs èn fu meki libisma kon volmaakti baka na a ten fu a Dusun Yari Tiri fu Krestes.