Yu wani libi fu têgo?

„MI NO e frede fu dede”, na so wan owru uma na ini Yapan ben taki. „Ma mi e sari taki mi sa abi fu libi den bromki disi na baka.” Wan Kresten sisa di ben go na a oso fu na uma disi ben man frustan fu san ede a taki so wan sani, fu di na uma ben abi wan heri moi dyari. Furu sma di e taki dati den no e frede fu dede, trutru lobi den wondru sani di Gado meki, èn te yu luku en bun, dan a kan taki den sma disi wani libi fu têgo.

Libi fu têgo? Furu sma no ben o agri nanga so wan prakseri. Kande son sma e taki srefi dati den no wani libi fu têgo. Ma fu san ede wan sma ben o denki na so wan fasi?

 Têgo libi sa de wan soi sani?

Son sma e denki taki a sa de wan soi sani fu libi fu têgo. Kande den e sori taki den furu sma di de nanga pensyun, no abi furu fu du, boiti taki den e sidon luku telefisi heri dei. Efu na so yu e denki, dan poti prakseri na san na astronomiaman Robert Jastrow ben taki di sma aksi en efu a ben o de wan blesi, noso wan fluku te sma ben o libi fu têgo. Jastrow ben piki: „A ben o de wan blesi gi den sma di wani fu kon sabi sani trutru èn di wani leri nyun sani ala ten. Te den sma disi e prakseri taki den o man teki sabi fu têgo, dan dati ben o gi den furu prisiri. Ma tra sma di denki taki den sabi ala sani kaba èn di no wani leri nyun sani, ben o si têgo libi leki wan takru fluku. Den no ben o sabi san fu du nanga a ten di den ben o abi.”

A fasi fa yu e denki fu sani, o meki yu si têgo libi leki wan soi sani, noso leki wan prisiri sani. Efu yu na wan sma ’di wani fu kon sabi sani trutru èn di wani leri nyun sani ala ten’, dan prakseri den sani di yu ben o man du, soleki fu meki skedrei, fu prei poku, fu bow difrenti sani, fu seti wan dyari, noso fu du iniwan tra warti sani di yu lobi. Têgo libi na grontapu ben o gi yu na okasi fu leri moro bun fa fu du difrenti sani di yu lobi fu du.

Iya, têgo libi sa de wan trutru prisiri sani te wi o man sori lobi gi trawan fu têgo èn te wi o firi taki trawan lobi wi fu têgo. Wi meki na so wan fasi taki wi man sori lobi, èn wi e firi bun trutru te trawan lobi wi. Te wi abi lobi gi trawan èn te trawan lobi wi tu, dan dati sa meki wi koloku trutru; awansi omeni yari e pasa, wi sa tan de koloku. Te wi e libi fu têgo, dan wi sa abi na okasi fu kon kisi lobi gi tra libisma, ma spesrutu gi Gado, èn wi sa man du dati fu ala ten. Na apostel Paulus ben taki: „Efu wan sma lobi Gado, dan Gado sabi a sma dati” (1 Korentesma 8:3). A de wan tumusi moi howpu taki wi sa sabi a Moro Heiwan fu hemel nanga grontapu èn taki en sa sabi wi tu! Boiti dati, noiti wi sa sabi wi lobi-ati Mekiman dorodoro; ala ten wi sa man leri moro fu en. Sobun, te yu e luku den reide di wi kari dyonsrode, dan yu denki taki têgo libi sa de wan soi sani di no sa tyari wini kon gi yu?

A libi warti soso fu di a syatu?

Son sma e feni taki na fu di a libi syatu, meki taki a de wan warti sani. Kande den e teki a libi agersi nanga gowtu, di no de fu feni so furu. Den sma disi e taki dati efu gowtu ben de fu feni na ala sei, dan a no ben o de so wan diri sani moro. Ma awansi dati ben o de so, toku gowtu ben o de wan moi sani ete. A no de fu taki dati a de so tu nanga a libi.

Wi ben sa kan teki têgo libi gersi nanga a loktu di de lontu wi èn di wi kan gebroiki fu hari bro. Prakseri wan man di e dukrun go na ini a se èn di e fasi na wan sani pe a no man komoto  moro. Disi e meki taki a no man kon na tapusei fu a watra moro fu hari bro. Yu no denki taki a man disi sa si a loktu di a e gebroiki fu hari bro, leki wan tumusi warti sani? Yu denki taki, baka te sma puru en na ini a nowtu disi, dati a sa kragi taki now a abi tumusi furu loktu fu hari bro? Kwetikweti!

Neleki fa sma kan puru wan man di fasi na ondro watra, na so wi kan kisi a howpu fu libi fu têgo, èn no fu wan tu yari nomo. „Sondu e pai nanga dede”, na so na apostel Paulus ben skrifi, „ma a presenti di Gado e gi, na têgo libi nanga yepi fu Krestes Yesus, wi Masra” (Romesma 6:23). Nanga yepi fu a frulusu-ofrandi fu Yesus, Gado sa puru sondu nanga dede gi libisma, èn a sa gi den libisma di e gi yesi na en a presenti fu libi fu têgo. Wi musu de nanga bigi tangi taki Gado seti sani na so wan lobi-ati fasi!

Fa a de nanga den lobiwan fu yu?

Kande son sma e denki: ’Fa a de nanga den lobiwan fu mi? Fu libi fu têgo na grontapu no ben sa switi efu den lobiwan fu mi no sa de makandra nanga mi.’ Kande yu kon leri san Bijbel e taki, èn yu kon leri taki libisma man libi fu têgo na ini wan paradijs na grontapu (Lukas 23:43; Yohanes 3:16; 17:3). A no de fu taki dati yu ben sa wani taki den krosibei famiriman fu yu, den lobiwan fu yu, nanga den bun mati fu yu, de drape tu so taki densrefi kan kisi a srefi prisiri di yu howpu fu kisi na ini a nyun regtfardiki grontapu di Gado pramisi.—2 Petrus 3:13.

Ma fa a de efu den mati nanga den lobiwan fu yu no wani libi fu têgo na ini wan paradijs na grontapu? No lasi-ati fu a sani dati ede. Go doro fu teki soifri sabi fu Bijbel, èn handri akruderi a sabi dati. Na apostel Paulus ben skrifi: „Frow, yu no man sabi efu yu o man meki yu masra kon na bribi. Man, yu no man sabi tu efu yu o man meki yu frow kon na bribi” (1 Korentesma 7:16, Nyun Testamenti). Sma kan kenki a fasi fu den. Fu eksempre, wan man di no ben lobi a Kresten bribi kwetikweti ben kenki èn bakaten a ben tron wan owruman na ini a Kresten gemeente. A e taki: „Mi de nanga tangi trutru taki a lobi famiri fu mi ben tan hori densrefi getrow na den Bijbel gronprakseri, aladi mi ben e gens den srefisrefi.”

Gado e broko en ede trutru nanga a libi fu yu èn nanga a libi fu den lobiwan fu yu. Fu tru, „Yehovah . . . no wani taki wan sma e kisi pori, ma a wani taki ala sma musu abi berow” (2 Petrus 3:9). Yehovah Gado wani taki yu nanga den lobiwan fu yu libi fu têgo. A lobi di a abi de moro bigi leki a lobi di onvolmaakti libisma abi (Yesaya 49:15). Sobun, fu san ede yu no e meki muiti fu abi wan bun banti nanga Gado? Efu yu e du dati, dan yu sa man yepi den lobiwan fu yu fu du a srefi sani tu. Srefi efu den no abi a howpu now fu libi fu têgo, toku a kan taki den e kenki a fasi fa den e tyari densrefi te den e si taki yu e handri akruderi a soifri sabi fu Bijbel.

Ma fa a de nanga den lobiwan di yu lasi na ini dede kande? Bijbel abi wan tumusi moi howpu gi den milyunmilyun sma di dede, namku taki den sa opo baka na dede èn libi na ini Paradijs na grontapu. Yesus Krestes ben pramisi: „A yuru e kon pe ala sma di de na ini den memregrebi, . . . sa kon na doro” (Yohanes 5:28, 29). Srefi den sma di dede sondro fu sabi Gado sa kon na libi baka, bika Bijbel e taki: „Wan opobaka o de fu den regtfardikiwan nanga den onregtfardikiwan” (Tori fu den Apostel 24:15). A sa de wan prisiri sani trutru fu gi wan switikon na den sma disi di kon na libi baka!

A de wan tumusi moi howpu fu libi fu têgo

Efu yu man abi prisiri èn de koloku now awinsi a grontapu disi lai nanga furu problema, dan a no de fu taki dati yu sa prisiri fu libi fu têgo na ini wan paradijs na grontapu. Ma di wan Yehovah Kotoigi ben sori wan uma den winimarki di sma sa abi te den e libi fu têgo, dan na uma ben taki: „Mi no wani libi fu têgo. Efu mi libi 70 noso 80 yari, dan dati nofo gi mi.” Wan Kresten owruman di ben de drape sosrefi ben aksi na uma: „Oiti yu prakseri fa den pikin fu yu sa firi efu yu dede?” Na uma bigin krei di a prakseri fa den pikin fu en o sari te a mama fu den ben sa dede. Na uma ben taki:  „Now fosi mi kon frustan taki mi e denki misrefi nomo, èn mi kon si taki têgo libi a no wan howpu di e sori taki wan sma e prakseri ensrefi nomo, ma a abi fu du nanga a banti di wi abi nanga trawan.”

Son sma e feni kande taki nowan sma no e broko en ede nanga den, èn fu dati ede den no abi trobi efu den de na libi noso efu den dede. Ma toku a Sma di e gi wi libi e broko en ede nanga wi, fu di a e taki: „Fu tru mi e taigi unu, . . . mi no e prisiri te na ogriwan e dede, ma mi e prisiri te wan ogri sma e kenki a libi fu en èn te a tan na libi trutru” (Esekièl 33:11). Fu di Gado e broko en ede so furu nanga a libi fu na ogriwan srefi, dan a no de fu taki dati a e broko en ede trutru nanga den wan di lobi en.

Kownu David fu owruten Israel ben sabi seiker taki Yehovah ben o sorgu en na wan lobi-ati fasi. David ben taki wan leisi: „Efu mi eigi papa nanga mi eigi mama ben o gowe libi mi, dan Yehovah srefi ben sa teki mi” (Psalm 27:10). Soleki fa a sori, dan David ben sabi taki en papa nanga mama lobi en. Ma srefi efu en papa nanga mama, den sma nanga suma a ben abi a moro krosibei banti, ben o gowe libi en, toku a ben sabi taki Gado no ben o libi en. Fu di Yehovah lobi wi èn e broko en ede nanga wi, meki a wani gi wi têgo libi èn a wani taki wi musu abi wan matifasi nanga en di noiti no sa pori (Yakobus 2:23). A no de so taki wi musu de nanga tangi te wi e teki den tumusi moi presenti disi?

[Prenki na tapu bladzijde 7]

Te wi lobi Gado èn te wi lobi tra sma, dan têgo libi sa de wan warti sani gi wi