Fa yu kan kon sabi san bun èn san ogri?

SUMA abi a reti fu poti markitiki di e sori wi san bun èn san ogri? Na aksi disi ben opo kon sensi a bigin fu a historia fu libisma. Soleki fa a Bijbel buku Genesis e sori, dan Gado ben poti wan bon na ini a dyari fu Eden, èn a ben kari en „a bon fu sabi bun nanga ogri” (Genesis 2:9). Gado ben komanderi a fosi man nanga uma fu no nyan fu den froktu fu a bon disi. Ma a feanti fu Gado, Satan Didibri, ben taki dati, efu den ben o nyan fu a bon disi, den ai ben o „kon opo trutru” èn den ben o ’de leki Gado, fu di den ben o sabi bun nanga ogri’.—Genesis 2:16, 17; 3:1, 5; Openbaring 12:9.

Sortu bosroiti Adam nanga Eva ben musu teki? Den ben musu teki den markitiki di Gado poti di e sori san bun èn san ogri, noso den ben musu handri akruderi den eigi markitiki? (Genesis 3:6) Adam nanga Eva ben bosroiti fu trangayesi Gado èn  den nyan fu a bon. San a pikin sani dati di den ben du, ben wani taki? Fu di den no ben wani lespeki den wet di Gado poti gi den, meki na so wan fasi den sori taki den, nanga den bakapikin fu den, ben o libi moro bun te densrefi ben o bosroiti san bun èn san ogri. A de so taki libisma kisi bun bakapisi di den pruberi fu de leki Gado fu di den poti den eigi markitiki?

Difrenti fasi fa sma e prakseri

Te na Encyclopædia Britannica e taki fu den leri fu prenspari sabiman na ini den hondrohondro yari di pasa, dan a e sori tu taki fu a ten fu a Griki filosofiaman Sokrates, te na a di fu 20 yarihondro, „ibri tron baka sma ben e haritaki fu kon sabi san bun trutru èn fu kon sabi sortu markitiki e sori krin san bun èn san ogri”.

Fu eksempre, na ini a di fu feifi yarihondro b.G.T., yu ben abi wan prenspari grupu fu Griki leriman. Den ben leri sma taki, efu den ben wani fu kon sabi den markitiki fu san bun èn san ogri dan den ben musu luku san furu sma na ini a libimakandra ben e denki. Wan fu den leriman ben taki: „Wan sani kan bun gi wan foto, solanga den sma na ini a foto dati, feni taki a sani bun.” Efu dati ben o de a markitiki, dan Jodie di wi kari na ini a fosi artikel, musu hori a moni gi ensrefi, fu di furu sma na ini a libimakandra fu en, noso a „foto” fu en, ben o du dati.

Immanuel Kant, wan barinen filosofiaman fu a di fu 18 yarihondro, ben denki tra fasi fu a tori. Wan tijdschrift taki: „Immanuel Kant nanga tra sma di abi a srefi denki leki en . . . ben poti krakti tapu a reti di ibriwan sma abi fu bosroiti gi ensrefi” (Issues in Ethics). Soleki fa a filosofia fu Kant e sori, solanga Jodie no e pasa den reti fu trawan, dan a kan du san a wani. A no musu du wan sani soso fu di furu sma ben o du dati.

We, dan fa Jodie lusu a problema fu en? Jodie bosroiti fu lusu a problema na wan heri tra fasi. A ben e handri akruderi den leri fu Yesus Krestes di ben poti markitiki di Kresten èn sosrefi sma di no de Kresten, e lespeki srefisrefi. Yesus ben leri sma: „Fu dati ede, ala sani di unu wani meki sma du gi unu, na dati unu musu du gi den” (Mateyus 7:12). Na uma skreki srefisrefi di Jodie gi en den 82.000 Amerkan dala. Di na uma ben aksi Jodie fu san ede a no ben teki a moni, dan Jodie ben fruteri dati en na wan Kotoigi fu Yehovah èn a taki: „A moni no ben de fu mi.” Gi Jodie a ben de tumusi prenspari fu gi yesi na den wortu di skrifi na ini Mateyus 19:18: „Yu no musu fufuru.”

A de so taki wan sani bun fu di furu sma e denki so?

Kande son sma ben o taki dati Jodie du wan don sani fu di a handri na so wan fasi. Ma wi no kan frutrow tapu san furu sma e denki. Fu eksempre, na ini son libimakandra na ini a ten di pasa, furu sma ben e bribi taki a ben bun fu tyari pikin leki srakti-ofrandi. Efu yu ben libi na ini so wan libimakandra, dan yu ben o feni en wan bun sani tu? (2 Kownu 16:3) Fa a ben o de efu yu ben gebore na ini wan libimakandra pe sma ben e feni en wan bun sani fu nyan a meti fu libisma? Dati ben o wani taki dan, dati  a no ben fowtu fu nyan a meti fu libisma? A no fu di furu sma e du wan sani, meki a sani dati bun tu. Langa ten pasa, Bijbel ben warskow gi a trapu disi, di a taki: „Yu no musu waka baka a bigi ipi sma fu du ogri.”—Exodus 23:2.

Yesus Krestes ben sori ete wan sani fu san ede wi musu luku bun taki wi no e go prakseri taki wan sani bun, soso fu di furu sma e denki taki a bun. A ben tyari kon na krin taki Satan na „a tiriman fu grontapu” (Yohanes 14:30; Lukas 4:6). Satan e gebroiki a posisi fu en fu kori „sma na heri grontapu” (Openbaring 12:9). Fu dati ede, efu yu e denki neleki fa furu sma e denki fu san bun èn san ogri, dan a kan taki yu e teki a denki fu Satan abra, èn a no de fu taki dati a sa abi takru bakapisi gi yu.

Yu kan frutrow tapu yu eigi denki?

A de so dan, taki ibri sma musu bosroiti gi ensrefi san bun èn san ogri? Bijbel e taki: „No frutrow tapu yu eigi frustan” (Odo 3:5). Fu san ede wi no musu du dati? Fu di ala libisma gebore na ini sondu èn dati e meki taki den no e krutu sani na wan yoisti fasi. Di Adam nanga Eva ben opo densrefi teige Gado, dan den teki den markitiki abra fu Satan di ben prakseri ensrefi nomo èn di ben drai en baka gi Gado. Den teki Satan leki den yeye tata. Fu dati ede den meki taki ala den bakapikin fu den kisi wan ati di e kori den èn aladi na ati man si san bun, toku a e pusu den tu fu du san ogri.—Genesis 6:5; Romesma 5:12; 7:21-24.

Te na Encyclopædia Britannica e taki fu markitiki fu san bun èn san ogri, dan a e taki: „A no e fruwondru wi te sma sabi san bun fu du, ma na presi fu dati den e du sani di e sori taki den e suku den eigi bun. Gi den sabiman fu den Westsei kondre, a de wan bigi problema fu sori den sortu sma disi fu san ede den musu du san bun.” Bijbel e taki en moi: „Na ati e kori sma moro leki iniwan tra sani èn a pori srefisrefi. Suma kan sabi en?” (Yeremia 17:9) Yu ben o frutrow wan sma te yu sabi taki a e kori trawan?

A tru taki srefi den sma di no e bribi na ini Gado man tyari densrefi na wan fasi di fiti, èn den kan hori densrefi tu na bun markitiki. Ma furu tron den markitiki na san den sma disi e hori densrefi de fu feni na ini Bijbel tu. Aladi den sortu sma disi no e bribi na ini Gado, toku a fasi fa den e denki e sori taki den man sori den fasi di Gado abi. Disi e buweisi taki na a bigin libisma ben meki „akruderi a prenki fu Gado”, soleki fa Bijbel e sori (Genesis 1:27; Tori fu den Apostel 17:26-28). Na apostel Paulus taki: „Den na yoisti den sma di e sori taki san de na ini a wet, skrifi na ini den ati.”—Romesma 2:15.

A no de fu taki dati wan sma kan sabi fa fu du bun, ma a de wan tra sani fu abi a krakti tu fu du san bun. Fa wan sma kan kon kisi a krakti di a abi fanowdu fu du san bun? Na a ati e pusu wan sma fu handri. Fu dati ede, te wan sma e kon kisi lobi gi a Skrifiman fu Bijbel, Yehovah Gado, dan dati kan yepi a sma fu kon kisi a krakti dati.—Psalm 25:4, 5.

Fa fu kisi a krakti fu du san bun

A fosi sani di wan sma musu du fu kon kisi lobi gi Gado na taki a musu kon frustan taki den komando fu En no hebi èn taki den bun. „Disi na san a lobi fu Gado wani taki”, na so na apostel Yohanes taki, „dati wi e du san den komando fu en e taki; ma toku den wet fu en no de wan hebi” (1 Yohanes 5:3). Fu eksempre, Bijbel e gi bun rai di kan yepi yonguwan fu si krin san bun èn san ogri, spesrutu te den musu bosroiti efu den musu dringi sopi, gebroiki drugs, noso efu den musu abi seks fosi den trow. Bijbel kan yepi trowpaar fu sabi fa fu lusu problema, èn a kan gi papa nanga mama rai di sa yepi  den fu kweki den pikin fu den. * Te yongusma nanga owrusma e fiti den markitiki fu Bijbel na ini den libi, dan den e kisi wini fu dati, awinsi den gudu noso pôti, awinsi omeni skoroleri den kisi, noso awinsi sortu ras den de.

Neleki fa gosontu nyanyan e gi yu krakti fu wroko, na so yu e kisi krakti tu fu libi akruderi den markitiki fu Gado te yu e leisi a Wortu fu en. Yesus ben agersi den wortu fu Gado nanga brede di e hori sma na libi (Mateyus 4:4). A ben taki tu: „Mi nyanyan de, fu mi du a wani fu en di ben seni mi kon” (Yohanes 4:34). Fu di Yesus ben teki Gado Wortu leki nyanyan, meki a ben abi a krakti fu kakafutu gi tesi èn a ben man teki bun bosroiti.—Lukas 4:1-13.

Na ini a bigin, a kan taki yu no feni en makriki fu teki Gado Wortu leki nyanyan èn fu fiti den markitiki fu en na ini yu libi. Ma memre taki di yu ben yongu, kande yu no ben lobi nyanyan di ben bun gi yu. Efu yu ben wani kon tranga, dan yu ben musu leri fu lobi den sortu gosontu nyanyan disi. Na a srefi fasi, a kan teki ten bifo yu kon lobi den markitiki fu Gado. Efu yu horidoro, dan yu sa kon lobi den èn yu sa kon tranga na yeyefasi (Psalm 34:8; 2 Timoteyus 3:15-17). Yu sa leri fu frutrow tapu Yehovah èn dati sa pusu yu fu „du bun”.—Psalm 37:3.

A kan taki noiti yu sa kon na ini a srefi situwâsi leki di fu Jodie. Ma toku, ibri dei yu e miti situwâsi pe yu musu bosroiti efu yu sa du san bun, noso san ogri. Yu musu teki bosroiti na ini prenspari tori, èn sosrefi na ini tori di no prenspari so. Fu dati ede Bijbel e gi wi a deki-ati: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala san yu e du, èn ensrefi sa meki yu pasi kon reti” (Odo 3:5, 6). Te yu e leri fu frutrow tapu Yehovah, dan yu sa kisi wini now èn yu sa abi na okasi tu fu libi fu têgo, bika den wan di e gi yesi na Yehovah Gado, sa kisi libi te fu kaba.—Mateyus 7:13, 14.

[Futuwortu]

[Prenspari pisi na tapu bladzijde 6]

A kan taki yeye libisani abi krakti tapu a fasi fa furu sma na grontapu e denki fu wan tori

[Prenki na tapu bladzijde 5]

Na ini a heri historia, sabiman haritaki fu san bun èn san ogri

SOKRATES

KANT

CONFUCIUS

[Sma di abi a reti fu den prenki]

Kant: Fu a buku The Historian’s History of the World; Sokrates: Fu a buku A General History for Colleges and High Schools; Confucius: Sung Kyun Kwan University, Seoul, Korea

[Prenki na tapu bladzijde 7]

Bijbel no e yepi wi wawan fu kon sabi san bun èn san ogri, ma a e pusu wi tu fu du san bun