Ondrofenitori

Mi e frutrow taki Yehovah sa sorgu mi na wan lobi-ati fasi

SOLEKI FA ANNA DENZ TURPIN FRUTERI

„Ala leisi yu e poti na aksi: ’Fu san ede?’”, na so mi mama ben taki aladi a ben e lafu. Di mi ben de wan pikin meisje, dan ala leisi mi ben e poti aksi gi mi papa nanga mama. Mi ben wani kon sabi furu sani, ma noiti mi mama nanga mi papa ben atibron te mi ben e poti aksi gi den. Na presi fu dati, den ben leri mi fu prakseri bun fu wan tori èn fu teki mi eigi bosroiti akruderi a konsensi fu mi di kisi leri fu Bijbel. A leri dati ben o de wan tumusi warti sani gi mi bakaten! Wan dei, di mi ben abi 14 yari, den Nazi grabu mi lobi papa nanga mama, èn mi no si den noiti moro.

MI PAPA, Oskar Denz, nanga mi mama, Anna Maria, ben libi na ini a Doisri foto Lörrach di de krosibei na a lanki fu Switserland. Di den ben yongu, den ben de fayafaya na ini politiek èn sma na ini a libimakandra ben sabi den èn ben e lespeki den. Ma na ini 1922, syatu baka di den trow, dan mi papa nanga mama kon abi wan tra prakseri fu politiek afersi èn den kon abi tra marki na ini den libi. Mi mama bigin studeri Bijbel nanga den Bijbel Ondrosukuman, soleki fa sma ben kari Yehovah Kotoigi na ini a ten dati, èn a ben breiti fu leri taki a Kownukondre fu Gado sa tyari vrede kon na grontapu. Syatu baka dati mi papa bigin studeri Bijbel sosrefi, èn den bigin go na den konmakandra fu den Bijbel Ondrosukuman. Tapu Kresneti fu a yari dati, mi papa gi mi mama wan bijbelstudie buku di nen De Harp Gods. Tapu 25 maart 1923 mi gebore èn mi ben de a wan-enkri pikin na ini wi osofamiri.

Mi man memre den prisiri sani ete di wi ben du na ini na osofamiri fu wi, soleki te wi ben go koiri na ini a Zwarte Woud na ini a waran pisi ten fu a yari, èn te mi  mama ben e leri mi fa fu du sani na ini na oso. A de leki mi man si en tanapu na mi fesi ete na ini a kukru, e leri mi fa fu bori. Ma san de moro prenspari, na taki mi papa nanga mama leri mi fu lobi Yehovah Gado èn fu frutrow en tu.

A gemeente fu wi ben abi sowan 40 fayafaya Kownukondre preikiman. Mi papa nanga mama ben sabi heri bun fa fu suku okasi fu taki fu a Kownukondre nanga trawan. Fu di fosi den ben gwenti fu du sani na ini a libimakandra, meki den no ben syen fu taki nanga trawan èn sma ben lobi fu arki den sosrefi. Di mi ben abi seibi yari, mi ben wani preiki oso fu oso tu. Na a fosi dei di mi go preiki, mi kisi wan tu buku fu a sma di ben wroko nanga mi. A sma sori go na wan oso, èn a taigi mi nomo: „Go drape èn luku efu den sma wani den buku disi.” Na ini 1931, wi ben go na wan kongres fu den Bijbel Ondrosukuman na ini Basel, Switserland. Na a kongres dati mi papa nanga mama teki dopu.

Fosi bigi bruya ben de èn baka dati den kwinsi wi

Na a pisi ten dati, Doisrikondre ben de na ini bigi bruya, èn difrenti politiek grupu ben e feti nanga makandra na tapu strati. Wan neti mi ben wiki fu di sma ben e bari na a oso na wi sei. Tu tini boi ben kiri a brada fu den nanga wan forku di sma e gebroiki fu teki drei grasi, fu di den no ben agri nanga a fasi fa a brada fu den ben denki fu politiek. Na ala sei moro nanga moro sma ben kon kisi bita-ati gi den Dyu. Na skoro wan meisje ben abi fu tanapu en wawan na ini wan uku, soso fu di a ben de wan Dyu. Mi ben firi sari gi en, ma mi no ben sabi taki heri esi sma no ben o bemui moro nanga mi tu.

Tapu 30 yanuari 1933, Adolf Hitler ben tron a fosi-minister fu Doisrikondre. Wi ben e luku go na a lantikantoro, di ben de tu uku moro fara, èn wi ben si fa den Nazi ben abi bigi prisiri di den opo a fraga di abi a marki fu den na tapu. Na skoro, a leriman fu wi ben de fayafaya fu leri wi fu taki na odi: „Heil Hitler!” Na a bakadina dati mi taigi mi papa san ben pasa. Disi ben gi en broko-ede. „A sani disi no bun,” a ben taki. „’Heil’ wani taki frulusu. Efu wi ben o taki ’Heil Hitler’, dan a ben o wani taki dati na Hilter o frulusu wi, na presi fu Yehovah. Mi no denki taki a sani disi fiti, ma yu musu bosroiti gi yusrefi san yu o du.”

Den skoromati fu mi no ben wani bemui moro nanga mi, fu di mi ben bosroiti fu no taki ’Heil Hitler’. Wan tu boi ben fon mi srefi te den skoromisi nanga skoromeester no ben e luku. Te fu kaba, den no ben fruferi mi moro. Ma srefi den mati fu mi ben taigi mi taki den papa no ben wani den fu prei nanga mi kwetikweti, fu di mi ben ogri srefisrefi.

Tu mun baka di den Nazi teki a makti abra na ini Doisrikondre, den ben tapu a wroko fu Yehovah  Kotoigi fu di den ben si den leki wan kefar gi a kondre. Den ogri-ati legre fu den Nazi tapu a bijkantoro na ini Maagdenburg èn den ben tapu wi fu hori konmakandra. Ma fu di wi ben libi krosibei na a lanki fu Switserland, meki mi papa ben man kisi primisi fu abra go na Basel, pe wi ben go na den konmakandra tapu sonde. Furu tron a ben taki dati a ben winsi taki den brada fu wi na ini Doisrikondre ben man kisi a sortu yeye nyanyan disi di ben o yepi den fu abi deki-ati na ini a ten di ben o kon.

Den waka di wi ben teki ben kan de wan kefar gi wi

Di den tapu a bijkantoro na ini Maagdenburg, dan Julius Riffel, di ben e wroko na a bijkantoro, ben kon na Lörrach, a foto pe a ben e libi di a ben de wan pikin ete. A ben kon drape fu seti sani so taki wi ben kan du a preikiwroko na wan kibrifasi. Wantewante mi papa ben de klariklari fu yepi. A ben meki mi nanga mi mama sidon èn a taigi wi taki a ben agri fu yepi tyari Bijbel publikâsi fu Switserland kon na ini Doisrikondre. A ben taki dati a sani disi o meki en kon de na ini bigi kefar èn taki skowtu ben o man sroto en na iniwan momenti. A no ben wani wi fu denki taki wi musu du a srefi sani leki en, bika a sani disi ben o meki wi kon de na ini bigi kefar tu. Wantewante mi mama ben taki: „Mi de nanga yu.” Den alatu drai luku mi, èn mi ben taki: „Mi de nanga unu tu!”

Mi mama ben meki wan tas di ben bigi leki wan Waktitoren. A ben e poti publikâsi na a wan sei fu a tas èn baka dati a ben nai a pisi dati tapu. A ben meki saka di nowan sma ben kan si, na ini den krosi fu mi papa so taki a ben kan kibri sani na ini. A ben meki tu berebanti di umasma e weri na ondro den krosi, èn na wan koni fasi mi nanga en ben kibri pikin buku fu studeri Bijbel na ini den berebanti dati. Ibri leisi te wi ben tyari den gudu disi kon na wi oso na wan kibrifasi, dan wi ben breiti taki sani waka bun èn wi ben gi Yehovah tangi. Wi ben kibri den publikâsi na a tapu sodro fu wi.

Na a bigin, den Nazi no ben sabi srefisrefi san wi ben e du. Den no ben poti aksi gi wi èn den no ben kon luku san wi abi na ini wi oso. Ma toku, wi ben bosroiti taki efu wan problema ben kon, wi ben o gebroiki wan sani fu warskow den yeye brada nanga sisa fu wi. Sobun, te wi ben musu warskow den, dan wi ben o gebroiki a nomru 4711, dati na a nen fu wan pôpi switi smeri. Efu a ben de so taki den brada ben kan kon na ini kefar te den ben o kon na wi oso, dan wi ben o warskow den fu di wi o gebroiki a nomru dati na a wan, noso tra fasi. Mi papa ben taigi den tu fu luku go na tapusei na a fensre fu wi foroisi, bifo den kon na ini na oso pe wi ben libi. Efu a fensre na a kruktu-anusei ben opo, dan a ben o wani taki dati wan problema de èn taki den brada no musu kon na inisei.

Na ini 1936 nanga 1937, a Gestapo ben hori bun furu sma. Den ben sroto dusundusun Kotoigi na ini strafu-oso èn den ben poti den na ini strafuman kampu tu, pe den Kotoigi ben pina na wan tumusi ogri-ati fasi. A bijkantoro na ini Bern, Switserland, ben kisi brifi di ben sori san ben pasa nanga den brada nanga sisa; sma ben tyari wan tu fu den brifi disi na wan kibrifasi komoto fu den kampu. Den brada ben tyari ala den brifi disi kon na wán èn bakaten den poti den na ini wan buku di nen Kreuzzug gegen das Christentum (A feti di sma e feti teige den wan fu a Kresten bribi). A buku disi ben tyari kon na krin sortu ogri den Nazi ben du. Wi  ben teki a wroko na wi tapu fu tyari den brifi disi na wan kibrifasi go na ini Basel. A wroko disi ben kan meki wi kon de na ini bigi problema. Efu den Nazi ben kisi wi nanga den brifi disi di ben tyari kon na krin sortu ogri den ben du, dan den ben o sroto wi wantewante. Mi ben krei te mi ben e leisi fa den brada fu wi ben pina na wan ogri-ati fasi. Ma toku mi no ben e frede. Mi ben abi a frutrow taki Yehovah, mi papa, nanga mi mama, di ben de den moro bun mati fu mi, ben o sorgu mi.

Mi ben abi 14 yari di mi kaba nanga skoro èn mi ben go wroko na wan wenkri pe den e seri ososani. Furu tron wi ben tyari den publikâsi noso tra sani go na Switserland tapu satra bakadina noso sonde, bika mi papa no ben abi fu wroko na den dei dati. Kon meki wi taki dati wi ben go ibri tu wiki. Sma ben kan denki taki wi ben de leki ibriwan tra osofamiri di e go koiri na a kaba fu a wiki, èn pikinmoro fo yari langa den skowtu di ben de na a lanki fu a foto no ben hori wi, noso den no ben luku san wi ben abi na wi. A sani disi ben go doro teleki wan dei na ini februari 1938.

Den kisi wi!

Noiti mi sa frigiti fa mi papa ben luku di wi ben doro na a presi pe wi ben musu teki den publikâsi krosibei fu Basel èn di wi ben si taki wi musu tyari furu publikâsi. Fu di den skowtu ben kisi wan tra famiri di ben tyari publikâsi sosrefi, meki wi ben musu tyari moro buku a leisi disi. Na a lanki pe wi ben musu abra, a skowtu drape no ben frutrow wi èn fu dati ede a seni den man fu luku san wi ben abi na wi. Di den feni den buku, a skowtu hori gon gi wi èn a taigi wi fu waka go na a skowtu wagi di ben de drape. Di den skowtu rei gowe nanga wi, mi papa ben hori mi anu steifi èn a taki nanga wan safri sten: „No tori trawan. No kari a nen fu nowan sma!” „Mi no sa du dati!”, na so mi ben gi en a dyaranti. Di wi doro baka na Lörrach, den teki mi lobi papa tyari gowe. Mi si en fu a lasti leisi di den sroto en na strafu-oso.

Fo yuru langa, fo Gestapo man poti furu aksi gi mi, èn den ben taigi mi fu taki fa den tra Kotoigi nen èn pe den ben e libi. Di mi no ben wani taigi den, dan wan fu den skowtu ben atibron èn a ben warskow mi taki: „Wi abi tra fasi fu meki yu taki!” Mi no taigi den nowan sani. Baka dati den tyari mi nanga mi mama go baka na a oso fu wi, èn fu a fosi leisi den luku efu den ben man feni buku noso tra sani na ini wi oso. Den ben teki mi mama fu go sroto èn den seni mi go na a oso fu mi tanta di ben musu luku mi now. Ma den no ben sabi taki mi tanta ben de wan Kotoigi tu. Aladi den ben gi mi pasi fu go wroko, toku fo Gestapo man ben de na ini wan oto na fesisei fu na oso èn den ben e luku ibri sani di mi ben du. Wan tra skowtu ben e waka go-kon na sei pasi.

Baka wan tu dei, na brekten yuru, mi ben waka komopo na ini na oso èn mi ben si wan yongu sisa e rei tapu en baisigri kon miti mi. Di a ben kon moro krosibei, mi ben kan si taki a ben o trowe wan pisi papira gi mi. Leti na a momenti di mi fanga a pisi papira, mi drai luku fu si efu den Gestapo man ben si san mi du. Mi ben fruwondru fu si taki leti na a momenti dati, den ben lafu so te taki den ben anga den ede go na baka!

Na tapu a pikin pisi papira fu a sisa, a ben skrifi taki mi ben musu go na a oso fu en papa nanga mama na wan pisi ten fu 12 yuru bakadina. Ma den Gestapo man ben e luku mi. San mi ben o du fu no meki a papa nanga mama fu a sisa disi kon na ini kefar? Mi luku den fo Gestapo man na ini na oto èn baka dati mi luku a skowtu di ben e waka go-kon na sei pasi. Mi no ben sabi san fu du, èn mi ben begi fayafaya fu Yehovah yepi mi. Ne wantronso, a skowtu waka go na a oto fu den Gestapo man èn a ben taki nanga den man. Baka dati, a go na ini na oto fu den, èn den rei gowe!

Leti na a momenti dati, mi tanta beni na uku kon. Twarfu yuru brekten ben pasa kaba. A ben leisi a pikin brifi èn a ben feni taki wi musu go na a oso soleki fa a skrifi na ini a brifi, fu di a ben denki taki den brada ben seti sani fu tyari mi go na Switserland. Di wi doro drape, a famiri meki mi miti wan man di mi no ben sabi; en nen ben de Heinrich Reiff. A ben taigi mi taki a ben breiti taki nowan sani pasa nanga mi èn taki a ben kon fu yepi mi lowe go na Switserland. Baka wan afu yuru mi ben musu miti en na ini wan busi.

A libi fu mi na a presi pe mi ben lowe go

Di mi miti Brada Reiff mi ben e krei srefisrefi, fu di mi ati ben broko taki mi abi fu libi mi papa nanga mama na baka. Ala sani ben pasa syatu baka makandra. Wan tu sani ben pasa di meki taki wi ati ben de na dyompo, ma baka dati wi ben moksi  nanga wan grupu sma di ben e go koiri, èn na so wi ben abra a lanki go na Switserland sondro taki wan sani pasa nanga wi.

Di mi doro na a bijkantoro na ini Bern, mi kon yere taki den brada drape ben seti sani so taki mi ben kan lowe. Nanga switifasi den gi mi wan presi fu tan. Mi ben wroko na ini a kukru èn mi ben lobi fu wroko drape trutru. Ma a ben hebi gi mi fu libi drape na a presi pe mi lowe go, fu di mi no ben sabi san ben o pasa nanga mi papa nanga mama. Den alatu ben kisi tu yari strafu! Son leisi, mi ben sari srefisrefi èn mi ben broko mi ede so te, taki mi ben go na ini a wasi-oso fu krei langalanga watra-ai. Ma mi ben man skrifi brifi doronomo gi mi papa nanga mama èn densrefi ben e skrifi mi tu. Den gi mi deki-ati fu tan loyaal.

A bribi di mi papa nanga mama ben abi, naki mi ati trutru. Fu dati ede meki mi gi mi libi abra na Yehovah èn mi teki dopu tapu 25 yuli 1938. Baka di mi wroko wán yari na Bethel, mi go wroko na Chanélaz, wan gron di a bijkantoro fu Switserland ben bai fu prani nyanyan gi a Bethelfamiri. Den ben gebroiki a presi drape tu leki tanpe gi den brada di lowe gi frufolgu.

Di a strafu fu mi papa nanga mama ben kon na wan kaba na ini 1940, den Nazi ben wani fu lusu den soso te den ben o taki dati den no de na ini a bribi moro. Den tan hori densrefi na a bosroiti fu no du dati, èn fu dati ede meki den seni den go na strafuman kampu. Den seni mi papa go na Dachau èn mi mama na Ravensbrück. Na a kowru pisi ten fu a yari 1941, mi mama nanga tra sisa di ben de na ini a kampu, ben weigri fu du wroko gi den srudati. Fu dati ede den kisi a strafu fu tanapu na ini a kowru, dri dei nanga dri neti langa. Baka dati, den sroto den na ini dungru strafuman-kamra èn 40 dei langa den gi den pikinso nyanyan nomo. Ne den fon den sisa. Mi mama dede tapu 31 yanuari 1942, dri wiki baka di den fon en na wan ogri-ati fasi.

Den seni mi papa fu Dachau go na Mauthausen, na ini Oostenrijk. Na ini a kampu disi den Nazi ben abi wan spesrutu fasi fa den ben kiri den strafuman, fu di den ben gi den strafuman pikinso nyanyan nomo èn fu di den meki den du bun hebi wroko. Siksi mun baka di mi mama dede, den Nazi kiri mi papa, ma den du dati na wan tra fasi. Fu espresi den datra na ini a kampu ben gi wan lo strafuman a siki tuberculose. Baka dati, den datra gi den strafuman wan spoiti na ini den ati fu kiri den. Di den ben taki fa a du kon taki mi papa dede, dan den skrifi na ini wan raportu taki a dede fu di „en ati ben swaki”. A ben abi 43 yari. Baka wan tu mun fosi mi kon yere fa den ben kiri mi papa nanga mama na so wan ogri-ati fasi. Te now ete mi e krei te mi e prakseri mi lobi papa nanga mama. Ma toku, na ini a ten dati èn sosrefi now, mi e kisi trowstu fu di mi sabi taki mi mama nanga papa, di ben abi a howpu fu libi na ini hemel, de na ini Yehovah anu pe nowan sani kan pasa nanga den.

Baka a di fu Tu Grontapufeti, mi kisi a grani fu go na a di fu erfu klas fu a Waktitoren Bijbelskoro Gilead na New York. A ben de wan trutru prisiri sani fu poti ala mi prakseri na a studeri fu Bijbel, feifi mun langa! Di mi kaba nanga a skoro na ini 1948, den seni mi go na Switserland fu dini leki wan zendeling. Syatu baka dati, mi miti James L. Turpin, wan getrow brada di ben go na a di fu  feifi klas fu Gilead. Di a fosi bijkantoro ben seti na ini Torkukondre, a ben dini leki opziener drape. Syatu baka di wi trow na ini maart 1951, mi ben de nanga bere; sobun, wi ben o tron papa nanga mama! Wi froisi go na Amerkankondre èn drape na umapikin fu wi, Marlene, gebore na ini december.

Mi nanga Jim kisi bigi prisiri na ini a Kownukondre diniwroko fu wi di wi du furu yari langa. Nanga prisiri mi man memre wan bijbelstudenti, wan yongu Sneisi uma di nen Penny èn di ben lobi fu studeri Bijbel. A ben teki dopu, èn bakaten a trow nanga Guy Pierce, di de wan memre now fu a Tiri Skin fu Yehovah Kotoigi. Den sma disi di mi lobi meki taki mi no ben sari so furu moro baka di mi lasi mi papa nanga mama na ini dede.

Na a bigin fu a yari 2004, den brada na ini Lörrach, a foto pe mi mama nanga papa ben libi, bow wan nyun Kownukondre zaal na Stichstrati. Fu di sma ben warderi san Yehovah Kotoigi ben du, meki den heiheiman fu a foto bosroiti fu kenki a nen fu a strati kon tron Denzstraße (Denzstrati) fu gi grani na mi papa nanga mama. A koranti fu a presi drape, Badische Zeitung, ben skrifi wan artikel di nen: „Wi e memre a trowpaar Denz di sma ben kiri: Wan nyun nen gi a strati.” Na ini na artikel disi den ben skrifi taki „sma ben kiri mi papa nanga mama fu a bribi fu den ede na ini wan strafuman kampu na a ten fu a tirimakti fu Hitler di ben nen a Derde Rijk”. Mi no ben fruwakti taki den heiheiman fu a presi drape ben o du so wan sani, ma a e meki mi firi prisiri fu si fa a situwâsi drape kon kenki.

Mi papa ben gwenti fu taki dati wi musu seti sani na fesi neleki Armagedon no sa kon na ini a pisi ten pe wi e libi, ma taki wi musu tyari wisrefi neleki Armagedon o kon tamara. Disi na tumusi warti rai di mi pruberi fu fiti ala ten na ini mi libi. A no makriki ala ten fu wakti nanga pasensi tapu den sani di musu kon ete, spesrutu fu di mi kon owru now, èn dati e meki taki mi no man komoto na oso. Ma toku, noiti mi tweifri na a pramisi di Yehovah gi ala den getrow futuboi fu en, namku: „Frutrow tapu Yehovah nanga yu heri ati . . . Poti prakseri na en na ini ala san yu e du, èn ensrefi sa meki yu pasi kon reti.”—Odo 3:5, 6.

[Faki/​Prenki na tapu bladzijde 29]

WARTI WORTU FU FOSITEN

Wan uma fu wan dorpu di de pikinso moro fara fu Lörrach, ben go na a foto drape na ini den yari baka 1980. Na a pisi ten dati, den sma fu a foto ben e tyari sani di den no ben wani moro go na wan presi pe trawan ben kan kon luku, èn den ben kan teki san den ben wani. Na uma disi ben feni wan boksu pe sma e poti sani na ini di den ben gebroiki fu nai krosi, èn a ben tyari dati go na oso. Bakaten, a ben luku na ondrosei fu a boksu èn a feni wan tu fowtow fu wan yongu meisje èn sosrefi brifi di ben skrifi na tapu papira di sma ben e gebroiki na ini strafuman kampu. Fu di na uma ben leisi den brifi meki a ben wani sabi trutru suma ben de a pikin meisje nanga a brei wiwiri.

Wan dei na ini 2000, na uma ben si wan artikel na ini wan koranti di ben taki fu sani di ben pasa na ini a historia èn di sma ben kan go luku na ini Lörrach. Na artikel ben taki fu san ben pasa nanga Yehovah Kotoigi na a pisi ten di den Nazi ben tiri, èn a ben taki sosrefi fu a famiri fu wi. Den ben poti fowtow fu mi pe mi ben de wan tini ete. Di na uma si taki mi gersi a pikin meisje na tapu a fowtow, dan a ben taki nanga a nyunsuman di skrifi na artikel èn a taigi en fu den brifi di a ben abi. Ala nanga ala, a ben abi 42 brifi! Baka wan tu wiki, mi ben abi den brifi disi na ini mi anu. Mi papa nanga mama ben skrifi den brifi disi èn den ben aksi mi tanta ala ten fa a ben de nanga mi. Ala ten den ben tan broko den ede nanga mi. Mi e fruwondru taki noti no pasa nanga den brifi disi èn taki mi kon feni den baka moro leki 60 yari!

[Prenki na tapu bladzijde 25]

A koloku osofamiri fu wi kon prati na wan ogrifasi di Hitler kon na a makti

[Sma di abi a reti fu a prenki]

Hitler: U.S. Army photo

[Prenki na tapu bladzijde 26]

1. A bijkantoro na ini Maagdenburg

2. A Gestapo ben kisi dusundusun Kotoigi

[Prenki na tapu bladzijde 28]

Mi nanga Jim kisi bigi prisiri na ini a Kownukondre diniwroko fu wi