San wi musu leisi—A koni rai fu Salomo

„NOITI sma no e kaba fu meki furu buku, èn te wan sma e gi ensrefi tumusi furu na den, dan dati e weri a skin” (Preikiman 12:12). Di a koni Kownu Salomo fu Israel skrifi den wortu disi sowan 3000 yari pasa, dan a no ben wani broko sma saka fu no leisi buku. Na presi fu dati, a ben taki dati sma musu luku bun san den e leisi. Na ini a ten disi, a rai dati fiti srefisrefi, fu di ibri yari sma e tyari milyardmilyard buku kon na doro na heri grontapu!

A de krin fu si taki den „furu buku” fu san Salomo ben e taki, no ben e bow sma, noso gi sma krakti. Fu dati ede, a ben kon si taki te wan sma e leisi den tumusi furu, dan na presi fu kisi wini fu dati, a e „weri a skin” fu a sma.

Ma a de so taki Salomo ben taki dati nowan enkri buku de di abi bun rai na ini, di de fu frutrow èn di e tyari wini kon gi a leisiman? Nôno, bika a ben skrifi sosrefi: „Den wortu fu den konisma de leki srapu tiki di e pusu mankaw fu waka, èn den sma di e poti tumusi furu prakseri na a tyari kon na wán fu heri ipi odo, de leki spikri di naki go na ini wan sani; na wán herder gi den na wi” (Preikiman 12:11). Iya, son wortu di skrifi de „leki srapu tiki di e pusu mankaw fu waka”, èn den e gi wi deki-ati fu du bun. Den kan tranga wan sma fu waka a yoisti pasi. Boiti dati, ’neleki spikri di naki go na ini wan sani’, den wortu kan tranga den bosroiti di wan sma e teki, èn den kan meki taki a sma tanapu steifi.

Pe wi kan feni den sortu koni wortu dati? Soleki fa Salomo e taki, dan den moro prenspari koni wortu e komoto fu a wán herder, Yehovah (Psalm 23:1). Fu dati ede, a moro bun buku di wan sma kan leisi fu feni den koni wortu dati, na a buku di Gado meki sma skrifi, namku a Bijbel. Te wan sma e leisi den wortu disi doronomo, dan dati kan yepi en fu kon ’koni dorodoro, èn fu de srekasreka dorodoro gi ibri bun wroko’.—2 Timoteyus 3:16, 17.