Wan sani di libisma wawan kan du

Jodie abi wan wroko pe a e yepi sma fu luku o warti den gudu de di wan sma di dede gowe libi na baka, so taki den kan seri den sani disi. A e yepi wan uma di lasi en sisa na ini dede. A musu luku o warti den sani de di a sisa fu na uma abi na ini en oso, fu kan seri den bakaten. Di Jodie luku lontu na a presi pe sma e meki faya fu waran na oso, dan a feni wan tu dosu. Te a e luku na ini wán fu den dosu disi, dan a no man bribi san a e si. A dosu disi abi omeni papira moni fu 100 Amerkan dala na ini. Den domru na ini wan sortu brenki papira; ala nanga ala a ben de sowan 82.000 Amerkan dala! Jodie wawan de na ini a kamra. San a musu du? A musu teki a dosu na wan kibrifasi, noso a musu fruteri na uma taki a feni a moni?

A MUILEK bosroiti di Jodie ben musu teki, e sori go na wan sani di libisma man du èn di e meki taki wi e difrenti fu meti. Wan buku e taki: „Wan fu den spesrutu sani di libisma man du, na taki wi kan aksi wisrefi efu wan sani bun fu du, noso efu a no bun fu du” (The World Book Encyclopedia). Wan dagu di abi angri èn di e feni wan pisi meti na tapu wan tafra, no e aksi ensrefi efu a musu nyan a meti, noso efu a no musu nyan a meti. Ma Jodie man denki efu a bosroiti di a o teki, bun noso efu a no bun. Efu a hori a moni gi ensrefi, dan a e fufuru, ma a kan taki nowan sma o si san a du. A moni a no fu en, ma te yu luku en bun, dan na uma no sabi srefisrefi taki a moni de drape. Boiti dati, dan furu sma na ini a libimakandra pe Jodie e tan, kan feni taki a don efu a e gi a moni na a uma.

Efu yu ben de na ini a presi fu Jodie, dan san yu ben o du? A piki di yu e gi, sa anga fu den markitiki di yu e gebroiki fu sabi san bun èn san ogri.

 Markitiki di e sori wi san bun èn san ogri

Gi wan langa pisi ten, kerki ben taigi sma san bun èn san takru. Gado Wortu, Bijbel, ben abi furu krakti tapu a denki fu furu sma. Ma na heri grontapu moro nanga moro sma e si den difrenti markitiki di kerki poti, leki dondon sani èn den e si den markitiki fu Bijbel di e sori san bun èn san ogri, leki sani di no de gi a ten disi. Suma e bosroiti now gi sma san bun èn san ogri? Wan buku e taki dati „fosi, kerki ben abi krakti tapu sma, ma now libisma koni abi moro krakti tapu a denki fu sma” (Ethics in Business Life). Na presi fu arki san kerki abi fu taki, dan furu sma e suku rai na sabiman fu grontapu di e taki san bun èn san ogri. Paul McNeill, wan sabiman di e ondrosuku san bun èn san ogri, e taki: „Soleki fa mi e si a tori, dan den sabiman di e sori sma na sortu markitiki den musu hori densrefi, de neleki priester. . . . Na ini a ten disi, na presi taki libisma e meki kerki tiri den libi, den e arki den sabiman disi di e taki san bun, noso san ogri.”

Te yu musu teki muilek bosroiti, dan fa yu e sabi san bun èn san ogri? Na Gado e bosroiti gi yu san bun èn san ogri, noso yusrefi e bosroiti dati?