A presi pe a tru anbegi nanga heiden bribi tuka

MORO leki wán hondro yari kaba, a brokopresi fu na owruten foto Efeise, na a west sesyoro fu Torkukondre, na wan presi pe sma e ondrosuku sani fu owruten, fayafaya. Sma bow wan tu fu den owruten oso baka, èn sabiman ondrosuku furu fu den owruten sani di den feni, fu kon sabi san den sani dati ben de. A sani disi meki taki Efeise tron wan fu den moro prenspari presi na ini Torkukondre pe sma fu tra kondre e go na fakansi.

San ondrosukuman kon sabi fu Efeise? Fa a tumusi moi èn prenspari owruten foto dati de na ini a ten disi? Te wi e go luku a brokopresi fu Efeise èn a Museum fu Efeise na ini Wenen, na Oostenrijk, dan wi sa kon frustan fa a tru anbegi ben tuka nanga heiden bribi na ini Efeise. Meki wi luku wan tu sani fu Efeise fosi.

Wan presi di furu sma ben wani teki abra

Na ini a di fu 11 yarihondro b.G.T., furu dyugudyugu ben de na ini a kontren fu Europa go miti Asia, èn furu sma ben e froisi go na a kontren dati. Na a ten dati, den Grikisma fu Ionia bigin teki den presi abra na a west sesyoro fu Pikin Asia. Di den sma disi froisi go tan na den presi na ini Pikin Asia, dan den kon miti sma di ben e anbegi wan mama-gado. Bakaten sma ben o kon sabi a gado dati leki Artemis fu Efeise.

Na ini den yari baka 650 b.G.T., den Simeriasma di ben gwenti fu hari go fu a wan presi go na a trawan, komoto fu a Blaka Se na noordsei, èn den go feti nanga den sma fu Pikin Asia, fu man fufuru den gudu fu den. Bakaten, na a pisi ten fu 550 b.G.T., Kownu Krusus fu Lidia, bigin tiri a presi drape èn sma ben sabi a makti tiriman disi fu di a ben gudu srefisrefi. Di a Gran Kownukondre Persia ben kon moro bigi, dan Kownu Sirus teki den foto fu Ionia abra, èn sosrefi a foto Efeise.

Na ini 334 b.G.T., Aleksander fu Masedonia bigin feti teige Persia, èn te fu kaba a tron a nyun tiriman fu Efeise. Baka di Aleksander dede frukufruku na ini 323 b.G.T., dan den edeman fu den legre fu en bigin feti teige makandra fu tron tiriman fu Efeise. Na ini 133 b.G.T., Atalus III, a kownu fu Pergamum di noiti no ben meki pikin, gi Efeise na den Romesma, èn na so a foto ben tron wan pisi fu a distrikt Asia fu Rome.

A tru anbegi e tuka nanga heiden bribi

Na ini a fosi yarihondro G.T., di na apostel Paulus kon na Efeise na a kaba fu a di fu tu preikiwaka fu en, dan sowan 300.000 sma ben e libi na ini a foto  (Tori fu den Apostel 18:19-21). Na a ten fu a di fu dri preikiwaka fu en, Paulus go baka na Efeise èn nanga moro deki-ati leki bifo, a go taki na ini a snoga fu a Kownukondre fu Gado. Ma baka dri mun, den Dyu ben e gens Paulus so te, taki a bosroiti fu hori den aladei taki fu en na ini a zaal fu a skoro fu Tiranus (Tori fu den Apostel 19:1, 8, 9). Tu yari langa a tan preiki drape, aladi a ben e du kefalek krakti wroko, soleki fu dresi sma na wan wondru fasi èn fu puru ogri yeye na sma tapu (Tori fu den Apostel 19:10-17). A no de fu fruwondru taki furu sma ben tron bribiman! Iya, a wortu fu Yehovah ben abi so furu krakti, taki son sma di ben e du towfruwroko fosi, ben de klariklari fu bron den diri buku fu den.—Tori fu den Apostel 19:19, 20.

Den bun bakapisi di Paulus ben abi na ini a preikiwroko, no ben meki nomo taki furu sma tapu nanga na anbegi fu na uma-gado Artemis, ma a ben meki den anbegiman fu Artemis atibron tu. A meki di sma ben e meki solfru popki fu Artemis, ben de wan bisnis di ben e tyari furu moni kon. Fu di den sma disi ben frede taki den ben o lasi a bisnis disi, meki wan man di ben nen Demetrius sutu faya gi den solfrusmeti, so taki den ben kan meki opruru na ini a foto.—Tori fu den Apostel 19:23-32.

Den meki so wan opruru, taki tu yuru langa den sma drape di ben de nanga bigi atibron, ben e bari doronomo: „Artemis, a gado fu den Efeisesma, na wan bigi gado!” (Tori fu den Apostel 19:34) Baka di a dyugudyugu kon moro mendri, dan Paulus gi den tra Kresten deki-ati ete wan leisi, ne a teki waka go na Masedonia (Tori fu den Apostel 20:1). Ma aladi a gowe libi Efeise fu go na Masedonia, toku na anbegi fu Artemis tan go na baka moro nanga moro.

A tempel fu Artemis e go na baka

Na anbegi fu Artemis ben rutu dipi na ini Efeise. Bifo a ten fu Kownu Krusus, dan a moro prenspari gado di sma ben e anbegi drape, ben de a mama-gado Cybele. Krusus ben fruteri taki Cybele ben de famiri fu den gado fu den Grikisma, fu di a ben howpu taki a sani disi ben o meki den Grikisma nanga den tra pipel anbegi wán gado makandra. Na ini den yari baka 550 b.G.T., Krusus horibaka gi a bow fu wan tempel gi Artemis, a gado di ben teki a presi fu Cybele.

A tempel ben de wan fu den moro kefalek sani di den Grikisma bow. Noiti bifo sma ben gebroiki so bigi pisi marmer-ston fu bow so wan bigi tempel. Faya pori a tempel dati na ini 356 b.G.T. Sma ben bow wan srefi sortu kefalek tempel baka pe furu sma ben kan feni wroko, èn furu sma fu tra kondre ben e kon anbegi a gado fu den drape. Den ben bow a tempel disi baka na tapu wan heipresi fu 73 meter bradi èn 127 meter langa, ma a tempel srefi ben de sowan 50 meter bradi èn 105 meter langa. Sma ben e si a tempel disi leki wan fu den seibi moro kefalek sani di sma bow na grontapu. Ma a no ala sma ben lobi a tempel disi. A filosofiaman Herakleitus fu Efeise ben agersi a dungru pisi na fesi na altari nanga a dungru di wan sma de na ini fu di a e libi wan doti libi, èn a ben feni taki a fasi fa sma ben e tyari densrefi na ini a tempel ben ogri moro leki fa meti e tyari densrefi. Ma gi furu sma a ben gersi leki a santa presi fu Artemis na ini Efeise noiti no ben o pori. A historia e sori taki sani waka heri tra fasi. Wan buku di e fruteri fu Efeise, e taki: „Na a pisi ten fu a di fu tu yarihondro, dan wantronso sma no ben e anbegi Artemis nanga den tra gado so furu moro” (Ephesos—Der neue Führer).

Na ini a di fu dri yarihondro G.T., wan hebi gronseki naki Efeise. Boiti dati,  den Gotsma di ben gwenti waka nanga sipi, komoto fu a Blaka Se fu fufuru den gudu fu a tempel fu Artemis, èn baka dati den sutu faya gi en. A buku fu san wi taki didyonsro, e taki tu: „Den wini Artemis èn a no ben man kibri en eigi oso srefi, sobun fa sma ben o man si en ete leki a gado di ben e kibri a foto?”—Psalm 135:15-18.

Te fu kaba, sani waka na so wan fasi taki na a kaba fu a di fu fo yarihondro b.G.T., Kèiser Theodosius I poti a „Kresten bribi” leki a moro prenspari bribi fu a kondre. Heri esi, a kefalek tempel fu Artemis tron wan presi pe sma ben e go fu koti pisi ston puru fu meki den oso fu den. Na anbegi fu Artemis no ben prenspari moro kwetikweti. Yu abi wan puwema di e fruteri fa a tempel dati ben de wan wondru sani na ini owruten, ma disi na san wan man di ben leisi a puwema disi ben taki fu a tempel: „Now a de a moro takru brokobroko presi di de.”

Na presi fu Artemis, den e anbegi a „Mama fu gado” now

Paulus ben warskow den owru man fu a gemeente na ini Efeise taki baka te a gowe, „wolfu di e kwinsi sma” ben o kon èn man di ben „e taki kruktu sani” ben o opo na den mindri (Tori fu den Apostel 20:17, 29, 30). Disi na soifri san pasa. Sani di pasa na a ten dati, e sori taki a falsi anbegi ben tan go doro na ini Efeise, fu di den sma di ben fadon komoto fu a Kresten bribi ben e hori densrefi na ala sortu heiden bribi.

Na ini 431 G.T., a di fu dri konmakandra fu Kresten kerki ben hori na ini Efeise, èn na a konmakandra dati, sma taki-go-taki-kon fu kon sabi efu Krestes ben de wan gado, noso wan libisma. Wan buku e fruteri: „Den Aleksandriasma ben wini a tori disi krinkrin; den ben e bribi taki Krestes ben de nowan enkri tra sani leki wan gado nomo” (Ephesos—Der neue Führer). A sani disi tyari bigi kenki kon. „A bosroiti di sma teki na Efeise, meki taki Maria tron wan moro prenspari sma. Sma no ben sabi en moro leki a sma di meki Krestes, ma now a ben tron a sma di meki gado. A bosroiti disi no ben meki nomo taki sma bigin anbegi Maria, ma a ben de a fosi sani tu di ben tyari bigi prati kon na ini a Kresten kerki. . . . Te na a dei fu tide sma e haritaki ete fu a sani disi.”

Na so a du kon taki sma tapu fu anbegi Cybele nanga Artemis, èn den bigin anbegi Maria leki „a Sma di meki gado”, noso „a mama fu gado”. Soleki fa a buku e taki, dan „na anbegi di sma ben e anbegi Maria na ini Efeise . . . na wan sani di sma e du te na a dei fu tide, èn yu no kan fruklari na anbegi dati sondro fu taki fu na anbegi di sma ben e anbegi Artemis”.

Na anbegi fu Artemis de na frigitibuku

Baka di sma no ben e anbegi Artemis moro, dan Efeise bigin go na baka. Gronseki, malaria, èn a wasi di a se ben e wasi santi kon na a lanpe, ben meki taki a libi na ini a foto dati ben e kon muilek moro nanga moro.

Na a di fu seibi yarihondro G.T., na Islam bribi bigin panya na ala sei. Ma na Islam ben du moro leki fu tyari den lo fu Arabia kon na wán fu teki a bribi disi. Den legre fu Arabia di ben e waka nanga sipi, fufuru den gudu fu Efeise na ini a di fu seibi yarihondro èn a di fu aiti yarihondro G.T. Te fu kaba, a ben klari gi Efeise di a lanpe ben tapu nanga santi dorodoro, èn na so a foto tron wan brokopresi. Soso wan pikin foto di nen Aya Soluk (now a nen Selçuk) tan abra fu a kefalek moi èn prenspari foto fu owruten.

Teki wan koiri na ini a brokopresi fu Efeise

Efu yu wani frustan fa a moi foto Efeise ben de na ini owruten, dan yu kan go luku den sani di tan abra fu a foto dati. Efu yu e bigin waka na a hei pisi fu a foto, dan wantewante yu o si a tumusi moi Strati fu Curetes di e saka go na a Bibliotheek fu Celsus, pe sma ben kan go leisi buku. Na a reti-anusei fu a strati, na Odeum o hari yu prakseri; dati na wan pikin komediprei-oso di sma bow na ini a di fu tu yarihondro G.T. Sowan 1500 sma ben kan sidon na ini, èn soleki fa a sori, dan den ben e gebroiki en leki wan krutu-oso èn leki wan  presi pe sma ben kan abi prisiriten. Na ala tu sei fu a Strati fu Curetes, sani bow soleki a wowoyo pe sma ben gwenti fu taki fu politiek tori, a tempel fu Hadrianus, wan tu fonten pe sma ben kan go teki watra, èn oso di ben bow na a seibere fu den bergi. Den oso disi ben de fu prenspari Efeisesma.

A Bibliotheek fu Celsus di bow na ini a di fu tu yarihondro G.T., o hari yu prakseri trutru fu di a moi srefisrefi. Den someni buku-lolo fu a bibliotheek disi ben e tan na ini faki na ini skotu fu wan bigi kamra pe sma ben kan sidon leisi. Den fo bigi popki di ben de na fesi a kefalek moi mofodoro fu a bibliotheek disi, e prenki den moro prenspari fasi di wan hei lantiman fu Rome, soleki Celsus, ben musu abi, namku: Sophia (koni), Arete (bunfasi), Ennoia (a gi di wan sma e gi ensrefi), nanga Episteme (sabi, noso a koni fu man frustan sani krin). Den bigi popki disi de fu si ete na ini a Museum fu Efeise na ini Wenen, pe sma kan go luku owruten sani. Krosibei fu a fesidyari fu a bibliotheek, yu abi wan bun bigi doro di e tyari yu go na a wowoyo fu Tetragonos. A bigi opo pren disi, pe sma ben e du den aladei bisnis fu den, ben lontu nanga pasi di ben abi daki.

Baka dati, yu e kon na a Marmer Pasi di e tyari yu go na wan bigi komediprei-oso. Baka di sma bow a presi disi kon moro bigi na a ten di Rome ben e tiri a foto, dan sowan 25.000 sma ben kan sidon na ini. Na ini a fesidyari fu a presi disi yu ben abi stonpostu, sosrefi skedrei di kerfu na ini ston, èn bigi popki di ben e moi a presi trutru. Prakseri fa a ben de di Demetrius, a solfrusmeti, ben sutu faya gi den ipi sma fu meki opruru.

A pasi di e komoto fu a bigi komediprei-oso go na a lanpe fu a foto, na wan kefalek moi pasi. A langa sowan 500 meter, a bradi sowan 11 meter, èn na ala tu sei yu abi wan lo stonpostu di e tanapu sei nanga sei. Na a pasi disi, sma ben bow sosrefi a sportskoro fu a komediprei-oso èn a sportskoro fu a lanpe, so taki sma ben kan oefen den skin drape. Na a kaba fu a pasi, yu abi a tumusi moi portu fu a lanpe, èn a portu disi ben e opo gi sma fu ala sei fu grontapu. We, na dyaso a koiri di wi teki na ini a brokopresi fu wan fu den moro moi presi fu grontapu, e kon na wan kaba. Na a Museum fu Efeise na ini Wenen, wan pikin udu model fu a prenspari owruten foto disi de fu si, èn sosrefi furu tra monumenti.

Te yu e waka na ini a museum èn te yu e si a popki fu Artemis fu Efeise, dan dati e meki yu prakseri fa den fosi Kresten na ini Efeise ben abi fu horidoro na a ten dati. Den ben abi fu libi na ini wan foto pe afkodrei ben lai, èn pe sma ben e kwinsi trawan soso fu di den ben de fu wan tra bribi. Den anbegiman fu Artemis ben gens a Kownukondre boskopu trutru (Tori fu den Apostel 19:19; Efeisesma 6:12; Openbaring 2:1-3). Aladi di sma no ben lobi den Kresten na ini a ten dati, toku a tru anbegi teki rutu. Na anbegi disi fu a tru Gado o tan tu te den falsi bribi fu a ten fu wi o kisi pori, neleki fa a pasa nanga na anbegi fu Artemis na ini owruten.—Openbaring 18:4-8.

[Karta/​Prenki na tapu bladzijde 26]

(Efu yu wani si pe den sani disi skrifi, luku a tijdschrift)

MASEDONIA

Blaka Se

PIKIN ASIA

Efeise

Mindrikondre Se

EGEPTE

[Prenki na tapu bladzijde 27]

Pisi di tan abra fu a tempel fu Artemis

[Prenki na tapu bladzijde 28, 29]

1. Bibliotheek fu Celsus

2. Arete

3. A Marmer Pasi, di e tyari yu go na a bigi komediprei-oso