’Mi breiti nanga a leri di mi kisi’

A MEISJE Kazuna, ben fruwondru srefisrefi di en skoromeester aksi en fu teki prati na wan strei fu hori wan takimakandra na ini Ingrisitongo. Ala den middelbaar skoro na tapu a bigi èilanti Hokkaido, na a noordsei fu Yapan, ben kan teki prati na a strei disi, ma noiti ete a skoro fu Kazuna ben seni wan studenti go na a strei dati. Na a dei fu a strei, Kazuna ben e senwe-senwe, fu di sowan 50 tra studenti ben teki prati na a strei dati tu. A bigin senwe moro srefi di a si tu krutuman di ben e taki Ingrisitongo, a mamatongo fu den; den man disi ben musu luku suma ben o wini a strei.

Den ben kari den nen fu den sma di wini, èn den bigin nanga a sma di kisi a lasti prijs. Kazuna ben de nanga opo mofo di den kari en nen te fu kaba. En nanga en skoromeester, di ben sidon na en sei, luku makandra aladi den ben e fruwondru srefisrefi. Aladi Kazuna no ben man bribi ete san pasa, a opo go na a podium fu go teki a prijs fu en, iya, a ben wini a fosi prijs!

Nanga prisiri Kazuna fruteri: „Mi ben man du disi, soso fu di Yehovah en organisâsi e gi leri nanga yepi fu a Theokrasia Diniwroko-skoro. Mi breiti srefisrefi taki mi kisi a leri disi.” Sensi en pikin-nengreten, Kazuna teki prati na a skoro disi, di de wan fu den gemeente konmakandra fu Yehovah Kotoigi. Di Kazuna ben e sreka ensrefi gi a strei, dan a luku spesrutu fa a musu gebroiki a mikrofon, fa a kan taki nanga switifasi èn nanga faya, fa a kan gebroiki en heri skin te a e taki, fa a musu luku den arkiman te a e taki, èn tra sani di sma kan leri na a Theokrasia Diniwroko-skoro.

Grantangi, teki a kari di wi e gi yu fu kon luku fa sani e waka na a skoro disi, di e hori ala wiki na wan Kownukondre zaal fu Yehovah Kotoigi ini a kontren fu yu. Dan yusrefi kan si fa yonguwan nanga owruwan e kisi wini fu a skoro. Ala sma kan kon na a konmakandra disi. Grantangi, efu yu wani sabi moro fu a skoro di de krosibei fu pe yu e tan, dan aksi Yehovah Kotoigi na ini a birti fu yu.