Wan heri moi dei fu kaba a skoro

„A MOI dei disi na wan blesi fu tru. A son e skèin. A loktu krin. A grasi e gro so moi. Fowru e singi. Ala sani e sori taki tide o de wan moi dei, èn noti no o pori wi prisiri. Yehovah a no wan Gado di e pori sma prisiri. A de wan Gado di e blesi sma.”

Nanga den wortu disi, Brada Samuel Herd, wan memre fu a Tiri Skin fu Yehovah Kotoigi, bigin a programa di hori na a kaba fu a di fu 117 klas fu a Waktitoren Bijbelskoro Gilead. Dati ben de tapu 11 september 2004. Na a moi programa disi den studenti ben kisi rai di komoto fu Bijbel, èn a rai disi gi den deki-ati. Wan tu studenti ben fruteri san den ondrofeni na a skoro, èn tra zendeling fruteri san den ondrofeni na ini den kondre pe den e dini. Iya, a ben de wan heri moi dei gi ala den 6974 sma di ben kon na a Waktitoren Skoro Centrum na ini Patterson, New York, èn na ini tra gebow na ini Brooklyn nanga Wallkill. Den sma na Brooklyn nanga Wallkill ben kan arki a programa nanga yepi fu radio nanga video.

Wortu fu gi den studenti deki-ati

John Kikot, di de wan memre fu a Bijkantoro Komte fu Amerkankondre, gi den studenti deki-ati di a hori a lezing, „Tan abi prisiri leki wan zendeling”. A meki den kon si taki Gilead studenti abi a nen fu de sma di e prisiri ala ten, soleki fa a ben de fu si na a kaba fu a skoro. Den sani di den studenti leri fu Bijbel na a ten di den ben de na a skoro, ben gi den prisiri èn now den man yepi tra sma fu kon abi a srefi prisiri dati. Fa den o man du dati? Den o man du dati te den e du ala muiti na ini a zendeling diniwroko fu den. Yesus ben taki: „Wan sma sa de moro koloku te a e gi sani, leki te a e kisi sani” (Tori fu den Apostel 20:35). Den nyun zendeling sa tan abi prisiri te den e teki na eksempre fu Yehovah Gado, a „koloku Gado” di lobi fu gi sani èn di e meki sma kon sabi a waarheid.—1 Timoteyus 1:11.

A tra takiman di ben teki prati na a programa, ben de David Splane, wan tra memre fu a Tiri Skin, èn a ben hori a lezing, „Yu o man libi bun nanga den sma na ini a kondre pe yu e go?” A no de fu taki dati a bun èn a switi fu libi makandra na ini wánfasi, ma son leisi disi wani taki dati wi musu tron „ala sani gi ala sortu sma” (1 Korentesma 9:22; Psalm 133:1). Brada Splane ben sori den studenti di kaba a skoro, taki den ben o kisi fu du nanga furu tra sma na ini a zendelingwroko fu den, namku den sma fu a kontren pe den e go dini, tra zendeling, brada nanga sisa na ini a nyun gemeente pe den o go, èn den sma na a bijkantoro di e tiri a preikiwroko nanga a leriwroko na ini a kondre. Fu meki sani waka moro bun na mindri den studenti nanga den tra sma, meki Brada Splane gi den wan tu bun rai, namku: Leri fu taki a tongo di sma e taki drape, fiti yusrefi na a libi drape, hori na prakseri taki tra zendeling abi ten fanowdu gi densrefi, èn gi yesi na den sma di e teki fesi.—Hebrewsma 13:17.

 Baka a lezing disi, a Gilead leriman, Lawrence Bowen poti na aksi, „Fa yu e denki?” A ben memre den studenti taki den sma di ’ben e krutu sani soleki fa den ben e si nanga ai’, no ben e si Yesus leki a Mesias (Yohanes 7:24). Wi alamala leki sondu libisma, musu luku bun taki wi no „e denki leki fa libisma e denki”, ma wi musu „denki leki fa Gado e denki” (Mateyus 16:22, 23). Srefi sma di tranga na yeye fasi musu tan kenki a denki fu den. Neleki fa a de nanga wan sipi di de na se, na so a fasi fa wi e kenki a denki fu wi kan meki taki wi abi bun bakapisi, noso a kan meki taki sani no waka bun gi wi na yeye fasi. Te wi e tan studeri Bijbel fu kon frustan en moro bun, dan dati o yepi wi fu denki „leki fa Gado e denki”.

Wallace Liverance, wan tra leriman na a Gileadskoro, ben tyari wan kaba kon na a pisi disi fu a programa. A lezing fu en ben abi fu du nanga Yesaya 55:1, èn a ben nen, „San yu o bai?” A ben gi den studenti deki-ati fu „bai” a krakti, a prisiri, nanga a yepi di e komoto fu den profeiti boskopu fu Gado gi a ten fu wi. A profeititori fu Yesaya e agersi a wortu fu Gado nanga watra, win, nanga merki. Fa wan sma kan bai den sani disi „sondro moni èn sondro wan prijs”? Brada Liverance ben sori taki wan sma kan du disi te a  e poti prakseri na Bijbel profeititori, èn te a e kenki den denki nanga den fasi fu en di no de akruderi Bijbel, fu teki a denki nanga den fasi fu Gado (Yesaya 55:2, 3, 6, 7). Te den nyun zendeling du disi, dan dati o yepi den fu tan du a wroko fu den na ini den kondre pe den o go dini. Sondu libisma e denki furu tron taki den o de koloku te den e du muiti fu kisi furu gudu, so taki den kan abi wan switi libi. „No bribi disi kwetikweti”, na so a takiman ben gi leki rai. „No teki a denki dati. Sorgu taki yu e poti ten na wan sei fu studeri a profeiti Wortu fu Gado finifini, so taki yu man frustan en moro bun. A kan gi yu nyun krakti, a kan gi yu deki-ati, èn a kan gi yu prisiri na ini a zendelingwroko fu yu.”

Moi ondrofenitori fu studenti, nanga interview

Den studenti ben e teki prati na a preikiwroko doronomo. Mark Noumair, wan tra Gilead leriman, ben hori wan takimakandra nanga wan tu studenti di ben e demo wan tu sani di den ben ondrofeni na ini a preikiwroko. A takimakandra disi ben abi leki thema: „No syen gi a bun nyunsu” (Romesma 1:16). Den arkiman ben prisiri fu arki fa lepi preikiman ben e gi kotoigi oso fu oso, na strati, èn na presi pe furu wenkri de. Den studenti di ben man taki tra tongo, bosroiti fu go preiki gi sma di e taki wan tra tongo èn di e libi na ini a kontren fu a gemeente pe den ben e go. Trawan du furu bun sani nanga den Bijbel publikâsi di Yehovah Kotoigi tyari kon na doro, fu di den gebroiki den publikâsi fu tyari gobaka èn fu bigin nyun bijbelstudie. Den ’no ben e syen’ fu preiki a bun nyunsu.

Brada William Nonkes, di e wroko na a Dienst Afdeling, ben interview wan tu sma di e du a zendelingwroko wan pisi ten kaba na ini Burkina Faso, Latfia, nanga Rosiakondre. Den ben gi bun rai di abi fu du nanga a thema: „Na wan lobi-ati fasi Yehovah e pai getrow sma”. Wan fu den brada di Brada Nonkes ben interview, ben gi den studenti a deki-ati fu memre den 300 srudati di ben de na ini a legre fu Gideon. Ibri srudati ben kisi wan wroko fu du, èn na dati ben yepi Gideon fu wini a feti (Krutuman 7:19-21). Na so a de tu taki zendeling e kisi blesi te den e tan du a wroko fu den.

„Tron ala sani gi ala sortu sma”, ben de a thema fu den interview di Samuel Roberson, wan leriman na Patterson, ben hori. A ben taki nanga memre fu a Bijkantoro Komte fu Senegal, Guam, Liberia, nanga Madagaskar. Ala nanga ala, 170 zendeling e dini na ini den kondre disi. Den sani di den memre fu den Bijkantoro Komte ben taki, ben yepi den nyun studenti di kaba a skoro, fu kon sabi fa den Bijkantoro Komte e yepi nyun zendeling fu fiti densrefi na libi na ini a kondre pe den e go dini. Nofo tron disi wani taki dati den musu leri fu du sani di sma fu den kondre na ini Europa nanga Amerika no gwenti fu du. Fu eksempre, na ini son kondre a de wan gwenti gi mansma taki den e hori den mati fu den na anu te den e waka makandra, èn srefi den mansma na ini a Kresten gemeente e du disi. Na son kontren di de ondro a tiri fu a bijkantoro fu Guam, sma e nyan freimde sani. We, efu tra sma kon gwenti den sani disi, dan nyun zendeling kan du dati tu.

Guy Pierce, wan memre fu a Tiri Skin, ben hori a lezing, „Tan loyaal na ’a Kownukondre fu wi Masra’”. A ben memre den arkiman taki: „Yehovah no meki sani somarso. A ben abi wan sani na prakseri gi den sani di a meki. A no kenki prakseri fu san a o du nanga grontapu. Den sani di a abi na prakseri gi grontapu, musu fu pasa te fu kaba. Nowan sani kan kenki dati” (Genesis 1:28). Brada Pierce ben gi ala sma a deki-ati fu saka densrefi na wan loyaal fasi ondro a makti fu Gado, aladi problema opo kon leki bakapisi fu a sondu fu a fosi man, Adam. „Wi e libi na ini a yuru fu krutu. Wi no abi furu ten moro fu feni opregtisma èn fu yepi den fu kon sabi a waarheid. Gebroiki yu ten bun fu tyari a bun nyunsu fu a Kownukondre gi tra sma”, na so Brada Pierce ben gi leki rai. Den sma di e horibaka na wan loyaal fasi gi a Kownukondre fu Gado, kan de seiker taki Gado o horibaka gi den tu.—Psalm 18:25.

Na a kabapisi fu a programa, a fesiman ben leisi karta nanga brifi di ben komoto fu den bijkantoro na heri grontapu, fu gi den studenti odi nanga deki-ati. Baka dati a gi den studenti di kaba a skoro, den diploma fu den, èn wan fu den studenti leisi wan brifi fu a heri klas, pe den ben sori taki den abi furu warderi gi a leri di den kisi. A ben fiti srefisrefi fu kaba a moi dei disi na so wan fasi, èn ala sma di ben de drape o tan memre a dei disi fu wan langa pisi ten ete.

[Faki na tapu bladzijde 23]

WAN TU SANI FU A KLAS

A nomru fu kondre di ben de drape: 11

A nomru fu kondre pe den e go dini: 22

A nomru fu studenti: 48

Gemiddeld yari di den abi: 34,8

Gemiddeld yari di den de na ini a waarheid: 18,3

Gemiddeld yari di den e du furuten diniwroko: 13,4

[Prenki na tapu bladzijde 24]

A di fu 117 klas fu a Waktitoren Bijbelskoro Gilead di klari a skoro nanga bun bakapisi

Den nen di de fu si na ondrosei, poti na ini rei di nomru fu fesisei go na bakasei, èn den nen poti fu a kruktu-anusei go na a reti-anusei na ini ibri rei.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.