Yu e teki a yepi fu Yehovah?
Yu e teki a yepi fu Yehovah?
„Yehovah na mi yepiman; mi no sa frede.”—HEBREWSMA 13:6.
1, 2. Fu san ede a prenspari taki wi e teki a yepi nanga a tiri di Yehovah wani gi wi na ini a libi?
PRAKSERI taki yu e waka na tapu wan bergi èn a pasi di yu e waka muilek srefisrefi. Ma yu no de yu wawan, fu di wan sma bosroiti fu waka makandra nanga yu fu yepi yu. A sma disi na a moro bun sma di kan yepi yu. A abi bun furu ondrofeni èn a tranga moro yu, ma nanga ala pasensi a e waka na yu sei. A e si taki yu e stotu yu futu wawan leisi. Fu di a e broko en ede nanga yu, meki a e langa en anu fu yepi yu pasa wan pisi pe yu ben kan kisi mankeri. Yu ben o weigri fu teki a yepi fu en? Kwetikweti! Yu libi de na ini a tori.
2 Wi leki Kresten musu waka wan muilek pasi. A de so taki na wi wawan musu waka a smara pasi dati? (Mateyus 7:14) Nôno, fu di Bijbel e sori wi taki a moro bun Sma di kan tiri wi, namku Yehovah Gado, e gi libisma na okasi fu waka nanga en (Genesis 5:24; 6:9). A de so taki Yehovah e yepi den futuboi fu en te den e waka a smara pasi? A e taki: „Mi, Yehovah yu Gado, e grabu yu hori na yu reti-anu. Mi na a wan di e taigi yu: ’No frede. Misrefi o yepi yu’” (Yesaya 41:13). Neleki a sma di e yepi wi na ini na agersitori fu wi, dan Yehovah e langa en anu fu yepi wi na wan switifasi èn a wani de wan mati fu den sma di e suku fu waka nanga en. Fu tru, nowan fu wi sa wani weigri fu teki a yepi fu en!
3. Na sortu aksi wi sa poti prakseri na ini na artikel disi?
3 Na ini a fosi artikel, wi ben poti prakseri na den fo fasi fa Yehovah ben e yepi a pipel fu en na ini owruten. Fa a de na ini a ten disi? A e yepi a pipel fu en na a srefi fasi disi tu? Èn fa wi kan sorgu taki wi e teki iniwan fu den yepi di a e gi wi? Meki wi poti prakseri na den aksi dati. Te wi sa du dati, dan wi sa kisi moro frutrow taki Yehovah na wi Yepiman trutru.—Hebrewsma 13:6.
Yepi di wi e kisi fu den engel
4. Fu san ede den futuboi fu Gado kan abi a frutrow taki den engel sa horibaka gi den na ini a ten disi?
4 Den engel e yepi den futuboi fu Yehovah na ini a ten disi? Iya, den e du dati. A tru taki na ini a ten disi engel no e sori densrefi moro te den musu frulusu tru anbegiman fu ogri. Srefi na ini Bijbel ten, dan wawan leisi nomo den engel ben e yepi sma na so wan fasi. Libisma no ben man si furu fu den sani di engel ben du, èn so a de tu na ini a ten disi. Ma toku den futuboi fu Gado ben kisi furu deki-ati te den ben sabi taki den engel ben e horibaka gi den (2 Kownu 6:14-17). Wi abi bun reide tu fu abi a srefi firi.
5. Fa Bijbel e sori taki den engel abi wan prati na a preikiwroko na ini a ten disi?
5 Den engel fu Yehovah de nanga ala den prakseri na wan spesrutu wroko di abi fu du nanga wi. Sortu wroko na dati? Wi kan feni a piki na ini Openbaring 14:6: „Mi ben si wan tra engel e frei na mindrisei fu hemel, èn a ben abi têgo bun nyunsu fu meki bekènti leki prisiri nyunsu gi den sma di e libi na grontapu, èn gi ibri nâsi nanga lo nanga tongo nanga pipel.” A de krin taki a „têgo bun nyunsu” disi abi fu du nanga a ’bun nyunsu fu a kownukondre’. Soleki fa Yesus ben taki na fesi, dan a bun nyunsu disi „o preiki gi ala sma na heri grontapu” bifo a kaba fu a seti fu sani disi (Mateyus 24:14). A tru taki den engel no e preiki langalanga gi sma. Yesus ben gi libisma a prenspari wroko disi (Mateyus 28:19, 20). Aladi wi e du a wroko disi, a e gi wi trutru deki-ati fu sabi taki wi e kisi yepi fu den santa engel di koni èn di de makti yeye!
6, 7. (a) San e sori taki den engel e horibaka gi a preikiwroko fu wi? (b) Fa wi kan sorgu taki wi e kisi a yepi fu den engel fu Yehovah?
6 Furu buweisi de di e sori taki den engel e horibaka gi a wroko fu wi. Fu eksempre, furu tron wi e yere taki Yehovah Kotoigi miti wan sma na ini a preikiwroko, di no so langa pasa ben e begi Gado fu yepi en fu feni a waarheid. Fu di sma ondrofeni den sortu sani disi someni leisi, meki wi no kan taki dati a e pasa somarso. Fu di den engel e yepi na so wan fasi, meki moro nanga moro sma e leri fu du ’san na engel di e frei na mindrisei fu hemel’ ben taki: „Frede Gado èn gi en glori.”—Openbaring 14:7.
7 Yu wani trutru taki den makti engel fu Yehovah yepi yu? Dan du ala muiti fu du so furu leki yu man na ini yu diniwroko (1 Korentesma 15:58). Te wi de fayafaya na ini a spesrutu wroko di Yehovah gi wi èn te wi e du en nanga prisiri, dan wi kan abi a dyaranti taki den engel fu en sa yepi wi.
Yepi di wi e kisi fu na edeman fu den engel
8. Sortu moi posisi Yesus abi na ini hemel èn sortu dyaranti dati e gi wi?
8 Yehovah e gebroiki wan tra engel tu fu yepi wi. Openbaring 10:1 e taki fu wan kefalek „tranga engel” di en „fesi ben de leki a son”. Soleki fa a sori, dan na engel disi di Yohanes ben si na ini wan fisyun, e agersi Yesus Krestes di kisi wan hei posisi, èn di kisi makti na ini hemel (Openbaring 1:13, 16). Yesus de wan engel trutru? Iya, fu taki en leti, dan a de wan gran engel (1 Tesalonikasma 4:16). San na wan gran engel? Den wortu dati wani taki „prenspari engel”, noso „edeman fu den engel”. Yesus na a moro tranga wan fu ala den yeye manpikin fu Yehovah. Yehovah gi Yesus makti tapu En heri legre fu engel. Fu di a de a gran engel, meki a abi furu makti fu yepi wi. Fa a e du dati?
9, 10. (a) Fa Yesus de wi „yepiman” te wi e sondu? (b) Fa na eksempre fu Yesus kan yepi wi?
9 Na owru apostel Yohanes ben skrifi: „Efu wan sma e du wan sondu, dan wi abi wan yepiman na a Tata, dati na Yesus Krestes, wan regtfardiki sma” (1 Yohanes 2:1). Fu san ede Yohanes ben taki dati Yesus na wi „yepiman”, spesrutu te wi „e du wan sondu”? We, wi e sondu ibri dei, èn sondu e meki taki wi e dede (Preikiman 7:20; Romesma 6:23). Ma Yesus ben gi en libi abra leki wan srakti-ofrandi gi den sondu fu wi. Èn a e tanapu na a sei fu wi Tata di abi sari-ati, fu opo taki gi wi. Ibriwan fu wi abi a yepi disi fanowdu. Fa wi kan sori taki wi wani a yepi disi? Wi musu abi berow fu den sondu fu wi èn wi musu aksi pardon, aladi wi e poti bribi na ini a srakti-ofrandi fu Yesus. Wi musu sorgu tu taki wi no e du a srefi sondu baka.
10 Boiti taki Yesus dede gi wi, a gi wi wan volmaakti eksempre (1 Petrus 2:21). Na eksempre fu en e tiri wi, a e yepi fu libi na so wan fasi taki wi kan wai pasi gi seryusu sondu. Na so fasi wi sa plisi Yehovah Gado. Wi no breiti fu abi a yepi disi? Yesus ben pramisi den bakaman fu en taki den ben o kisi wan tra yepiman.
Yepi di wi e kisi fu a santa yeye
11, 12. San na a yeye fu Yehovah, o tranga a de, èn fu san ede wi abi en fanowdu na ini a ten disi?
11 Yesus ben pramisi: „Mi sa aksi a Tata èn a sa gi unu wan tra yepiman di sa de nanga unu fu têgo, a yeye fu waarheid, di grontapu no kan kisi” (Yohanes 14:16, 17). A „yeye fu waarheid”, noso santa yeye, a no wan sma, ma a de wan krakti, namku a krakti fu Yehovah srefi. A krakti fu a santa yeye no skotu. Yehovah gebroiki a krakti disi fu meki hemel nanga grontapu, fu du tumusi moi wondru, èn fu meki sma kon sabi a wani fu en nanga yepi fu fisyun. Ma Yehovah no e gebroiki en yeye na a fasi dati na ini a ten disi. Disi wani taki dan dati wi no abi a santa yeye fanowdu?
12 Kwetikweti! Na ini den ’muilek ten disi di tranga fu pasa’ wi abi a yeye fu Yehovah fanowdu moro leki iniwan ten bifo (2 Timoteyus 3:1). A e gi wi krakti fu horidoro ondro tesi. A e yepi wi fu kweki moi fasi di e meki taki wi e kon moro krosibei na Yehovah èn na wi brada nanga sisa na yeye fasi (Galasiasma 5:22, 23). Ma fa wi kan kisi wini fu a kefalek moi yepi disi di Yehovah e gi wi?
13, 14. (a) Fu san ede wi kan abi a dyaranti taki Yehovah de klariklari fu gi en pipel a santa yeye fu en? (b) Sortu sani wi ben kan du di ben o sori taki wi no wani a presenti fu a santa yeye trutru?
13 Na a fosi presi, wi musu begi gi a santa yeye. Yesus ben taki: „Efu unu leki ogri sma, sabi fa fu gi bun presenti na den pikin fu unu, o moro dan a Tata na hemel, sa gi santa yeye na den wan di e aksi en fu dati!” (Lukas 11:13) Iya, Yehovah na a moro bun Tata di wi kan abi. Efu wi e aksi en nanga bribi èn na wan opregti fasi fu gi wi en santa yeye, dan wi kan de seiker taki a sa gi wi a presenti disi. Now wi musu aksi wisrefi: Wi e aksi en fu gi wi en santa yeye? Na ini den aladei begi fu wi, wi musu aksi en fu a gi wi en santa yeye.
14 Na a di fu tu presi, wi e sori taki wi wani a presenti disi fu di wi e meki a santa yeye tiri wi. Fu gi wan eksempre: Kon meki wi taki dati wan Kresten e feti teige a gwenti di a abi fu luku sani di abi fu du nanga seks, soleki seks buku nanga seks felem. A aksi Gado fu gi en a santa yeye fu yepi en kakafutu gi a fisti gwenti disi. A suku yepi na den Kresten owruman, èn den gi en a rai fu du wan tu prenspari sani, soleki fu no go krosibei srefi fu den sortu lagi sani disi (Mateyus 5:29). San ben o pasa efu a no ben o gi yesi na a rai fu den owruman, èn efu a ben o tan luku den sortu sani disi te a kisi a firi fu du dati? A e handri akruderi den begi fu en pe a ben aksi Gado fu a santa yeye kan yepi en? Noso, a kan taki a e meki a yeye fu Gado firi sari so taki a no sa kisi a presenti disi? (Efeisesma 4:30) Fu tru, wi alamala musu du ala san wi man fu sorgu taki Yehovah kan yepi wi na so wan moi fasi.
Yepi di wi e kisi fu Gado Wortu
15. Fa wi kan sori taki wi no e si Bijbel leki wan sani di no de so prenspari?
15 Furu yarihondro langa, Bijbel ben de wan yepi gi den getrow futuboi fu Yehovah. Ma na presi fu si den Santa Buku fu Bijbel leki sani di no de so prenspari, dan wi wani hori na prakseri o furu yepi Bijbel kan gi wi. Wi musu meki muiti efu wi wani kisi a yepi dati. Wi musu meki a tron wan gwenti fu leisi Bijbel doronomo.
16, 17. (a) Fa Psalm 1:2, 3 e taki fu den winimarki di wi e kisi te wi e leisi a wet fu Gado? (b) Fa Psalm 1:3 e sori go na wan wroko di wi musu du nanga faya?
16 Psalm 1:2, 3 e taki fu a man di e plisi Gado: „En prisiri de na ini a wet fu Yehovah, èn na ini en wet a e leisi nanga wan safri sten dei nanga neti. Fu tru a sa tron leki wan bon di prani pe watra e lon pasa, di e gi en eigi froktu te en ten doro, èn den wiwiri fu en no e kon flaw, èn ala san a e du sa waka bun.” Yu e si sortu prenspari penti a tekst disi e tyari kon na fesi? A makriki fu leisi den wortu dati èn denki taki a e sori go na wan moi presi, pe wan bon di e gro na sei liba, e gi kowrupe. A ben o switi trutru fu sribi na so wan presi te bakadina! Ma a psalm disi no e sori wi taki wi musu prakseri fu rostu. Na presi fu dati a e sori go na wan wroko di wi musu du nanga faya. Fa so?
17 Luku taki a bon fu san a psalm e taki, a no wan bon di e gi kowrupe wawan èn di bigin gro fu ensrefi sei wan liba. A de wan bon di e gi nyanyan, di wan sma „prani” na wan presi di en frukisi, namku „pe watra e lon pasa”. Na ini wan dyari nanga froktubon, dan a kan taki a sma di abi a dyari dati, diki gotro fu sorgu taki a watra kan doro den rutu fu den warti bon fu en. Efu wi e gro moi na yeye fasi neleki fa a bon dati e gro, dan dati e kon fu di wan sma du furu wroko fu yepi wi. Wi de na ini wan organisâsi di e tyari a soifri watra fu waarheid kon na wi, ma wi fu wi sei musu du wan sani tu. Wi musu sorgu taki wi e kisi wini fu a tumusi warti watra disi. Te wi e prakseri dipi fu den sani di wi leisi èn te wi e ondrosuku sani moro fini, dan dati sa meki taki wi sa frustan den tru tori fu Gado Wortu èn den sa doro wi ati tu. Na a fasi dati, wi sa meki bun froktu tu.
18. San wi musu du fu feni den piki di Bijbel e gi tapu den aksi fu wi?
18 Wi no sa kisi wini fu Bijbel te wi libi en na tapu wan bukuplanga sondro fu leisi en. Bijbel a no wan buku tu di kan du wondru gi wi. Sobun, wi no kan tapu wi ai, opo a Bijbel, èn denki taki wi ai sa fadon wantronso tapu a piki fu wan aksi di wi abi. Te wi musu teki bosroiti, dan wi musu suku „a sabi fu Gado”, neleki wi ben sa diki fu feni wan gudu di beri dipi ondro gron (Odo 2:1-5). Furu tron, wi musu studeri fayafaya èn wi musu ondrosuku sani finifini efu wi wani feni Bijbel rai di wi abi fanowdu ini wan spesrutu tori. Wi abi furu Bijbel publikâsi di kan yepi wi te wi e suku rai. Te wi e gebroiki den sani disi fayafaya fu suku den moi gudu di kibri na ini Gado Wortu, dan wi sa feni a koni fu Gado. Na so fasi wi e kisi wini fu a yepi di Yehovah e gi wi.
Yepi di wi e kisi fu brada nanga sisa
19. (a) Fu san ede wi kan si den artikel na ini A Waktitoren nanga na Ontwaakt! leki yepi di brada nanga sisa e gi wi? (b) Fa wan spesrutu artikel na ini wan Waktitoren noso wan Ontwaakt! yepi yu?
19 Ala ten Yehovah gebroiki den futuboi fu en fu yepi makandra. A de so taki Yehovah kenki? Kwetikweti. A no de fu taki dati ibriwan fu wi kan memre okasi pe wan brada, noso wan sisa gi wi a yepi di wi ben abi fanowdu na a yoisti momenti. Fu eksempre, yu kan memre wan artikel na ini wan Waktitoren noso Ontwaakt! di trowstu yu di yu ben abi dati fanowdu, noso di yepi yu fu lusu wan problema, noso di yepi yu fu kakafutu gi wan tyalensi di ben tesi a bribi fu yu? Yehovah yepi yu fu di a poti „a getrow èn koni srafu” di kisi a wroko fu gi yu „nyanyan na a reti ten”.—Mateyus 24:45-47.
20. Na sortu fasi Kresten owruman e sori taki den na „presenti ini libisma”?
20 Ma furu tron, brada nanga sisa e yepi wi fu di den e du sani gi wi. Wan Kresten owruman kan hori wan publikitaki di e naki wi ati, noso a kan taki a e kon fisiti wi fu yepi wi pasa wan muilek ten. A kan de so tu taki a e gi wi rai na wan switi fasi, èn dati kan yepi wi fu kon si sortu swakifasi wi abi èn fa wi kan basi en. Wan Kresten sisa di de nanga tangi gi a yepi di wan owruman ben gi en, ben skrifi: „Na ini a preikiwroko, a ben gi mi deki-ati fu taki san ben de tapu mi ati. A neti na fesi, mi ben begi Yehovah, èn mi ben aksi en fu seni wan sma nanga suma mi ben kan taki. A tra dei, a brada disi taki nanga mi na wan switi fasi. A yepi mi fu kon si fa Yehovah yepi mi someni yari langa kaba. Mi e taigi Yehovah tangi taki a seni na owruman disi fu yepi mi.” Na ala den sortu fasi disi, Kresten owruman e sori taki den na „presenti ini libisma” di Yehovah gi nanga yepi fu Yesus Krestes, so taki wi kan kisi yepi fu horidoro tapu a pasi fu libi.—Efeisesma 4:8.
21, 22. (a) San na den bakapisi te den wan na ini a gemeente e fiti a rai di skrifi na ini Filipisma 2:4? (b) Fu san ede a de wan prenspari sani tu te brada nanga sisa e sori switifasi na ini pikin sani?
21 Boiti den owruman, dan ibri getrow Kresten wani fiti a komando di skrifi nanga yepi fu santa yeye, fu no ’poti prakseri na en eigi afersi wawan, ma fu poti prakseri na den afersi fu trawan tu’ (Filipisma 2:4). Te den wan na ini a Kresten gemeente e fiti a rai disi, dan na wan moi fasi den sa man sori switifasi. Fu eksempre, wan osofamiri ben kisi furu problema wantronso. A papa ben go na wenkri makandra nanga a yongu umapikin fu en. Di den ben drai go baka na oso, dan den kisi wan ongoloku nanga a wagi fu den. Na umapikin kon dede, èn a papa ben kisi hebi mankeri. Di a papa komoto na ati-oso, dan a ben malengri so kefalek, taki a no ben man du noti gi ensrefi. En wefi ben e firi brokosaka so te, taki en wawan no ben man sorgu gi en masra. Sobun, wan trowpaar na ini a gemeente ben teki a trowpaar disi di ben e sari so te, na ini den oso èn wan tu wiki langa den sorgu gi den.
22 A tru taki, a no na ala ten te brada nanga sisa e sori switifasi, dan a abi fu du nanga wan muilek situwâsi pe den musu gi furu fu densrefi. Son leisi wi e kisi yepi na ini moro pikin sani. Ma awinsi brada nanga sisa e sori switifasi na ini pikin sani, toku wi e warderi dati, a no so? Yu kan memre wan okasi pe wan brada noso wan sisa sori switifasi gi yu fu di den taki wan sani, noso fu di den du wan sani di yepi yu na a yoisti momenti? Furu tron, Yehovah e sorgu gi wi na den sortu fasi disi.—Odo 17:17; 18:24.
23. Fa Yehovah e denki te wi e meki muiti fu yepi makandra?
23 Yu ben sa wani taki Yehovah gebroiki yu fu yepi trawan? We, yu kan kisi a grani dati. Fu taki en leti, dan Yehovah e warderi en te yu e du muiti fu yepi trawan. En Wortu e taki: „A sma di e yepi den mofinawan, e leni Yehovah, èn A sa pai a sma dati gi san a du” (Odo 19:17). Wi e kisi furu prisiri te wi e gi wi brada nanga sisa san wi abi (Tori fu den Apostel 20:35). Den wan di no wani abi demakandra nanga sma na ini a gemeente, no sa feni a prisiri di wi e kisi te wi e yepi trawan èn den no sa feni a deki-ati tu di wi e kisi te trawan e yepi wi (Odo 18:1). Fu dati ede, meki wi go na den Kresten konmakandra doronomo èn na wan getrow fasi, so taki wi kan gi makandra deki-ati.—Hebrewsma 10:24, 25.
24. Fu san ede wi no musu firi leki wi misi wan sani, fu di wi no si den kefalek bigi wondru di Yehovah du na ini a ten di pasa?
24 A e gi wi prisiri fu prakseri dipi fu den fasi fa Yehovah e yepi wi, a no so? Aladi wi no e libi na ini wan ten pe Yehovah e du kefalek bigi wondru fu meki den prakseri fu en kon tru, toku wi no musu firi leki wi e misi wan sani. San de prenspari trutru, na taki Yehovah e gi wi ala yepi di wi abi fanowdu fu kan tan getrow. Èn efu wi alamala e horidoro na ini bribi, dan wi sa de na libi fu si den tumusi moi sani di Yehovah sa du èn di noiti no pasa ete na ini a historia! Meki wi abi a fasti bosroiti fu teki a yepi di Yehovah e gi wi na wan lobi-ati fasi èn fu gebroiki a yepi dati tu, so taki wisrefi kan taki tu san skrifi na ini wi yaritekst fu 2005: „Mi sa kisi yepi fu Yehovah.”—Psalm 121:2.
San yu e prakseri?
Fa Yehovah e yepi wi na ini a ten disi—
• nanga den engel fu en?
• nanga a santa yeye fu en?
• nanga en Wortu di skrifi nanga yepi fu santa yeye?
• nanga wi brada nanga sisa?
[Aksi fu a tori disi]
[Prenki na tapu bladzijde 18]
Wi e kisi deki-ati fu di wi sabi taki den engel e horibaka gi a preikiwroko
[Prenki na tapu bladzijde 21]
Yehovah kan gebroiki wan brada, noso sisa fu wi fu trowstu wi te a de fanowdu