Fa fu kibri den pikin fu yu nanga yepi fu a koni fu Gado

IBRI dei a skin fu wi e feti. A skin fu wi abi fu feti teige sani di kan meki wi kon siki. Koloku taki a skin fu furu fu wi man feti teige den sortu siki disi, èn taki a kan kibri wi so taki wi no e kisi den someni siki di e pina sma.

Na so a de tu taki Kresten musu kakafutu gi denki nanga markitiki di no de akruderi Bijbel, èn den musu kakafutu sosrefi gi sani di kan meki taki den e kon siki na yeye fasi (2 Korentesma 11:3). Fu man kakafutu ibri dei gi den sani disi di kan pori wi frustan nanga wi ati, dan a de fanowdu taki wi e leri fa fu kibri wisrefi na yeye fasi.

Spesrutu den pikin fu wi musu leri fa fu kibri densrefi na yeye fasi, fu di den no gebore nanga a koni fu man kakafutu gi a yeye fu grontapu (Efeisesma 2:2). Te den pikin e gro kon bigi, dan a de tumusi prenspari taki papa nanga mama e leri den fa den kan kibri densrefi. Ma san o yepi den fu kibri densrefi? Bijbel e fruklari: „Yehovah srefi e gi koni; . . . a sa kibri srefi a pasi fu den loyaalwan fu en” (Odo 2:6, 8). A koni fu Gado man kibri a pasi fu yonguwan. Efu den yonguwan disi no abi a koni dati, dan den ben kan brokokindi gi takru demakandra, a dwengi di trawan e dwengi den fu du leki den, noso gi prisiriten di no bun. Fa papa nanga mama kan meki a tiri fu Yehovah yepi den fu poti a koni fu Gado dipi na ini na ati fu den pikin fu den?

Suku fu abi bun demakandra

Wi kan frustan taki yonguwan lobi fu de makandra nanga tra yonguwan. Ma te den abi demakandra soso nanga trawan di no abi ondrofeni, dan den no sa kisi a koni fu Gado, èn den no sa kon sabi tu fa fu gebroiki en. „Lawfasi tai na a ati fu wan boi”, na so wan odo e warskow (Odo 22:15). Ma fa son papa nanga mama yepi den pikin fu den fu gebroiki a koni fu Gado, te a abi fu du nanga a demakandra di den abi?

Wan papa di nen Don * ben taki: „Den boi fu wi ben lobi fu de makandra nanga mati di ben de speri fu den, ma furu tron te den ben de makandra, den ben de na wi oso, èn wi ben de drape tu. Fu di wi gi pasi ala ten taki tra yonguwan kon na wi oso, meki furu tron wi oso ben lai nanga yonguwan. Te den ben kon, dan wi ben e gi den nyanyan èn wi  ben e gi den a firi taki den kan kon na wi oso ala ten. Wi no ben e feni en fruferi te den ben e meki babari, noso te wunyuwunyu ben de na ini na oso fu wi, fu di wi ben wani den pikin fu wi fu meki prisiri sondro taki wan ogri ben e miti den.”

Brian nanga Mary abi dri pikin di e tyari densrefi bun, ma den e agri taki a no ala ten a ben makriki fu gi den pikin leri. Den e fruteri: „Na ini wi gemeente, wi tini umapikin Jane no ben abi furu speri nanga suma a ben kan abi demakandra. Ma aladi dati ben de so, toku a ben abi wan mati di nen Susan, èn a ben de wan yongusma di ben lobi meki prisiri èn di ben lobi fu abi demakandra nanga trawan. Ma tra fasi leki wi, a papa nanga mama fu Susan ben gi a pikin fu den primisi fu du moro sani. Susan ben mag tan moro lati na strati leki Jane, a ben mag weri moro syatu koto leki Jane, a ben mag arki poku di no bun, èn a ben mag luku felem di no fiti. Wan heri pisi ten, Jane no ben man frustan fu san ede wi no ben gi en primisi fu du son sani. Jane ben feni taki a papa nanga mama fu Susan ben frustan na umapikin fu den moro bun, èn a ben feni taki wi ben muilek tumusi. Na di a no ben go so bun moro nanga a yeyefasi fu Susan, dan fosi Jane kon frustan taki na kibri wi kibri en di wi no gi en primisi fu du son sani. Wi breiti trutru taki wi tan hori wisrefi na a bosroiti di wi ben teki fu no gi pasi taki wi umapikin ben mag du ala san a wani, fu di wi ben bribi taki dati ben de gi a bun fu en.”

Neleki Jane, furu yonguwan kon si taki a de wan koni sani fu suku rai na a papa nanga mama fu den, te den wani kon sabi nanga suma den kan abi demakandra. „A sma di e gi yesi na a piri-ai di e gi libi, e tan na mindri koni sma”, na so wan odo e taki (Odo 15:31). Yonguwan di abi a koni fu Gado, sa suku fu abi demakandra nanga bun mati.

Fa fu kakafutu te trawan e dwengi yonguwan fu du leki den

Te yonguwan abi demakandra nanga den speri fu den, dan a de so furu tron taki den speri disi e dwengi den fu du leki den. Ibri dei baka, den pikin fu wi musu kakafutu te trawan e dwengi den fu du leki den. Fu di a de so furu tron taki yonguwan wani den speri fu den fu feni den bun, meki a dwengi di den speri disi e dwengi den, kan abi so wan krakti na den tapu taki den e du den sani di grontapu e si leki bun sani.—Odo 29:25.

Bijbel e memre wi taki „grontapu e pasa gowe nanga den lostu fu en” (1 Yohanes 2:17). Fu dati ede, papa nanga mama no musu gi pasi taki a denki fu grontapu abi tumusi furu krakti tapu den pikin fu den. Fa den kan yepi den pikin fu den fu abi a denki di fiti wan Kresten?

„Ala ten mi umapikin ben wani weri den krosi di tra yonguwan ben e weri”, na so Richard taki. „Fu dati ede, wi teki wi ten fu taki nanga en fu a bun sei èn fu a takru sei fu ibri sani di a ben aksi wi primisi fu du. Srefi te a ben abi fu du nanga wan modo di wi ben feni bun, dan toku wi ben e hori wisrefi na a rai di wi ben yere wan tu yari pasa, namku ’na wan koni sma no sa de a fosiwan di e teki wan nyun modo abra, èn a no sa de a lastiwan tu di e tapu nanga a modo dati.’”

Wan mama di nen Pauline, ben kakafutu na wan tra fasi gi yonguwan di ben wani dwengi den pikin fu en fu de leki den. A e fruteri: „Mi ben wani  sabi moro fu den sani di den pikin fu mi ben lobi, èn doronomo mi ben e go na ini den kamra fu taki nanga den. Den langa takimakandra disi di mi ben abi nanga den, yepi mi fu meki den kisi wan yoisti denki fu sani, èn mi ben man yepi den sosrefi fu poti prakseri na tra fasi di de fu denki fu wan tori.”

Ala ten speri sa tan dwengi trawan fu du leki den, èn fu dati ede wi kan fruwakti taki papa nanga mama sa musu tan meki tranga muiti fu ’broko grontapu prakseri puru’ èn den sa musu yepi den pikin fu den fu ’basi den prakseri fu den, so taki den kan gi yesi na Krestes’ (2 Korentesma 10:5). Ma te papa, mama, nanga pikin „e horidoro na ini begi”, dan den sa kisi a krakti fu kaba a tumusi prenspari wroko disi.​—Romesma 12:12; Psalm 65:2.

A trikifasi fu den sani di sma e du fu abi prisiri

Wan di fu dri sani di abi krakti tapu yonguwan, èn di kan gi papa nanga mama broko-ede, na den sani di yonguwan e du fu abi prisiri. A no de fu taki dati yongu pikin lobi fu prei. Furu pikin di de moro owru, e suku tu fu du prisiri sani nomonomo (2 Timoteyus 2:22). Ma te den abi prisiri na wan donfasi, dan dati kan pori a yeyefasi fu den. Tu prenspari fasi de fa den prisiri sani di yonguwan e du kan pori a yeyefasi fu den.

A fosiwan, na taki moro furu fu den sani di sma e du fu abi prisiri, na sani di e sori a lagi fasi fa grontapu sma e tyari densrefi (Efeisesma 4:17-19). Toku a de so furu tron taki den sani di den e du fu abi prisiri, na sani di sori fu de span èn moi. Disi na wan trutru kefar gi yonguwan di son leisi no e si taki disi na wan trapu.

A di fu tu sani di kan pori a yeyefasi fu den, na a ten di yonguwan e gebroiki fu abi prisiri. Son yonguwan e kon si ’a abi di den kan abi prisiri’, leki a moro prenspari sani na ini den libi, èn a sani dati e teki tumusi furu fu den ten nanga den krakti. Wan odo e warskow taki „a no bun fu nyan tumusi furu oni” (Odo 25:27). Na so a de tu taki te yonguwan abi tumusi furu prisiri, dan dati sa meki taki den no e angri so furu moro gi yeye nyanyan, èn te fu kaba den sa kon lesi na yeye fasi (Odo 21:17; 24:30-34). Te yonguwan e gebroiki den sani na grontapu dorodoro, dan dati sa tapu den fu „grabu a trutru libi hori bun steifi”, namku a têgo libi na ini a nyun grontapu fu Gado (1 Timoteyus 6:12, 19). San papa nanga mama du di a tyalensi disi miti den?

Mari Carmen, wan mama di abi dri umapikin, ben taki: „Wi ben wani den umapikin fu wi abi prisiriten di fiti èn di ben o meki den firi bun. Fu dati ede, mi nanga mi masra ben gwenti fu go koiri nanga den, èn den ben abi demakandra sosrefi nanga mati di den ben abi na ini a gemeente. Ma wi ben e luku bun fu no abi tumusi furu prisiriten. Wi ben agersi prisiriten nanga wan switisani di yu e kisi baka te yu nyan, iya, a sani dati switi ma a no dati de fanowdu fu kisi krakti. Den pikin ben leri fu wroko na oso, na skoro, èn na ini a gemeente.”

Don nanga Ruth ben du spesrutu muiti fu meki den pikin abi prisiriten. „Wi ben gwenti fu poti a satra leki a spesrutu dei pe wi leki osofamiri ben e du sani makandra”, na so den e fruteri. „Na mamanten wi ben e teki prati na a preikiwroko, na bakadina wi ben e go swen, èn na neti wi ben abi wan spesrutu nyanyan.”

Te wi e luku san den papa nanga mama disi e taki, dan dati e sori o prenspari a de fu meki den pikin abi nofo prisiriten di fiti, èn fu poti prisiriten na a yoisti presi na ini a libi fu den leki Kresten.​—Preikiman 3:4; Filipisma 4:5.

Frutrow tapu Yehovah

A no de fu taki dati a e teki furu yari fosi wan pikin e leri fa fu kibri ensrefi na yeye fasi. Wan wondru dresi no de di kan meki den pikin kisi a koni fu Gado di sa meki den frutrow den hemel Tata. Na presi fu dati, papa nanga mama musu „tan kweki den nanga a trangaleri èn a seryusu frumane fu  Yehovah” (Efeisesma 6:4). A gi di papa nanga mama e tan gi den pikin fu den „seryusu frumane”, wani taki dati den e yepi den pikin disi fu si sani soleki fa Gado e si sani. Fa papa nanga mama kan du dati?

Wan osofamiri bijbelstudie di e hori doronomo na wan prenspari sani di sa yepi den abi bun bakapisi. A studie ’kan opo den ai fu den pikin so taki den kan luku den wondrusani na ini a wet fu Gado’ (Psalm 119:18). Diego ben si na osofamiri studie leki wan tumusi seryusu sani, èn na so a ben man yepi den pikin fu en fu kon moro krosibei na Yehovah. „Mi ben e sreka misrefi heri bun gi a studie”, na so a ben taki. „Fu di mi go ondrosuku sani na ini Bijbel publikâsi, meki mi kon sabi fa mi ben kan meki den pikin fu mi si den sma fu Bijbel leki trutru sma. Mi ben gi den pikin deki-ati fu luku fa a libi fu den gersi a di fu den getrow wan. Disi ben sori den pikin krin san Yehovah feni bun.”

Boiti taki pikin e leri te papa nanga mama e studeri nanga den, den e leri tu na tra okasi. Moses ben gi papa nanga mama a rai fu taki fu den frumane fu Yehovah ’te den ben e sidon na ini den oso èn te den ben e waka na pasi èn te den ben go didon èn te den ben opo’ (Deuteronomium 6:7). Wan papa e fruteri: „Mi manpikin no e taki wantewante san de tapu en ati, a abi pikinso ten fanowdu fosi a e bigin taki fa a e firi. Te wi e go koiri noso te wi e du wan wroko makandra, dan safrisafri a e bigin fruteri fa a e firi. Na den okasi disi, wi ben abi wan tu bun takimakandra di tyari wini kon gi mi nanga en.”

Den begi di papa nanga mama e begi, abi furu krakti sosrefi tapu den pikin fu den. Te den pikin e yere fa en papa nanga mama e aksi Yehovah nanga sakafasi fu yepi den èn fu gi den pardon, dan disi e meki den pikin „bribi taki a de” trutru (Hebrewsma 11:6). Furu papa nanga mama di abi bun bakapisi nanga den pikin fu den, e taki dati a de tumusi prenspari taki osofamiri e begi makandra. Den kan begi makandra fu sani di abi fu du nanga skoro, noso fu tra sani di e gi den pikin fu den broko-ede. Wan papa e taki dati ala ten a wefi fu en e begi nanga den pikin bifo den e go na skoro.​—Psalm 62:8; 112:7.

’Meki wi no tapu fu du san bun’

Ala papa nanga mama e meki fowtu èn kande den e firi sari fu a fasi fa den handri na ini son situwâsi. Ma Bijbel e gi wi deki-ati fu tan meki muiti fu no „tapu fu du san bun”.—Galasiasma 6:9.

Ma kande papa nanga mama e feni taki den no man moro, te den no man frustan den pikin fu den son leisi. Den ben kan feni taki den yonguwan fu a ten disi de tra fasi èn taki den muilek. Ma fu taki en leti, den pikin na ini a ten disi abi den srefi swakifasi leki den pikin fu fositen, èn den e kisi fu du nanga den srefi sortu tesi, aladi a kan taki den e kisi moro kwinsi fu du ogri. Dati meki di wan papa ben gi en manpikin piri-ai, dan baka dati a taki na wan switifasi: „Na ati fu yu wani du nomo san mi ati ben wani du di mi ben abi a yari fu yu.” Kande  papa nanga mama no sabi furu fu computer, ma den sabi ala sani di a sondu libisma skin wani du.​—Mateyus 26:41; 2 Korentesma 2:11.

Son pikin e sori kande taki den no wani teki a leri di a papa nanga a mama fu den e gi den, èn kande den e rigeri srefi te den e kisi trangaleri. Te disi e pasa, dan a de prenspari baka fu abi pasensi. Aladi furu pikin ben kan sori na a bigin taki den no wani arki, noso taki den tranga ede ten na ten, toku den e gi yesi te fu kaba (Odo 22:6; 23:22-25). Matthew, wan yongu Kresten di e dini now na wan bijkantoro fu Yehovah Kotoigi, e fruteri: „Di mi ben de wan tini, dan mi ben feni taki mi papa nanga mama ben e poti tumusi furu wet gi mi. Mi ben prakseri taki, efu a papa nanga mama fu den mati fu mi ben gi den primisi fu du wan spesrutu sani, dan fu san ede den di fu mi no ben wani du dati? Èn son leisi mi ben atibron srefisrefi te a strafu di den ben e gi mi, ben de taki mi no ben mag go koiri nanga boto, wan sani di mi ben lobi fu du. Ma te mi e prakseri den sani dati, dan mi e frustan taki a trangaleri di mi papa nanga mama gi mi ben bun, èn a ben de fanowdu. Mi de nanga tangi taki den no draidrai fu gi mi a leri di mi ben abi fanowdu.”

A no de fu taki, dati aladi den pikin fu wi de na ini situwâsi son leisi di no bun gi a yeye fasi fu den, toku den kan gro kon tron bun Kresten. Soleki fa Bijbel e pramisi, dan a koni fu Gado kan yepi den pikin fu kibri densrefi na yeye fasi. „Te koni e kon na ini yu ati èn sabi srefi e tron wan prisiri sani gi yu eigi sili, dan yu frustan srefi sa hori wakti gi yu, a koni fu si sani krin srefi sa kibri yu, fu frulusu yu fu a takru pasi.”​—Odo 2:10-12.

A no de wan makriki sani gi wan mama fu tyari wan pikin neigi mun langa na ini en bere. Èn den 20 yari baka dati, kan tyari sari nanga prisiri kon. Ma fu di Kresten papa nanga mama lobi den pikin fu den, meki den e du ala san den man fu kibri den pikin fu den nanga yepi fu a koni fu Gado. A lobi di den abi gi den pikin fu den, na a srefi lobi di na owru apostel Yohanes ben abi gi den yeye pikin fu en. Na apostel dati ben taki: „Nowan tra sani e gi mi moro prisiri leki te mi e yere taki den pikin fu mi e tan waka na ini a waarheid.”​—3 Yohanes 4.

[Futuwortu]

[Prenki na tapu bladzijde 24]

„Fu di wi gi pasi taki tra yonguwan kon na wi oso ala ten, meki furu tron wi oso ben lai nanga yonguwan”

[Prenki na tapu bladzijde 25]

Meki muiti fu kon sabi moro fu den sani di yu pikin lobi fu du

[Prenki na tapu bladzijde 26]

„Mi ben sreka misrefi bun gi a studie”