Fu san ede furu sma no e denki taki kerki kan tyari wánfasi kon na mindri libisma

„LOBI tra sma” (Mateyus 22:39). Furu kerki e taki dati den e hori densrefi na a gronprakseri disi di e sori fa wan sma musu tyari ensrefi. Efu den kerki fesiman ben man leri den sma fu a kerki fu den fu lobi tra sma, dan wánfasi ben o de na den mindri. Ma yu e si taki disi e pasa? Kerki man tyari wánfasi kon? No so langa pasa, wan ondrosuku du na ini Doisrikondre pe den ben aksi sma a sani disi: „Kerki e tyari wánfasi kon na mindri libisma, noso yu denki taki moro furu den e tyari pratifasi kon?” Fu ala den sma di gi piki tapu na aksi disi, 22 procent fu den ben feni taki kerki e tyari wánfasi kon, aladi 52 procent fu den ben feni taki kerki e tyari pratifasi kon. Kande sma na ini yu kondre e denki a srefi fasi tu.

Fu san ede furu sma no e denki taki kerki man tyari wánfasi kon na mindri libisma? Kande na fu di den sabi san pasa na ini den ten di pasa. Na presi fu tyari sma kon na wán, dan furu tron a ben de so taki kerki tyari pratifasi kon. Son leisi a ben de so, taki sma du den moro ogri-ati sani nanga trawan, aladi den taki dati den na kerkisma. Luku wan tu eksempre fu soso den lasti 100 yari di pasa.

Na ini a nen fu kerki

Na ini den Balkan Staten, na a pisi ten fu a di fu Tu Grontapufeti, den Krowâsiasma di ben de Lomsu, ben e feti teige den Serfiasma di ben de fu na Orthodox Kerki. Ala tu grupu ben taki dati den de bakaman fu Yesus di ben leri den bakaman fu en fu lobi tra sma. Toku wan ondrosukuman e taki dati a feti disi ben de „wan fu den moro ogri feti na ini a historia pe sma fu wan kondre srakti makandra leki meti na wan tumusi ogri-ati fasi”. A ben seki grontapu trutru di a kon na krin taki moro leki 500.000 mansma, umasma, nanga pikin ben dede na ini a feti disi.

Na ini 1947, sowan 400 milyun sma, dati wani taki sowan 20 procent fu ala libisma na heri grontapu, ben e libi na a bigi kontren pe den Indiasma e tan. Furu fu den ben de fu a Hindu bribi, a Moslim bribi, nanga a Sikh bribi. Di India prati, dan den sma fu na Islam bribi seti a nyun kondre Pakistan. Na a pisi ten dati, sma du ala sortu ogri-ati sani nanga den loweman fu ala den tu kondre disi; den bron den, den fon den, den gi den skin-ati, èn den sutu ipi-ipi fu den kiri soso fu di den ben de fu wan tra kerki.

Efu dati no sari ete, dan na a bigin fu a di fu 21 yarihondro, terrorisme, noso den ogri-ati sani di sma e du fu gens tirimakti, meki libisma frede moro srefi. Tide na a dei, terrorisme tyari bruya kon na heri grontapu, èn furu fu den grupu di e du den sortu ogri-ati sani disi, e taki dati den na sma  di de fu wan kerki. Sma no e si kerki leki wan sani di kan tyari wánfasi kon. Na presi fu dati, den e si kerki leki wan sani di e tyari ogridu nanga pratifasi kon. Fu dati ede, a no de fu fruwondru taki a Doisri tijdschrift FOCUS taki dati den moro prenspari kerki fu grontapu, namku a Buda bribi, a Dyu bribi, a Hindu bribi, Islam, Krestenhèit, nanga a Tao bribi, de leki kroiti di kan sutu faya na iniwan ten.

Haritaki na mindri sma fu a srefi kerki

Aladi son kerki e feti nanga tra kerki, a de so tu taki sma fu a srefi kerki e haritaki nanga makandra. Fu eksempre, na ini den lasti yari di pasa, den kerki fu Krestenhèit prati fu di den e haritaki fu wan tu leri fu den. Kerki fesiman nanga tra kerkiman e poti aksi soleki: Wan sma mag du wan sani fu no kon de nanga bere? Wan sma mag puru bere? Umasma kan du priesterwroko? Fa kerki musu si sma di e libi wan homo-sekslibi? Kerki musu horibaka gi feti? Fu di den kerki no man agri na ini den pisi tori disi, meki furu sma e aksi densrefi: ’Fa wan kerki kan tyari wánfasi kon na mindri ala libisma, efu a no man tyari den memre fu en kon na wán srefi?’

A de krin fu si taki nofo tron kerki no ben man tyari wánfasi kon. Ma a de so taki pratifasi de na ini ala kerki? Wan kerki, noso wan bribi de di de tra fasi, so taki a kan tyari wánfasi kon na mindri libisma?

[Prenki na tapu bladzijde 3]

Skowtu di kisi mankeri di kerkigrupu na ini India feti na ini 1947

[Sma di abi a reti fu a prenki]

Photo by Keystone/Getty Images