Lobi gi Gado e tyari wánfasi kon

WAN fu den prenspari sani di ben de krin fu si na ini a Kresten gemeente di a ben seti na ini a fosi yarihondro Gewoon Teri, na taki den memre fu a gemeente ben e libi na ini wánfasi nanga makandra, aladi den ben de difrenti sortu sma. Den sma dati, di ben e anbegi a tru Gado, ben komoto fu difrenti nâsi na ini Asia, Europa, nanga Afrika. Den ben de difrenti sortu sma fosi, soleki priester, srudati, srafu, loweman, sma di ben e bai èn seri sani, sma di ben e du wan spesrutu sortu wroko, èn bisnisman. Sonwan fu den ben de Dyu, èn trawan ben de fu tra nâsi. Fosi, furu fu den ben e libi wan hurulibi, noso wan homo-sekslibi, èn trawan ben de drunguman, fufuruman, nanga bedrigiman. Toku, di den tron Kresten, dan den tapu nanga den ogri di den ben e du èn a bribi fu den meki den kon de wán.

San ben meki taki a Kresten bribi fu a fosi yarihondro tyari ala den sortu sma disi kon makandra na ini wánfasi? Fu san ede den ben e libi na ini vrede nanga makandra èn nanga tra sma? Fu san ede den no ben e moksi nanga sma di ben e opo densrefi teige tirimakti èn nanga sma di ben e feti? Fu san ede a fosi Kresten bribi ben de heri tra fasi leki den moro prenspari bribi na ini a ten disi?

San ben tyari den memre fu a gemeente kon na wán?

A moro prenspari sani di tyari den Kresten bribiman fu a fosi yarihondro kon na wán, ben de lobi gi Gado. Den Kresten dati ben frustan taki a moro prenspari plekti fu den, na fu lobi a tru Gado, Yehovah, nanga den heri ati, sili, èn frustan. Fu eksempre, na apostel Petrus, di ben de wan Dyu, ben  kisi a komando fu go na wan sma fu wan tra kondre, ma soleki fa a gwenti ben de, dan Dyu no ben e bumui tumusi furu nanga den sortu sma dati. Toku, a moro prenspari sani di ben meki Petrus gi yesi na a komando, ben de fu di a lobi Yehovah. Petrus nanga den tra fosi Kresten ben abi wan krosibei banti nanga Gado, fu di den ben kon sabi soifri sortu fasi Gado abi, san A lobi, èn san A no lobi. Baka wan pisi ten, ala anbegiman fu Yehovah ben kon frustan taki Yehovah wani taki den musu ’de makandra na ini wánfasi, nanga a srefi denki èn nanga a srefi fasi fu prakseri’.​—1 Korentesma 1:10; Mateyus 22:37; Tori fu den Apostel 10:1-35.

Boiti dati, a bribi na ini Yesus Krestes ben tyari den bribiman kon na wán sosrefi. Den ben wani du soifri leki fa Krestes ben du. A ben gi den a komando: „Unu lobi makandra; neleki fa mi lobi unu . . . Na a fasi disi ala sma o sabi taki unu na mi disipel, te unu lobi makandra” (Yohanes 13:34, 35). A lobi disi no ben musu de wan firi di den ben o abi fu wan pisi ten nomo, ma a ben musu de wan tranga lobi di ben o meki taki den ben o de klariklari fu gi densrefi. San ben o de a bakapisi te den ben o abi a lobi disi? Yesus ben begi gi den wan di ben e poti bribi na ini en, taki: „Mi e aksi . . . taki den alamala kan de wán, neleki fa yu, Tata, de na ini wánfasi nanga mi èn mi de na ini wánfasi nanga yu, so taki den kan de sosrefi na ini wánfasi nanga wi.”​—Yohanes 17:20, 21; 1 Petrus 2:21.

Yehovah ben meki en santa yeye, noso en wroko krakti, kon na tapu den tru futuboi fu en. A yeye disi ben meki taki den ben e libi na ini wánfasi. A ben meki den kon frustan den leri fu Bijbel, èn ala den gemeente ben e hori densrefi na dati. Den anbegiman fu Yehovah ben e preiki a srefi boskopu, namku taki a nen fu Yehovah ben o kon santa nanga yepi fu a Mesias Kownukondre fu Gado, di de wan hemel tirimakti di o tiri ala libisma. Den fosi Kresten ben e frustan taki a ben de a plekti fu den fu „no de wan pisi fu a grontapu disi”. Fu dati ede, te sma ben e opo densrefi teige a tirimakti fu wan kondre, noso te srudati ben de na ini feti, dan Kresten no ben e teki sei na ini den feti disi. Den ben e suku fu abi vrede nanga ala sma.​—Yohanes 14:26; 18:36; Mateyus 6:9, 10; Tori fu den Apostel 2:1-4; Romesma 12:17-21.

Ala bribiman ben teki a frantwortu fu horibaka gi a wánfasi di den ben abi. Fa so? Fu di den ben e sorgu taki den tyari densrefi akruderi san Bijbel e taki. Fu dati ede, na apostel Paulus ben skrifi gi Kresten: „Puru na owru fasi fa wan sma de, di de akruderi a waka nanga libi di unu ben abi fosi”, èn „tron wan nyun sma”.​—Efeisesma 4:22-32.

A wánfasi ben tan

A no de fu taki dati den bribiman na ini a fosi yarihondro ben de sondusma, èn situwâsi ben e opo kon di ben kan meki den lasi a wánfasi fu den. Fu eksempre, Tori fu den Apostel 6:1-6 e fruteri taki krutukrutu ben kon na mindri den Dyu Kresten di ben e taki Grikitongo, nanga den Dyu Kresten di ben e taki Hebrewtongo. Den wan di ben e taki Grikitongo ben feni taki den trawan no ben e handri bun nanga den. Ma di den apostel kon yere a tori disi, dan esi-esi den lusu a problema na wan reti fasi. Bakaten, wan kesekese ben kon fu wan leri di ben abi fu du nanga den plekti di den tra sma di no ben de Dyu, ben abi na ini a Kresten gemeente. Den ben teki wan bosroiti akruderi Bijbel gronprakseri, èn ala den sma na ini a gemeente ben hori densrefi na a bosroiti dati.​—Tori fu den Apostel 15:1-29.

Den eksempre disi e sori taki kesekese no ben meki taki den Kresten ben e bumui soso nanga sma fu den eigi pipel. Èn awinsi den no ben e agri nanga makandra na ini ala sani, toku den no ben e haritaki fu difrenti Bijbel leri, èn pratifasi no ben kon na ini a fosi yarihondro Kresten gemeente. Fu san ede? We, na fu di den ben abi lobi gi Yehovah, den ben e bribi na ini Yesus Krestes, den ben abi so  wan lobi taki den ben e poti prakseri na den afersi fu trawan bifo den eigi afersi, den ben teki a santa yeye, èn den ben gi a yeye na okasi fu tiri den. Boiti dati, den ben e bribi den srefi leri fu Bijbel, èn den ben de klariklari fu kenki a fasi fa den ben e handri. Ala den sani disi, di ben e tyari den kon na wán, ben krakti nofo fu meki a fosi gemeente tan na ini wánfasi èn na ini vrede.

Sma di e anbegi na ini wánfasi na ini a ten disi

Sma kan abi a srefi wánfasi na ini a ten disi? A kan taki te now ete den srefi sani disi e tyari sma fu wan bribi kon na wán, èn e meki sma fu ala ras na ala pisi fu grontapu libi na ini vrede nanga makandra? Iya, a kan! Na heri grontapu, Yehovah Kotoigi e libi na ini wánfasi leki brada nanga sisa na ini moro leki 230 kondre, èilanti, nanga kontren. Èn den srefi sani di ben tyari den Kresten fu a fosi yarihondro kon na wán, e tyari Yehovah Kotoigi kon na wán na ini a ten disi tu.

A moro prenspari sani di e yepi Yehovah Kotoigi fu de wán, na a dini di den e dini Yehovah Gado nanga den heri ati. Disi wani taki dati den e du muiti fu tan getrow na en na ini ala sortu situwâsi. Kotoigi fu Yehovah e bribi na ini Yesus Krestes tu, èn na ini den leri fu en. Den Kresten disi e sori taki den e poti prakseri fosi na den afersi fu den sma di abi a srefi bribi leki den, èn den e preiki a srefi bun nyunsu fu Gado Kownukondre na ini ala den kondre pe den e wroko. Den lobi fu fruteri sma fu a Kownukondre disi, awinsi den sma abi wan tra bribi, awinsi den de fu wan tra ras noso fu wan tra kondre, noso awinsi den gudu noso pôti. Yehovah Kotoigi no e teki sei na ini den afersi fu grontapu tu, èn disi e yepi den fu wai pasi gi problema di abi fu du nanga politiek, kulturu, a libimakandra, nanga bisnis, bika na den problema disi e meki taki so furu pratifasi de na mindri libisma now. Ala Kotoigi teki en leki frantwortu fu horibaka gi a wánfasi fu den, fu di den e tyari densrefi akruderi Bijbel markitiki.

Wánfasi e hari sma

Furu tron a wánfasi fu Kotoigi hari a prakseri fu sma di no de Kotoigi. Ilse, * fu eksempre, ben de wan non fu a Lomsu Kerki èn a ben e libi na ini wan fu den oso pe non e tan na ini Doisrikondre. Sortu sani fu Yehovah Kotoigi ben hari en? Ilse taki: „Den de den moro bun sma di mi ben miti oiti. Den no e go na feti, èn den no e du nowan sani fu du trawan ogri. Den wani yepi sma fu kisi wan koloku libi na ini wan paradijs grontapu ondro a tiri fu Gado Kownukondre.”

Dan yu abi Günther, di ben de wan Doisri srudati di ben e wroko na ini Fransikondre na a ten fu a di fu Tu Grontapufeti. Wan dei, wan priester fu a Protestant Kerki ben taki fu Gado nanga den srudati di ben de na ini a grupu fu Günther. A priester ben begi Gado fu kisi blesi, fu kisi kibri, èn fu wini a feti. Baka di a kaba taki, dan Günther go du en wroko baka leki waktiman di e luku fa sani ben e waka na a sei fu den feanti. A ben abi wan wrokosani fu luku go farawe, èn di a luku nanga a sani disi, dan a si fa wan priester ben e taki fu Gado tu nanga den feanti legre na a tra sei. Bakaten Günther taki: „Soleki fa a sori, dan a priester dati ben begi Gado tu fu kisi blesi, fu kisi kibri, èn fu wini a feti. Mi ben aksi misrefi fa a kan taki Kresten kerki na ala tu sei ben e feti teige makandra na ini a srefi feti.” A sani disi tan na ini a prakseri fu Günther. Bakaten, di Günther miti Yehovah Kotoigi, di no e teki prati na feti, dan a tron wan fu den furu brada fu den di de na heri grontapu.

Ashok nanga Feema ben de fosi na ini wan fu den bribi fu Owstusei. Na oso, den ben abi wan sortu altari gi wan gado. Di wan sma na ini a famiri fu den kon siki seryusu, dan den go luku baka na ini sortu sani den ben e bribi. Di Ashok nanga Feema taki nanga Yehovah Kotoigi, dan den leri fu Bijbel naki den ati, sosrefi a lobi di de na mindri den Kotoigi. Now den de fayafaya preikiman fu a bun nyunsu fu a Kownukondre fu Yehovah.

Ilse, Günther, Ashok nanga Feema e libi na ini wánfasi leki brada nanga sisa makandra nanga milyunmilyun tra Kotoigi fu Yehovah na heri grontapu. Den e bribi a pramisi fu Bijbel, taki heri esi den srefi sani di tyari den kon na wán na ini wán bribi na ini a ten disi, na den srefi sani di o tyari wánfasi kon na mindri ala libisma di e gi yesi na Gado. Dan nowan bribi noso kerki o meki taki ogri-ati sani pasa, noso taki pratifasi de na mindri libisma. Heri grontapu sa anbegi a tru Gado, Yehovah, na ini wánfasi.​—Openbaring 21:4, 5.

[Futuwortu]

[Prenki na tapu bladzijde 4, 5]

Aladi den fosi Kresten ben de difrenti sortu sma, toku den ben e libi na ini wánfasi