Wi kisi leri fu gi kotoigi finifini
Wi kisi leri fu gi kotoigi finifini
„Unu sa de kotoigi fu mi na Yerusalem èn na heri Yudea nanga Samaria èn te na a moro farawe presi fu grontapu.”—TORI FU DEN APOSTEL 1:8.
1, 2. San ben de a wroko fu Petrus, èn suma ben gi en a wroko dati?
„YESUS fu Nasarèt . . . gi wi a komando . . . fu preiki gi a pipel èn fu gi kotoigi finifini, taki disi na a Sma di Gado poti leki krutuman fu den libiwan nanga den dedewan” (Tori fu den Apostel 10:38, 42). Nanga den wortu dati, na apostel Petrus sori Kornelius nanga en osofamiri taki a ben kisi a wroko fu de wan preikiman fu a bun nyunsu.
2 O ten Yesus gi en a wroko dati? Soleki fa a sori, dan Petrus ben e prakseri san Yesus taki baka di a kisi wan opobaka èn bifo a go na hemel. Na a okasi dati, Yesus taigi den getrow disipel fu en: „Unu sa de kotoigi fu mi na Yerusalem èn na heri Yudea nanga Samaria èn te na a moro farawe presi fu grontapu” (Tori fu den Apostel 1:8). Ma wan pisi ten fosi a ten dati, Petrus ben sabi kaba taki leki disipel fu Yesus, a ben o abi fu fruteri tra sma fu a bribi di a ben abi na ini Yesus.
Den kisi leri sowan dri yari langa
3. Sortu wondru Yesus du, èn sortu kari a ben gi Petrus nanga Andreas?
3 Wan tu mun baka di Yesus dopu na ini 29 G.T., dan a go preiki na a presi pe Petrus nanga en brada Andreas ben e wroko leki fisiman na a Se fu Galilea. Den ben wroko heri neti, ma den no ben fanga nowan fisi. Toku, Yesus taigi den: „Go pe a watra dipi, dan un musu saka den fisinèt fu unu go na ini a watra so taki unu kan kisi fisi.” Di den du san Yesus taki, dan „den kisi wan heri ipi fisi. Fu taki en leti, den fisinèt fu den bigin priti.” Di Petrus si a wondru disi, dan a kon frede, ma Yesus meki a firi korostu di a taki: „No frede moro langa. Fu bigin nanga now yu sa kisi sma libilibi.”—Lukas 5:4-10.
4. (a) Fa Yesus sreka den disipel fu en fu gi kotoigi? (b) Na sortu fasi a diniwroko fu den disipel fu Yesus ben o de tra fasi leki di fu en?
4 Wantewante Petrus nanga Andreas, sosrefi Yakobus nanga Yohanes, di ben de manpikin fu Sebedeyus, gowe libi den boto fu den èn den waka baka Yesus. Pikinmoro dri yari langa, den waka nanga Yesus aladi a ben e preiki, èn den kisi leri fu de preikiman fu a bun nyunsu (Mateyus 10:7; Markus 1:16, 18, 20, 38; Lukas 4:43; 10:9). Di den kaba kisi leri tapu 14 Nisan 33 G.T., dan Yesus taigi den: „A sma di e sori bribi na ini mi, a sma dati sa du sosrefi den wroko di mi e du; èn a sa du wroko di bigi moro leki den disi” (Yohanes 14:12). Aladi den disipel fu Yesus ben o gi kotoigi finifini neleki fa Yesus ben du dati, toku den ben o gi kotoigi na moro presi. Heri esi den kon frustan taki den nanga ala tra disipel di ben o kon ete, ben o gi kotoigi na ini „ala kondre”, èn den ben o go doro nanga dati te na „a kaba fu a sistema disi”.—Mateyus 28:19, 20.
5. Na sortu fasi wi kan kisi wini fu a leri di Yesus gi den bakaman fu en?
5 Wi e libi na ini a ten fu „a kaba fu a sistema disi” (Mateyus 24:3). Tra fasi leki den fosi disipel dati, wi no man waka nanga Yesus èn luku fa a e preiki gi sma. Ma toku wi kan kisi wini fu den sani di a ben e leri den disipel fu en, te wi e leisi na ini Bijbel fa a ben e preiki èn sortu sani a ben taigi den bakaman fu en fu du (Lukas 10:1-11). Ma na artikel disi o taki fu wan tra tumusi prenspari sani di Yesus sori den disipel fu en, namku a yoisti fasi fa wan sma musu si a preikiwroko.
A ben e broko en ede nanga tra sma
6, 7. Sortu fasi Yesus ben abi di ben meki taki a kisi bun bakapisi na ini a diniwroko fu en? Fa wi kan teki na eksempre fu en ini a tori disi?
6 Fu san ede Yesus ben man gi kotoigi na so wan bun fasi? Wan sani, na fu di a ben poti prakseri na sma trutru èn a ben e broko en ede nanga den. A psalm skrifiman ben taki na fesi taki Yesus ben o „firi sari gi a mofinawan èn gi a pôtiwan” (Psalm 72:13). A no de fu taki dati a meki a profeititori dati kon tru. Bijbel e fruteri san pasa wan leisi: „Di a ben si na ipi a ben firi sari nanga den, bika den ben kisi kwinsi èn den ben e waka bruyabruya leki skapu sondro skapuman” (Mateyus 9:36). Srefi sma di ben du seryusu sondu, ben kan si taki a ben e broko en ede nanga den èn a sani dati ben hari den kon na Yesus.—Mateyus 9:9-13; Lukas 7:36-38; 19:1-10.
7 Wi na ini a ten disi o abi bun bakapisi tu te wi e sori taki wi e broko wi ede nanga sma, neleki fa Yesus ben du dati. Bifo yu e go na ini a preikiwroko, dan teki ten fu prakseri taki a boskopu di yu e tyari gi den sma, na wan sani di den abi fanowdu trutru. Prakseri fu den problema di den abi kande èn di soso a Kownukondre kan lusu gi den. Teki a fasti bosroiti fu abi wan bun denki fu ala sma, fu di yu no sabi suma o arki a boskopu fu yu. Kande a sma di yu o miti, begi fu wan sma leki yu kon na en fu yepi en!
Lobi ben meki taki a ben e du sani
8. Sortu sani di ben meki taki Yesus preiki a bun nyunsu gi sma, e meki den bakaman fu en du a srefi sani tu?
8 A bun nyunsu di Yesus ben meki bekènti, ben abi fu du nanga den moro prenspari strei pe libisma musu sori na sortu sei den de, namku efu den ben o du a wani fu Yehovah, efu den ben o santa En nen, èn efu den ben o sori taki En na a Moro Hei Tiriman (Mateyus 6:9, 10). A lobi di Yesus abi gi en Tata, meki taki a ben man tan getrow te na a kaba èn a ben man gi finifini kotoigi fu a Kownukondre, di sa tyari wan kaba kon na den strei dati (Yohanes 14:31). Na ini a ten disi, den bakaman fu Yesus abi a srefi lobi disi tu, èn dati meki den e teki prati fayafaya na a preikiwroko. Na apostel Yohanes taki: „Disi na san a lobi fu Gado wani taki, dati wi e du san den komando fu en e taki”, sosrefi a komando fu preiki a bun nyunsu èn fu meki disipel.—1 Yohanes 5:3; Mateyus 28:19, 20.
9, 10. Boiti taki wi lobi Gado, dan a lobi gi suma sosrefi o pusu wi fu gi kotoigi finifini?
9 Yesus ben taigi den bakaman fu en: „Efu unu lobi mi, dan unu sa hori den komando fu mi. A sma di abi den komando fu mi èn e hori den, en na a sma di lobi mi” (Yohanes 14:15, 21). Sobun, lobi gi Yesus musu meki taki wi e gi kotoigi fu a waarheid èn du den tra sani di Yesus taigi wi fu du. Wan leisi di Yesus sori ensrefi na Petrus baka di a kisi wan opobaka, dan a taigi Petrus: „Gi den pikin skapu fu mi nyanyan. . . . Wei den skapu fu mi. . . . Gi den pikin skapu fu mi nyanyan.” San ben o meki Petrus du dati? Yesus ben gi piki tapu na aksi disi, di a aksi Petrus ibri tron baka: „Yu lobi mi? . . . Yu lobi mi? . . . Yu lobi mi?” Iya, a lobi di Petrus ben abi gi Yesus, ben o meki a gi kotoigi finifini, a ben o suku den „pikin skapu” fu Yesus, èn baka dati a ben o de wan skapuman na yeye fasi gi den.—Yohanes 21:15-17.
10 Na ini a ten disi, wi no sabi Yesus leki fa Petrus ben sabi en. Ma wi sabi o prenspari a sani de di Yesus du gi wi. A e naki wi ati trutru taki a lobi wi so te, taki a „ondrofeni gi ala sma san na dede” (Hebrewsma 2:9; Yohanes 15:13). Wi abi a srefi firi leki Paulus di a ben skrifi: „A lobi di Krestes abi, e pusu wi . . . A dede gi ala sma, so taki den wan di e libi, no musu libi gi densrefi moro, ma gi a sma di dede gi den” (2 Korentesma 5:14, 15). Te wi e si a wroko fu gi kotoigi finifini, leki wan seryusu sani, dan wi e sori taki wi e warderi en trutru taki Yesus sori so wan lobi gi wi, èn wi e sori sosrefi taki wi lobi en tu (1 Yohanes 2:3-5). Noiti wi wani si a preikiwroko leki wan sani di no de so prenspari, fu di dati kan sori leki a srakti-ofrandi fu Yesus no de so prenspari gi wi.—Hebrewsma 10:29.
Tan poti prakseri na san prenspari trutru
11, 12. Fu san ede Yesus ben kon na grontapu, èn fa a sori taki disi ben de a moro prenspari wroko gi en?
11 Di Yesus ben de na fesi Pontius Pilatus, a taki: „Na fu a sani disi ede mi gebore, èn na fu a sani disi ede mi kon na grontapu, fu mi gi kotoigi fu a waarheid” (Yohanes 18:37). Yesus no ben meki nowan sani puru en prakseri fu a gi di a ben e gi kotoigi fu a waarheid. Gado ben wani taki a ben musu du dati.
12 Satan tesi Yesus ini a tori disi trutru. Syatu baka di Yesus dopu, dan Satan taigi en taki a ben kan meki Yesus tron wan prenspari sma na ini grontapu, fu di a ben kan gi Yesus „ala den kownukondre fu grontapu nanga a moi fu den” (Mateyus 4:8, 9). Bakaten, den Dyu ben wani meki Yesus tron kownu (Yohanes 6:15). Son sma na ini a ten disi kan prakseri taki a ben o bun efu Yesus ben du dati, fu di en leki libisma kownu, ben o man du furu bun sani gi libisma. Ma Yesus weigri fu denki so. A moro prenspari sani gi en, ben de fu gi kotoigi fu a waarheid.
13, 14. (a) Sortu sani no ben kan puru Yesus prakseri na a moro prenspari sani di a ben kon fu du? (b) San Yesus du, aladi a ben pôti?
13 Boiti dati, Yesus no ben meki gudu puru en prakseri fu san a ben kon fu du. Fu dati ede, a no ben e libi leki wan guduman. A no ben abi en eigi oso srefi. Wan leisi a taki: „Den krabudagu abi olo èn den fowru di e frei na loktu abi sribipresi, ma a Manpikin fu libisma no abi nowan presi fu poti en ede” (Mateyus 8:20). Di Yesus dede, dan a wan-enkri warti sani di Bijbel e taki dati a ben abi, ben de wan krosi di den srudati fu Rome ben trowe lot fu kisi en (Yohanes 19:23, 24). Ma dati wani taki dati Yesus ben libi wan soso libi? Kwetikweti!
14 Yesus ben du moro leki san iniwan guduman di lobi fu gi sma sani, ben sa man du oiti. Paulus ben taki: „Unu sabi a no-frudini bun-ati fu wi Masra Yesus Krestes, taki aladi a ben gudu, toku a ben kon pôti fu unu ede, so taki unu ben sa kan kon gudu nanga yepi fu a pôtifasi fu en” (2 Korentesma 8:9; Filipisma 2:5-8). Aladi Yesus no ben abi furu gudu, toku a gi sakafasi sma na okasi fu kisi volmaakti libi fu têgo. Wi de nanga bigi tangi taki a du disi! Èn wi e prisiri srefisrefi taki a kisi en pai fu di a tan du a wani fu Gado leki a moro prenspari sani na ini en libi!—Psalm 40:8; Tori fu den Apostel 2:32, 33, 36.
15. San warti moro gudu?
15 Kresten na ini a ten disi e du muiti fu de leki Yesus fu di den no e meki gudu puru den prakseri na san prenspari (1 Timoteyus 6:9, 10). Den sabi taki gudu kan meki a libi moro makriki, ma den sabi tu taki gudu no kan meki wan sma kisi têgo libi na ini a ten di e kon. Te wan Kresten dede, dan nowan fu den gudu fu en abi waarde gi en, neleki fa a krosi fu Yesus no ben abi waarde gi en di a dede (Preikiman 2:10, 11, 17-19; 7:12). Te wan Kresten dede, dan a wan-enkri warti sani di a abi, na a banti di a abi nanga Yehovah èn nanga Yesus Krestes.—Mateyus 6:19-21; Lukas 16:9.
A no ben lasi-ati te sma ben e gens en
16. San Yesus du di sma ben e gens en?
16 A gens di sma ben e gens Yesus, no ben puru a prakseri fu en fu a gi di a ben e gi kotoigi fu a waarheid. A ben sabi taki a ben o dede leki srakti-ofrandi na a kaba fu en diniwroko na grontapu, ma dati srefi no ben meki a lasi-ati. Paulus ben taki fu Yesus: „Na fu a prisiri di ben e wakti en, meki a dede na a pina-postu èn a no ben broko en ede taki a ben o kisi syen; a go sidon na a reti-anusei fu a kownusturu fu Gado” (Hebrewsma 12:2). Luku taki Yesus „no ben broko en ede taki a ben o kisi syen”. A no ben broko en ede nanga san gensman ben e denki fu en. A moro prenspari sani gi en, ben de fu du a wani fu Gado.
17. San wi kan leri fu a fasi fa Yesus horidoro?
17 Paulus ben leri wan sani fu a fasi fa Yesus horidoro. Dati meki a gi Kresten a deki-ati disi: „Poti prakseri finifini na a sma di ben frudrage den ogri di sondari ben taki fu en sondro taki den ben abi wini fu dati; na so fasi unu no sa kon weri èn lasi-ati” (Hebrewsma 12:3). A tru taki wi kan kon weri te sma e gens wi, noso te den e krutukrutu nanga wi dei fu dei. Wi kan kon weri fu tan kakafutu gi den sani fu grontapu di e hari wi, èn kande famiriman fu wi e krutu nanga wi taki wi musu „tron wan prenspari sma na ini a libi”. Ma neleki Yesus, wi e frutrow tapu Yehovah fu gi wi krakti te wi tan abi a fasti bosroiti fu poti a Kownukondre na a fosi presi na ini wi libi.—Mateyus 6:33; Romesma 15:13; 1 Korentesma 2:4.
18. Sortu moi sani wi kan leri fu den wortu di Yesus taigi Petrus?
18 Yesus no ben meki nowan sani puru en prakseri na san a ben musu du, èn dati de krin fu si di a bigin taigi den disipel fu en taki a ben o dede. Petrus ben gi Yesus a deki-ati fu „sorgu bun” gi ensrefi èn a ben gi Yesus a dyaranti taki ’a sani disi no ben o miti en kwetikweti’. Yesus ben weigri fu arki iniwan sani di ben kan meki a no hori ensrefi moro na a bosroiti di a ben teki fu du san Yehovah wani. A drai en baka gi Petrus èn a taki: „Komopo na mi fesi, Satan! Yu wani taki mi musu fadon, bika yu no e denki leki fa Gado e denki, ma yu e denki leki fa libisma e denki” (Mateyus 16:21-23). Meki a de so, taki wi sosrefi abi a fasti bosroiti fu no denki leki fa libisma e denki. Na presi fu dati, meki a de so ala ten taki wi e denki soleki fa Gado e denki.
A Kownukondre sa tyari wini kon fu ala ten
19. Aladi Yesus ben e du wondru, toku san ben de a moro prenspari pisi fu a diniwroko fu en?
19 Yesus ben du furu wondru fu sori taki en na a Mesias trutru. A ben wiki dedesma srefi. Aladi den sani disi ben e hari sma kon na en, toku Yesus no ben kon soso fu du bun gi libisma. A ben kon fu gi kotoigi fu a waarheid. A ben sabi taki den bun sani di a ben e du gi den sma, ben o de fu wan syatu pisi ten nomo. Srefi den sma di ben kisi wan opobaka, ben o dede baka. Soso te a ben o gi kotoigi fu a waarheid, a ben sa man yepi son sma fu kisi têgo libi.—Lukas 18:28-30.
20, 21. San na a yoisti fasi fa wan Kresten musu si den bun sani di a kan du gi sma?
20 Na ini a ten disi, son sma e pruberi fu du bun sani neleki Yesus, fu di den e meki ati-oso, noso fu di den e du tra bun sani gi den pôtisma na grontapu. Son leisi, den e lasi furu te den e du den sani disi, èn na opregtifasi fu den sma disi de fu prèise trutru. Ma den bun sani di den e du, de fu wan syatu pisi ten nomo. Na soso a Kownukondre sa man tyari wini kon fu ala ten. Fu dati ede, a moro prenspari sani gi Yehovah Kotoigi, na fu gi kotoigi fu a waarheid fu a Kownukondre dati, neleki fa Yesus ben du dati.
21 A no de fu taki dati tru Kresten e du bun sani gi tra sma. Paulus ben skrifi: „Solanga a ten bun gi wi ete, meki wi du bun gi ala sma, ma spesrutu gi den wan di de na ini a srefi bribi leki wi” (Galasiasma 6:10). Na ini muilek ten, noso te wan sma de na nowtu, dan wi no e draidrai fu „du bun” gi den birtisma fu wi, noso gi den Kresten brada nanga sisa fu wi. Ma toku wi no e frigiti san na a moro prenspari sani di wi musu du, namku fu gi kotoigi fu a waarheid.
Leri fu na eksempre fu Yesus
22. Fu san ede Kresten e preiki gi tra sma?
22 Paulus ben skrifi: „Trutru, helu fu mi efu mi no ben sa meki a bun nyunsu bekènti!” (1 Korentesma 9:16) A no ben e si a bun nyunsu leki wan sani di no de so prenspari, fu di a ben sabi taki en nanga den sma di ben arki en, ben sa man kisi libi efu a ben preiki a bun nyunsu (1 Timoteyus 4:16). Na a srefi fasi wi e si a diniwroko fu wi. Wi wani yepi tra sma. Wi wani sori lobi gi Yehovah. Wi wani sori taki wi lobi Yesus èn taki wi e warderi a bigi lobi di a sori gi wi. Dati meki wi e preiki a bun nyunsu èn na so fasi wi ’no e libi moro gi den lostu fu libisma, ma gi a wani fu Gado’.—1 Petrus 4:1, 2.
23, 24. (a) San wi e leri fu a wondru fu den fisi? (b) Suma na ini a ten disi, e gi kotoigi finifini?
23 Neleki Yesus, wi no e meki noti puru wi prakseri na a moro prenspari wroko di wi musu du, awinsi sma e krutukrutu nanga wi, noso awinsi den e atibron èn no wani arki a boskopu fu wi. Wi e leri wan sani fu a wondru di Yesus du di a gi Petrus nanga Andreas a kari fu tron wan bakaman fu en. Wi e frustan taki te wi e gi yesi na Yesus, èn fu taki en na wan agersi fasi, te wi e trowe den fisinèt fu wi na ini watra pe a gersi leki fisi no de, dan a fisiwroko fu wi kan abi bun bakapisi. Furu Kresten ’fisiman’ kisi furu ’fisi’ baka di den wroko furu yari na presi di ben de leki watra di no abi fisi. Trawan ben man go pe moro ’fisi’ de èn den ben kisi furu bun bakapisi tu. Awinsi san wi e du, wi no o tapu fu trowe den fisinèt fu wi, iya, wi no sa tapu fu gi kotoigi fu a waarheid. Wi sabi taki na nowan presi na grontapu, Yesus no taki ete dati a preikiwroko no abi fu du moro.—Mateyus 24:14.
24 Moro leki siksi milyun Kotoigi fu Yehovah e wroko fayafaya na ini moro leki 230 kondre. Na ini A Waktitoren fu 1 februari 2005, yu sa si na alayari raportu fu den pe yu sa man leisi fa den du a diniwroko fu den na heri grontapu na ini a yari 2004. A raportu dati o sori taki Yehovah blesi a preikiwroko trutru. Sobun, na ini a pisi ten di a sistema disi de ete, meki wi tan hori bun na prakseri sortu deki-ati Paulus e gi wi nanga den wortu disi: „Preiki a wortu, du en leki wan sani di musu du wantewante” (2 Timoteyus 4:2). Meki wi tan gi kotoigi finifini, teleki Yehovah taki dati a wroko kaba.
Bigin nanga a yari disi, a Raportu fu a dienstyari fu Yehovah Kotoigi na heri grontapu no sa de fu feni moro na ini A Waktitoren fu 1 yanuari. Na presi fu dati, wi o poti en na ini A Waktitoren fu 1 februari.
Yu kan gi piki?
• Fa wi kan kisi wini fu a leri di Yesus gi den disipel fu en?
• Fa Yesus ben si den sma gi suma a ben e preiki?
• San e meki taki wi wani gi kotoigi finifini?
• Na sortu fasi wi kan tan poti prakseri na a du di wi e du a wani fu Gado, neleki fa Yesus ben du dati?
[Aksi fu a tori disi]
[Prenki na tapu bladzijde 15]
Wi sa abi bun bakapisi na ini a diniwroko fu wi, te wi e sori taki wi e broko wi ede nanga sma, neleki fa Yesus ben du dati
[Prenki na tapu bladzijde 16, 17]
A moro prenspari sani di Yesus kon du na grontapu, ben de fu gi kotoigi fu a waarheid
[Prenki na tapu bladzijde 17]
A moro prenspari sani gi Yehovah Kotoigi, na fu gi kotoigi finifini