Ondrofenitori

Wi leri fu frutrow dorodoro tapu Yehovah

SOLEKI FA NATALI HOLTORF FRUTERI

A ben de yuni 1945. Wan fu den dei fu a mun dati, wan sikisiki man kon na wi oso, èn nanga pasensi a ben tanapu e wakti na a fesidoro. Ruth, a moro yongu umapikin fu mi, skreki, èn bari kari: „Mama, wan freimde sma de na mofodoro!” Ma a no ben sabi taki a freimde sma dati ben de en papa, mi lobi masra Ferdinand. Tu yari na fesi, dri dei nomo baka di Ruth gebore, Ferdinand ben gowe fu oso, ne sma grabu en, èn te fu kaba den poti en na ini wan Nazi strafuman kampu. Ma now, baka wan langa pisi ten, Ruth miti en papa, èn na osofamiri fu wi ben de makandra baka. Mi nanga Ferdinand ben abi furu sani fu fruteri makandra!

FERDINAND gebore na ini 1909 na ini a foto Kiel, na Doisrikondre, èn mi gebore na ini 1907 na ini a foto Dresden di de na ini Doisrikondre tu. Di mi ben abi 12 yari, dan fu a fosi leisi a famiri fu wi miti den Bijbel Ondrosukuman, soleki fa Yehovah Kotoigi ben nen na ini a ten dati. Di mi ben abi 19 yari, mi gowe libi na Evangelie Kerki èn mi gi mi libi abra na Yehovah.

Na a srefi ten dati, Ferdinand klari a heiskoro pe a ben e leri sani fu sipi, èn a tron wan sipiman. Te a ben de na se, dan a ben e aksi ensrefi efu wan Mekiman de trutru. Wan fu den leisi di Ferdinand ben doro baka na Doisrikondre, dan a go luku en brada di ben de wan Bijbel Ondrosukuman. Den sani di en brada fruteri en a wan leisi dati, ben de nofo fu overtoigi en taki Bijbel abi den piki tapu den sani di a ben aksi ensrefi. A gowe libi a Luther Kerki, èn a bosroiti sosrefi fu tapu nanga a wroko di a ben e du leki sipiman. Baka di a ben teki prati fu a fosi leisi na a preikiwroko, a ben angri trutru fu du a wroko disi en heri libi langa. A srefi neti dati, Ferdinand gi en  libi abra na Yehovah. A teki dopu na ini augustus 1931.

A ben e wroko leki sipiman èn leki preikiman

Na ini november 1931, Ferdinand teki loko go na Bakrakondre fu go yepi nanga a preikiwroko drape. Di Ferdinand taigi a brada di ben e orga a wroko na ini a kondre dati, taki a ben de wan sipiman fosi, dan a brada bari taki: „Yu na a yoisti man di wi e suku!” Den brada ben yuru wan boto so taki wan grupu fu pionier (furuten dinari) ben kan go preiki gi den sma di e libi na sei den kanaal na a noordsei fu a kondre. Feifi sma ben de na ini a boto, ma nowan fu den ben man tyari a boto. We, na so Ferdinand tron kapten fu a boto.

Baka siksi mun, den brada aksi Ferdinand fu dini leki pionier na ini Tilburg, na a zuidsei fu Bakrakondre. Na a ten dati, sosrefi mi doro na ini Tilburg fu dini leki pionier èn drape mi miti Ferdinand. Ma baka di wi doro drape, dan wantewante den brada aksi wi fu froisi go na Groningen, na noordsei fu a kondre. Drape wi trow na ini oktober 1932. Wi go tan na ini wan oso pe wan tu pionier ben e tan kaba, èn drape wi ben de den fosi dei baka di wi trow, aladi wi ben e pionier na a srefi ten!

Na ini 1935, Esther, na umapikin fu wi, gebore. Aladi wi ben abi pikinso moni nomo, toku wi ben abi a fasti bosroiti fu tan pionier go doro. Wi froisi go na wan dorpu, èn drape wi ben e tan na ini wan pikin oso. Mi ben e sorgu gi a beibi na oso, aladi mi masra ben tan a heri dei langa na ini a preikiwroko. A tra dei fu en, mi masra ben e sorgu gi a beibi, aladi mi ben e go heri dei na ini a preikiwroko. Na so wi ben e du teleki Esther ben bigi nofo fu go na ini a preikiwroko makandra nanga wi.

Syatu baka dati, a politiek situwâsi na ini Europa kon ogri. Wi kon yere fa sma ben e frufolgu den Kotoigi na ini Doisrikondre, èn wi ben frustan taki heri esi sma ben o frufolgu wi tu. Wi ben e aksi wisrefi efu wi ben o man horidoro te hebi frufolgu ben o miti wi. Na ini 1938, a tirimakti fu Bakrakondre gi a komando taki sma fu dorosei kondre no mag prati kerki buku drape. Fu di den Kotoigi fu Bakrakondre ben wani yepi wi fu go doro nanga wi diniwroko, meki den gi wi den nen fu sma di ben wani sabi moro fu a wroko fu wi. Na so wi ben man studeri Bijbel nanga wan tu fu den sma disi.

Na a ten dati, wan kongres fu Yehovah Kotoigi ben o hori. Aladi wi no ben abi nofo moni fu go nanga loko na a kongres, toku wi ben wani de drape trutru. We, na so wi teki wi baisigri èn wi rei dri dei langa, aladi pikin Esther ben e sidon na ini wan beibi sturu na fesisei fu a baisigri. Na netiten wi ben sribi na den Kotoigi di ben e tan na seipasi pe wi ben e rei. Wi ben breiti trutru fu de fu a fosi leisi na wan kongres na Bakrakondre! A programa meki wi de srekasreka gi den tesi di ben o miti wi. Ma san de moro prenspari, na taki wi kisi deki-ati fu poti wi frutrow tapu Gado. Wi ben hori wisrefi na den wortu di skrifi na ini Psalm 31:6: „Mi fu mi sei, tapu Yehovah mi e frutrow.”

Den Nazi e onti wi

Na ini mei 1940, den Nazi broko kon na ini Bakrakondre. Syatu baka dati a Gestapo, noso a grupu fu skowtu di e wroko kibrikibri, kon na wi oso sondro taki wi ben fruwakti  dati, èn dati ben pasa di wi ben e seti wan tu Bijbel publikâsi di wi ben kisi. A Gestapo teki Ferdinand tyari go na a edekantoro fu den. Mi nanga Esther go luku en drape doronomo, èn son leisi te wi ben go, den skowtu ben e poti wan lo aksi gi en, èn den ben e fon en leti na wi fesi. Na ini december, den lusu Ferdinand sondro taki a ben fruwakti dati, ma a no ben o teki langa fosi den ben o sroto en baka. Di wi kon na oso wan mofoneti, dan wi si wan Gestapo oto krosibei fu wi oso. Ferdinand ben man lowe gowe, ma mi nanga Esther go na ini na oso. A Gestapo ben e wakti wi. Den ben wani Ferdinand. A srefi neti dati, baka di a Gestapo gowe, den skowtu fu Bakrakondre kon èn den tyari mi gowe fu poti aksi gi mi. A dei baka dati, mi nanga Esther go kibri na a oso fu wan Kotoigi trowpaar di ben nen Norder. Den sma disi di no ben dopu so langa ete, gi wi wan presi fu tan èn den kibri wi sosrefi.

Na a kaba fu yanuari 1941, a Gestapo hori wan pionier trowpaar di ben e tan na ini wan boto di de leki wan oso. A tra dei fu en, mi masra nanga wan kring-opziener go na ini a boto fu teki wan tu sani fu a trowpaar, ma sma di ben e wroko nanga a Gestapo feti nanga den. Ferdinand ben man hari ensrefi puru, èn a lowe gowe na tapu en baisigri. Ma den grabu a kring-opziener tyari go na strafu-oso.

Den brada di ben abi frantwortu, ben aksi Ferdinand fu teki a wroko abra fu a kring-opziener. Disi ben wani taki dati sowan dri dei nomo na ini wan mun, a ben o de na oso. Disi ben de wan nyun tyalensi gi wi, ma mi tan pionier go doro. A Gestapo ben e suku Kotoigi moro nanga moro, èn fu dati ede wi ben musu tan froisi fu a wan presi go na a trawan. Na ini 1942, wi froisi dri leisi. Te fu kaba, wi doro na ini a foto Rotterdam, farawe fu a presi pe Ferdinand ben e du a diniwroko fu en kibrikibri. Na a ten dati mi ben de nanga bere fu a di fu tu pikin fu wi. Nanga switifasi a famiri Kamp teki wi na ini den oso. A no langa na fesi, a Gestapo ben seni den tu manpikin fu a trowpaar disi go na strafuman kampu.

A Gestapo de na wi baka nomonomo

Ruth, a di fu tu pikin fu wi, gebore na ini yuli 1943. Baka di Ruth gebore, dan Ferdinand ben man tan dri dei nanga wi, ma baka dati a ben abi fu gowe, èn wan heri pisi ten pasa fosi wi si en baka. Sowan dri wiki baka dati, skowtu kisi Ferdinand na ini Amsterdam. Den tyari en go na a kantoro fu a Gestapo, èn drape den kon sabi suma na en. A Gestapo poti wan lo aksi gi en, fu di den ben wani dwengi en fu taki sani di ben abi fu du nanga a preikiwroko fu wi. Ma a wan-enkri sani di Ferdinand ben wani fruteri den, na taki en na wan Kotoigi fu Yehovah èn taki a no ben abi noti fu du nanga politiek afersi. A Gestapo skowtu ben atibron srefisrefi nanga Ferdinand, fu di leki borgu fu Doisrikondre, a no ben gi en nen fu du a srudatiwroko. Den ben wani kiri en, fu di den ben feni taki a ben de wan toriman.

Na ini den feifi mun baka dati, den hori Ferdinand na ini wan strafuman kamra, pe den ben e taigi en ibri tron baka taki wan grupu srudati ben o sutu en kiri. Ma toku a no degedege srefisrefi, ma a tan loyaal na Yehovah. San ben yepi en fu tan tranga na yeye fasi? A Wortu fu Gado, Bijbel. A no de fu taki dati, fu di Ferdinand ben de wan Kotoigi, meki a no ben mag abi wan Bijbel. Ma den tra strafuman ben mag aksi fu kisi wan Bijbel. Fu dati ede Ferdinand kisi a tra strafuman na ini a strafuman kamra fu en so fara fu aksi en famiri fu seni wan Bijbel kon gi en. Furu yari baka dati, te Ferdinand ben e taki fu a tori disi, dan en ai ben e brenki, èn a ben e taki: „A Bijbel dati trowstu mi trutru!”

Na a bigin fu yanuari 1944, den tyari Ferdinand wantronso go na wan strafuman kampu na ini Vught, na Bakrakondre. A no ben fruwakti taki a ben o de wan blesi gi en te den ben o tyari en go drape, bika a miti 46 tra Kotoigi drape. Di mi yere taki den ben seni en go na wan tra presi, dan mi ben breiti so te fu yere taki a ben de na libi ete!

Den e tan preiki na ini a strafuman kampu

A libi na ini a kampu ben hebi srefisrefi. A ben de wan aladei sani taki den strafuman ben de nanga angribere, taki den no ben abi nofo krosi fu waran den skin, èn taki hebi kowru ben e naki den. Ferdinand kon siki seryusu na en gorogoro.  Wan dei di a ben kowru srefisrefi, a ben musu tanapu na dorosei na ini wan rei e wakti teleki sma ben kari en nen. Baka dati a go na a presi pe den e sorgu gi sikisma. Sikisma di ben abi korsu fu 40 graden noso moro hei leki dati, ben mag tan drape. Ma Ferdinand no ben mag tan, fu di a korsu fu en ben de 39 graden nomo! Den sma taigi en fu go wroko baka. Ma wan tu strafuman yepi en fu di den ben e firi sari gi en, èn difrenti leisi den meki a go kibri na wan waran presi fu wan syatu pisi ten. A kon firi ensrefi moro bun di a weer kon moro waran. Boiti dati, a ben e pasa tu taki te sonwan fu den brada ben kisi nyanyan sani fu famiri, dan den ben e prati dati nanga trawan, èn na so Ferdinand ben man kisi ensrefi baka.

Bifo den ben poti mi masra na strafu-oso, dan a preikiwroko ben de a moro prenspari sani na ini en libi, èn di a ben de na ini a kampu, a tan fruteri trawan fu a bribi fu en. Furu tron den skowtu na ini a kampu ben e taigi en wan lo fruferi sani fu di a ben e weri wan persi dri-uku na tapu en krosi. A dri-uku disi ben de a marki di ben e sori taki wan strafuman na wan Kotoigi. Ma gi Ferdinand, den sani di den skowtu ben taki ben de wan okasi fu bigin wan takimakandra nanga den. Na a bigin, den brada ben kan preiki soso na ini den strafuman kampu pe moro furu Kotoigi ben e tan. Den brada ben aksi densrefi: ’Fa wi kan miti moro strafuman?’ Sondro fu den sabi, den sma di ben e tiri a strafuman kampu kon nanga wan lusu. Fa so?

Den brada ben e kibri wan tu Bijbel publikâsi, èn sosrefi 12 Bijbel. Wan dei, den waktiman feni wan tu publikâsi, ma den no ben man kon sabi suma ben abi den sani disi. Fu dati ede, den skowtu fu a kampu ben feni taki den Kotoigi no ben musu de makandra moro. Sobun, den strafu ala den brada, fu di den meki den go tan na ini oso pe sosrefi strafuman ben e tan di no de Kotoigi. Boiti dati, te nyanyan yuru ben doro, dan den brada ben musu sidon nyan sei strafuman di no de Kotoigi. Den brada ben kisi wini fu a seti disi. Now den ben man du san den ben wani du sensi na a bigin, èn dati ben de fu preiki gi so furu strafuman leki den ben man.

Mi wawan e sorgu gi den tu umapikin

Na a srefi ten dati, mi nanga den tu umapikin fu mi ben e tan ete na ini Rotterdam. A ben muilek srefisrefi gi wi na ini a kowru pisi ten fu a yari 1943 go miti 1944. Na bakasei fu wi oso, wan presi ben de pe Doisri srudati ben poti bigi gon fu sutu den opolani di ben e frei pasa. Na fesisei fu wi oso a Waal Lanpe ben de, èn den tra kondre di ben span anu makandra teige Doisrikondre, ben e trowe bom drape ala leisi baka. Drape no ben de wan bun presi srefisrefi fu kibri, bika wi ben kan lasi wi libi. Boiti dati, nyanyan no ben de fu feni so makriki. Moro leki iniwan ten bifo, wi leri fu poti wi frutrow tapu Yehovah dorodoro.​—Odo 3:5, 6.

Esther, di ben abi aiti yari, ben yepi a pikin osofamiri fu wi fu di a ben e go tanapu na ini wan rei na wan presi pe sma ben kan kisi nyanyan. Furu tron, te a ben doro na fesisei fu a rei, dan a nyanyan ben kaba. Wan fu den leisi di a ben go suku nyanyan, a ben de leti drape pe opolani ben e sutu na tapu den feanti. Mi bruya di mi yere den bom e sutu, ma syatu baka dati mi no ben e frede moro. Na presi fu dati mi bigin krei fu di mi ben breiti taki a ben drai kon baka sondro taki wan sani pasa nanga en. A ben abi sosrefi wan tu gron nyanyan na en. A fosi sani di mi aksi en, na: „San pasa?” A no ben bruya srefisrefi di a piki mi taki: „Di den bom fadon, mi du nomo san papa ben taigi mi fu du: ’Go didon langalanga na tapu a gron, tan didon, èn begi Gado.’ Na a sani dati yepi mi!”

Fu di sma ben man yere na a fasi fa mi e taki dati mi na wan Doisri, meki a ben moro bun taki Esther ben e go bai wan tu sani di wi ben man bai. Den Doisri srudati kon si dati, èn den ben bigin poti aksi gi Esther. Ma a no fruteri den noti san a no ben mag fruteri den. Mi ben e leri Esther sani fu Bijbel na oso, èn fu di a no ben man go na skoro, meki mi leri en fu leisi èn fu skrifi, èn sosrefi fa fu du tra sani.

Esther ben e yepi mi tu na ini a preikiwroko. Fosi mi ben e go na wan sma en oso fu studeri Bijbel nanga en, dan Esther ben go fosi fu si efu nowan sma ben o si wi. A ben e luku efu a bijbelstudenti trutru ben poti den sani di ben musu sori taki kefar no ben de. Fu eksempre, a sma di  mi ben o go fisiti, ben gwenti fu poti wan bromkipatu na wan spesrutu presi na a fensrebangi fu meki mi sabi taki mi ben kan kon na inisei. Te mi ben e hori a bijbelstudie, dan Esther ben e tan na dorosei fu luku efu kefar ben e kon, aladi a ben e trusu a beibiwagi pe Ruth ben de na ini, go-kon na tapu strati.

Ferdinand e go na Sachsenhausen

Fa sani ben e waka nanga Ferdinand? Na ini september 1944, sma grabu en makandra nanga furu trawan, èn den tyari den go na a loko station. Drape den kwinsi grupu fu 80 strafuman poti na ini den wagi fu a loko. Ibri wagi fu a loko, ben abi wán embre di den strafuman ben musu gebroiki leki toilet, èn wan tra embre di ben abi watra na ini fu dringi. Den ben de na pasi dri dei nanga dri neti langa, èn den wagi ben span so te taki den strafuman ben man tanapu wawan! Pikinmoro winti no ben e kon na inisei. Den wagi fu a loko ben tapu na ala sei, èn soso wan tu pikin olo ben de na difrenti presi na a skin fu den wagi. Mi no man fruklari fa den strafuman ben e faya, èn fa angri nanga watra ben e kiri den, libi fu a tingi di na inisei fu a wagi ben e tingi.

Safrisafri a loko kon stop na a Sachsenhausen strafuman kampu di ala sma ben sabi leki wan presi pe wan lo takru sani ben e pasa. Den teki ala den sani di den strafuman ben abi ete, boiti den 12 pikin Bijbel di den Kotoigi ben tyari kon drape nanga den!

Den seni Ferdinand nanga aiti tra brada go wroko na wan tra kampu na ini Rathenow, èn a kampu disi ben de ondro a tiri fu Sachsenhausen. Drape den ben musu meki wrokosani di sma e gebroiki na ini na orloku. Aladi sma ben gwenti fu tapu skreki gi den brada taki den ben o kiri den, toku den brada weigri fu du a sortu wroko dati. Te mamanten den brada ben e taki fu wan bijbeltekst fu man gi makandra deki-ati fu tan tanapu kánkan, èn wan fu den tekst dati ben de Psalm 18:2. Na so fasi den ben man denki dipi fu a tekst dati a heri dei. Disi ben yepi den brada fu denki dipi fu yeye afersi.

Te fu kaba, den brada yere bigi gon e sutu, èn a sani disi ben sori taki den srudati grupu fu den kondre di ben e feti teige Doisrikondre, èn sosrefi den srudati grupu fu Rosiakondre, ben e kon moro krosibei. Den srudati fu Rosiakondre ben de den fosiwan di doro na a kampu pe Ferdinand nanga den mati fu en ben de. Den srudati gi den strafuman nyanyan, èn den komanderi den fu gowe libi a kampu. Na a kaba fu april 1945, a legre fu Rosiakondre gi den primisi fu go na oso.

Wi de makandra leki wan osofamiri te fu kaba

Tapu 15 yuni, Ferdinand doro na ini Bakrakondre. Den brada na ini Groningen gi en wan switikon. Heri esi a kon yere taki wi de na libi èn taki wi ben e tan na wan boitipresi, èn wi kisi fu yere taki a ben drai kon baka. A ben gersi leki wi ben musu wakti wan langa pisi ten fosi a doro drape. Ma te fu kaba, wan dei a pikin Ruth bari kari: „Mama, wan freimde sma de na mofodoro!” Dati ben de mi lobi masra èn a lobi papa fu mi pikin!

Wi ben musu lusu furu problema, fosi wi ben kan abi wan bun osofamiri-libi baka. Wi no ben abi wan presi fu tan, èn wan bigi problema di wi ben abi, na fu kisi primisi fu tan na ini Bakrakondre. Fu di wi ben de Doisri, meki wan tu yari langa den lantiman fu Bakrakondre ben e handri  nanga wi leki wi na freimdesma. Ma te fu kaba, wi ben man seti wi libi drape èn wi ben man bigin libi na a fasi fa wi ben angri fu libi, namku fu dini Yehovah makandra leki wan osofamiri.

„Tapu Yehovah mi e frutrow”

Na ini den yari baka dati, te mi nanga Ferdinand ben e kon makandra nanga wan tu mati fu wi di ben libi na ini a tranga ten dati tu, dan wi ben lobi fu taki fa Yehovah tiri wi na wan lobi-ati fasi na ini den muilek ten dati (Psalm 7:1). Wi breiti taki na ini ala den yari dati, Yehovah gi wi na okasi fu yepi meki Kownukondre afersi go na fesi. Wi ben gwenti fu taki sosrefi fa wi ben breiti taki wi gebroiki den yongu yari fu wi fu du santa diniwroko gi Yehovah.​—Preikiman 12:1.

Baka a pisi ten fu a frufolgu di den Nazi ben e frufolgu wi, dan mi nanga Ferdinand dini Yehovah makandra moro leki 50 yari, fosi a kaba a diniwroko fu en dyaso na grontapu tapu 20 december 1995. Dyonsro mi o abi 98 yari. Ibri dei mi e taki Yehovah tangi taki den pikin fu wi yepi wi so furu na ini den muilek yari dati, èn taki te now ete mi e du san mi man na ini a diniwroko fu en, fu kan gi glori na en nen. Mi de nanga tangi gi ala den sani di Yehovah du gi mi, èn mi e angri trutru fu tan libi akruderi den wortu disi: „Mi fu mi sei, tapu Yehovah mi e frutrow.”—Psalm 31:6.

[Prenki na tapu bladzijde 19]

Mi nanga Ferdinand na ini oktober 1932

[Prenki na tapu bladzijde 19]

A boto „Almina” di den botoman ben gebroiki fu go preiki

[Prenki na tapu bladzijde 22]

Mi, Ferdinand, nanga den pikin