A preikiwroko fu Saulus e meki taki sma e si en leki wan feanti

DEN Dyu na ini Damaskus no ben man frustan san pasa. Fa wan fayafaya bakaman fu a Dyu bribi ben kan drai baka gi a bribi fu en? Sma ben sabi Saulus leki wan man di ben e muilek den sma na ini Yerusalem di ben e kari a nen fu Yesus. A ben kon na Damaskus fu frufolgu den disipel drape. Ma now, ensrefi ben e preiki taki a srefi wisiwasi ogriman di sma ben spikri na wan postu fu di den ben feni taki a afrontu Gado, ben de a Mesias! Saulus ben kon law?​—Tori fu den Apostel 9:1, 2, 20-22.

Kande wan fasi de fu fruklari a pisi tori disi. Sma di ben komoto fu Yerusalem èn di ben e waka makandra nanga Saulus, ben sa fruteri trawan kande san ben pasa di den ben de na pasi. Di den ben de krosibei fu Damaskus, dan wantronso wan brenki faya koti komoto fu hemel èn na ala sei lontu den leti ben e skèin. Ne den alamala fadon na gron. Wan sten ben de fu yere sosrefi. Nowan sma ben kisi mankeri, boiti Saulus. A ben e didon na a pasi. Te fu kaba, di a opo, dan den tra sma di ben e waka nanga en, ben abi fu tyari en go na Damaskus, fu di a ben kon breni.​—Tori fu den Apostel 9:3-8; 26:13, 14.

Wan gensman e tron wan bakaman

San ben pasa nanga Saulus di a ben de na pasi fu go na Damaskus? A kan de taki a langa pasi, noso a faya son na mindridei ben meki a kon weri? Sma na ini a ten disi di e tweifri na san skrifi na ini Bijbel, feni nomonomo taki a no wan wondru, ma na wan tra sani pasa nanga Saulus. Den e taki dati Saulus en frustan ben kon bruya, noso taki a ben e si sani di no ben de so trutru. Noso den e taki tu dati kande en konsensi ben naki en so te, taki wantronso a no ben sabi san fu du moro, noso dati senwe naki en, èn dati a ben de fu kisi stoipi kande.

Ma Yesus Krestes sori ensrefi na Saulus na ini a brenki faya dati trutru, èn na so a overtoigi Saulus taki En na a Mesias. Son skedrei fu a pisi tori disi, e sori taki Saulus ben fadon komoto fu wan asi. Aladi dati kan de so, toku Bijbel e taki nomo dati a „fadon na gron” (Tori fu den Apostel 22:6-11). Ma a syen di so wan heihei man leki Saulus kisi, ben hati en moro leki a fadon di a fadon na gron, bika now a ben musu fu agri taki den sani di den bakaman fu Yesus ben e preiki, ben de so trutru. A wan-enkri sani di Saulus ben kan du, na fu teki a sei fu den. Saulus, di ben de wan ogri-ati gensman fu a boskopu fu Yesus fosi, ben kon tron wan fu den moro fayafaya bakaman fu en now. Baka di Saulus ben man si baka èn di a teki dopu, dan „Saulus tan kisi moro nanga moro krakti èn a ben bruya den Dyu di ben e tan na ini Damaskus, fu di a ben sori krin taki Yesus na Krestes”.​—Tori fu den Apostel 9:22.

Den misi fu kiri en

Pe Saulus, di sma ben e kari Paulus bakaten, go baka di a drai en libi? Na ini a brifi di a skrifi gi den Galasiasma, a taki: „Mi go na Arabia, dan mi drai kon baka na Damaskus” (Galasiasma 1:17). A wortu „Arabia” e sori go na iniwan pisi fu a kondre Arabia di de krosibei fu a se, sobun Paulus go kande na iniwan fu den presi disi. Son sabiman e taki dati kande Paulus go na ini a gran sabana fu Siria, noso na wan tra presi na ini Nabatea, a  kownukondre fu Kownu Aretas IV. Soleki fa a sori, dan baka di Saulus dopu, a go na wan tiri presi fu denki dipi fu den sani di ben e wakti en, neleki fa Yesus ben go na ini a sabana baka di a dopu.​—Lukas 4:1.

Di Saulus drai go baka na Damaskus, dan „den Dyu bosroiti fu kiri en” (Tori fu den Apostel 9:23). A granman di ben e teki presi gi Kownu Aretas na ini Damaskus, ben e hori wakti na a foto fu man kisi Saulus (2 Korentesma 11:32). Ma aladi den feanti ben e seti sani fu kiri Saulus, den disipel fu Yesus ben e seti sani so, taki a ben man lowe.

Wan tu fu den sma di ben yepi Saulus fu lowe, ben de Ananias nanga den disipel di ben de nanga Saulus wantewante baka di a drai en libi (Tori fu den Apostel 9:17-19). * A kan taki son sma di ben tron bribiman di Saulus preiki gi den na ini Damaskus, ben yepi en tu, bika Tori fu den Apostel 9:25 e taki: „Den disipel fu en teki en poti na ini wan baskita, èn na neti den saka en go na gron, komoto fu wan fensre di ben de na ini a skotu.” A kan taki den wortu „den disipel fu en” e sori go na sma di Saulus gi leri. Awinsi fa a no fa, den bun bakapisi di a ben kisi na ini a preikiwroko, ben meki den gensman teige en moro nanga moro.

San wi kan leri

Te wi e luku den sani di pasa baka di Saulus drai en libi èn teki dopu, dan wi e si krin taki a no ben e broko en ede tumusi nanga san tra sma ben e denki fu en, èn a no ben tapu nanga en diniwroko fu di sma ben e frufolgu en. A moro prenspari sani gi Saulus, ben de a preikiwroko di a ben kisi fu du.​—Tori fu den Apostel 22:14, 15.

Kande a no so langa pasa yu kon frustan o prenspari a de fu preiki a bun nyunsu. Efu disi de so, dan yu sabi taki ala tru Kresten musu de Kownukondre preikiman. A no musu fruwondru yu efu ten na ten a preikiwroko fu yu e meki taki sma e atibron na yu tapu (Mateyus 24:9; Lukas 21:12; 1 Petrus 2:20). A fasi fa Saulus ben e handri te sma ben e gens en, de wan eksempre gi wi. Te Kresten e tan horidoro aladi den e kisi tesi, dan Gado o prisiri nanga den. Yesus taigi den disipel fu en: „Nowan sma sa wani si unu na ai, fu mi nen ede.” Ma toku, a gi den a dyaranti: „Unu sa wini unu sili efu unu horidoro.”​—Lukas 21:17-19.

[Futuwortu]

[Prenki na tapu bladzijde 28]

Saulus „fadon na gron” di Yesus sori ensrefi na en

[Prenki na tapu bladzijde 29]

Saulus ben man lowe di sma seti sani fu kiri en na ini Damaskus