„Fa yu e du dati?”

MURIEL, di abi dri pikin, ben fruwondru srefisrefi di wan owru man di a no ben sabi, ben aksi en a sani disi na ini wan nyanyan-oso. Heri dei kaba a ben de na datra nanga den pikin fu en, èn a ben lasi furu ten. Efu den ben o go na oso fu nyan, dan den no ben o doro biten na a Kresten konmakandra fu den. Sobun, a tyari den pikin go na wan nyanyan-oso di no ben de so fara, so taki den ben kan nyan wan sani esi-esi.

Di den ben de fu kaba nyan, dan wan man waka miti Muriel èn a taki: „Mi ben e luku unu sensi unu kon na inisei. Èn mi si taki den pikin fu yu de heri tra fasi leki den pikin di mi e si furu tron. Efu yu si san tra pikin e du nanga den tafra nanga sturu! Den e poti den futu na tapu a tafra. Den e skoifi den sturu go na ala sei. Ma den pikin fu yu no e meki babari èn den abi bun maniri. Fa yu e du dati?”

Muriel ben piki en taki: „Mi nanga mi masra e studeri Bijbel nanga den pikin fu wi doronomo, èn wi e pruberi fu gebroiki den sani di wi e leri na ini wi libi. Wi na Yehovah Kotoigi.” Di a man yere disi, a taki: „Mi na wan Dyu èn mi ben pasa a Holocaust libilibi. Mi e memre ete fa sma ben e frufolgu Yehovah Kotoigi na ini Doisrikondre. Srefi na a ten dati den Kotoigi ben e difrenti fu tra sma. A fasi fa den pikin fu yu e tyari densrefi, naki mi ati trutru. Mi musu kon ondrosuku a bribi fu yu moro bun.”

Bijbel na wan tumusi bun buku di kan yepi sma fu kweki den pikin fu den. Yehovah Kotoigi wani yepi sma trutru, so taki den kan kisi wini fu a rai di de fu feni na ini den Buku fu Bijbel. Wi e gi yu deki-ati na wan switi fasi fu gi yesi na san skrifi dyaso na ondrosei.