„Gi makandra wan switikon”

FEIBE, wan Kresten uma fu a fosi yarihondro, ben abi wan problema. A ben komoto fu Kenkrea na ini Grikikondre, go na Rome, ma a no ben sabi den Kresten na ini Rome (Romesma 16:1, 2). Edgar Goodspeed, wan man di e vertaal Bijbel, e taki: „Sma na ini Rome [fu a ten dati] ben ogri èn den ben e du ala sortu ogri-ati sani, èn wan lespeki uma, spesrutu wan Kresten uma, noiti no ben o go na den pikin hotel, fu di den presi disi ben abi wan takru nen.” Sobun, pe Feibe ben o feni sribipresi?

Na ini Bijbel ten, sma ben gwenti fu waka fara. Yesus Krestes nanga den disipel fu en ben du disi fu di den ben e preiki a bun nyunsu na heri Yudea nanga Galilea. A no langa baka dati, Kresten zendeling soleki Paulus ben e tyari a boskopu go na difrenti presi na ini a birti fu a Mindrikondre Se, sosrefi na Rome, a mamafoto fu a Gran Kownukondre fu den Romesma. Te den fosi yarihondro Kresten ben e waka go na wan farawe presi, efu na wan presi na ini kontren fu den Dyu, noso na ini kontren fu tra pipel, dan pe den ben e sribi? Sortu problema den ben kisi te den ben e suku sribipresi? San wi kan leri fu a fasi fa den ben e gi sma wan switikon?

„Tide mi musu tan na ini yu oso”

Fu gi sma wan switikon, na wan gwenti di den tru anbegiman fu Yehovah abi langa ten kaba. Fu eksempre, Abraham, Lot, nanga Rebeka ben lobi fu du disi (Genesis 18:1-8; 19:1-3; 24:17-20). A famiri-edeman Yob ben fruteri fa a ben e handri nanga freimdesma: „Nowan freimdesma di ben e libi drape, ben o abi fu sribi na dorosei; ala ten mi doro ben opo go na a pasi.”​—Yob 31:32.

Efu wan Israelsma, di ben e teki waka go na wan presi, ben wani suku sribipresi na wan tra Israelsma, dan a wan-enkri sani di a ben abi fu du nomo, na fu sidon na wan pren na ini wan foto èn wakti fu wan sma aksi en fu kon tan nanga en (Krutuman 19:15-21). Soleki fa a gwenti ben de, dan a sma di ben teki trawan na ini en oso, ben e wasi den futu fu den trawan, a ben e gi den nyanyan nanga dringi, èn a ben e gi nyanyan na den meti fu den sma disi tu (Genesis 18:4, 5; 19:2; 24:32, 33). Son tron te sma ben e teki waka go na wan presi, dan den ben e tyari den eigi sani di den ben sa abi fanowdu, soleki brede nanga win gi densrefi, èn drei grasi noso tra nyanyan gi den buriki fu den. Na so fasi den no ben abi fu muilek den sma di ben o teki den na ini oso, bika na soso wan sribipresi den ben o abi fanowdu.

Bijbel no e taki furu fu a fasi fa Yesus ben e feni sribipresi te a ben e go preiki na difrenti presi, ma awinsi fa no fa, en nanga den disipel fu en ben e feni sribipresi (Lukas 9:58). Di Yesus ben de na Yerikow, dan a wan-enkri sani di a ben abi fu taigi Sakeyus, na: „Tide mi musu tan na ini yu oso.” „Nanga bigi prisiri” Sakeyus ben teki Yesus na ini en oso (Lukas 19:5, 6). Furu tron Yesus ben go tan na den mati fu en na ini Betania, namku Marta, Maria, nanga Lasarus (Lukas 10:38; Yohanes 11:1, 5, 18). Èn soleki fa a sori, dan Yesus ben tan nanga Simon Petrus te a ben de na ini Kaperna-um.​—Markus 1:21, 29-35.

Den sani di Yesus taigi den 12 apostel fu en bifo den ben o go na ini a preikiwroko, e sori fa den sma ben o ontfanga den na ini Israel. Yesus taigi den: „No suku gowtu, solfru, noso kopro fu poti na  ini un monisaka na un seibere; no tyari wan saka nanga nyanyan fu te unu de na pasi, èn no tyari tu krosi, susu, noso wan tiki; bika a wrokoman warti fu kisi a nyanyan fu en. Awansi na ini sortu foto noso dorpu unu e go, suku suma drape warti en fu teki unu na ini oso èn fu yere a boskopu, èn tan drape teleki unu gowe” (Mateyus 10:9-11). A ben sabi taki reti-ati sma ben o teki den disipel fu en na ini oso, èn taki den ben o gi den nyanyan, sribipresi, èn tra sani di den abi fanowdu.

Ma wan ten ben o kon pe preikiman ben o abi fu sorgu gi densrefi èn densrefi ben o abi fu pai gi den sani di den ben o abi fanowdu, te den ben e waka fu a wan presi go na a trawan. Yesus ben sabi taki wan ten ben o doro taki sma no ben o wani si den bakaman fu en na ai, èn taki a preikiwroko ben o du na presi dorosei fu Israel, sobun a taki: „Meki a sma di abi wan monisaka, teki en, èn meki a teki wan nyanyan-saka tu” (Lukas 22:36). Wan prenspari sani di ben o yepi den preikiman fu panya a bun nyunsu, na taki den ben o abi fu waka go na difrenti presi èn den ben o abi fu sribi na son presi.

„Abi a gwenti fu gi sma wan switikon”

Fu di feti no ben de furu na ini a Gran Kownukondre fu den Romesma èn fu di a kondre ben abi furu pasi di ben meki fu ston, meki furu sma di ben e libi drape na ini a fosi yarihondro, ben e teki waka go na difrenti presi. * Disi ben meki taki furu tron sma ben abi wan sribipresi fanowdu te den ben de na pasi. Fu dati ede, sma ben bow pikin hotel na difrenti presi na den pasi pe furu sma ben e waka. Efu yu ben de na so wan hotel, dan a ben o teki wan heri dei fu doro wan trawan. Ma wan buku e taki: „Den sani di sma sabi èn skrifi fu den presi disi, no bun kwetikweti. Difrenti buku èn owruten sani di sma feni, e sori taki nofo tron den presi disi ben brokobroko èn morsu, pikinmoro nowan sturu noso tafra ben de, fyofyo ben de na ini den bedi, a nyanyan nanga dringi no ben bun, a basi nanga den wrokoman no ben de fu frutrow, ala sortu sma ben e kon drape di no ben abi wan bun nen, èn nofo tron den sma disi ben e handri na wan fasi di no fiti kwetikweti” (The Book of Acts in Its Graeco-Roman Setting [A buku Tori fu den Apostel na a ten fu a tirimakti fu Grikikondre nanga Rome]). Yu kan frustan taki wan sma di e hori ensrefi na bun gwenti nanga gronprakseri, no ben o tan na den sortu pikin hotel disi, efu a ben kan feni wan tra sribipresi.

Fu dati ede, a no de fu fruwondru taki ibri tron baka, Bijbel e gi Kresten deki-ati taki den musu lobi fu gi sma wan switikon. Paulus ben gi den Kresten na ini Rome, a deki-ati disi: „Prati sani nanga den santawan akruderi san den abi fanowdu. Abi a gwenti fu gi sma wan switikon” (Romesma 12:13). A ben memre den Dyu Kresten: „No frigiti fu gi sma wan switikon, bika na so fasi, son sma teki engel na ini oso, sondro fu sabi srefi” (Hebrewsma 13:2). Petrus ben gi tra bribiman a deki-ati taki den ben musu „gi makandra wan switikon, sondro fu krutukrutu”.​—1 Petrus 4:9.

Ma na ini son situwâsi a no ben o fiti fu teki sma na ini oso. Di na apostel Yohanes ben taki fu ’ibri sma di e pusu go na fesi èn di no e tan na ini a leri fu Krestes’, dan a ben taki tu: „Noiti un musu teki en na ini un oso, èn un no musu taki en odi tu. Bika a sma di e taki en odi, abi prati na den ogri wroko fu en” (2 Yohanes 9-11). Paulus ben skrifi fu sondari di no e sori berow, taki: „Un no musu moksi unsrefi moro nanga iniwan sma di den ben kari wan brada, di de wan huruman noso wan sma di abi bigi-ai noso wan sma di e anbegi kruktugado noso wan skempiman noso wan drunguman noso wan bedrigiman, èn no nyan nanga so wan sma srefi.”​—1 Korentesma 5:11.

A ben musu fu de so, taki bedrigiman nanga tra sma ben e si a switifasi fu tru Kresten, leki wan moi okasi fu kisi wini gi densrefi nomo. Wan buku de di nen Didache, noso Teaching of the Twelve Apostles (Didache, noso Den leri fu den twarfu apostel), e taki fu Bijbel tori di abi fu du nanga a Kresten bribi. A buku disi e gi a rai taki efu wan preikiman di e go na difrenti presi, e suku sribipresi, dan sma kan teki en na ini oso fu „wán dei, noso fu tu dei efu dati de fanowdu”. Baka dati, te a o gowe, „meki a teki nowan tra sani boiti brede . . . Efu a e aksi moni, dan a de wan falsi profeiti.” A buku e taki moro fara: „Efu a wani tan moro langa nanga unu èn a sabi du wan wroko, dan meki a wroko fu sorgu ensrefi. Ma efu a no sabi du nowan wroko, dan sorgu gi en soleki fa unu feni bun, so taki nowan sma musu abi a denki taki fu di a de wan Kresten,  dan a kan libi leki lesiman na un mindri. Ma efu a no wani wroko, aladi a sabi wroko, dan a e gebroiki a Kresten bribi soso fu kisi wini gi ensrefi; luku bun nanga den sortu sma dati.”

Te na apostel Paulus ben e go na son foto èn a ben o tan na sma oso fu wan langa pisi ten, dan a ben sorgu fu no de wan hebi gi den sma di ben o meki paiman fu en ede. Na presi fu dati, a ben e meki tenti fu seri fu man sorgu ensrefi (Tori fu den Apostel 18:1-3; 2 Tesalonikasma 3:7-12). Soleki fa a sori, dan den fosi Kresten ben e skrifi brifi gi makandra pe den ben e fruteri bun sani fu a sma di ben e teki waka, so taki trawan ben kan teki a sma na ini oso. Na so Paulus ben skrifi wan brifi pe a ben fruteri bun sani fu Feibe. „Mi wani du wan bun wortu gi wi sisa Feibe”, na so Paulus ben skrifi, „so taki unu kan gi en wan switikon leki wan futuboi fu Masra . . . èn so taki unu kan yepi en nanga ala sani pe a ben sa abi unu fanowdu”.​—Romesma 16:1, 2

Blesi di wan sma e kisi te a lobi fu gi trawan wan switikon

Den Kresten zendeling fu a fosi yarihondro ben abi a frutrow taki Yehovah ben o sorgu taki den kisi ala san den abi fanowdu. Ma den ben kan fruwakti taki den tra Kresten ben o gi den wan switikon? Lidia ben meki Paulus nanga tra sma tan na en oso. Na ini Korente, na apostel ben tan na Akwila nanga Preskela. Wan strafu-oso waktiman ben gi Paulus nanga Silas nyanyan. Tra sma di ben gi Paulus wan switikon na ini den oso, ben de Yason di ben libi na ini Tesalonika, nanga Filipus na ini Sesarea. Di Paulus ben de na a pasi fu Sesarea go na Yerusalem, dan Menason sosrefi ben gi en wan switikon na ini oso. Di Paulus ben de na pasi fu go na Rome, den brada na ini Puteoli ben teki en na ini oso tu. A no de fu taki dati den sma disi ben kisi furu wini na yeye fasi di den teki Paulus na ini oso!​—Tori fu den Apostel 16:33, 34; 17:7; 18:1-3; 21:8, 16; 28:13, 14.

A sabiman Frederick F. Bruce e taki: „Den mati disi fu Paulus, sosrefi den tra sma di ben e wroko makandra nanga en, nanga den mansma nanga umasma di ben teki en na ini oso, ben abi wán reide nomo fu san ede den ben e yepi en, namku fu di den ben lobi en èn fu di den ben lobi a Masra di a ben e dini. Den ben sabi taki te den ben o dini Paulus, dan na so fasi den ben o dini a Masra tu. Disi na wan heri bun reide fu gi sma wan switikon.

Te now ete a de fanowdu fu gi trawan wan switikon. Dusundusun opziener fu Yehovah Kotoigi di kisi a frantwortu fu go na den difrenti gemeente, ondrofeni taki den Kresten brada nanga sisa fu den teki den na ini oso na wan switi fasi. Son Kownukondre preikiman pai nanga den eigi moni fu go preiki na presi pe sma yere a bun nyunsu wanwan leisi nomo. Te wi abi a sakafasi fu teki den sma disi na ini wi oso, dan wi o kisi furu blesi. Te wi gi den wan switikon, awinsi wi e gi den wan kari nomo fu kon nyan wan sani nanga wi, dan dati na wan moi okasi fu „gi makandra deki-ati” èn fu sori lobi gi wi brada nanga sisa èn gi wi Gado (Romesma 1:11, 12). Den sortu okasi disi e tyari wini kon, spesrutu gi den sma di lobi fu gi trawan wan switikon, bika „wan sma sa de moro koloku te a e gi sani, leki te a e kisi sani”.​—Tori fu den Apostel 20:35.

[Futuwortu]

[Prenki na tapu bladzijde 23]

Kresten ’abi a gwenti fu gi sma wan switikon’