Krestes—Prenspari Bijbel profeititori ben e sori go na en

„A marki fu profeititori na fu gi kotoigi fu Yesus.”​—OPENBARING 19:10.

1, 2. (a) Sortu bosroiti Israel ben musu bigin teki na ini 29 G.T? (b) San wi sa luku na ini na artikel disi?

A DE a yari 29 G.T. Ala den sma na ini Israel e taki fu a Mesias di Gado pramisi. A diniwroko fu Yohanes a Dopuman meki taki sma e fruwakti a Mesias fayafaya (Lukas 3:15). Yohanes e taki dati en a no a Krestes. Na presi fu dati, a e sori go na Yesus fu Nasaret èn a e taki: „Mi gi kotoigi taki a sma disi na a Manpikin fu Gado” (Yohanes 1:20, 34). Heri esi, ipi-ipi sma bigin waka baka Yesus fu arki den leri fu en, èn fu a ben kan meki den kon betre.

² Na ini den mun baka dati, Yehovah e gi bun furu buweisi di abi fu du nanga a Manpikin fu en. Den sma di ondrosuku den Buku fu Bijbel èn di e si den wroko fu Yesus, abi bun reide fu bribi na ini en. Ma furu sma fu a pipel di Gado ben meki wan frubontu nanga den, no e sori bribi. Wan tu fu den nomo e bribi taki Yesus na a Krestes, a Manpikin fu Gado (Yohanes 6:60-69). San yu ben o du efu yu ben e libi na a ten dati? Yu ben o teki Yesus leki a Mesias èn yu ben o tron wan getrow futuboi fu en? Luku taki Yesus srefi e buweisi suma na en, te sma e taki dati a pasa den wet fu a Sabat, èn poti prakseri na buweisi di a e gi den getrow disipel fu en bakaten, fu tranga a bribi fu den.

Yesus srefi e gi a buweisi

3. Sortu sani meki taki Yesus gi sma buweisi fu sori suma a de trutru?

³ A de a Paskafesa fu 31 G.T. Yesus de na ini  Yerusalem. Didyonsro a meki wan man kon betre baka di ben siki 38 yari langa. Ma den Dyu e frufolgu Yesus fu di a du disi tapu a Sabat. Den e taki sosrefi taki a no sori lespeki gi Gado kwetikweti, èn den e suku fu kiri en fu di a e taki dati Gado na en Tata (Yohanes 5:1-9, 16-18). Yesus e opo taki gi ensrefi èn a gi dri krakti buweisi di ben o overtoigi ibri reti-ati Dyu, èn di ben o sori den suma a de trutru.

4, 5. San ben de a marki fu a diniwroko fu Yohanes, èn san ben de a bakapisi fu a wroko dati?

⁴ Na a fosi presi, Yesus taki fu a kotoigi di Yohanes a Dopuman, a sma di ben kon fosi en, ben gi: „Un seni sma go na Yohanes èn a kotoigi fu a waarheid. A man dati ben de wan lampu di ben leti èn di ben e skèin, èn wan syatu pisi ten un ben wani prisiri trutru na ini a leti fu en.”​—Yohanes 5:33, 35.

⁵ Yohanes a Dopuman ben de „wan lampu di ben leti èn di ben e skèin” fu di syatu bifo Herodes poti en na strafu sondro taki a ben du wan ogri, a ben e du a wroko di a ben kisi fu Gado fu sreka a pasi gi a Mesias. Yohanes ben taki: „A reide fu san ede mi kon fu dopu sma na ini watra, na so taki Israel kan kon sabi suma na [a Mesias] . . . Mi ben si a yeye e saka kon neleki wan doifi fu hemel, èn a ben tan na en tapu. Misrefi no ben sabi en, ma a Sma di ben seni mi fu dopu sma na ini watra ben taigi mi: ’A sma di yu si a yeye e saka kon na en tapu èn e tan na en tapu, na en na a sma di e dopu na ini santa yeye.’ En mi si en, èn mi gi kotoigi taki a sma disi na a Manpikin fu Gado” (Yohanes 1:26-37). * Yohanes ben sori krin taki Yesus na a Manpikin fu Gado, iya, a Mesias di Gado ben pramisi. A kotoigi di Yohanes ben gi ben krin so te, taki aiti mun baka di a dede, furu reti-ati Dyu di ai ben kon opo, ben taki: „Ala den sani di Yohanes taki fu a man disi, ben tru.”​—Yohanes 10:41, 42.

6. Fu san ede den wroko fu Yesus ben musu overtoigi sma taki Gado ben e horibaka gi en?

⁶ Now, Yesus e gi den Dyu wan tra buweisi fu sori den taki en na a Mesias trutru. A e taki fu den tumusi moi wroko fu en fu sori taki Gado e horibaka gi en. „A kotoigi di mi abi, bigi moro di fu Yohanes”, na so a e taki, „bika na yoisti den wroko di mi Tata gi mi fu du, iya, den wroko srefi di mi e du, e gi kotoigi fu mi taki a Tata seni mi kon” (Yohanes 5:36). Srefi den feanti fu Yesus no ben man taki dati den buweisi disi no ben tru, bika Yesus ben du furu wondru sosrefi. Wan tu fu den sma ben aksi bakaten: „San wi musu du, bika a man disi e du furu marki?” (Yohanes 11:47) Ma sonwan fu den wani sabi moro, èn den e taki: „Te a Krestes doro, dan a no sa du moro wondru leki a man disi, a no so?” (Yohanes 7:31). Den sma di ben e arki Yesus ben kisi wan moi okasi fu si den fasi fu a Tata na ini a Manpikin fu en.​—Yohanes 14:9.

7. Fa den Hebrew Buku fu Bijbel e gi kotoigi fu Yesus?

⁷ Te fu kaba, Yesus e poti prakseri na wan sani di e gi wan krinkrin kotoigi fu en. A e taki: ’Den Buku fu Bijbel . . . na yoisti den wan di e kotoigi fu mi’, èn a e taki moro fara: „Efu unu ben bribi Moses, dan unu ben o bribi mi, bika a ben skrifi fu mi” (Yohanes 5:39, 46). A no de fu taki, dati Moses ben de wán nomo fu den someni kotoigi fu a ten fosi Krestes, di ben skrifi fu Krestes. Den sma disi ben skrifi hondrohondro profeititori nanga finifini tori di ben abi fu du nanga den difrenti famiri, èn ala den sani disi ben e sori go na a Mesias (Lukas 3:23-38; 24:44-46; Tori fu den Apostel 10:43). Ma fa a de nanga a Wet fu Moses? Na apostel Paulus ben skrifi: „A Wet tron wi leriman di e tyari wi go na Krestes” (Galasiasma 3:24). Iya, „a marki fu profeititori na fu gi kotoigi fu Yesus”.​—Openbaring 19:10.

8. Fu san ede furu Dyu no ben poti bribi na ini a Mesias?

⁸ Te wi e luku ala den buweisi disi, namku a krinkrin kotoigi fu Yohanes, Yesus en eigi krakti wroko, sosrefi den fasi di e sori fa Gado de, èn a bun bigi kotoigi di den Buku fu Bijbel e gi, dan den no e overtoigi yu taki Yesus ben de a Mesias? Iniwan sma di ben abi trutru lobi gi Gado èn gi a Wortu fu en, ben o si disi  wantewante èn ben o sori bribi na ini Yesus, a Mesias di Gado ben pramisi. Ma furu fu den sma na ini Israel no ben abi a lobi dati. Yesus ben taigi den gensman fu en: „Mi sabi heri bun taki unu no abi lobi gi Gado” (Yohanes 5:42). Na presi taki den ben „e suku a glori di e kon fu a wan-enkri Gado”, den ben „e teki glori fu makandra”. Fu dati ede a no e fruwondru wi taki den no ben e agri nanga Yesus, di neleki en Tata, no ben feni a denki dati bun kwetikweti!​—Yohanes 5:43, 44; Tori fu den Apostel 12:21-23.

Den disipel e kisi krakti nanga yepi fu wan fisyun

9, 10. (a) Fu san ede wan marki fu hemel ben o de wan bigi yepi gi den disipel fu Yesus? (b) Sortu tumusi moi sani Yesus ben pramisi den disipel fu en?

⁹ Moro leki wán yari pasa kaba sensi Yesus ben gi den sma buweisi taki en na a Mesias, soleki fa dati skrifi na a bigin. A Paskafesa fu a yari 32 G.T. pasa kaba. Furu sma di ben abi bribi, tapu fu waka baka Yesus, kande fu di den kisi frufolgu, fu di den ben e suku fu kon gudu, noso fu di den ben e broko den ede nanga a libi. Kande trawan bruya noso lasi-ati fu di Yesus no ben wani sma fu poti en leki kownu. Di den Dyu kerki fesiman tyalensi en, dan a weigri fu gi den wan marki fu hemel, fu di a no ben wani gi ensrefi glori (Mateyus 12:38, 39). Kande son sma ben kon bruya fu di Yesus ben weigri fu du dati. Boiti dati, Yesus bigin fruteri den disipel fu en wan tori, ma den abi muiti fu frustan a tori dati. A taigi den taki ’a musu go na Yerusalem, èn den owruman nanga den priester o meki a pina hebi, èn den o kiri en’.​—Mateyus 16:21-23.

¹⁰ Sowan neigi noso tin mun baka dati, a ten ben o doro ’gi [Yesus] fu gowe libi a grontapu disi fu go na en Tata’ (Yohanes 13:1). Yesus e broko en ede trutru nanga den getrow disipel fu en, èn a e pramisi wan tu fu den a srefi sani di a ben weigri fu gi den Dyu di no ben abi bribi, namku wan marki fu hemel. Yesus e taki: „Fu tru mi e taigi unu taki sonwan fu unu di e tanapu dyaso no sa dede kwetikweti bifo den si a Manpikin fu libisma e kon na ini en kownukondre” (Mateyus 16:28). A krin fu si taki Yesus no e taki dati wan tu fu den disipel fu en sa libi teleki a Mesias Kownukondre seti na ini 1914. Yesus abi na prakseri fu gi dri fu en disipel di a lobi srefisrefi, wan tumusi moi fisyun fu a glori di a sa abi leki kownu fu a Kownukondre. A fisyun disi nen a transfigurâsi.

11. Fruteri san ben de a transfigurâsi fisyun.

¹¹ Siksi dei baka dati, Yesus e tyari Petrus, Yakobus, nanga Yohanes go na tapu wan hei bergi, èn a kan taki a ben de na a lanki fu a Hermonbergi. Drape Yesus „kenki kon de wan heri tra fasi, èn en fesi ben e brenki leki a son, èn den krosi fu en ben e brenki leki a leti”. Den profeiti Moses nanga Elia wantronso de drape tu, èn den e taki nanga Yesus. A kan taki a tumusi moi sani disi e pasa na neti, èn dati e meki taki a de fu si moro krin. Fu taki en leti, a sani disi de fu si so krin, taki Petrus wani seti dri tenti, wán gi Yesus, wán gi Moses, èn wán gi Elia. Aladi Petrus e taki ete, wan brenki wolku de fu si tapusei fu den èn wan sten di e komoto na ini a wolku e taki: „Disi na mi Manpikin, a lobiwan di mi feni bun; arki en.”​—Mateyus 17:1-6.

12, 13. Sortu krakti a transfigurâsi ben abi tapu den disipel fu Yesus, èn fu san ede dati ben de so?

 ¹² A tru taki no so langa pasa Petrus ben gi kotoigi taki Yesus na „Krestes, a Manpikin fu a libi Gado” (Mateyus 16:16). Ma prakseri fa a ben o de te yu e yere fa Gado srefi e gi kotoigi fu taigi sma suma na en salfu Manpikin, èn sortu frantwortu a abi! A transfigurâsi na wan sani di tranga a bribi fu Petrus, Yakobus, nanga Yohanes trutru! Now di a bribi fu den kon moro tranga, dan den sreka moro bun gi san e wakti den èn gi a prenspari frantwortu di den sa abi na ini a gemeente di sa seti.

¹³ A transfigurâsi e tan na ini a prakseri fu den disipel. Moro leki 30 yari baka dati, Petrus e skrifi: „[Yesus] ben kisi grani nanga glori fu Gado a Tata, di a sten fu Gado ben taigi en nanga yepi fu a bigi glori: ’Disi na mi manpikin, mi lobiwan, di misrefi feni bun.’ Iya, wi ben yere den wortu disi komoto na hemel di wi ben de nanga en na tapu a santa bergi” (2 Petrus 1:17, 18). A transfigurâsi naki na ati fu Yohanes tu. Soleki fa a sori, dan moro leki 60 yari baka di a pasa, a e sori go na a sani dati te a e taki den wortu disi: „Wi si a glori fu en, wan glori soleki a wan di a wan-enkri gebore manpikin fu wan papa abi” (Yohanes 1:14). Ma a transfigurâsi no ben o de a lasti fisyun di den bakaman fu Yesus ben o si.

Den getrow-wan fu Gado e kon frustan sani moro bun

14, 15. Na sortu fasi na apostel Yohanes ben musu tan teleki Yesus ben kon?

¹⁴ Baka di Yesus kisi wan opobaka, dan a e sori ensrefi na den disipel fu en na a Se fu Galilea. Drape a e taigi Petrus: „Efu mi wani [Yohanes] fu tan teleki mi kon, dan san yu abi fu du nanga dati?” (Yohanes 21:1, 20-22, 24) Den wortu disi wani taki dati na apostel Yohanes ben o libi moro langa leki den tra apostel? Soleki fa a sori, dan dati tru, bika a e tan dini Yehovah getrow, sowan 70 yari ete. Ma den wortu fu Yesus wani taki moro.

¹⁵ Den wortu „teleki mi kon” e memre wi na den wortu fu Yesus di a ben taki dati ’a Manpikin fu libisma ben o kon na ini en kownukondre’ (Mateyus 16:28). Taki Yohanes e tan teleki Yesus e kon, wani taki dati Yohanes e kisi wan fisyun bakaten di e sori fa Yesus e kon leki a Tiriman fu a Kownukondre. Na a kaba fu Yohanes en libi, te a de leki strafuman na tapu na èilanti Patmos, a e kisi na Openbaring nanga ala den moi marki fu sani di ben o pasa na „a ten fu Masra”. Den tumusi moi fisyun disi abi so wan bigi krakti tapu Yohanes, taki te Yesus e taki: „Iya, mi e kon esi-esi”, Yohanes e bari: „Amen! Kon, Masra Yesus.”​—Openbaring 1:1, 10; 22:20.

16. Fu san ede a prenspari taki wi e tan tranga a bribi fu wi?

¹⁶ Den opregtisma di ben e libi na ini a fosi yarihondro, e teki Yesus leki a Mesias èn den e poti bribi na ini en. Te wi e luku taki furu sma lontu den opregtisma no abi bribi, te wi e luku a wroko di den musu du, èn te wi e luku den tesi di e wakti den, dan a de fanowdu taki den sma disi e kisi tranga. Yesus gi nofo buweisi fu sori taki en na a Mesias, èn a gi den getrow bakaman fu en fisyun di yepi den fu frustan sani moro bun, so taki den ben kan kisi deki-ati. Na ini a ten disi, wi de moi fara kaba na ini „a dei fu Masra”. Heri esi Krestes sa pori Satan en heri ogri grontapu sistema, èn a o frulusu a pipel fu Gado. Wi sosrefi musu tranga a bribi fu wi, èn wi kan du dati fu di wi e gebroiki ala den sani di  Yehovah seti fu meki sani waka bun nanga wi na yeye fasi.

Den kisi kibri na ini dungru ten èn na ini banawtu ten

17, 18. Sortu bigi difrenti ben de na ini a fosi yarihondro na mindri den bakaman fu Yesus èn den wan di ben gens a prakseri fu Gado? Fa sani waka gi ibriwan fu den grupu disi?

¹⁷ Baka di Yesus dede, den disipel sori deki-ati fu di den gi yesi na a komando di a ben gi den fu kotoigi fu en „na heri Yudea nanga Samaria èn te na a moro farawe presi fu grontapu” (Tori fu den Apostel 1:8). Aladi a nyun Kresten gemeente e kisi hebi frufolgu na difrenti ten, toku Yehovah e blesi a nyun gemeente disi fu di a e meki den kon frustan yeye afersi moro bun, èn a gemeente e kisi furu nyun disipel sosrefi.​—Tori fu den Apostel 2:47; 4:1-31; 8:1-8.

¹⁸ Na a tra sei, sani e kon ogri moro nanga moro gi den wan di e gens a bun nyunsu. „A pasi fu den godelowsuwan de leki a dungru”, na so Odo 14:19 e taki. „Den no sabi na san den e tan naki den futu fadon.” Na ini 66 G.T. „a dungru” e kon moro blaka te den srudatimakti fu Rome e lontu Yerusalem. Te den Romesma hari gowe fu wan pisi ten, sondro taki sma sabi fu san ede, dan den e drai kon baka na ini 70 G.T., ma disi leisi den e pori a foto. Soleki fa a Dyu historia skrifiman Josephus e taki, dan moro leki wán milyun Dyu lasi den libi. Ma getrow Kresten e lowe gowe. Fu san ede? We, te den srudati hari gowe a fosi leisi, den Kresten disi e gi yesi na a komando di Yesus ben gi den fu lowe gowe.​—Lukas 21:20-22.

19, 20. (a) Fu san ede a pipel fu Gado no abi fu frede te a disiten grontapu sistema e kon na wan kaba? (b) Sortu tumusi moi sani Yehovah meki en pipel kon sabi na ini den someni tenti yari fosi 1914?

¹⁹ Wi de na ini a srefi situwâsi dati. A bigi banawtu di e kon sa wani taki dati Satan nanga en heri ogri grontapu sistema, sa kon na wan kaba. Ma a pipel fu Gado no abi fu frede, bika Yesus ben pramisi: „Luku! Mi sa de nanga unu ala den dei te na a kaba fu a sistema disi” (Mateyus 28:20). Fu tranga a bribi fu den fosi disipel fu en èn fu sreka den gi san ben wakti den, meki Yesus gi den wan fisyun fu a glori di a ben o abi na ini hemel leki Mesias Kownu. Fa a de na ini a ten disi? Na ini 1914, a fisyun dati kon tru, èn a tranga a bribi fu a pipel fu Gado trutru taki Yesus e tiri now leki Mesias Kownu! A sani disi e gi wi a pramisi taki tumusi moi ten e wakti wi, èn ibri leisi den futuboi fu Yehovah e kon frustan moro bun san na a Mesias Kownukondre dati. Na ini a grontapu fu tide di e kon dungru moro nanga moro, „a pasi fu den regtfardikiwan de leki a brenki leti di e kon krin moro nanga moro, teleki a dei poti kon steifi”.​—Odo 4:18.

²⁰ Srefi bifo 1914, wan pikin grupu fu salfu Kresten bigin frustan den prenspari tru tori di ben taki fu Masra di ben o drai kon baka. Fu gi wan eksempre, den kon frustan taki sma no ben o man si en te a ben drai kon baka, soleki fa den tu engel ben taki di ben sori densrefi na ini 33 G.T. na den disipel, di Yesus ben e opo go na hemel. Baka di wan wolku tapu Yesus so taki den disipel no ben man si en moro, dan den engel taki: „A Yesus disi di Gado puru na un mindri èn di opo go na hemel, sa kon na a srefi fasi leki fa unu ben si en e go na hemel.”​—Tori fu den Apostel 1:9-11.

21. Fu san wi o taki na ini na artikel di e kon?

²¹ Soso den getrow futuboi fu Yesus si fa a gowe. Soleki fa a ben de nanga a transfigurâsi, na so tra sma no ben drape tu fu si san ben pasa, nôno, grontapu no ben sabi srefi san ben pasa. A srefi sani disi ben o pasa te Yesus ben kon  baka leki Tiriman fu a Kownukondre (Yohanes 14:19). Soso en getrow salfu disipel ben o frustan taki a ben e tiri leki Kownu. Na ini na artikel di e kon, wi sa si fa a sabi dati ben abi wan bigi krakti na den tapu, èn a ben o kisi en heimarki te milyunmilyun sma di ben saka densrefi na ondro Yesus ben o kon makandra.​—Openbaring 7:9, 14.

[Futuwortu]

Yu e memre disi ete?

• Di sma kragi Yesus taki a ben pasa a wet fu a Sabat èn taki a ben afrontu Gado, dan sortu buweisi a gi den fu sori taki en na a Mesias?

• Fa den fosi disipel fu Yesus ben kisi wini fu a transfigurâsi?

• San Yesus ben wani taki di a taki dati Yohanes ben o tan teleki a ben kon?

• Sortu fisyun kon tru na ini 1914?

[Aksi fu a tori disi]

[Prenki na tapu bladzijde 10]

Yesus ben gi buweisi di ben e sori krin taki en na a Mesias

[Prenki na tapu bladzijde 12]

A transfigurâsi fisyun ben tranga a bribi fu den disipel

[Prenki na tapu bladzijde 13]

Yohanes ben musu tan teleki Yesus ’ben kon’