Yu kan tiri a fasi fa yu libi e waka?

A TRU taki a fasi fa yu libi o waka, seti na fesi kaba? A de so taki den bosroiti di wi e teki na ini wi libi, no abi krakti tapu a tamara fu wi?

Kon meki wi taki dati libisma srefi e tiri a fasi fa den libi e waka. Efu dati ben de so, dan fa sma kan denki taki Gado ben seti na fesi taki wan sma ben o du wan spesrutu wroko, noso taki wan sma ben o teki wan spesrutu frantwortu na en tapu? Èn fa Gado ben o man meki a sani di a abi na prakseri gi grontapu kon tru, efu libisma srefi ben kan tiri a fasi fa den libi e waka? Bijbel e gi wi bun piki tapu den aksi disi.

Wan libi di seti na fesi kaba, èn wan fri wani​—Fa ala tu sani kan de tru?

Poti prakseri na a fasi fa Yehovah Gado meki wi. „Akruderi a prenki fu Gado a ben meki [libisma]; leki man èn leki uma a ben meki den”, na so Bijbel e taki (Genesis 1:27). Fu di wi meki akruderi a prenki fu Gado, meki wi man sori den fasi fu en, èn dati na fasi soleki lobi, retidu, koni, nanga makti. Boiti dati, Gado gi wi a presenti fu a fri-wani, noso a fri di wi abi fu teki wi eigi bosroiti. A sani disi e poti wi aparti fu den tra sani di a meki na grontapu. Wisrefi kan bosroiti efu wi sa teki, noso efu wi no sa teki a tiri di Gado e gi wi te a abi fu du nanga a fasi fa wi musu tyari wisrefi. Na fu dati ede meki a profeiti Moses ben kan taki: „Fu tru, mi e teki hemel nanga grontapu leki kotoigi teige unu tide, taki mi poti libi nanga dede na yu fesi, blesi nanga fluku; èn yu musu frukisi libi so taki yu kan tan na libi, yu nanga yu bakapikin,  fu di yu lobi Yehovah, yu Gado, fu di yu e arki en sten èn fu di yu e tan hori na en.”​—Deuteronomium 30:19, 20.

Ma a presenti di wi kisi fu teki wi eigi bosroiti, no wani taki dati wi fri fu du ala san wi wani. A no wani taki dati wi no abi fu hori wisrefi na den wet di Gado poti gi wi fu meki sani waka bun nanga wi, èn fu meki wi e tyari wisrefi na wan fasi di fiti, iya, den wet disi de fu meki sani waka bun na hemel èn na grontapu, èn fu meki vrede de. Gado ben poti den wet disi fu a bun fu wi, èn iniwan sma di ben o pasa den wet disi ben o ondrofeni bun takru bakapisi. Prakseri nomo san ben o pasa efu wi ben o bosroiti fu no poti prakseri na a wet fu a zwaartekracht, èn wi ben o dyompo komoto fu a daki fu wan hei gebow!​—Galasiasma 6:7.

A de so tu taki a fri di wi abi fu teki wi eigi bosroiti, e poti spesrutu frantwortu na wi tapu, èn tra mekisani di no abi a fri dati no abi den frantwortu disi. A skrifiman Corliss Lamont e aksi: „Fa wi kan taki dati libisma sabi fa fu tyari densrefi na wan yoisti fasi, èn fa wi kan strafu den sosrefi gi den ogri di den e du, te wi e agri taki a ben seti kaba na fesi sortu bosroiti den ben o teki, èn fa den ben o handri?” A no de fu taki dati a sani disi no kan. Meti di e du sani akruderi a koni di Gado poti na ini den, no abi fu gi frantwortu fu den sani di den e du. Na so a de tu taki sma no kan taki dati computer de frantwortu gi den sani di sma e meki den du. Fu dati ede, a fri di wi abi fu teki wi eigi bosroiti e poti wan hebi frantwortu na wi tapu, èn a e meki taki wi sa musu gi frantwortu fu den sani di wi e du.

Efu fosi wi gebore Yehovah Gado ben seti sani na fesi kaba fa wi libi ben o waka, en efu a ben o hori wi frantwortu bakaten gi den sani di wi ben o du, dan Yehovah ben o de wan Gado di no lobi libisma èn a no ben o handri na wan reti fasi! Ma a no e du disi, fu di „Gado na lobi”, èn „ala san a e du, na retidu” (1 Yohanes 4:8; Deuteronomium 32:4). A tru taki Gado gi wi a fri fu teki wi eigi bosroiti, ma a no de so taki a ’bosroiti bun langa na fesi kaba suma a ben o frulusu èn suma a ben o libi fu kisi pori’. Disi na san den sma e taki di e bribi taki Gado bosroiti na fesi kaba fa wan sma en libi o waka. A fri di libisma abi fu teki den eigi bosroiti, e sori krin taki Gado no bosroiti na fesi kaba fa wan sma en libi o waka.

Bijbel e sori krin taki den bosroiti di wi e teki abi krakti tapu a fasi fa wi libi e waka. Fu gi wan eksempre, disi na san Gado e begi ogriman fu du: „Grantangi drai baka, ibriwan sma fu a takru pasi fu en èn fu a takrufasi fu den sani di yu e du . . . so taki mi no e meki rampu miti yu” (Yeremia 25:5, 6). Gado ben o aksi libisma a sani disi fu soso, efu a ben seti na fesi kaba fa wan sma en libi ben o waka. Boiti dati, Gado Wortu e taki: „Fu dati ede abi berow èn drai un libi, so taki Yehovah kan figi un sondu puru, so taki ten di e gi kowru-ati  kan kon fu Yehovah” (Tori fu den Apostel 3:19). Fu san ede Yehovah ben o aksi sma fu sori berow èn fu drai den libi efu a ben sabi na fesi kaba taki den no man du noti fu tyari wan kenki kon na ini a fasi fa den libi e waka?

Den Buku fu Bijbel e taki fu wan tu sma di Gado ben kari fu tiri leki kownu na hemel, makandra nanga Yesus Krestes (Mateyus 22:14; Lukas 12:32). Ma Bijbel e taki dati den sa lasi a grani dati efu den no e horidoro te na a kaba (Openbaring 2:10). Fu san ede Gado ben o gi den wan kari, efu a ben bosroiti na fesi kaba taki a no ben o teki den? Luku sosrefi san na apostel Paulus ben taigi den yeye brada nanga sisa fu en. A ben skrifi: „Efu wi gwenti du sondu fu espresi, baka te wi kisi a soifri sabi fu waarheid, dan nowan srakti-ofrandi gi sondu sa tan abra moro” (Hebrewsma 10:26). So wan warskow ben o de fu soso efu Gado ben bosroiti na fesi kaba fa den libi ben o waka. Ma a no de so dan taki Gado ben bosroiti na fesi kaba taki wan tu sma ben o de tiriman makandra nanga Yesus Krestes?

Gado ben bosroiti na fesi kaba fu teki aparti sma, noso wan grupu fu sma?

„[Gado] blesi wi na ala sortu fasi nanga en santa yeye fu di wi de wán nanga Krestes”, na so na apostel Paulus ben skrifi, „neleki fa a ben kari wi fu de wán nanga Krestes bifo grontapu seti . . . Bika Gado ben bosroiti na fesi fu teki wi leki manpikin fu en nanga yepi fu Yesus Krestes” (Efeisesma 1:3-5). Sortu bosroiti Gado ben teki na fesi kaba, èn san a wani taki dati a teki sma „bifo grontapu seti”?

Den vers disi e sori taki Gado teki wan tu bakapikin fu a fosi man, Adam, fu tiri makandra nanga Krestes na hemel (Romesma 8:14-17, 28-30; Openbaring 5:9, 10). Ma te yu e hori na prakseri taki libisma de fri fu teki den eigi bosroiti, dan a no kan de tru noiti taki dusundusun yari bifo son sma gebore, Yehovah Gado ben bosroiti kaba taki den sma disi ben o kisi so wan grani. A bosroiti di Gado ben teki na fesi kaba, ben abi fu du nanga wan grupu sma, èn no nanga aparti sma.

Wi o fruklari dati nanga yepi fu wan agersitori: Kon meki wi taki dati wan tirimakti e bosroiti fu seti wan spesrutu organisâsi. A e bosroiti na fesi san na organisâsi musu du, sortu makti a sa abi, èn o bigi a sa de. Te fu kaba, na organisâsi dati e bigin wroko, èn den memre e taki: „Wan tu yari pasa, a tirimakti ben bosroiti na fesi sortu wroko wi ben o du. Now wi e bigin nanga a wroko di wi kisi fu du.” Yu ben o taki dati na organisâsi ben musu fu bosroiti wan tu yari na fesi, suma ben o de den memre fu na organisâsi dati? Kwetikweti. Na so a de tu taki Yehovah ben bosroiti na fesi taki a ben o seti wan spesrutu organisâsi fu puru den bakapisi fu a sondu fu Adam. A ben bosroiti na fesi taki wan grupu sma ben o dini na ini na organisâsi dati, ma a no ben bosroiti na fesi suma ben o de den sma dati. Gado ben o teki den sma dati bakaten, èn den bosroiti di den ben o teki na ini den libi ben o sori efu A ben o feni den bun, noso efu a no ben o feni den bun te fu kaba.

Sortu grontapu na apostel Paulus ben abi na prakseri di a ben taki: „[Gado] kari wi fu de wán nanga Krestes bifo grontapu seti”? A grontapu di Paulus abi na prakseri dyaso, a no a grontapu di Gado ben seti di a meki Adam nanga Eva. A grontapu dati ben de „heri bun”, iya, a no ben abi nowan sondu noso kruktudu (Genesis 1:31). A no ben de so taki a grontapu dati ben musu kisi „frulusu” fu sondu.​—Efeisesma 1:7.

A grontapu di Paulus ben abi na prakseri na a wan di kon de, baka di Adam nanga Eva ben opo densrefi teige Gado na ini Eden. Iya, a grontapu dati ben difrenti trutru fu a wan di Gado ben abi na prakseri na ini a bigin. A ben de a grontapu di bigin nanga den pikin fu Adam nanga Eva. A grontapu dati ben abi sma di ben frigiti Gado èn di tron srafu fu sondu nanga kruktudu. A ben de wan grontapu fu libisma di, tra fasi leki Adam nanga Eva di ben sondu fu espresi, ben kan kisi frulusu.​—Romesma 5:12; 8:18-21.

Yehovah Gado ben kan du wan sani wantewante na a situwâsi di ben kon de baka di Adam nanga Eva ben opo densrefi na ini Eden. A momenti di a ben de fanowdu fu du wan sani, a bosroiti taki wan spesrutu organisâsi ben o seti, èn dati ben de a Mesias Kownukondre ondro a tiri fu Yesus Krestes. A ben o gebroiki na organisâsi dati fu frulusu libisma fu na sondu fu Adam (Mateyus 6:10). Gado ben du disi „bifo a seti fu a grontapu”  fu libisma di ben kan kisi frulusu, dati wani taki, bifo a tranga-ede Adam nanga Eva ben kisi pikin.

Furu tron a de so, taki libisma musu sabi fosi fa den o du wan sani, bifo den kan du a sani dati bun. Sma di e bribi taki Gado seti na fesi kaba fa den libi o waka, de nanga a denki taki Gado ben musu fu sabi finifini san a ben o du nanga hemel nanga grontapu pe ala sani e waka soleki fa ensrefi ben seti dati na fesi. Roy Weatherford ben skrifi: „Furu filosofiaman feni taki wan Almakti Gado seiker ben o seti ibri sani finifini na fesi.” A tru taki Gado musu seti iniwan sani di o pasa, finifini na fesi?

Fu di Yehovah na wan almakti Gado di koni moro iniwan sma, meki ala ten a sabi san fu du te wan sani e pasa di a no ben fruwakti, fu di den mekisani fu en e gebroiki a fri di den abi fu teki den eigi bosroiti (Yesaya 40:25, 26; Romesma 11:33). A kan du disi wantewante sondro fu seti sani na fesi. Tra fasi leki sondu libisma di no man du ala sani, na Almakti Gado no abi fu seti sani finifini fosi, fu kan sabi na fesi fa a libi fu ibri sma na grontapu sa waka (Odo 19:21). Na ini wan tu bijbelvertaling, Efeisesma 3:11 e taki dati Gado abi wan „têgo prakseri”, èn a no e taki dati A seti sani na fesi kaba.

Fa yu kan abi krakti tapu a tamara fu yu

Gado abi wan sani na prakseri gi grontapu, èn a sani dati ben seti na fesi kaba. Openbaring 21:3, 4 e taki: „Luku! A tenti fu Gado de na libisma, èn a sa tan nanga den, èn den sa de en pipel. Èn Gado srefi sa de nanga den. Èn a sa figi puru ala watra na den ai, èn dede no sa de moro, nowan sari, nowan babari, nowan pen no sa de moro. Den fositen sani pasa kaba.” Iya, a grontapu disi sa tron wan paradijs, soleki fa Yehovah ben wani na ini a bigin (Genesis 1:27, 28). Ma na aksi de now: Yu sa de drape? Den bosroiti di yu e teki now e sori efu dati sa de so. Yehovah no bosroiti na fesi fa sani o waka nanga yu libi.

A lusu-ofrandri fu Gado en Manpikin, Yesus Krestes, e gi iniwan sma di e bribi na ini en, na okasi fu kisi têgo libi (Yohanes 3:16, 17; Tori fu den Apostel 10:34, 35). „A sma di e sori bribi na ini a Manpikin, abi têgo libi”, na so Bijbel e taki. „A sma di no e gi yesi na a Manpikin no sa si a libi” (Yohanes 3:36). Yu kan teki a libi te yu e kon sabi moro fu Gado, fu en Manpikin, èn fu A wani fu en, fu di yu e ondrosuku Bijbel èn fu di yu e du san yu e leri. A sma di e handri akruderi tru sabi di skrifi na ini Gado Wortu, e kisi a dyaranti taki „a sa abi wan bun libi èn a no sa frede te rampu miti en”.​—Odo 1:20, 33.

[Prenki na tapu bladzijde 5]

Tra fasi leki meti, libisma musu tyari frantwortu fu den sani di den e du

[Sma di abi a reti fu a prenki]

Eagle: Foto: Cortesía de GREFA