A waarheid e meki froktu na ini den wan di yu e gi leri?

DI WAN yonkuman di nen Eric, taigi en papa nanga mama taki a no ben wani de wan Kotoigi fu Yehovah moro, dan a sani dati broko den ati. Den no ben fruwakti a sani dati kwetikweti. Di Eric ben de wan boi, dan a ben e teki prati na a osofamiri bijbelstudie, a ben e go na den Kresten konmakandra, èn a ben e go na ini a preikiwroko makandra nanga a gemeente. Soleki fa a ben sori, dan Eric ben e waka na ini a waarheid, fu taki en so. Ma now di a ben gowe libi na oso, dan en papa nanga mama kon si taki a waarheid fu Bijbel no ben de na ini en. A sani dati seki den, èn den ben e sari srefisrefi.

Tra sma de di firi sari tu di wan bijbelstudenti fu den tapu nanga a studie sondro taki den ben fruwakti dati. Te dati e pasa, dan sma e aksi densrefi furu tron: ’Fu san ede mi no si taki disi ben o pasa?’ We, fa wi man si na fesi efu a waarheid e meki froktu na ini den wan di wi e gi leri, fosi rampu e miti den na yeye fasi? Iya, fa wi kan de seiker taki a waarheid e wroko na ini wi èn sosrefi na ini den wan di wi e gi leri? Na agersitori di Yesus ben fruteri fu a saiman, èn di wi sabi heri bun, e yepi wi fu piki den aksi disi.

A waarheid musu doro na ati

„A siri na a wortu fu Gado”, na so Yesus ben taki. „A siri di sai na tapu a tumusi bun gron, na den sma di, baka di den yere a wortu nanga wan opregti en bun ati, e hori en èn e meki froktu fu di den e horidoro” (Lukas 8:11, 15). Sobun, fosi a waarheid fu a Kownukondre kan abi krakti tapu den studenti fu wi, a musu teki rutu na ini na agersi ati fu den. Yesus e gi wi a dyaranti taki te a waarheid fu Gado e naki na ati fu wan bun sma, neleki te bun siri e gro na ini bun gron, dan wantewante a waarheid dati e bigin wroko na tapu a sma, èn a e meki froktu. Sortu sani wi musu fruwakti fu si?

Wi musu poti prakseri na a fasi fa a sma de na ini en ati, èn no na den sani di wi man si nanga ai. A no ala ten wi sa kon sabi san de na ini na ati fu wan sma, soso fu di wan sma e teki prati doronomo na sani di abi fu du nanga na anbegi (Yeremia 17:9, 10; Mateyus 15:7-9). Wi musu kon sabi a sma moro bun. Wi musu man si taki a sma tyari wan kenki kon trutru na ini a fasi fa a e denki, te a abi fu du nanga den sani di a wani, a reide fu san ede a e du sani, èn den sani di a poti na a fosi presi na ini en libi. A sma musu tron wan nyun sma soleki fa Gado wani dati (Efeisesma 4:20-24). Wi sa fruklari disi nanga yepi fu wan agersitori: Di den sma fu Tesalonika kon yere a bun nyunsu, dan Paulus taki dati den ben de klariklari fu teki en leki a wortu fu Gado. Ma boiti dati, den ben e horidoro, den ben de getrow, èn den ben abi lobi, èn a sani dati overtoigi Paulus taki a waarheid ben „abi krakti tapu [den]”.​—1 Tesalonikasma 2:13, 14; 3:6.

A no de fu taki, dati a fasi fa a studenti e tyari ensrefi, sa sori te fu kaba san de na ini en ati, soleki fa na eksempre fu Eric e sori (Markus 7:21, 22; Yakobus 1:14, 15). A sari fu taki dati, te wi e si swakifasi na a sma, dan a kan lati kaba fu yepi a sma dati. Fu dati ede, san de fanowdu, na fu pruberi fu kon sabi sortu swakifasi a sma abi, fosi den fasi disi e meki a sma fadon na yeye fasi. Wi musu feni wan fasi fu luku na ini na agersi ati fu a sma. Fa wi kan du dati?

Teki leri fu Yesus

A no de fu taki dati Yesus ben man leisi sma ati heri bun (Mateyus 12:25). Nowan fu wi man du dati. Toku a sori wi taki sosrefi wi kan kon sabi  san na den sani di wan sma wani trutru, fu san ede wan sma e du spesrutu sani, èn sortu sani a e poti na a fosi presi na ini en libi. Neleki fa wan datra di abi ondrofeni e du difrenti sani fu kon sabi san e du a trutru ati fu wan siki sma, na so Yesus gebroiki Gado Wortu fu ’hari sani kon na tapu’ èn fu tyari kon na krin san „na ati e denki èn san a abi na prakseri”, srefi te den sani dati ben kibri ete gi trawan.​—Odo 20:5; Hebrewsma 4:12.

Fu gi wan eksempre, wan leisi Yesus yepi Petrus fu kon frustan taki a ben abi wan swakifasi di ben o meki a naki futu trutru bakaten. Yesus ben sabi taki Petrus ben lobi en. Fu taki en leti, a no langa pasa di Yesus ben gi Petrus „den sroto fu a kownukondre” (Mateyus 16:13-19). Ma Yesus ben sabi tu taki Satan ben e suku fu meki den apostel fu en naki futu. Na ini den dei di ben de na den fesi, den apostel ben o kisi hebi kwinsi fu du san Satan ben wani den fu du. Soleki fa a sori, dan Yesus ben si taki a bribi fu sonwan fu den disipel fu en no ben tranga nofo. Fu dati ede, a no ben frede fu sori den sortu swakifasi den ben musu kenki. Luku fa a opo a tori dati.

Mateyus 16:21 e taki: „Sensi a ten dati, Yesus Krestes bigin sori den disipel taki a musu . . . pina . . . èn taki den ben o kiri en.” Luku taki Yesus sori den, a no taigi den nomo san ben o pasa nanga en. A musu de so taki a gebroiki bijbeltekst soleki Psalm 22:14-18 noso Yesaya 53:10-12, di e sori taki a Mesias ben o abi fu pina èn dede. Awansi fa a no fa, fu di Yesus leisi na ini Bijbel, noso fu di a taki sani soleki fa den ben skrifi na ini Bijbel, dan a gi Petrus nanga den trawan wan okasi fu taki san ben de na tapu den ati. Fa den ben o feni en te a ben o taigi den taki sma ben o frufolgu en?

Tra fasi leki fa wi fruwakti kande, Petrus, di ben de wan sma di ben de sondro frede èn di ben de fayafaya, ben piki na wan fasi di ben sori taki a no ben poti bun prakseri na a tori disi. Na so a kon na krin taki a fasi fa a ben denki no ben bun kwetikweti. A ben taki: „Masra, sorgu bun gi yusrefi, a sani disi no o miti yu kwetikweti.” A ben krin fu si taki a fasi fa Petrus ben e denki no ben bun, bika soleki fa Yesus ben sori, dan Petrus ’no ben e denki leki fa Gado e denki, ma a ben e denki leki fa libisma e denki’. Dati ben de wan seryusu fowtu di ben kan abi bun takru bakapisi. We, san Yesus du dan? Baka di Yesus gi Petrus piri-ai, dan a taigi en nanga den tra disipel: „Efu wan sma wani kon na mi baka, dan a no musu teri ensrefi moro, ma meki a teki en pina-postu èn tan waka na mi baka.” A taki fu den prakseri na ini Psalm 49:8 nanga Psalm 62:12, fu memre den na wan switi fasi taki têgo libi no ben o komoto fu libisma di no man gi trawan frulusu, ma a ben o komoto fu Gado.​—Mateyus 16:22-28.

Bakaten, Petrus meki frede basi en wan pisi ten èn a lei gi Yesus dri leisi. Ma aladi dati de so, toku wi no abi fu tweifri taki a takimakandra disi èn sosrefi tra takimakandra yepi en fu go na fesi heri esi na yeye fasi (Yohanes 21:15-19). Feifitenti dei nomo baka dati, Petrus opo tanapu sondro frede na fesi den ipi-ipi sma na ini Yerusalem fu gi den sma buweisi taki Yesus ben kisi wan opobaka trutru. Na ini den wiki, den mun, nanga den yari baka dati, a sori deki-ati di sma ben e grabu en doronomo, di den ben e fon en, èn di den ben e poti en na strafu-oso, èn na so fasi a ben de wan tumusi bun eksempre fu wan sma di ben de opregti sondro fu frede.​—Tori fu den Apostel 2:14-36; 4:18-21; 5:29-32, 40-42; 12:3-5.

San wi e leri fu a sani disi? Yu kan si san Yesus ben du fu hari kon na tapu san ben de na ini na ati fu Petrus, èn san a ben du fu tyari dati kon na  krin? A fosi sani di a du, na taki a gebroiki bijbeltekst di ben fiti fu meki Petrus poti prakseri na a swakifasi di a ben abi. Baka dati, a gi Petrus na okasi fu taki san ben de na tapu en ati. Te fu kaba, a gi Petrus moro rai fu Bijbel, fu yepi en fu kenki a fasi fa a ben denki èn a fasi fa a ben e firi. Kande yu feni taki yu no o man gi sma leri na a fasi disi, ma meki wi luku tu ondrofenitori di e sori taki te wi e sreka wisrefi bun èn te wi e frutrow tapu Yehovah, dan dati kan yepi iniwan fu wi fu du san Yesus ben du.

Hari kon na tapu san de na ini na ati

Wan Kresten papa ben kon sabi taki den tu boi fu en di ben sidon na ini na eerste nanga a tweede klas, ben teki switisani puru fu a tafra fu a skoromeester. A poti den boi sidon èn a taki-go-taki-kon nanga den. A papa no ben si na ogri disi leki wan pikin sani nomo di den boi ben du fu fruferi a skoromeester, ma a taki: „Mi taki nanga den boi fu di mi ben wani sabi soifri san ben meki den du na ogri disi.”

A papa aksi den boi efu den ben sabi ete san ben pasa nanga Akan, soleki fa Yosua kapitel 7 e fruteri dati. Heri esi den boi frustan san a ben wani sori den, èn den fruteri a papa fu na ogri di den ben du. A konsensi fu den ben trobi den kaba. Fu dati ede a papa meki den leisi Efeisesma 4:28, pe skrifi: „Meki a sma di e fufuru, no fufuru moro, ma na presi fu dati meki a go wroko tranga . . . so taki a kan abi wan sani fu prati nanga wan sma di de ini nowtu.” A papa meki den pikin bai sukrusani baka fu gi dati na a skoromeester, èn a sani dati meki den frustan a rai fu Bijbel moro bun.

„Te wi ben si taki den pikin fu wi ben abi takru denki, dan wi ben e pruberi fu rutu iniwan fu den denki disi puru”, na so a papa e taki, „èn wi ben e taki-go-taki-kon nanga den pikin fu meki den kisi bun denki di ben o meki den handri na a yoisti fasi.” Fu di a papa nanga a mama disi e teki na eksempre fu Yesus te den e gi den pikin fu den leri, meki a no de fu taki dati den ben abi bun bakapisi baka wan pisi ten. Te fu kaba, ala tu boi kisi a kari fu go dini na Bethel na ini Brooklyn èn wan fu den e dini drape ete, sowan 25 yari kaba.

Luku fa wan tra Kresten ben man yepi a bijbelstudenti fu en. A bijbelstudenti dati ben e go na den konmakandra, a ben e teki prati na a preikiwroko, èn a ben taki kaba taki a ben wani teki dopu. Ma a ben gersi leki a ben e frutrow tumusi furu tapu ensrefi, na presi fu frutrow tapu Yehovah. „Na uma disi di no trow, moro nanga moro ben e tyari ensrefi leki wan sma di no ben abi trawan fanowdu, ma ensrefi no ben e si dati”, na so a Kotoigi e taki. „Mi ben e broko mi ede taki wan dei a ben o lasi-ati noso taki a ben o tapu fu dini Yehovah.”

Fu dati ede a Kotoigi no draidrai, ma a gebroiki Mateyus 6:33 fu taki-go-taki-kon nanga a bijbelstudenti disi. A gi en deki-ati fu tyari wan kenki kon na ini a fasi fa a ben e libi, fu poti a Kownukondre na a fosi presi, èn fu frutrow tapu Yehovah taki a ben o meki sani waka bun nanga en. A kotoigi aksi en langalanga: „Yu abi muiti son leisi fu frutrow tapu trawan èn tapu Yehovah sosrefi, fu di yu e libi yu wawan?” A studenti agri taki pikinmoro a ben tapu fu begi. Ne a preikiman gi en deki-ati fu teki a rai di skrifi na Psalm 55:22 èn fu trowe en hebi na tapu Yehovah fu di, soleki fa 1 Petrus 5:7 e gi a dyaranti, „a e broko en ede nanga unu”. Den wortu dati naki en ati. A Kotoigi e taki: „A sani dati meki a krei, èn mi no ben gwenti fu si taki a e krei.”

Tan sorgu taki a waarheid e wroko na ini yu

Te wi e si taki den sma di wi e gi leri e teki a waarheid fu Bijbel, dan dati e gi wi furu prisiri.  Ma efu wi wani abi bun bakapisi te wi e meki muiti fu yepi trawan, dan wisrefi musu de bun eksempre (Yudas 22, 23). Wi alamala musu ’tan wroko gi wi eigi frulusu nanga frede en nanga beifi’ (Filipisma 2:12). Dati wani taki dati wi musu sorgu doronomo taki a leti fu Bijbel e skèin tapu wi eigi ati, aladi wi e luku efu wi abi denki, winsi, noso firi di wi musu kenki.​—2 Petrus 1:19.

Fu gi wan eksempre, a de so taki a faya di yu abi fu du Kresten wroko kon swaki den dei disi? Efu dati de so, dan fa a du kon? Wan reide ben kan de taki yu e frutrow tumusi furu tapu yusrefi. Fa yu kan kon sabi efu dati de so? Leisi Hagai 1:2-11, èn poti prakseri na wan opregti fasi na a fasi fa Yehovah e taki nanga den Dyu di ben drai go baka na a kondre fu den. Dan, aksi yusrefi: ’Mi e broko mi ede tumusi efu sani o tan waka bun nanga mi na moni sei èn efu mi o tan abi den sani di mi abi fanowdu fu tan na libi? Mi e frutrow na tapu trutru taki Yehovah sa sorgu mi osofamiri te mi e poti yeye afersi na a fosi presi na ini mi libi? Noso mi feni taki mi musu sorgu gi misrefi fosi?’ Efu a de fanowdu taki yu musu kenki a fasi fa yu e denki noso a fasi fa yu e firi, dan no draidrai fu du dati. Rai fu Bijbel, soleki den wan di de fu feni na Mateyus 6:25-33, Lukas 12:13-21, nanga 1 Timoteyus 6:6-12, e sori krin fu san ede wi musu abi wan yoisti denki fu den sani di wi abi fanowdu fu tan na libi, èn fu den gudu di wi abi. A denki dati e gi wi a dyaranti taki Yehovah sa tan blesi wi.​—Maleaki 3:10.

Te wi e ondrosuku wisrefi krin na a fasi disi, dan dati sa meki taki wi sa go prakseri seryusu fu den swakifasi fu wi. Te sma e meki wi kon si taki wi abi swakifasi, dan a kan de wan muilek sani gi wi fu agri taki dati de so trutru. Ma te yu e bigin du wan sani na wan lobi-ati fasi fu yepi yu pikin, yu bijbelstudenti, noso yusrefi, dan awansi a muilek, toku dati ben kan abi leki bakapisi taki yu e kibri a libi fu a sma dati, noso taki yu e kibri yu eigi libi.​—Galasiasma 6:1.

Ma fa a de efu a muiti di yu e meki no e sori fu tyari bun bakapisi kon? No lasi-ati tumusi gaw. A kan de wan muilek sani fu kenki wan onvolmaakti ati, a kan teki furu ten, èn son leisi a sani disi kan meki wan sma lasi-ati sosrefi. Ma a kan tyari blesi kon tu.

A yonkuman Eric di ben kari na a bigin fu na artikel, kon kisi ensrefi te fu kaba èn a bigin baka fu „waka na ini a waarheid” (2 Yohanes 4). „Na di mi kon si san mi ben lasi, dan fosi mi drai go baka na Yehovah”, na so a e taki. Eric en papa nanga mama yepi en so taki a e dini Gado getrow now. Fosi, a no ben lobi en srefisrefi taki en papa nanga mama ben e gi en deki-ati doronomo fu ondrosuku en ati, ma now a e warderi trutru san den du. „Mi papa nanga mi mama na tumusi bun sma”, na so a e taki. „Noiti den tapu fu lobi mi.”

Te wi e skèin a leti fu Gado Wortu na tapu na ati fu den wan di wi e gi leri, dan na so fasi wi sori taki wi abi lobi bun-ati (Psalm 141:5). Tan ondrosuku na ati fu yu pikin èn a di fu den bijbelstudenti fu yu, fu kon sabi efu trutru den e kweki nyun Kresten fasi. Tan sorgu taki a waarheid e wroko na ini trawan èn na ini yu fu di yu e „gebroiki a wortu fu a waarheid na wan reti fasi”.​—2 Timoteyus 2:15.

[Prenki na tapu bladzijde 29]

Den wortu fu Yesus ben tyari kon na krin taki Petrus ben abi wan swakifasi

[Prenki na tapu bladzijde 31]

Gebroiki Bijbel fu hari kon na tapu san de na ini na ati