Ala ten Yehovah e du san reti

„Yehovah de regtfardiki na ini ala den pasi fu en.”​—PSALM 145:17.

1. Fa yu e firi te yu kon sabi taki wan sma abi wan fowtu denki fu yu, èn san wi kan leri fu so wan ondrofeni?

A PASA nanga yu wan leisi taki wan sma ben abi wan fowtu denki fu yu fu di a no sabi yu bun? Kande a e tweifri na a fasi fa yu e handri, noso kande a e aksi ensrefi fu san ede yu handri so. We, efu disi pasa nanga yu, dan a ben sa hati yu kande èn wi kan frustan fu san ede yu ben e firi so. Ma toku wi kan leri wan prenspari sani fu disi, namku: A de wan koni sani fu no abi wan denki fu wan tori, bifo wi sabi a fini fu a tori.

2, 3. San son sma e du te son Bijbel tori no e sori ala sani finifini di den ben sa wani sabi? Ma san Bijbel e fruteri wi fu Yehovah?

² A bun fu hori a sani disi na prakseri bifo wi abi wan denki fu Yehovah Gado èn fu san a du. Fu san ede? Fu di son tori na ini Bijbel kan bruya wi te wi leisi den a fosi leisi. Sonwan fu den tori disi, di e taki fu sani di son anbegiman fu Gado du noso fu a fasi fa Gado krutu son sma, no e fruteri wi ala sani finifini kande, èn disi kan meki taki wi no kan kisi piki tapu ala den aksi fu wi. A de wan sari sani taki son sma no e bribi den tori disi, èn den e tweifri srefi efu Gado regtfardiki trutru èn efu trutru a e du san reti. Toku, Bijbel e taigi wi taki „Yehovah regtfardiki na ini ala den pasi fu en” (Psalm 145:17). En Wortu e gi wi a dyaranti tu taki a „no e handri na wan ogri-ati fasi” (Yob 34:12; Psalm 37:28). Fu dati ede, prakseri nomo fa a musu e firi te sma abi wan fowtu denki fu en!

³ Meki wi luku feifi sani di e sori fu san ede wi kan bribi taki Yehovah e krutu sani na a yoisti fasi. Dan nanga den sani dati na prakseri, wi o luku tu Bijbel tori di son sma e feni muilek fu frustan.

Fu san ede wi kan bribi taki Yehovah e krutu sani na a yoisti fasi?

4. Fu san ede wi musu abi sakafasi te wi e prakseri fu den sani di Gado du? Gi wan eksempre.

⁴ A fosi sani, na fu di Yehovah sabi a heri tori finifini, èn wi no sabi dati. Fu dati ede, wi musu abi sakafasi te wi e prakseri fu den sani di Yehovah du. Fu gi yu wan eksempre: Prakseri fu wan krutuman di e leisi a bosroiti di a teki na ini wan krutu-afersi. A krutuman disi abi wan heri bun nen na ini a libimakandra èn a no e teki sma sei na ini krutu-afersi. Sobun, efu wan sma e kon taki dati a krutuman fowtu, aladi a sma disi no sabi a heri tori èn a no sabi den wet na san a krutuman musu hori ensrefi, dan san yu ben o denki fu a sma dati? A ben o de wan don sani te wan sma e krutu wan tori sondro fu sabi a heri tori finifini (Odo 18:13). We, dan a de wan moro don sani te libisma e krutu „a Krutuman fu heri grontapu”!​—Genesis 18:25.

5. San wi no musu frigiti te wi e leisi Bijbel tori di e sori fa Gado krutu son sma?

⁵ A di fu tu sani fu san ede wi kan bribi taki Gado e krutu sani na a yoisti fasi, na fu di Gado man du wan sani di libisma no man du, namku fu leisi sma ati (1 Samuel 16:7). En Wortu e taki: „Mi, Yehovah, e ondrosuku na ati, èn mi e ondrosuku den niri, iya, fu gi ibriwan sma akruderi den pasi fu en, akruderi a bakapisi fu den sani di a e du” (Yeremia 17:10). Fu dati ede, te wi e leisi den Bijbel tori di e sori fa Gado krutu son sma, dan meki wi no frigiti taki den ai fu en si ala sani di no skrifi na ini a tori; a si san a sma ben e prakseri aladi trawan no ben sabi dati, a si fu san ede a sma handri na so wan fasi, èn a si na fesi san a sma ben wani du.​—1 Kroniki 28:9.

6, 7. (a) Fa Yehovah sori taki ala ten a e hori ensrefi na en markitiki fu regtfardikifasi èn retidu, srefi efu a musu lasi furu fu dati ede? (b) San wi musu hori na prakseri te wi e leisi wan sani na ini Bijbel di e meki wi aksi wisrefi efu Gado ben handri na wan yoisti èn reti fasi?

⁶ Luku a di fu dri sani fu san ede wi kan bribi taki Yehovah e krutu sani na a yoisti fasi: Ala ten a e hori ensrefi na den regtfardiki markitiki fu en, srefi efu a musu lasi furu fu dati ede. Luku  wan eksempre. Di Yehovah gi en Manpikin leki lusu-paiman fu meki den libisma di e gi yesi na en kon fri fu sondu nanga dede, dan a tan hori ensrefi na den reti èn regtfardiki markitiki fu en (Romesma 5:18, 19). Ma di a ben e si fa en lobi Manpikin ben e pina èn dede na wan pina-postu, dan dati ben musu fu hati Yehovah moro leki iniwan tra sani. San disi e taigi wi fu Gado? Fu „a lusu-paiman di Yesus Krestes ben pai”, Bijbel e taki: „Gado du disi fu sori sma taki a de regtfardiki” (Romesma 3:24-26). Na ini wan tra vertaling fu Romesma 3:25, wi e leisi: „Na so Gado sori tak’ A e du sani tapu wan leti fasi” (Nyun Testamenti). Iya, aladi Yehovah lasi furu èn a ben e hati en srefisrefi, toku a ben de klariklari fu gi a lusu-paiman, èn disi e sori taki a de tumusi prenspari gi en fu „du sani tapu wan leti fasi”.

⁷ Sobun, te wi e leisi wan sani na ini Bijbel di e meki wi aksi wisrefi efu Gado ben handri na wan yoisti èn reti fasi, dan wi musu hori a sani disi na prakseri: Fu di Yehovah e tan hori ensrefi na en markitiki fu regtfardikifasi èn retidu, meki a no kibri en eigi Manpikin srefi so taki a no ben o dede wan hati dede. We, efu a ben hori ensrefi na den markitiki dati na ini na afersi disi, dan yu no denki taki a o du dati na ini tra afersi tu? Fu taki en leti, noiti a e pasa so, taki Yehovah no e hori ensrefi na den regtfardiki èn reti markitiki fu en. Sobun, wi abi nofo buweisi di e gi wi a dyaranti taki ala ten a e du sani tapu wan reti fasi.​—Yob 37:23.

8. Fu san ede a no yoisti te libisma e denki taki Yehovah no abi retidu nanga regtfardikifasi?

⁸ Luku wan di fu fo sani fu san ede wi kan bribi taki Yehovah e krutu sani na wan yoisti fasi: Yehovah meki libisma akruderi a prenki fu en (Genesis 1:27). Sobun, Gado gi libisma den srefi fasi di a abi; dati wani taki dati a gi den a firi fu handri na wan reti èn regtfardiki fasi tu. We, efu wi abi den firi disi, dan a no yoisti fu denki taki Yehovah no abi den fasi disi, a no so? Te wan Bijbel tori e bruya wi pikinso, dan wi musu hori na prakseri taki a sondu di wi kisi, meki taki wi no man taki soifri san reti èn san regtfardiki. Yehovah Gado, di meki wi akruderi a prenki fu en, sabi soifri san na retidu èn regtfardikifasi (Deuteronomium 32:4). Na wan don sani fu kisi a prakseri srefi, taki libisma de moro regtfardiki èn e handri na wan moro reti fasi leki Gado!​—Romesma 3:4, 5; 9:14.

9, 10. Fu san ede Yehovah no abi a plekti fu fruteri libisma fu san ede a du wan sani, noso fu sori den taki a abi leti?

⁹ Wan di fu feifi sani fu san ede wi kan bribi taki Yehovah e krutu sani na a yoisti fasi, na taki a de „a Moro Heiwan na heri grontapu” (Psalm 83:18). Fu dati ede, a no abi a plekti fu fruteri libisma fu san ede a du wan sani, noso fu sori libisma taki a abi leti. En na a Gran Patu-bakriman, èn wi de leki kleidoti di a e gebroiki fu meki prapi; sobun a kan du nanga wi soleki fa a wani (Romesma 9:19-21). Suma na wi, di de leki prapi di a meki, fu krutu den bosroiti fu en èn den sani di a e du? Di a famiri-edeman Yob, ben abi wan fowtu denki fu a fasi fa Gado e handri nanga libisma, dan Yehovah sori en taki a no ben denki na wan yoisti fasi, di a aksi en: „Yu wani meki mi retidu de trutru sondro krakti? Yu wani gi mi fowtu so taki yu kan abi reti?” Baka di Yob kon frustan taki a ben taki wan sani sondro fu sabi a heri tori, dan a kisi berow (Yob 40:8; 42:6). Meki a de so, taki noiti wi e meki a fowtu fu taki dati Gado fowtu!

¹⁰ A de krin, taki nofo buweisi de fu san ede wi kan bribi taki ala ten Yehovah e du san reti. Now di wi kon frustan fa Yehovah e du sani, dan meki wi luku tu Bijbel tori di kan bruya son sma. A fosiwan abi fu du nanga den sani di wan anbegiman fu Gado ben du, èn a trawan abi fu du nanga wan krutustrafu di Gado srefi ben gi.

Fu san ede Lot ben wani gi den umapikin fu en na wan grupu ogriman di ben abi atibron?

11, 12. (a) Fruteri san pasa di Gado seni tu engel, di ben teki libisma-skin, fu go na Sodom. (b) San son sma e aksi densrefi te den leisi a tori disi?

¹¹ Na ini Genesis kapitel 19, wi e leisi san pasa di Gado seni tu engel, di ben teki libisma-skin, fu go na Sodom. Lot ben wani nomonomo taki den fisitiman disi ben musu tan na en oso. Ma na a neti dati, wan grupu ogriman fu a foto lontu  na oso èn den ben wani taki Lot tyari den fisitiman kon gi den, so taki den ben kan abi seks demakandra nanga den. Lot ben pruberi fu taki nanga den ogriman fu no du a sani disi, ma den man no ben wani arki. Fu kibri den fisitiman, Lot taki: „Grantangi, mi brada, no handri na wan ogri-ati fasi. Grantangi, luku, dyaso mi abi tu umapikin di noiti ete didon na wan man. Grantangi, meki mi tyari den kon na doro gi unu. Dan un du nanga den san bun na un ai. Ma no du den man disi noti, bika na fu dati ede den kon na ondro a skaduw fu mi daki.” A grupu ogriman no ben wani arki èn pikinmoro den broko a doro kon na inisei. Te fu kaba, den engel di ben kon na Lot, breni a grupu ogriman di ben e du leki den no bun na den ede.​—Genesis 19:1-11.

¹² Yu kan frustan taki a tori disi e meki son sma aksi densrefi wan tu sani. Kande den e aksi: ’Fa Lot ben kan gi den umapikin fu en na wan grupu ogriman di ben abi gridi sekslostu, soso fu di a ben wani kibri den fisitiman di ben de na ini en oso? A no de so taki Lot handri na wan fowtu fasi, noso na wan lagi fasi srefi fu di a ben e frede?’ Te yu e luku a tori disi, dan fu san ede Gado meki Petrus skrifi taki Lot ben de wan „regtfardiki man”? Gado ben feni en bun taki Lot du so wan sani? (2 Petrus 2:7, 8) Meki wi go luku a tori disi moro fini, so taki wi no kisi wan fowtu denki.

13, 14. (a) San wi musu hori na prakseri fu a fasi fa Lot ben handri na ini a Bijbel tori disi? (b) San e sori taki Lot no ben handri na wan lagi fasi fu di a ben e frede?

¹³ Fosi, wi musu hori na prakseri dati Bijbel no e taki efu Lot du bun, noso efu a ben fowtu; Bijbel e fruteri nomo san ben pasa. Bijbel no e fruteri tu san Lot ben e denki, noso fu san ede a handri na so wan fasi. Te Lot o kon baka na a „opobaka . . . fu den regtfardikiwan”, dan kande a sa fruteri a tori disi moro fini.​—Tori fu den Apostel 24:15.

¹⁴ Lot no ben de wan fredeman kwetikweti. A ben kon na ini wan muilek situwâsi. Di Lot taki dati den fisitiman ben „kon na ondro a skaduw” fu en daki, dan a ben wani sori taki a ben e si en leki wan plekti fu kibri den fisitiman. Ma disi no ben o de wan makriki sani. A Dyu historia skrifiman Josephus fruteri taki den sma fu Sodom „ben e handri na wan ogri fasi nanga libisma, èn den no ben e lespeki Gado kwetikweti . . . Den no ben wani si freimdesma na ai, èn den ben e du ala sortu morsu sani na seks sei nanga makandra.” Toku, Lot no ben e frede a grupu ogriman disi di ben abi bita-ati. Kontrari fu dati, a go na dorosei èn a taki-go-taki-kon nanga den man disi di ben e atibron. A „ben tapu a doro na en baka” srefi.​—Genesis 19:6.

15. Fu san ede wi kan taki dati Lot ben handri nanga bribi?

 ¹⁵ Son sma kan aksi: ’Ma dan fu san ede Lot ben wani gi den umapikin fu en na den ogriman dati?’ Na presi fu denki wantewante taki Lot ben ogri, dan meki wi prakseri pikinso fu san ede Lot ben sa du so wan sani. Na a fosi presi, wi kan taki dati Lot du disi fu di a ben abi bribi. Fa so? A no de fu taki dati Lot ben sabi fa Yehovah ben kibri Sara, a wefi fu en omu Abraham. Memre taki Sara ben moi srefisrefi èn fu dati ede Abraham ben aksi en fu taigi sma taki den ben de brada nanga sisa, fu di Abraham ben frede taki sma ben o kiri en fu man teki Sara. * Bakaten, sma ben tyari Sara go na a oso fu Farao. Ma Yehovah ben kon na ini a tori èn a ben sorgu taki Farao no du nowan ogri nanga Sara (Genesis 12:11-20). A kan taki Lot ben abi a bribi taki Yehovah ben o kibri den umapikin fu en na so wan fasi tu. A moi fu si taki nanga yepi fu den engel fu en, Yehovah kon na ini a tori trutru èn noti ben pasa nanga den yongu uma.

16, 17. (a) Na sortu fasi Lot ben e pruberi kande fu skreki, noso bruya den man fu Sodom? (b) Awinsi san Lot ben e denki, sortu sani wi sabi seiker?

¹⁶ Luku wan tra sani di ben kan meki taki Lot handri na so wan fasi. Kande Lot ben e pruberi fu skreki, noso bruya den man. Kande a ben e denki taki den man no ben o wani den umapikin fu en, fu di den sma fu Sodom ben abi a gridi lostu fu libi wan homo-sekslibi (Yudas 7). Boiti dati, den yongu uma ben abi mofo fu trow nanga tu man fu a foto, sobun, na ini a grupu ogriman yu ben kan abi famiriman, mati, noso bisnis-mati fu den tu man disi di ben o trow nanga den umapikin fu Lot (Genesis 19:14). Kande Lot ben howpu taki sonwan fu den man na ini a grupu ben o opo taki gi den umapikin fu en, fu di den ben sabi den man di ben o trow nanga den umapikin fu Lot. Na so pratifasi ben o kon na ini a grupu, èn den no ben o man du so furu ogri. *

¹⁷ Awinsi san Lot ben e denki, noso awinsi san ben meki a handri so, wi sabi wan sani seiker, namku: Fu di na ala ten Yehovah e du san reti, meki a ben sabi fu san ede a ben e si Lot leki wan „regtfardiki man”. Èn te wi e luku fa a grupu ogriman fu Sodom ben handri leki den no bun na den ede, dan wi kan frustan krin fu san ede Yehovah ben abi ala reti fu strafu den ogrisma di ben e tan na ini a foto dati.​—Genesis 19:23-25.

Fu san ede Yehovah naki Usa kiri?

18. (a) San pasa di David ben pruberi fu tyari na Ark go na Yerusalem? (b) Sortu sani son sma e aksi densrefi te den leisi a tori disi?

¹⁸ Wan tra tori di son sma no e frustan so bun, abi fu du nanga a ten di David ben pruberi fu tyari na ark fu a frubontu go na Yerusalem. Den ben poti na Ark na tapu wan wagi di Usa nanga en brada ben e tyari. Bijbel e taki: „Safrisafri den kon doro te na a pisi gron fu Nakon pe den e masi sani. Dan Usa langa en anu go na a ark fu a tru Gado èn a grabu en hori, bika pikinmoro den kaw ben meki a fadon. Ne Yehovah atibron tapu Usa èn a tru Gado naki en trowe drape, fu di a du wan sani di e sori taki a no e lespeki Gado. Èn leti drape a dede, krosibei fu na ark fu a tru Gado.” Wan tu mun baka dati, ala sani waka bun di den tyari na Ark soleki fa Gado ben wani, namku na tapu den skowru fu den Kehatsma fu a lo fu Leifi (2 Samuel 6:6, 7; Numeri 4:15; 7:9; 1 Kroniki 15:1-14). Son sma e aksi densrefi kande: ’Fu san ede Yehovah gi Usa so wan hebi strafu? Usa ben pruberi nomo fu hori na Ark so taki a no fadon.’ Fosi wi kisi wan fowtu denki fu a tori disi, dan a bun fu luku wan tu pikinpikin sani fu a tori disi di sa yepi wi fu frustan en moro bun.

19. Fu san ede Yehovah no man handri na wan kruktu fasi?

¹⁹ Wi musu hori na prakseri taki Yehovah no man handri na wan kruktu fasi (Yob 34:10). A  no ben o sori lobi kwetikweti efu a ben o handri na wan kruktu fasi, èn Bijbel leri wi taki „Gado na lobi” (1 Yohanes 4:8). Boiti dati, den Buku fu Bijbel e taigi wi taki „regtfardikifasi nanga reti na a fasti presi fu [Gado] kownusturu” (Psalm 89:14). Fa a kan dan, taki Yehovah o man handri na wan kruktu fasi? Efu a ben o du disi, dan a ben o handri kontrari a reti di a abi fu de a Moro Hei Tiriman.

20. Fu san ede wi kan taki dati Usa ben musu fu sabi den wet di abi fu du nanga na Ark?

²⁰ Hori na prakseri taki Usa ben musu fu sabi a Wet. Na Ark ben e sori taki Yehovah ben de drape. A Wet ben sori krin taki na wán grupu fu sma nomo ben mag fasi na Ark, èn a Wet ben taki krin sosrefi dati iniwan tra sma di ben fasi na Ark, ben o kisi dedestrafu (Numeri 4:18-20; 7:89). Fu dati ede, te den ben musu tyari na Ark go na wan tra presi, dan den no ben musu si en leki wan wroko di no de so prenspari. Soleki fa a sori, dan Usa ben de wan Leifisma (ma a no ben de wan priester), sobun a ben musu fu sabi a Wet. Boiti dati, wan tu yari na fesi, sma ben tyari na Ark go kibri na a oso fu en papa (1 Samuel 6:20–7:1). A ben tan drape sowan 70 yari langa, teleki David bosroiti fu puru en drape. Sobun, sensi en pikin-nengreten, Usa ben sa musu fu sabi den wet di abi fu du nanga na Ark.

21. Te wi e luku a tori fu Usa, dan fu san ede a de prenspari fu hori na prakseri taki Yehovah e si na ini sma ati fu san ede den e du sani?

²¹ Soleki fa wi ben taki kaba, dan Yehovah man leisi sma ati. Gado Wortu e taki dati Usa ben „du wan sani di e sori taki a no e lespeki Gado”, sobun, a kan taki Yehovah ben si na ini na ati fu Usa taki a ben e denki ensrefi nomo, aladi dati no skrifi na ini a tori. A kan taki na heimemre meki Usa du sani di de teige a Wet? (Odo 11:2) A kan taki a ben e firi ensrefi prenspari na fesi ala sma fu di a ben e yepi fu tyari na Ark di en osofamiri ben kibri? (Odo 8:13) A ben de so taki Usa no ben e bribi taki Yehovah ben sa man du wan sani fu hori a santa kisi, di ben e sori taki A de na den mindri? Awinsi fa no fa, wi kan de seiker taki Yehovah ben du san reti. Soleki fa a sori, dan Yehovah ben si wan sani na ini na ati fu Usa, di meki taki A strafu en wantewante.—Odo 21:2.

Wan prenspari sani di e meki wi abi na overtoigi taki Gado e krutu sani na a yoisti fasi

22. Fu san ede wi kan taki dati Yehovah handri na wan koni fasi di a no meki sma skrifi ala sani finifini na ini en Wortu?

²² Wi man si taki Yehovah abi koni pasa marki fu di a no meki sma skrifi ala sani finifini na ini en Wortu. Na so fasi a e gi wi na okasi fu sori taki wi e frutrow en. Te wi e prakseri den sani di wi luku didyonsro, dan a de krin fu si taki wi kan abi ala frutrow taki Yehovah e krutu sani na a yoisti fasi, a no so? Iya, te wi e studeri Gado Wortu nanga wan opregti ati èn te wi de klariklari fu si a tori soleki fa Gado e si en, dan wi e leri so furu sani fu Yehovah, taki wi kan abi na overtoigi taki ala ten a e du san reti. Fu dati ede, efu son Bijbel tori e meki wan tu aksi opo kon di wi no man piki wantewante, dan meki wi abi ala frutrow taki Yehovah du san reti.

23. Sortu frutrow wi kan abi na ini den sani di Yehovah o du na ini a ten di e kon?

²³ Wi kan abi a srefi frutrow na ini den sani di Yehovah o du na ini a ten di e kon. Fu dati ede, meki wi abi na overtoigi taki te a ten doro fu koti krutu na ini a ten fu a bigi banawtu di de na pasi e kon, Yehovah no sa „pori den regtfardikiwan makandra nanga den ogriwan” (Genesis 18:23). A no o du dati noiti, fu di a lobi regtfardikifasi èn retidu. Wi kan abi ala frutrow sosrefi, taki a sa gi wi ala san wi wani na ini a nyun grontapu di e kon.​—Psalm 145:16.

[Futuwortu]

Yu e memre disi ete?

• Fu san ede wi kan bribi taki Yehovah e krutu sani na a yoisti fasi?

• San kan yepi wi fu no kisi wan fowtu denki fu a tori pe Lot ben wani gi den umapikin fu en na wan grupu ogriman di ben abi atibron?

• San kan yepi wi fu frustan fu san ede Yehovah naki Usa kiri?

• Sortu frutrow wi kan abi na ini den sani di Yehovah o du na ini a ten di e kon?

[Aksi fu a tori disi]