Den „feni wan peri di warti furu”

„A kownukondre fu hemel na a sani di sma e du furu muiti fu feni, èn den wan di e du furu muiti, e kisi en.”​—MATEYUS 11:12.

1, 2. (a) Sortu tumusi moi fasi Yesus ben tyari kon na krin na ini wan fu den agersitori fu en di e taki fu a Kownukondre? (b) San Yesus ben taki na ini na agersitori fu a peri di warti furu?

WAN sani de di abi someni waarde gi yu, taki yu ben o gi ala san yu abi, soso fu man kisi a sani dati? Nofo tron yu e yere taki sma gi den heri libi fu man doro wan spesrutu marki, soleki fu abi furu moni, biginen, makti, noso wan hei posisi. Ma na wanwan leisi nomo yu e yere taki wan sma feni wan sani di a wani so te, taki a de klariklari fu gi ala san a abi, soso fu man kisi a sani dati. So wan sma abi wan aparti, ma tumusi moi fasi, èn Yesus Krestes ben taki fu disi na ini wan fu den furu agersitori fu en di e taki fu a Kownukondre fu Gado, èn di e poti sma na prakseri broki.

² Wan leisi di Yesus ben de soso nanga den disipel fu en, dan a fruteri na agersitori disi di furu sma e kari ’na agersitori fu a peri di warti furu’. Disi na san Yesus taki: „A kownukondre fu hemel de sosrefi leki wan bisnisman di ben e waka go na difrenti presi fu suku peri di moi fu tru. Di a feni wán peri di warti furu, a gowe èn wantewante a seri ala den sani di a ben abi èn a bai a peri” (Mateyus 13:36, 45, 46). San Yesus ben wani leri den arkiman fu en nanga na agersitori disi? Èn fa wi kan kisi wini fu den wortu fu Yesus?

Peri ben abi furu waarde

3. Fu san ede peri ben abi so furu waarde na ini owruten?

³ Sensi na ini owruten, sma si peri leki diri sani di den e gebroiki fu moimoi. Wan buku e taki dati a sabiman Plinius na Owruwan fu Rome ben taki dati peri ben de „den moro diri sani” na a ten dati. Peri de heri tra fasi leki gowtu, solfru, noso furu diriston, fu di na libisani e meki den. Furu sma sabi taki na wan sortu meti di e libi na ini wan skropu na ini se, e meki peri. Te wan sani soleki wan pikin pisi ston e kon na ini a skropu, èn a e fruferi a meti disi, dan a meti e domru wan sortu weti brenki sani di sma e kari parelmoer lontu a ston, èn na a sani disi e meki taki a ston e tron wan heri moi peri te fu kaba. Na ini owruten, den moro moi peri ben e komoto na presi di ben de farawe fu Israel, namku a Redi Se, a Golf fu Persia, èn na Indisch Se. Disi na fu san ede Yesus ben taki fu „wan bisnisman di ben e waka go na difrenti presi fu suku peri di moi fu tru”. Wan sma musu du furu muiti fu feni peri di abi furu waarde.

4. San na a moro prenspari sani di wi kan leri fu na agersitori di Yesus gi fu a bisnisman di ben e waka go na difrenti presi?

 ⁴ Aladi a de so taki wan langa pisi ten moi peri ben diri srefisrefi, toku a no a waarde fu peri ben de a moro prenspari sani di Yesus ben wani leri sma nanga na agersitori fu en. Na ini na agersitori disi, Yesus no ben taki dati a Kownukondre fu Gado de leki wan diri peri nomo, ma a ben poti sma prakseri na „wan bisnisman di ben e waka go na difrenti presi fu suku peri di moi fu tru” èn na san a bisnisman du di a feni wan peri di ben moi srefisrefi. Tra fasi leki wan aladei wenkriman, wan bisnisman di ben e waka go na difrenti presi, ben de wan sabiman na ini a wroko di a ben e du; a ben sabi fa fu luku a peri finifini, èn a ben man si fu san ede a peri na wan aparti sortu peri. Efu a man disi si wan peri, dan a sabi wantewante efu a de wan trutru peri, èn nowan sma ben o man kori en nanga wan peri di no abi so furu waarde, noso nanga wan falsi peri.

5, 6. (a) Sortu prenspari fasi a bisnisman na ini na agersitori fu Yesus abi? (b) Te wi e luku na agersitori fu a gudu di ben kibri na ini a gron, dan sortu sani e kon na krin fu a bisnisman di ben e waka go na difrenti presi?

⁵ A bisnisman disi abi ete wan tra fasi di de prenspari. Nofo tron a de so, taki bifo wan bisnisman ben o bai wan peri, a ben o luku fosi omeni moni a ben o man meki efu a ben o seri en baka. Kande a ben o luku sosrefi efu sma ben o wani bai so wan peri, so taki a ben o man seri en esi-esi baka te a bai en. Sobun, a ben o prakseri nomo fa fu kisi wini esi-esi baka te a bai en; a no ben o denki fu bai a peri gi ensrefi. Ma dati no ben de so nanga a bisnisman na ini na agersitori fu Yesus. A no ben e prakseri fa fu meki moni, noso fa a ben kan kon moro gudu. Fu taki en leti, a ben de klariklari fu gi „ala sani di a ben abi”, soso fu man kisi a sani di a ben e suku.

⁶ Furu bisnisman ben o si a sani di a bisnisman na ini Yesus agersitori ben du, leki wan don sani. Wan koni bisnisman no ben o denki srefi fu du so wan sani di ben kan abi takru bakapisi gi en. Ma a bisnisman na ini na agersitori fu Yesus ben abi wan tra denki fu san warti trutru. A wini di a ben kisi, no ben de a moni di a ben o man kisi gi a peri, ma a ben de a prisiri di a ben o kisi fu di a ben abi wan sani di warti moro ala tra sani. A sani disi e kon na krin na ini wan srefi sortu agersitori di Yesus ben gi. A ben taki: „A kownukondre fu hemel de leki wan gudu di kibri na ini a gron, di wan man ben feni èn ben kibri. A ben e prisiri so te, taki a go seri ala den sani fu en, dan a bai a gron dati” (Mateyus 13:44). Iya, a man ben seri ala sani, soso fu di a ben e prisiri fu feni a gudu èn fu abi a gudu gi ensrefi. Yu abi sma na ini a ten disi di abi a srefi fasi disi tu? Wan gudu de di abi so furu waarde, taki wan sma e gi ala san a abi, soso fu man kisi en?

Den sma di ben sabi san warti trutru

7. Fa Yesus sori taki a sabi heri bun taki a Kownukondre na wan warti sani trutru?

⁷ Di Yesus ben e fruteri na agersitori fu en, dan a ben taki fu „a kownukondre fu hemel”. A ben sabi heri bun taki a Kownukondre na wan warti sani trutru. Den Evangelietori e gi krinkrin buweisi fu dati. Baka di a teki dopu na ini 29 G.T., dan Yesus „bigin preiki: ’Un abi berow, un pipel, bika a kownukondre fu hemel kon krosibei kaba.’” Dri nanga afu yari langa, a ben e leri ipi-ipi sma, den sani di abi fu du nanga a Kownukondre. A waka na a heri kondre, aladi a ben e „go na ala den foto nanga den dorpu fu preiki a bun nyunsu fu Gado kownukondre èn fu meki disi bekènti”.​—Mateyus 4:17; Lukas 8:1.

8. San Yesus du fu sori san a Kownukondre o du?

⁸ Na ini a heri kondre Yesus ben du furu wondru, soleki fu dresi den sikiwan, fu gi nyanyan na sma di abi angri, fu basi sani soleki winti nanga watra, èn fu wiki dedesma srefi. Nanga den wondru disi a ben e sori sosrefi san Gado Kownukondre o du (Mateyus 14:14-21; Markus 4:37-39; Lukas 7:11-17). Te fu kaba, a sori taki a de loyaal na Gado èn na a Kownukondre fu di a ben gi en libi, di a dede na wan  pina-postu fu en bribi ede. Neleki fa a bisnisman ben de klariklari fu gi ala san a ben abi fu man bai a „peri di warti furu”, na so Yesus ben libi èn dede gi a Kownukondre.​—Yohanes 18:37.

9. Sortu aparti fasi den fosi disipel fu Yesus ben abi?

⁹ Yesus no ben sori wawan taki a moro prenspari sani na ini en libi na a Kownukondre, ma a ben tyari wan pikin grupu sma kon na wán di ben tron bakaman fu en. Den bakaman disi sosrefi, ben de sma di ben e frustan heri bun taki a Kownukondre na wan warti sani trutru. Wan fu den bakaman disi ben de Andreas, di ben de wan disipel fu Yohanes a Dopuman fosi. Yu ben abi wan tra disipel fu Yohanes a Dopuman tu, di ben de wan fu den manpikin fu Sebedeyus kande, èn sma ben e kari en Yohanes tu. Di en nanga Andreas yere fu Yohanes a Dopuman taki Yesus na „a Pikin Skapu fu Gado”, dan wantewante den go na Yesus èn den tron bribiman. Ma a tori no kaba ete. Wantewante, Andreas go na en brada Simon èn a taigi en: „Wi feni a Mesias.” A no langa baka dati, Simon (di sma ben kon sabi leki Seifas, noso Petrus), Filipus, nanga en mati Natanael sosrefi ben kon si tu taki Yesus na a Mesias. Fu taki en leti, disi ben abi so wan krakti tapu Natanael, taki a taigi Yesus: „Yu na a Manpikin fu Gado, yu na a Kownu fu Israel.”​—Yohanes 1:35-49.

Den kisi deki-ati fu du wan sani

10. San den disipel du di Yesus kon èn kari den, wan pisi ten baka di a ben miti den a fosi leisi?

¹⁰ A prisiri di Andreas, Petrus, Yohanes, nanga tra sma ben kisi di den kon sabi suma na a Mesias, de leki a prisiri di a bisnisman kisi di a feni a peri di warti furu. Ma san den disipel ben o du now? Den Evangelietori no e fruteri furu fu san den du wantewante baka di den miti Yesus a fosi leisi. Soleki fa a sori, dan furu fu den drai go du den aladei sani fu den baka. Ma baka sowan siksi mun te go miti wán yari so, di Andreas, Petrus, Yohanes, nanga Yakobus, a brada fu Yohanes, ben e du fisiwroko na a Se fu Galilea, dan Yesus miti den baka. * Di Yesus si  den, dan a taki: „Un kon waka na mi baka, dan mi sa meki unu tron fisiman fu libisma.” San den du? Mateyus e fruteri fu Petrus nanga Andreas, taki: „Wantewante den gowe libi den fisinèt èn den go waka na en baka.” Fu Yakobus nanga Yohanes, wi e leisi: „Wantewante den gowe libi a boto nanga den papa, èn den waka na Yesus baka.” Lukas e fruteri tu taki den „gowe libi ala sani èn den go waka na en baka”.​—Mateyus 4:18-22; Lukas 5:1-11.

11. Soleki fa a sori, dan san ben meki taki den disipel gi yesi wantewante di Yesus gi den wan kari fu tron bakaman fu en?

¹¹ Ma na wantewante den disipel go waka baka Yesus, sondro fu denki fu a tori disi srefi? Kwetikweti! Aladi den ben drai go du a fisiwroko, baka di den miti Yesus a fosi leisi, toku wi kan de seiker taki den sani di den ben si èn yere na a okasi dati, ben abi furu krakti tapu den ati nanga frustan. Fu di wán yari so ben pasa, meki den ben abi nofo ten fu prakseri fu den sani disi. Now a ten ben doro fu teki wan bosroiti. Soleki fa Yesus ben fruteri, dan a bisnisman di ben e waka go na difrenti presi, ben e prisiri so te di a feni a tumusi warti peri, taki „a gowe èn wantewante” a du ala san ben de fanowdu fu man bai a peri. Den disipel ben o de leki a bisnisman disi? Iya. Den sani di den ben si èn yere, naki den ati trutru. Den ben e frustan taki a ten ben doro fu du wan sani. Sobun, soleki fa den Evangelietori e fruteri, dan sondro fu draidrai, den gowe libi ala sani èn den tron bakaman fu Yesus.

12, 13. (a) San furu sma du di den yere den sani di Yesus taki? (b) San Yesus ben taki fu den getrow disipel fu en, èn san den wortu dati e sori?

¹² Iya, den getrow sma disi ben de heri tra fasi leki wan tu tra sma fu san den Evangelietori e fruteri bakaten! Yesus ben dresi furu fu den sma disi èn a ben gi furu fu den nyanyan, ma toku den drai go du den aladei sani fu den baka (Lukas 17:17, 18; Yohanes 6:26). Di Yesus kari sonwan fu den fu tron bakaman fu en, dan den aksi en primisi fu go du tra sani fosi (Lukas 9:59-62). Den getrow sma ben de heri tra fasi, èn Yesus ben taki fu den: „Sensi a ten fu Yohanes a Dopuman teleki now, a kownukondre fu hemel na a sani di sma e du furu muiti fu feni, èn den wan di e du furu muiti, e kisi en.”​—Mateyus 11:12.

¹³ San den wortu „du furu muiti” e sori? Fu a Griki wortu di vertaal nanga den wortu disi, wan wortubuku e taki: „A wortu disi e sori taki wan sma e du muiti nanga ala krakti di a abi” (Vine’s Expository Dictionary of Old and New Testament Words). A Bijbel sabiman Heinrich Meyer e taki fu a vers disi: „A e sori taki wan sma de fayafaya, a e du ala muiti èn a e feti fu kisi a Mesias kownukondre di e kon . . . Den afersi fu a kownukondre e meki a sma de nanga faya srefisrefi (sobun, a no man tan tiri moro èn a no de nanga fruwakti moro).” Neleki a bisnisman di ben e waka go na difrenti presi, na so a pikin grupu sma disi ben man si heri esi san warti trutru, èn den ben de klariklari fu libi ala san den ben abi, fu a Kownukondre ede.​—Mateyus 19:27, 28; Filipisma 3:8.

Trawan go suku a Kownukondre tu

14. Fa Yesus sreka den apostel fu du a Kownukondre preikiwroko, èn san ben de a bakapisi?

¹⁴ Aladi Yesus ben e go doro nanga en diniwroko, a ben e leri èn yepi tra sma fu man kisi a Kownukondre. A fosi sani di a du, na fu teki 12 man na mindri den disipel fu en èn a poti den na wroko leki apostel, noso sma di a ben seni go fu du wan wroko. Yesus ben fruteri den apostel finifini fa den ben musu du a diniwroko fu den èn a ben warskow den tu gi den tyalensi nanga problema di ben o miti den (Mateyus 10:1-42; Lukas 6:12-16). Na ini den tu yari di ben o kon baka dati, den ben o go nanga Yesus na den preikiwaka fu en na ini a heri kondre, èn den ben tron bun mati fu en. Den ben e yere san a taki, den ben si den wondru fu en, èn den ben e si sortu eksempre a ben de gi den (Mateyus 13:16, 17). A no de fu taki dati ala den sani disi naki den ati so te, taki den ben e suku a Kownukondre fayafaya èn nanga den heri ati, neleki fa a bisnisman ben e suku fu kisi a peri.

15. San ben de a trutru reide di ben o meki den disipel prisiri, soleki fa Yesus ben taki?

 ¹⁵ Boiti den 12 apostel, Yesus „ben teki seibitenti tra sma èn a ben seni den tu na tu go na en fesi na ibri foto nanga presi pe ensrefi ben o go”. A ben fruteri den tu fu den tesi nanga problema di ben o miti den, èn a ben gi den a komando fu taigi ala sma: „A kownukondre fu Gado kon krosibei” (Lukas 10:1-12). Di den 70 sma drai kon baka, den ben e prisiri srefisrefi èn den taigi Yesus: „Masra, srefi den ogri yeye e arki wi te wi e gebroiki yu nen.” Ma kande den ben fruwondru di Yesus taigi den taki den ben o kisi moro prisiri srefi, fu di den ben e suku a Kownukondre fayafaya. A taigi den: „No prisiri fu a sani disi, taki den yeye e saka na un ondro, ma prisiri bika un nen skrifi na ini hemel.”​—Lukas 10:17, 20.

16, 17. (a)  an Yesus taigi den getrow apostel fu en na a lasti neti di a ben de nanga den? (b) Sortu prisiri nanga dyaranti den apostel ben kisi fu den wortu fu Yesus?

¹⁶ Te fu kaba, tapu 14 Nisan, 33 G.T., a lasti neti di Yesus ben de nanga den apostel fu en, dan Yesus seti wan sani di sma kon sabi bakaten leki na Avondmaal fu Masra, èn a ben gi den a komando taki den ben musu tan memre san ben pasa na a okasi dati. Na a neti dati, Yesus taigi den 11 apostel di ben tan abra, taki: „Unu na den wan di tan nanga mi di mi kisi tesi; èn mi e meki wan frubontu nanga unu, soleki fa mi Tata meki wan frubontu nanga mi, fu wan kownukondre, so taki unu kan nyan èn dringi na mi tafra na ini mi kownukondre, èn sidon na tapu kownusturu fu krutu den twarfu lo fu Israel.”​—Lukas 22:19, 20, 28-30.

¹⁷ A ben musu fu gi den bigi prisiri èn a ben musu fu naki den ati trutru, di den apostel yere Yesus taki den wortu disi! Yesus ben gi den a moro bigi grani di iniwan sma kan kisi (Mateyus 7:13, 14; 1 Petrus 2:9). Neleki a bisnisman di ben e waka go na difrenti presi, na so den apostel disi ben gi ala san den ben abi, fu kisi a Kownukondre. Now den ben kisi a dyaranti taki den no ben gowe libi ala sani fu soso.

18. Suma, boiti den 11 apostel, o kisi wini sosrefi fu a Kownukondre te fu kaba?

¹⁸ Den apostel di ben de nanga Yesus na a neti dati, no ben de den wan-enkri sma di ben o kisi wini fu a Kownukondre. Yehovah ben wani taki 144.000 sma ben musu kon na ini a Kownukondre frubontu dati, fu tiri makandra nanga Yesus na ini a tumusi moi Kownukondre na hemel. Boiti dati, na apostel Yohanes ben si na ini wan fisyun, „wan bigi ipi, di nowan sma ben man teri . . . e tanapu na fesi a kownusturu èn na fesi a Pikin Skapu, . . . aladi  den e taki: ’Tangi fu wi Gado, di e sidon na tapu a kownusturu, èn fu a Pikin Skapu, meki wi kisi frulusu.’” Disi na den sma na grontapu di e saka densrefi ondro a tiri fu a Kownukondre. *​—Openbaring 7:9, 10; 14:1, 4.

19, 20. (a) Sortu okasi sma fu ala kondre abi? (b) Sortu aksi wi sa luku na ini na artikel di e kon?

¹⁹ Syatu bifo Yesus go na hemel, a gi den getrow bakaman fu en a komando disi: „Fu dati ede, go na sma fu ala kondre èn meki den tron disipel, èn dopu den na ini a nen fu a Tata, fu a Manpikin èn fu a santa yeye. Leri den fu du ala san mi komanderi unu. Èn luku! Mi sa de nanga unu ala den dei te na a kaba fu a sistema disi” (Mateyus 28:19, 20). Sobun, sma fu ala kondre ben o tron disipel fu Yesus Krestes. Neleki fa a bisnisman ben du ala muiti fu man kisi a peri di moi srefisrefi, na so den sma disi ben o du ala muiti fu kisi pai fu a Kownukondre, efu a o de na hemel, noso na grontapu.

²⁰ Yesus ben sori taki a wroko fu meki disipel, ben o go doro te na „a kaba fu a sistema disi”. Sobun, yu denki taki na ini a ten fu wi, sma de ete di de leki a bisnisman di ben e waka go na difrenti presi? Yu denki taki sma de ete di de klariklari fu gi ala san den abi, fu Gado Kownukondre ede? Wi sa luku den aksi disi na ini na artikel di e kon.

[Futuwortu]

Yu kan tyari disi kon na krin?

• San na a moro prenspari sani di wi kan leri fu na agersitori fu a bisnisman di ben e waka go na difrenti presi?

• Fa Yesus sori taki a ben sabi heri bun taki a Kownukondre na wan warti sani trutru?

• San ben meki taki Andreas, Petrus, Yohanes, nanga tra sma gi yesi wantewante di Yesus kari den?

• Sortu tumusi moi okasi sma fu ala kondre abi?

[Aksi fu a tori disi]

[Prenki na tapu bladzijde 10]

’Den gowe libi ala sani èn den go waka na Yesus baka’

[Prenki na tapu bladzijde 12]

Fosi Yesus go na hemel, a gi den bakaman fu en a komando fu meki sma tron disipel