Du muiti na ini a ten disi fu feni a „peri di warti furu”
Du muiti na ini a ten disi fu feni a „peri di warti furu”
„A bun nyunsu disi fu a kownukondre o preiki gi ala sma na heri grontapu, so taki ala kondre kan yere dati.”—MATEYUS 24:14.
1, 2. (a) Fa den Dyu na ini a ten fu Yesus ben e prakseri fu Gado Kownukondre? (b) San Yesus du fu meki den bakaman fu en frustan bun san na a Kownukondre, èn san ben de a bakapisi fu dati?
DI Yesus kon na grontapu, furu Dyu ben de fayafaya fu kon sabi sani fu Gado Kownukondre (Mateyus 3:1, 2; 4:23-25; Yohanes 1:49). Ma na ini a bigin, furu fu den no ben e frustan krin o bigi a tirimakti fu a Kownukondre disi ben o de, èn fa a ben o tiri; den no ben e frustan sosrefi taki a ben o de wan tirimakti na hemel (Yohanes 3:1-5). Srefi sonwan fu den bakaman fu Yesus no ben e frustan krin san na Gado Kownukondre, noso san den ben musu du fu man kisi a blesi fu tron tiriman makandra nanga Krestes.—Mateyus 20:20-22; Lukas 19:11; Tori fu den Apostel 1:6.
2 Na ini den yari di ben e pasa, Yesus ben e leri den disipel furu sani nanga pasensi, soleki na agersitori fu a peri di warti furu, fu san wi ben taki na ini na artikel di pasa. Na a fasi disi a ben e sori den disipel o prenspari a de fu meki muiti fu kisi a hemel Kownukondre (Mateyus 6:33; 13:45, 46; Lukas 13:23, 24). Disi ben musu fu naki den ati trutru, bika heri esi den tron fayafaya deki-ati preikiman fu a bun nyunsu fu a Kownukondre na den moro farawe presi na grontapu, soleki fa wi man leisi na ini a buku Tori fu den Apostel.—Tori fu den Apostel 1:8; Kolosesma 1:23.
3. Nanga a ten fu wi na prakseri, san Yesus ben taki fu a Kownukondre?
3 Ma fa a de na ini a ten disi dan? Milyunmilyun sma e kisi fu yere san na den blesi di a Kownukondre o tyari na ini wan paradijs na grontapu. Na ini a prenspari profeititori fu „a kaba fu a grontapu sistema”, Yesus ben taki krin: „A bun nyunsu disi fu a kownukondre o preiki gi ala sma na heri grontapu, so taki ala kondre kan yere dati, èn dan a kaba o kon” (Mateyus 24:3, 14; Markus 13:10). A ben fruteri den bakaman fu en tu taki den ben o abi fu du a bun bigi wroko disi, awinsi den kisi bigi problema noso tyalensi, èn awinsi den kisi frufolgu srefi. Toku, a ben gi den a dyaranti disi: „A sma di horidoro te na a kaba, sa feni frulusu” (Mateyus 24:9-13). Disi wani taki dati den ben o abi fu gi ala san den abi èn den ben o abi fu gi densrefi, neleki fa a bisnisman na ini na agersitori fu Yesus ben du dati. Yu abi sma na ini a ten disi di e sori taki den abi so wan tranga bribi èn taki den de fayafaya fu kisi a Kownukondre?
A prisiri di wan sma e kisi te a feni a waarheid
4. Sortu krakti a waarheid fu a Kownukondre abi tapu sma na ini a ten disi?
4 A bisnisman na ini na agersitori fu Yesus ben e prisiri srefisrefi di a kon frustan taki a feni wan „peri di warti furu”. A ben e prisiri so te, taki a du ala san a man fu kisi a peri (Hebrewsma 12:1). Na so a de tu na ini a ten disi taki a waarheid fu Gado nanga en Kownukondre e hari sma èn a e meki den du wan sani tu. Disi e meki wi prakseri wan sani di skrifi na ini a buku Faith on the March, pe Brada A. H. Macmillan fruteri fa a ben e suku fu kon sabi suma na Gado èn san A abi na prakseri gi libisma. A ben taki: „Ibri yari, dusundusun sma e feni ete san mi ben feni. Den de sma leki yu nanga mi, bika den e kon fu difrenti kondre, den de fu difrenti ras, den de gudusma nanga pôtisma, yongusma nanga owrusma. A waarheid no de gi wán spesrutu grupu sma nomo. A e hari ala sortu sma.”
5. Sortu moi bakapisi wi e si na ini a raportu fu a dienstyari 2004?
5 Den wortu disi de so trutru, bika wi e si taki ibri yari a bun nyunsu fu Gado Kownukondre e naki na ati fu hondrohondro dusun opregti sma. Disi e meki taki den e gi den libi abra na Yehovah fu du en wani. A srefi sani ben de fu si tu na ini a dienstyari 2004, di bigin na ini september 2003 èn a kaba na ini augustus 2004. Na ini den 12 mun dati, 262.416 sma meki bekènti na publiki, taki den gi den libi abra na Yehovah fu di den teki dopu na ini watra. A sani disi pasa na ini den 235 kondre, pe Yehovah Kotoigi e studeri Bijbel nanga 6.085.387 sma ibri wiki. Den e du disi fu man yepi ala sortu sma fu ala sortu kondre, lo, nanga tongo so taki den kan kon sabi a waarheid fu Gado Wortu di e gi libi.—Openbaring 7:9.
6. Fa a du kon taki ala yari moro nanga moro sma e teki a waarheid?
6 Fa a du kon taki ala den sani disi pasa? A no de fu taki dati Yehovah e hari den reti-ati sma disi kon na en (Yohanes 6:65; Tori fu den Apostel 13:48). Ma wi no musu frigiti den sma tu di ben de klariklari fu gi densrefi èn di ben du muiti doronomo fu kisi a Kownukondre. Di Brada Macmillan ben abi 79 yari, a ben skrifi: „Sensi a fosi leisi di mi kon sabi den sani di Bijbel e pramisi libisma di e siki èn e dede, teleki now ete mi e howpu fayafaya na ini a boskopu dati fu Bijbel. Leti na a momenti dati, mi teki a fasti bosroiti fu kon sabi moro fu san Bijbel e leri, so taki mi ben o man yepi tra sma leki misrefi di wani kon sabi na Almakti Gado, Yehovah, nanga den bun sani di a abi na prakseri gi libisma.”
7. Sortu ondrofenitori e sori taki sma e prisiri èn den de fayafaya te den kon feni a waarheid fu Bijbel?
7 Na a srefi fasi, den futuboi fu Yehovah e wroko fayafaya na ini a ten disi. Teki leki eksempre, Daniela di e libi na Wenen na ini Oostenrijk. A taki: „Sensi mi pikin-nengreten, Gado na a moro bun mati fu mi. Ala ten mi ben wani kon sabi en nen, bika a wortu ’Gado’ ben e gi mi a firi taki mi no sabi en. Ma mi ben abi fu wakti teleki mi ben abi 17 yari, di Yehovah Kotoigi kon na mi oso. Den fruteri mi ala san mi ben wani sabi fu Gado. Now fosi mi ben feni a waarheid, èn mi ben e firi switi srefisrefi! Mi ben breiti so te, taki mi bigin preiki gi ala sma.” Den skoromati fu en bigin dreigi en fu di a ben de so fayafaya. „Ma mi ben e si disi leki wan Bijbel profeititori di ben e kon tru”, na so Daniela taki moro fara, „bika mi leri taki Yesus ben taki dati sma no ben o wani si den bakaman fu en na ai èn dati den ben o kisi frufolgu fu en nen ede. Mi ben breiti trutru èn mi ben e fruwondru fu a sani disi.” A no langa baka dati, Daniela gi en libi abra na Yehovah, a teki dopu, èn a bigin meki muiti fu go na ini a zendelingwroko. Baka di Daniela trow, dan en nanga en masra, Helmut, bigin preiki gi den Afrikansma, den Sneisi, den Filipijnsma, nanga den Indiasma di e libi na ini Wenen. Now Daniela nanga Helmut e dini leki zendeling na ini zuid-west Afrika.
Den no e gi abra
8. San na wan moi fasi fa furu sma sori taki den lobi Gado èn taki den de loyaal na a Kownukondre fu en?
8 Iya, a zendelingwroko na wan fu den fasi fa a pipel fu Yehovah na ini a ten disi e sori taki den lobi Gado èn taki den de loyaal na a Kownukondre fu en. Neleki a bisnisman na ini na agersitori fu Yesus, na so den sma di e du a wroko disi de klariklari fu go na farawe presi gi a Kownukondre. A no de fu taki dati den zendeling disi no e go na difrenti presi fu man feni a bun nyunsu fu a Kownukondre, ma den e du disi fu man tyari a bun nyunsu disi gi sma di e libi na den moro farawe presi na grontapu, fu leri den èn fu yepi den fu tron disipel fu Yesus Krestes (Mateyus 28:19, 20). Na ini furu kondre den e kisi fu du nanga bun hebi problema. Ma te den e horidoro, dan den e kisi furu blesi.
9, 10. Sortu span sani zendeling e ondrofeni na farawe presi, soleki na a Republiek fu Centraal-Afrika?
9 Wan eksempre fu disi, na a Republiek fu Centraal-Afrika pe a yari di pasa 16.184 sma go na a Memrefesa fu a dede fu Krestes. Dati na sowan seibi tron moro sma leki den Kownukondre preikiman di de na ini a kondre dati. Na furu presi na ini a kondre dati den sma no abi faya na ini oso, èn fu dati ede sma gwenti fu du den aladei wroko fu den na dorosei, na ondro wan bon pe a kowru pikinso. Sobun, yu kan frustan taki den zendeling e wroko na a srefi fasi tu; den e hori bijbelstudie na dorosei ondro wan bon pe a kowru pikinso. A sani disi moro bun fu di moro leti de na dorosei èn a no waran so leki na ini den oso. Ma a e tyari tra wini kon tu. Den sma na ini a kondre lobi Bijbel trutru, èn den gwenti fu taki fu Bijbel tori. Nofo tron te Kotoigi e hori bijbelstudie èn wan sma e waka pasa, dan a sma e bigin luku san e pasa èn a e teki prati na a bijbelstudie tu.
10 Na so a ben pasa taki wan zendeling ben e hori wan bijbelstudie dorosei fu wan oso, dan wan yonguman di ben e tan na abrasei fu a strati, kon na a zendeling èn a taki dati fu di nowan sma kon taki nanga en fu Bijbel, meki a zendeling ben musu kon na en oso fu studeri Bijbel nanga en tu. A no de fu taki dati a zendeling ben breiti fu du disi, èn a yonguman e go na fesi esi-esi. Na ini a kondre dati, a de so tu taki skowtu e stop den Kotoigi di de na pasi, ma a no fu tyari den na fesi krutu, noso fu gi den wan butu. Den e du disi fu aksi den moro nyun Waktitoren nanga Ontwaakt!, noso fu taki den Kotoigi tangi fu wan artikel di den ben feni heri moi.
11. Fa den sma di e du a zendelingwroko langa ten kaba, e denki fu a wroko di den e du, aladi den e kisi tesi son leisi?
11 Furu fu den sma di e du a zendelingwroko 40 noso 50 yari kaba, e du a srefi wroko dati te now ete na wan getrow fasi. A bribi fu den èn a fasi fa den e horidoro de wan moi eksempre gi wi alamala! Na ini den 42 yari di pasa, wan trowpaar dini leki zendeling na ini dri difrenti kondre. A masra e taki: „Wi ben kisi difrenti problema. Fu eksempre, 35 yari langa wi ben abi fu feti nanga malaria. Ma toku a no hati wi noiti taki wi teki a bosroiti fu tron zendeling.” A wefi e taki tu: „Furu sani de di e meki wi de nanga tangi ala ten. A preikiwroko e gi wi furu prisiri, èn a makriki fu bigin studeri Bijbel nanga sma. Te yu e si taki den studenti e kon na den konmakandra èn den e kon leri sabi makandra, dan ibri tron baka a gersi leki na wan bigi famiri kon makandra.”
Den „e si ala sani leki soso sani”
12. Fa wan sma e sori taki a sabi o warti a Kownukondre de trutru?
12 Di a bisnisman feni a peri di abi furu waarde, dan „a gowe èn wantewante a seri ala den sani di a ben abi èn a bai a peri” (Mateyus 13:46). Na a srefi fasi, den sma di e frustan krin o warti a Kownukondre de, de klariklari fu gi ala sani fu den di abi waarde. Na apostel Paulus, di ben abi a howpu fu de makandra nanga Krestes na ini a glori Kownukondre fu Gado, ben taki: „Iya, fu dati ede mi kan taki dati mi e si ala sani trutru leki soso sani, fu di a sabi fu Krestes Yesus mi Masra, warti moro ala sani. Fu en ede mi si ala sani leki soso sani, èn mi e si den leki wan ipi doti, so taki mi kan abi Krestes.”—Filipisma 3:8.
13. Fa wan man na ini a Tyekia Republiek sori taki a lobi a Kownukondre ?
13 Na a srefi fasi, furu sma na ini a ten disi de klariklari fu tyari bigi kenki kon na ini den libi, fu man kisi den blesi di a Kownukondre e gi. Fu eksempre, na ini oktober 2003, wan man fu 60 yari ben e wroko leki driktoro fu wan skoro na ini a Tyekia Republiek, di a feni wan buku di e yepi sma fu kon frustan Bijbel, namku Sabi di e tjari joe go na têgo libi. Baka di a leisi en, dan wantewante a suku Yehovah Kotoigi na ini a birti fu en, èn a bigin studeri Bijbel nanga den. A ben e go na fesi na yeye fasi èn heri esi a bigin go na ala den konmakandra. Ma a ben abi na prakseri fu meki muiti fu wini a verkiezing fu tron komsarsi èn fu tron asambleiman. Sobun, san a ben o du now? A ben bosroiti fu meki muiti fu tron wan tra sani, namku wan Kownukondre preikiman di de na ini a strei fu libi. A taki: „Mi ben man prati furu Bijbel publikâsi gi den studenti fu mi.” A gi en libi abra na Yehovah, èn a teki dopu na ini watra na wan kongres di hori na ini yuli 2004.
14. (a) San milyunmilyun sma du di den yere a bun nyunsu fu a Kownukondre? (b) Sortu seryusu aksi ibriwan fu wi musu poti gi wisrefi?
14 Milyunmilyun tra sma na heri grontapu handri na a srefi fasi di den yere a bun nyunsu fu a Kownukondre. Den komoto na ini na ogri grontapu disi, den kenki a fasi fa den ben de fosi, den gowe libi den mati di den ben abi fosi, èn den no e feti moro baka den sani fu a grontapu disi (Yohanes 15:19; Efeisesma 4:22-24; Yakobus 4:4; 1 Yohanes 2:15-17). Fu san ede den du ala den sani disi? Fu di den e frustan taki den blesi fu Gado Kownukondre warti moro iniwan sani di a disiten sistema ben sa man gi den. Yu e si a bun nyunsu fu a Kownukondre na a srefi fasi disi tu? A e meki taki yu de klariklari fu kenki a fasi fa yu e libi, a denki di yu abi fu san warti trutru, èn den marki di yu poti na ini yu libi, so taki yu kan du san Yehovah e aksi fu yu? Te yu e du disi, dan yu sa tan kisi furu blesi nownow èn na ini a ten di e kon.
A kotiwroko e kon na wan kaba
15. Sortu sani a pipel fu Gado ben o du na ini den lasti dei, soleki fa profeititori e sori?
15 A psalm skrifiman ben skrifi: „Yu pipel sa de klariklari fu gi densrefi, tapu a dei fu yu srudati legre.” Na mindri den sma di gi densrefi, yu abi sosrefi a „grupu yonguman di de neleki dowdropu” èn „wan bigi legre” fu „umasma di e fruteri a bun nyunsu” (Psalm 68:11; 110:3). Na ini den lasti dei disi, a pipel fu Yehovah, efu na mansma noso umasma, yonguwan noso owruwan, den alamala de fayafaya èn den e gi densrefi trutru fu dini Yehovah. Ma sortu bakapisi den kisi fu dati?
16. Gi wan eksempre fa den futuboi fu Gado e du muiti fu yepi tra sma fu kon leri sabi sani fu a Kownukondre.
16 Wan pionier, noso furuten Kownukondre preikiman na ini India ben aksi ensrefi fa a kan yepi den moro leki tu milyun dofusma na ini a kondre dati fu kon leri sabi sani fu a Kownukondre (Yesaya 35:5). A bosroiti fu gi en nen na wan organisâsi na ini Bangalore fu man leri a dofusma-tongo. Drape, a ben man prati a Kownukondre howpu nanga furu dofusma, èn wan tu grupu ben seti fu studeri Bijbel makandra. Na ini wan tu wiki nomo, moro leki twarfu sma bigin kon na den konmakandra na a Kownukondre zaal. Bakaten, na wan trow-oso, a pionier disi miti wan yongu dofu man fu a foto Calcutta; a yongu man ben abi furu aksi èn a ben sori taki a wani sabi moro fu Yehovah trutru. Ma wan problema ben de. A yongu man disi ben musu drai go baka na Calcutta, fu go na heiskoro. Ma Calcutta de so wan 1600 kilometer moro fara èn nowan Kotoigi drape ben sabi taki a dofusma-tongo. Nanga furu muiti a kisi en papa so fara fu gi en pasi fu go na wan heiskoro na ini a foto Bangalore, èn na so a ben kan studeri Bijbel go doro. A tan go na fesi na yeye fasi, èn baka wán yari so, a gi en libi abra na Yehovah. Now ensrefi e studeri Bijbel nanga tra dofusma, èn a e studeri srefi nanga wan dofu mati fu en di a sabi sensi en pikin-nengreten. A bijkantoro na ini India e seti sani now fu meki pionier leri a dofusma-tongo, so taki den kan yepi dofusma.
17. Fruteri sortu sani fu a raportu fu a dienstyari 2004 na tapu bladzijde 19 te 22, e gi yu deki-ati.
17 Na tapu bladzijde 19 te 22 fu a tijdschrift disi, yu kan si wan raportu di e sori fa Yehovah Kotoigi na heri grontapu wroko na ini a dienstyari 2004. Efu yu teki pikinso ten fu luku a raportu disi, dan yusrefi o si buweisi taki a pipel fu Yehovah na heri grontapu e du ala muiti na ini a ten disi fu feni a „peri di warti furu”.
Tan „suku a kownukondre fosi”
18. San Yesus no ben fruteri na ini na agersitori fu a bisnisman di ben e go na difrenti presi, èn fu san ede a no fruteri disi?
18 Te wi e luku baka sortu agersitori Yesus ben gi fu a bisnisman di ben e go na difrenti presi, dan wi e si taki Yesus no ben taki noti fu a fasi fa a bisnisman ben o libi, baka di a seri ala sani di a ben abi. A no de fu taki dati son sma kan aksi densrefi: ’Fa a bisnisman ben o feni nyanyan, krosi, nanga wan presi fu tan, now di a no abi nowan sani moro? Sortu wini a ben o kisi fu a peri dan?’ Te yu luku a sani disi na a fasi fa libisma e denki, dan yu ben o aksi yusrefi den sani disi trutru. Ma yu e memre ete taki Yesus ben gi den disipel fu en a deki-ati: „Tan suku a kownukondre nanga En regtfardikifasi fosi èn unu sa kisi ala den tra sani tu”? (Mateyus 6:31-33) A moro prenspari sani di e kon na krin na ini na agersitori, na taki a de prenspari fu sori taki yu e dini Gado nanga yu heri ati èn taki yu e wroko fayafaya gi a Kownukondre. Wi kan leri wan sani fu disi?
19. Sortu prenspari sani wi kan leri fu na agersitori di Yesus ben gi fu a peri di warti furu?
19 Awinsi wi kon sabi a tumusi moi bun nyunsu no so langa pasa, noso awinsi na someni yari kaba wi e du muiti fu kisi a Kownukondre èn fu fruteri sma fu den blesi fu en, toku wi alamala musu tan si a Kownukondre leki a moro prenspari sani na ini wi libi. Wi e libi na ini muilek ten, ma wi sabi seiker taki a sani di wi e feti na baka, na wan trutru sani di warti moro ala tra sani, neleki a peri di a bisnisman ben feni. Den sani di e pasa na grontapu èn Bijbel profeititori di kon tru, e gi wi krin buweisi taki wi e libi na „a kaba fu a grontapu sistema disi” (Mateyus 24:3). Meki wi de leki a bisnisman di ben e waka go na difrenti presi, fu di wi e sori nanga wi heri ati taki wi e wroko fayafaya gi Gado Kownukondre èn meki wi prisiri nanga a grani di wi abi fu meki a bun nyunsu bekènti.—Psalm 9:1, 2.
Yu e memre disi ete?
• Sortu sani meki taki moro nanga moro sma kon na ini a tru anbegi na ini den yari di pasa?
• Sortu fasi fu denki de fu si na den wan di e dini leki zendeling?
• Sortu kenki sma tyari kon na ini den libi fu a Kownukondre bun nyunsu ede?
• Sortu prenspari sani wi kan leri fu na agersitori di Yesus ben gi fu a peri di warti furu?
[Aksi fu a tori disi]
[Raportu na tapu bladzijde 19-22]
2004 DINIWROKO RAPORTU FU YEHOVAH KOTOIGI NA HERI GRONTAPU
(Luku a tijdschrift)
[Prenki na tapu bladzijde 14]
„A waarheid . . . e hari ala sortu sma.”—A. H. Macmillan
[Prenki na tapu bladzijde 15]
Daniela nanga Helmut preiki na ini Wenen gi sma di e taki wan tra tongo
[Prenki na tapu bladzijde 16, 17]
Neleki a bisnisman di ben e waka go na difrenti presi, na so zendeling na ini a ten disi e kisi furu blesi
[Prenki na tapu bladzijde 17]
„A pipel fu yu sa de klariklari fu gi densrefi”