Fa fu sorgu taki yu e tan tyari yusrefi leki wan Kresten

„’Unu na mi kotoigi’, na so Yehovah taki.”​—YESAYA 43:10.

1. Sortu sma Yehovah e hari kon na en?

TE YU de na wan Kownukondre zaal, dan teki yu ten fu luku lontu. Suma yu e si na a presi disi fu anbegi? Kande yu e si opregti yongusma di e arki nanga ala prakseri fu man kisi koni fu Bijbel (Psalm 148:12, 13). Kande yu o si osofamiri-edeman tu di e du muiti fu plisi Gado, aladi den e libi na ini wan grontapu di e pori na osofamiri-libi. Kande yu o si lobi-ati owrusma, di tan getrow na a pramisi di den meki di den gi densrefi abra na Yehovah, aladi den e kisi fu du nanga den problema fu owrudei (Odo 16:31). Den alamala lobi Yehovah fu tru. Èn a feni en bun fu meki den kon tron mati fu en. „Nowan sma kan kon na mi”, na so a Manpikin fu Gado taki, „boiti efu a Tata, di seni mi kon, e hari en kon.”​—Yohanes 6:37, 44, 65.

2, 3. Fu san ede a no makriki fu tan hori na prakseri taki wi na Kresten?

² Wi e prisiri trutru fu de na mindri wan pipel di Yehovah feni bun èn di a e blesi, a no so? Ma toku, a no makriki na ini den ’muilek ten disi di tranga fu pasa’, fu tan hori na prakseri taki wi na Kresten (2 Timoteyus 3:1). Disi de so, spesrutu gi yonguwan di e gro kon bigi na ini Kresten osofamiri. „Aladi mi ben e go na den Kresten konmakandra”, na so wan fu den yonguwan disi e taki, „toku mi no ben e poti marki gi misrefi na yeye  fasi, èn fu taki en leti, na ini mi ati mi no ben abi a winsi trutru fu dini Yehovah.”

³ A kan de so tu, taki sonwan fu den wani dini Yehovah, ma speri, a grontapu, nanga sondu firi abi furu krakti na den tapu. Te den sani disi abi krakti na wi tapu doronomo, dan a kan taki safrisafri wi no e tyari wisrefi leki Kresten moro. Fu eksempre, furu sma na ini a disiten grontapu e si leki den markitiki fu Bijbel di abi fu du nanga a fasi fa wan sma musu tyari ensrefi, na owruten sani di no e fiti na ini a nyun-modo ten fu wi (1 Petrus 4:4). Son sma no e si en leki wan tumusi prenspari sani fu anbegi Gado na a fasi fa en wani (Yohanes 4:24). Na ini en brifi gi den Efeisesma, Paulus e taki dati grontapu abi wan „yeye”, noso wan denki di abi krakti tapu furu sma (Efeisesma 2:2). A yeye disi e dwengi sma fu teki a denki fu wan libimakandra di no sabi Yehovah.

4. Fa Yesus sori taki a de tumusi prenspari gi wi fu tan tyari wisrefi leki wan Kresten?

⁴ Ma leki futuboi fu Yehovah di gi densrefi abra na en, wi e frustan taki awinsi wi owru noso yongu, a o tyari tumusi takru bakapisi kon te wi no e tyari wisrefi moro leki Kresten. Efu wi wani frustan krin fa wi leki Kresten musu tyari wisrefi, dan wi musu luku soso den markitiki di Yehovah poti èn san en e fruwakti fu wi. Tra fasi no de, bika na en meki wi akruderi a prenki fu en (Genesis 1:26; Mika 6:8). Bijbel e agersi a fasi fa wan Kresten e tyari ensrefi, nanga krosi di wi e weri fu ala sma kan si. Yesus ben warskow wi gi a ten fu wi, di a taki: „Luku! Mi e kon leki wan fufuruman. Koloku fu a sma di e tan na ai èn e tan weri en tapusei krosi, so taki a no sa waka nanga sososkin èn sma e si a syenfasi fu en” * (Openbaring 16:15). Wi no wani pori den Kresten fasi nanga markitiki fu wi èn gi pasi taki a grontapu fu Satan kenki wi. Efu dati ben o pasa, dan wi ben o lasi den „tapusei krosi” fu wi. So wan situwâsi ben o hati wi èn a ben o meki wi kisi syen.

5, 6. Fu san ede a de tumusi prenspari fu tanapu kánkan na yeye fasi?

⁵ Te wi e frustan heri bun suma na wi leki Kresten, dan dati sa abi furu krakti tapu a fasi fa wi e libi. Fa so? Efu wan anbegiman fu Yehovah ben o frigiti taki a de wan Kresten, dan tra sani kan bigin hari en prakseri, èn a no o sabi krin moro fa a musu libi èn sortu marki a musu poti na ini en libi. Ibri tron baka, Bijbel e warskow taki wi no musu kon na ini situwâsi pe wi e tweifri san fu du. „A sma di e tweifri”, na so a disipel Yakobus e warskow, „de neleki wan skwala fu se di winti e wai go, e wai kon. Fu taki en leti, no meki a sma dati denki taki a sa kisi wan sani fu Yehovah, fu di a sma dati na wan sma di no man teki bosroiti, èn a no de seiker fu nowan sani di a e du.”​—Yakobus 1:6-8; Efeisesma 4:14; Hebrewsma 13:9.

⁶ Fa wi kan sorgu taki wi e tan tyari wisrefi leki Kresten? San kan yepi wi fu frustan moro krin sortu bigi grani wi abi fu de anbegiman fu a Moro Heiwan? Grantangi, luku wan tu fasi fa wi kan du dati.

 Buweisi taki yu na wan Kresten trutru

7. Fu san ede wi o kisi wini te wi e begi Yehovah fu ondrosuku wi?

⁷ Tan du muiti fu meki a banti fu yu nanga Yehovah kon moro tranga. A moro warti sani di wan Kresten abi, na a banti di a abi nanga Gado (Psalm 25:14; Odo 3:32). Efu wi e bigin tweifri na a de di wi de Kresten, dan wi musu go ondrosuku finifini sortu banti wi abi nanga Gado èn o tranga a banti dati de. Dati meki a fiti taki a psalm skrifiman ben begi: „Ondrosuku mi, o Yehovah, èn tesi mi; krin den niri fu mi nanga na ati fu mi” (Psalm 26:2). Fu san ede a de tumusi prenspari taki wi aksi Yehovah fu ondrosuku wi? Fu di wisrefi no sabi bun fu san ede wi e du sani èn san na den lostu di de dipi na ini wi ati. Na Yehovah wawan man frustan fa wi de na inisei, fu san ede wi e du sani, san wi e prakseri, èn san wi e firi.​—Yeremia 17:9, 10.

8. (a) Fa wi kan kisi wini te Yehovah e tesi wi? (b) Fa yu kisi yepi fu gro na yeye fasi leki Kresten?

⁸ Te wi e aksi Yehovah fu ondrosuku wi, dan wi e gi en na okasi fu tesi wi. A kan gi pasi taki wi kon na ini situwâsi di o tyari kon na krin san na a trutru reide fu san ede wi e du sani èn fa wi ati de (Hebrewsma 4:12, 13; Yakobus 1:22-25). Wi musu breiti te wi e kisi den sortu tesi disi, bika den e gi wi na okasi fu sori efu wi de loyaal na Yehovah trutru. Den sortu tesi disi kan sori efu wi ’bun na ala fasi, èn efu wi no e mankeri noti’ (Yakobus 1:2-4). Èn na ini a pisi ten di wi e kisi tesi, wi kan gro na yeye fasi.​—Efeisesma 4:22-24.

9. A de so taki na soso te wi e firi, wi musu overtoigi wisrefi taki san Bijbel e leri, na waarheid? Fruklari disi.

⁹ Overtoigi yusrefi taki san Bijbel e leri, na waarheid. Efu wi no abi nofo sabi fu Bijbel, dan wi kan frigiti san a wani taki fu de futuboi fu Yehovah (Filipisma 1:9, 10). Ibri Kresten, efu a yongu noso owru, musu de seiker taki san a e bribi abi fu du nanga a waarheid fu Bijbel trutru. Paulus ben gi den tra bribiman a deki-ati disi: „Overtoigi unsrefi fu ala sani; hori fasti na a sani di bun srefisrefi” (1 Tesalonikasma 5:21). Yongu Kresten di kweki na ini osofamiri di abi frede gi Gado, musu frustan taki den no kan de tru Kresten soso fu di den papa nanga mama de na bribi. Salomo en eigi papa, David, ben gi en deki-ati fu ’sabi a Gado fu en papa èn fu dini en nanga en heri ati’ (1 Kroniki 28:9). A no ben o nofo efu a yongu Salomo ben e luku nomo fa en papa ben e kon kisi moro tranga bribi na ini Yehovah. Ensrefi ben musu leri sabi Yehovah, èn a ben du disi tu. A ben begi Gado: „Gi mi koni nanga sabi now, so taki mi kan go na dorosei èn kon na inisei na fesi a pipel disi.”​—2 Kroniki 1:10.

10. Fu san ede a no fowtu te wi e suku piki tapu son aksi, fu di wi wani kon sabi a waarheid?

¹⁰ Sabi e meki a bribi fu wan sma kon tranga. „Bribi e kon baka te sma yere sani”, na so na apostel Paulus ben taki (Romesma 10:17). San a ben wani taki nanga dati? A ben wani taki dati te wi e studeri Gado Wortu, wi o kisi moro bribi èn moro frutrow na ini Yehovah, na ini den pramisi fu en, èn na ini en organisâsi. Te wi du muiti trutru fu kon sabi san na a piki di Bijbel e gi tapu son aksi, dan wi kan kisi piki di sa meki wi ati sidon. Boiti dati, na Romesma 12:2, wi e feni a rai fu Paulus: „Kon sabi gi unsrefi san na a bun, yoisti èn volmaakti wani fu Gado.” Ma fa wi kan du dati? Te wi e teki „soifri sabi fu a waarheid” (Titus 1:1). A yeye fu Yehovah kan yepi wi fu frustan den moro muilek sani srefi (1 Korentesma 2:11, 12). Wi musu begi Gado fu yepi wi te wi no man frustan wan sani so bun (Psalm 119:10, 11, 27). Yehovah wani wi fu frustan en Wortu, fu bribi dati, èn fu gi yesi na dati. A e breiti te wi e suku piki tapu son aksi, no fu di wi wani krutu Bijbel, ma fu di wi wani kon sabi a waarheid.

Abi a fasti bosroiti fu plisi Gado

11. (a) Sortu firi di ala sma abi, kan de wan tesi gi wi? (b) Fa wi kan kisi deki-ati fu kakafutu gi a krakti di speri kan abi na wi tapu?

¹¹ No suku fu plisi libisma, ma suku fu plisi Gado. A no de wan freimde sani te wi wani de fu wan spesrutu grupu fu sma fu sori suma na wi. Ibriwan sma abi mati fanowdu, èn wi e firi bun te sma e teri wi. Speri kan abi furu krakti na wi tapu, awinsi wi na tini noso sma di moro owru, èn a krakti dati kan go so fara taki wan sma du ala muiti fu de leki trawan, noso fu plisi den  trawan. Ma a no ala ten mati nanga speri wani taki sani waka bun nanga wi. Son tron den e tron yu mati, soso fu di den wani wan sma fu horibaka gi den te den e du ogri (Odo 1:11-19). Te wan Kresten e brokokindi gi a takru krakti di speri abi na en tapu, dan nofo tron a no o wani meki sma sabi fa a de trutru (Psalm 26:4). „No tyari unsrefi soleki fa a grontapu lontu yu e tyari ensrefi”, na so na apostel Paulus ben warskow (Romesma 12:2, The Jerusalem Bible). Yehovah e gi wi a krakti di wi abi fanowdu fu man feti teige iniwan krakti di wani meki yu kon de leki grontapusma.​—Hebrewsma 13:6.

12. Sortu gronprakseri èn sortu eksempre kan gi wi deki-ati fu tan poti ala wi frutrow na ini Gado?

¹² Te wi e si taki speri e bigin abi so furu krakti na wi tapu taki wi no wani tyari wisrefi moro leki Kresten, dan wi musu memre taki a de moro prenspari fu tan loyaal na Gado, leki fu gi yesi na san sma e taki noso fu du san furu sma e du. Den wortu fu Exodus 23:2 kan de leki wan prenspari gronprakseri di kan kibri wi: „Yu no musu waka baka a bigi ipi sma fu du ogri.” Di furu Israelsma ben e tweifri efu Yehovah ben o man du san a pramisi, dan Kaleb ben e weigri fu abi a srefi denki leki furu fu den tra Israelsma. A ben de seiker taki den pramisi fu Gado de fu frutrow, èn a ben kisi furu blesi fu di a ben abi so wan frutrow (Numeri 13:30; Yosua 14:6-11). Yu wani du a srefi sani tu, namku fu kakafutu gi a denki di furu sma abi, so taki yu kan tan abi wan bun banti nanga Gado?

13. Fu san ede a de wan koni sani fu meki sma kon sabi taki wi na Kresten?

¹³ Meki sma sabi taki yu na wan Kresten. Den sma abi wan sani e taki, dati a moro bun fasi fu kibri yusrefi na ini feti, na fu feti baka, èn na dati wi e du te wi no frede fu taigi sma taki wi na Kresten. Di sma ben wani gens den getrow Israelsma na ini den dei fu Esra, fu di den ben e meki muiti fu du a wani fu Yehovah, dan den getrowsma disi taki: „Wi na den futuboi fu a Gado fu hemel nanga grontapu” (Esra 5:11). Te sma e handri na wan takru fasi nanga wi èn te den e taki someni ogri fu wi, dan wi kan kon frede so te, taki pikinmoro wi no man du noti. Te wi wani plisi ala sma ala ten, dan sani no o waka so bun gi wi moro. Sobun, no meki ogri sma tapu skreki gi yu. A de wan bun sani ala ten fu sori sma krin taki yu na wan Kotoigi fu Yehovah. Na wan lespeki fasi yu kan yepi trawan fu frustan san prenspari gi yu, san yu e bribi, èn fa yu leki Kresten e si sani. Meki sma kon sabi taki yu teki a fasti bosroiti fu tan hori yusrefi na den hei markitiki fu Yehovah di e sori fa wan sma musu tyari ensrefi na wan fasi di fiti. Meki den frustan krin taki yu leki wan Kresten, no wani du nowan sani di kan meki taki yu lasi yu soifri retifasi. Sori taki yu breiti nanga a fasi fa yu leri tyari yusrefi (Psalm 64:10). Te sma sabi yu leki wan Kresten di e tanapu kánkan, dan dati sa gi yu krakti, a sa kibri yu, èn a kan meki srefi taki sma bigin aksi yu sani di abi fu du nanga Yehovah èn nanga en pipel.

14. Spotu nanga gens musu meki taki wi lasi-ati? Fruklari disi.

¹⁴ Iya, son sma kan spotu noso gens yu  (Yudas 18). No lasi-ati te sma no wani arki yu te yu e fruteri den san prenspari gi yu (Esekièl 3:7, 8). Awinsi omeni muiti yu o du, no frigiti taki noiti yu o man overtoigi den sma di no wani taki yu overtoigi den. Memre Farao. Nowan rampu, noso wondru, srefi a dede fu en fosi-gebore manpikin, no ben man meki Farao bribi taki Moses ben e taki na ini a nen fu Yehovah. Sobun, no meki sma tapu skreki gi yu. Efu wi e frutrow na ini Gado èn efu wi e bribi na ini en, dan dati kan yepi wi fu no frede moro.​—Odo 3:5, 6; 29:25.

Leri fu den sani di pasa kaba, èn gebroiki dati fu seti wan bun tamara

15, 16. (a) San na a yeye gudu di wi kisi? (b) Fa wi kan kisi wini te wi e gebroiki Gado Wortu èn e denki dipi fu a yeye gudu di wi kisi?

¹⁵ Abi warderi gi a yeye gudu di yu kisi. Kresten o kisi wini te den e gebroiki Gado Wortu èn e denki dipi fu a bigi yeye gudu di den kisi. A gudu disi abi fu du nanga a waarheid di de na ini a Wortu fu Yehovah, a howpu fu kisi têgo libi, èn a grani fu teki presi gi Gado leki preikiman fu a bun nyunsu. Yu man si sortu frantwortu yu abi na mindri den Kotoigi fu Gado, di de wan grupu di abi a spesrutu grani fu du a wroko di e kibri sma libi, namku a Kownukondre preikiwroko? Memre taki Yehovah na a sma di e taki: „Unu na mi kotoigi.”​—Yesaya 43:10.

¹⁶ Yu kan aksi yusrefi sani soleki: ’A yeye gudu di mi kisi, warti gi mi trutru? Mi e si en leki wan prenspari sani trutru fu poti a wani fu Gado na a fosi presi na ini mi libi? Mi abi nofo warderi gi disi, so taki mi abi a krakti fu kakafutu gi iniwan  tesi di kan meki mi lasi a yeye gudu fu mi?’ A yeye gudu di wi abi, kan meki wi kon frustan krin taki na organisâsi fu Yehovah na a wan-enkri presi pe wi kan kisi kibri na yeye fasi (Psalm 91:1, 2). Te wi e prakseri fu prenspari sani di pasa na ini a historia fu a disiten organisâsi fu Yehovah, dan dati kan meki wi kon frustan taki nowan sma noso sani kan rutu a pipel fu Yehovah puru na grontapu.​—Yesaya 54:17; Yeremia 1:19.

17. Sortu tra sani de fanowdu, boiti taki wi e frutrow tapu a yeye gudu di wi kisi?

¹⁷ A no de fu taki dati wi no kan frutrow soso tapu a yeye gudu di wi kisi. Ibriwan fu wi musu kon kisi wan krosibei banti nanga Gado. Baka di Paulus du furu muiti fu tranga a bribi fu den Kresten na ini Filipi, dan a skrifi den, taki: „We, mi lobiwan, unu ben gi yesi ala ten di mi ben de nanga unu, ma now di mi no de nanga unu, unu de klariklari fu gi yesi moro srefi. Fu dati ede, neleki fa unu ben gi yesi ala ten, na so unu musu tan wroko gi un eigi frulusu nanga frede èn nanga beifi” (Filipisma 2:12). Wi no kan frutrow tapu tra sma fu man kisi frulusu.

18. Fa a Kresten diniwroko kan yepi wi fu kisi moro warderi gi a grani di wi abi leki Kresten?

¹⁸ Du so furu leki yu man na ini a Kresten diniwroko. Sma kon si taki „a wroko fu wan sma abi furu krakti tapu a fasi fa a sma de”. Kresten na ini a ten disi kisi a tumusi prenspari wroko fu preiki a bun nyunsu fu Gado Kownukondre di seti kaba. Paulus ben taki: „Fu di mi na wan apostel fu den nâsi trutru, meki mi e gi glori na a diniwroko fu mi” (Romesma 11:13). A preikiwroko fu wi e meki taki wi de tra fasi leki grontapusma, èn te wi e teki prati na dati, dan sma o kon sabi moro bun suma na wi leki Kresten. Te wi e teki prati fayafaya na tra theokrasia wroko, soleki fu go na Kresten konmakandra, fu yepi nanga a bow fu presi fu anbegi, fu meki muiti fu yepi sma di de na nowtu, èn tra sani leki dati, dan wi o kisi moro warderi gi a grani di wi abi leki Kresten.​—Galasiasma 6:9, 10; Hebrewsma 10:23, 24.

Te a de krin taki wi na Kresten, dan dati o tyari furu blesi kon

19, 20. (a) Sortu wini yu kisi fu di yu na wan Kresten? (b) San e meki taki wi na tru Kresten?

¹⁹ Teki pikinso ten fu prakseri fu den furu blesi nanga wini di wi e kisi fu di wi na tru Kresten. Wi abi a grani taki Yehovah e feni ibriwan fu wi bun. A profeiti Maleaki ben taki: „Den sma di ben frede Yehovah ben taki nanga makandra, ibriwan fu den nanga en kompe, èn Yehovah tan poti prakseri na den èn a tan arki den. Èn den bigin skrifi wan buku na en fesi fu memre den wan di ben frede Yehovah èn fu memre den wan di ben e prakseri en nen” (Maleaki 3:16). Gado kan si wi leki en mati (Yakobus 2:23). Wi abi wan moro bun libi fu di wi sabi fu san ede wi de na libi, wi sabi san a libi wani taki trutru, èn wi abi bun marki na ini a libi di e tyari wini kon. Boiti dati, wi kisi a howpu sosrefi fu libi fu têgo na ini a ten di e kon.​—Psalm 37:9.

²⁰ Memre taki na Gado wawan kan sori yu suma yu de trutru èn o warti yu de gi en; a no abi trobi san tra sma e prakseri fu yu. Tra sma kan krutu wi akruderi libisma markitiki di no bun nofo. Ma a sani di o meki taki wi de warti trutru, na a lobi fu Gado èn a poti di a e poti prakseri na wi; wi na fu en (Mateyus 10:29-31). Fu dati ede, a lobi di wi o kon abi gi Gado, musu meki wi kisi moro warderi gi suma wi de èn disi sa meki wi libi waka moro bun. „Efu wan sma lobi Gado, dan Gado sabi a sma dati.”​—1 Korentesma 8:3.

[Futuwortu]

Yu e memre disi ete?

• Fu san ede a de tumusi prenspari gi wi fu tan tyari wisrefi leki Kresten?

• Fa wi kan buweisi taki wi na tru Kresten?

• Te wi musu teki a bosroiti suma wi wani plisi, dan san sa yepi wi fu teki a yoisti bosroiti?

• Te wi e frustan bun sortu grani wi abi leki Kresten, dan fa dati kan yepi wi na ini a ten di e kon?

[Aksi fu a tori disi]

[Prenki na tapu bladzijde 21]

Te wi e du so furu leki wi man na ini a Kresten diniwroko, dan a o de moro krin fu si taki wi na tru Kresten