Wi musu breiti taki wi na Kresten!

„Meki a sma di e meki bigi, du dati gi Yehovah.”​—1 KORENTESMA 1:31.

1. Sortu nyun kenki de fu si na ini a fasi fa sma e prakseri fu a bribi fu den?

WAN nyunsuman di e taki fu kerki afersi ben sori no so langa pasa, fa furu sma na ini a ten disi e prakseri fu a bribi fu den. A ben taki: „A moro nyun kenki di de fu si na ini kerki disiten, no de taki wan nyun kerki e opo kon, ma taki sma no e broko den ede moro nanga a bribi fu den.” A ben sori sosrefi taki den sma disi abi wan fasi di e sori taki den „e weigri krinkrin fu poti prakseri na a bribi fu den”. A ben taki dati furu sma „e bribi na ini Gado . . . ; ma den no e broko den ede tumusi nanga en”.

2. (a) Fu san ede a no de fu fruwondru taki sma no e broko den ede nanga yeye afersi? (b) Fu san ede tru Kresten musu luku bun fu no tron sma di no e broko den ede nanga a bribi fu den?

² Studenti fu Bijbel no e fruwondru taki moro nanga moro sma na ini a ten disi no e broko den ede nanga Gado (Lukas 18:8). Te yu luku en bun, dan wi musu fruwakti srefi taki sma no e broko den ede moro nanga a bribi fu den. Bun langa kaba, falsi kerki kori sma èn meki den firi brokosaka (Openbaring 17:15, 16). Toku, tru Kresten musu luku bun taki den no kon abi a denki fu den sma disi di no e dini Gado nanga den heri ati, èn di no de fayafaya. Sani no sa waka bun gi wi efu wi tron sma di no e broko wi ede nanga a bribi fu wi, èn efu wi lasi a faya di wi abi fu dini Gado èn fu hori wisrefi na a waarheid fu Bijbel. Yesus ben sori taki sma musu luku bun nanga a sani disi, di a warskow den fosi yarihondro Kresten di ben e libi na ini Laodisea: „Yu no kowru èn yu no faya tu. Mi winsi taki yu ben kowru noso faya. . . . Yu broko-kowru.”​—Openbaring 3:15-18.

Wi musu frustan bun suma na wi

3. Sortu sani musu meki taki wi breiti fu de Kresten?

³ Efu Kresten no wani tron sma di no e broko den ede nanga yeye afersi, dan den musu frustan bun suma na den, èn den musu breiti nanga na aparti grani di den abi, namku fu de wan Kresten. Leki futuboi fu Yehovah èn disipel fu Krestes, wi kan leisi na ini Bijbel suma na wi. Te wi e wroko fayafaya fu prati „a bun nyunsu” gi tra sma, dan wi na „kotoigi” fu Yehovah, sma di „e wroko makandra nanga Gado” (Yesaya 43:10; 1 Korentesma 3:9; Mateyus 24:14). Wi na sma di „lobi makandra” (Yohanes 13:34). Tru Kresten na sma di e ’gebroiki a koni fu man si sani krin, so taki den man si san bun èn san ogri’ (Hebrewsma 5:14). Wi na „sma di e skèin leti na ini grontapu” (Filipisma 2:15). Wi e du muiti fu „tan tyari [wisrefi] na wan bun fasi na mindri den pipel”.​—1 Petrus 2:12; 2 Petrus 3:11, 14.

4. Fa wan anbegiman fu Yehovah kan sabi san a no de?

⁴ Tru anbegiman fu Yehovah sabi tu san den no de. „Den no de wan pisi fu grontapu”, neleki fa a Fesiman fu den, Yesus Krestes, no ben de wan pisi fu grontapu (Yohanes 17:16). Den e hori densrefi aparti fu „den nâsi”, di „de na dungru na frustan sei èn [di] drifi komoto fu a libi  di de fu Gado” (Efeisesma 4:17, 18). Leki bakapisi fu dati, den bakaman fu Yesus e ’drai den baka gi ogridu èn gi den lostu fu grontapu èn den e libi nanga krin frustan èn regtfardikifasi, èn den e dini Gado na wan getrow fasi na ini a disiten seti fu sani’.​—Titus 2:12.

5. San a wani taki dati wi musu ’meki bigi gi Yehovah’?

⁵ Te wi e frustan bun suma na wi èn sortu banti wi abi nanga a Moro Hei Tiriman fu hemel nanga grontapu, dan dati e meki taki wi wani ’meki bigi gi Yehovah’ (1 Korentesma 1:31). Ma san dati wani taki? Leki tru Kresten, wi breiti srefisrefi fu abi Yehovah leki a Gado fu wi. Wi e gi yesi na a rai disi: „A sma di e meki bigi gi ensrefi, musu meki bigi gi ensrefi tapu disi, taki a abi koni fu man si sani krin èn taki a abi sabi fu mi, taki mi na Yehovah, a Sma di e sori lobi bun-ati, retidu nanga regtfardikifasi na grontapu” (Yeremia 9:24). Wi e „meki bigi” fu di wi abi a grani fu sabi Gado èn fu di a e gebroiki wi fu yepi tra sma.

A no makriki fu tan si krin suma na wi

6. Fu san ede son sma feni taki a no makriki fu tan si krin sortu grani den abi leki Kresten?

⁶ A no de fu taki dati a no ala ten a makriki fu tan si krin taki wi leki Kresten abi wan aparti grani. Wan yongu man di kweki leki wan Kresten e memre taki wan pisi ten a ben kon swaki na yeye fasi. A taki: „Son tron mi ben abi a firi taki mi no sabi fu san ede mi na wan Kotoigi fu Yehovah. Sensi mi pikin-nengreten, mi leri sabi a waarheid. Son leisi mi ben kisi a firi taki a bribi disi ben de neleki ala den tra bribi.” Kande trawan gi pasi taki grontapu abi krakti tapu a Kresten libi fu den, fu di den go poti prakseri na a fasi fa grontapu e meki prisiri, na sani di de fu si èn yere na radio noso na telefisi, èn na a fasi fa grontapusma e si a libi tra fasi leki fa Gado e si dati (Efeisesma 2:2, 3). Ten na ten, son Kresten kan bigin tweifri na densrefi fu wan pisi ten, èn a kan taki den e go luku baka gi densrefi san warti gi den trutru èn sortu marki den poti na ini a libi.

7. (a) Na sortu fasi a fiti taki Kresten e ondrosuku densrefi? (b) Nanga san Kresten musu luku bun?

⁷ A de wan fowtu sani efu ten na ten yu e ondrosuku finifini na sortu fasi yu e libi? Nôno. Kande yu e memre ete taki na apostel Paulus ben gi Kresten a deki-ati fu tan ondrosuku densrefi: „Tan luku efu unu de trutru na ini a bribi, tan ondrosuku unsrefi fu kon sabi dati” (2 Korentesma 13:5). Dyaso na apostel ben e gi Kresten a deki-ati fu ondrosuku densrefi fu luku efu den kon swaki na yeye fasi, so taki den kan du muiti fu tyari kenki kon. Te wan Kresten e ondrosuku efu a de na bribi ete, dan a musu luku efu den sani di a e taki èn den sani di a e du, e sori taki a de na bribi trutru. Ma te wi e ondrosuku wisrefi na wan fasi di no abi noti fu du nanga a bribi fu wi, èn te wi e suku piki di no abi noti fu du nanga Yehovah noso nanga a Kresten gemeente, dan na ondrosuku fu wi sa de fu soso èn a kan abi takru bakapisi gi wi na yeye fasi. * Noiti wi wani taki ’a bribi fu wi lasi neleki wan sipi di sungu’!​—1 Timoteyus 1:19.

Kresten kan kisi problema tu

8, 9. (a) Fa Moses ben sori taki a e tweifri na ensrefi? (b) San Yehovah taki di Moses sori en taki a e tweifri efu a o man du a wroko di a kisi? (c) Sortu krakti den pramisi fu Yehovah abi na yu tapu?

⁸ Ma a de so dan, taki Kresten musu abi a firi taki den no du bun te den e tweifri na densrefi ten na ten? Kwetikweti! Den kan kisi trowstu trutru te den sabi taki a no den wawan kisi den sortu firi disi. Getrow kotoigi fu Gado na ini owruten ben kisi den firi disi tu. Prakseri Moses fu eksempre; a ben abi wan tranga bribi trutru, a ben de loyaal, èn a ben e dini Gado nanga en heri ati. Di a kisi wan wroko di ben gersi wan tumusi bigi wroko gi en, dan nanga tweifri na ini en ati Moses aksi: „Suma na mi?” (Exodus 3:11) Soleki fa a sori, dan Moses ben e prakseri: ’Mi na noti!’, noso ’Mi no man!’ Wan tu sani di ben pasa na ini a libi fu Moses ben kan meki taki a ben e firi leki a no ben o man du a wroko:  A ben de fu wan pipel di ben de srafu. Den Israelsma no ben wani sabi noti fu en. A no ben e taki grati (Exodus 1:13, 14; 2:11-14; 4:10). A ben de wan skapuman, èn Egeptesma ben e fisti gi a wroko dati (Genesis 46:34). Sobun, a no de fu fruwondru taki a ben e firi leki a no ben o man de a sma di Gado ben o gebroiki fu fri en pipel di ben de na ini katibo!

⁹ Yehovah ben gi Moses a dyaranti taki a ben o man du disi, fu di A pramisi en tu kefalek moi sani: „Bika mi sa sori taki mi de nanga yu, èn disi na a marki gi yu, taki na mi seni yu: Baka te yu tyari a pipel komoto fu Egepte, unu sa dini a tru Gado na tapu a bergi disi” (Exodus 3:12). Gado ben taigi en futuboi di ben e tweifri, taki A ben o de nanga en doronomo. Boiti dati, Yehovah sori en taki a ben o fri en pipel nomonomo. Na ini ala den hondrohondro yari di pasa, Gado pramisi sma na a srefi sortu fasi taki a o yepi den. Fu eksempre, di a nâsi Israel ben de fu go na ini a Pramisi Kondre, dan a taigi den nanga yepi fu Moses: „Abi deki-ati, tanapu kánkan. . . . Yehovah yu Gado na a wan di e hari go nanga yu. A no sa libi yu na baka, a no sa gowe libi yu krinkrin” (Deuteronomium 31:6). Yehovah ben gi Yosua a dyaranti disi tu: „Nowan sma sa man tanapu kánkan na yu fesi na ini ala den dei fu yu libi. . . . Mi sa sori taki mi de nanga yu. Mi no sa libi yu na baka, èn mi no sa gowe libi yu krinkrin” (Yosua 1:5). A e pramisi Kresten sosrefi: „Mi no sa gowe libi yu kwetikweti, èn noiti mi sa drai mi baka gi yu” (Hebrewsma 13:5). Efu wi abi so wan tranga sma fu horibaka gi wi, dan wi musu breiti fu de Kresten!

10, 11. Fa a Leifisma Asaf ben kisi yepi fu tan si en diniwroko gi Yehovah leki wan warti sani?

¹⁰ Sowan feifi hondro yari baka Moses, wan getrow Leifisma di nen Asaf, ben skrifi krin taki a ben e tweifri efu a abi wini fu libi na wan opregti fasi. Asaf ben e luku taki en di ben e feti fu dini Gado, ben e kisi so furu tesi nanga problema, aladi son sma di ben e afrontu Gado, ben e kisi moro makti èn wan moro bun libi. Sortu krakti disi ben abi na en tapu? „Fu mi sei, pikinmoro den futu fu mi ben drai komoto tapu a pasi”, na so a ben taki. „Pikinmoro den futu fu mi ben grati. Bika mi ben e dyarusu tapu den sma di e meki bigi, te mi ben e si a vrede fu den ogri sma.” A ben bigin tweifri efu a warti fu de wan anbegiman fu Yehovah. „Fu tru, a de fu soso taki mi krin mi ati èn taki mi e wasi mi anu fu di mi no abi fowtu”, na so Asaf ben e denki. „Èn heri dei sani ben e tan moro mi.”​—Psalm 73:2, 3, 13, 14.

¹¹ Fa Asaf du nanga den firi disi di ben e bruya en? A ben du leki noti no ben e du en? Nôno. Na ini begi, a fruteri Gado san a ben e firi, soleki fa wi kan leisi na ini Psalm 73. A denki fu Asaf kon kenki di a go na a santa tempel. Di a ben de drape, a kon frustan taki a moro bun fasi fu libi, na fu dini Gado fayafaya. Di a kisi warderi gi yeye afersi baka, dan a kon frustan taki Yehovah no wani si ogridu na ai kwetikweti èn taki den ogrisma o kisi strafu te fu kaba (Psalm 73:17-19). Di Asaf kenki en denki, a kon frustan moro bun sortu bigi grani a ben abi fu de wan futuboi fu Yehovah. A taigi Gado: „Mi de nanga yu doronomo; yu grabu mi  reti-anu hori. Nanga yu rai yu sa tiri mi, èn baka dati yu sa tyari mi go na glori srefi” (Psalm 73:23, 24). Asaf ben kon breiti baka taki a e dini en Gado.​—Psalm 34:2.

Den ben sabi heri bun suma na den

12, 13. Gi eksempre fu sma na ini Bijbel ten di ben breiti nanga a banti di den ben abi nanga Gado.

¹² Wan fasi fa wi kan tan hori na prakseri suma na wi leki Kresten, na fu luku èn teki na eksempre fu loyaal anbegiman di sori bribi; aladi den ben e kisi problema, toku den ben breiti srefisrefi nanga a banti di den ben abi nanga Gado. Prakseri Yosef, a manpikin fu Yakob. A ben yongu ete di sma seri en na wan triki fasi leki srafu èn di den tyari en go te na Egepte, someni hondrohondro kilometer fu en papa di ben e frede Gado. Drape sani ben de heri tra fasi leki na oso-sei pe a ben e firi switi èn pe sma ben e horibaka gi en. Na ini Egepte, Yosef no ben abi nowan sma di ben kan gi en rai fu Gado, èn a ben kisi fu du nanga muilek situwâsi di ben de wan tesi tapu den bun gwenti di a ben leri èn tapu a frutrow di a ben abi na ini Gado. Ma a sori krin taki a ben e tan du muiti fu hori na prakseri taki a de wan futuboi fu Gado, èn a ben tan hori ensrefi na san reti, soleki fa a ben leri. Srefi na ini muilek situwâsi a ben e si en leki wan grani fu de wan anbegiman fu Yehovah, èn a no ben frede fu taki fa a ben e prakseri fu wan sani.​—Genesis 39:7-10.

¹³ Aiti hondro yari baka dati, wan meisje fu Israel ben tron wan srafu fu Na-aman, a legre-edeman fu Siria, ma toku a meisje disi no ben frigiti taki a de wan anbegiman fu Yehovah. Di a meisje kisi na okasi fu gi kotoigi fu Yehovah, dan sondro fu frede a ben taki dati Elisa na a profeiti fu a tru Gado (2 Kownu 5:1-19). Furu yari baka dati, di wan lo kruktu sani ben e pasa  na ini Israel, dan a yongu Kownu Yosia tyari bigi kenki kon na ini na anbegi fu den Israelsma, fu di a ben meki a tempel fu Gado kon bun baka, èn a sorgu taki Israel bigin anbegi Yehovah baka; wan heri pisi ten sani ben tan soleki fa a ben seti den. A ben breiti srefisrefi nanga a bribi èn nanga na anbegi fu en (2 Kroniki, kapitel 34, 35). Di Danièl nanga den dri Hebrew mati fu en ben de na ini Babilon, den no frigiti noiti taki den na futuboi fu Yehovah, èn srefi di den ben kisi kwinsi nanga tesi, den tan hori a soifri retifasi fu den. A de krin taki den ben breiti fu de futuboi fu Yehovah.​—Danièl 1:8-20.

Yu musu breiti taki yu na wan Kresten

14, 15. Fa wi kan sori taki wi breiti fu de Kresten?

¹⁴ Den futuboi disi fu Gado ben abi bun bakapisi na ini den libi, fu di den ben sorgu taki den kon frustan bun sortu bigi grani den ben abi na fesi Gado. Fa a de nanga wi na ini a ten disi? San a wani taki dati wi musu breiti fu de Kresten?

¹⁵ Na a fosi presi, a wani taki dati wi musu abi furu warderi gi a grani di wi abi fu de na mindri a pipel fu Yehovah di e tyari en nen, a wani taki sosrefi dati a e blesi wi, èn dati a feni wi bun. Gado sabi soifri suma na fu en. Na apostel Paulus, di ben e libi na ini wan ten pe bruya ben de na ini a fasi fa sma ben e anbegi Gado, ben skrifi: „Yehovah sabi den wan di de fu en” (2 Timoteyus 2:19; Numeri 16:5). Yehovah e prisiri nanga den sma „di de fu en”. A e taki: „A sma di fasi unu, e fasi a popki fu mi ai” (Sakaria 2:8). A de krin taki Yehovah lobi wi. Sobun, wi musu lobi en tu nanga wi heri ati èn dati e meki taki wi abi wan krosibei banti nanga en. Paulus ben taki: „Efu wan sma lobi Gado, dan Gado sabi a sma dati.”​—1 Korentesma 8:3.

16, 17. Fu san ede Kresten yonguwan nanga owruwan, breiti srefisrefi nanga a gudu di den abi na yeye fasi?

¹⁶ A de wan bun sani gi yongusma di kweki leki Yehovah Kotoigi, fu ondrosuku efu den e kon abi wan moro krosibei banti nanga Gado, so taki den e kon frustan moro bun san a wani taki fu de wan Kresten. Den no musu prakseri taki a bun kaba te a papa nanga mama fu den de na bribi. Paulus ben skrifi fu ibri futuboi fu Gado, taki: „Na fesi fu en eigi basi a e tanapu noso fadon.” Dati meki Paulus skrifi moro fara: „Ibriwan fu wi sa gi Gado frantwortu fu ensrefi” (Romesma 14:4, 12). A de krin taki wi no kan abi wan krosibei banti nanga Yehovah doronomo, efu wi e dini en soso fu di wi famiri de na bribi.

¹⁷ Na ini a heri historia, ala ten yu ben abi sma di gi kotoigi fu Yehovah. A bigin nanga a getrow man Abel, sowan siksi dusun yari pasa, a e go doro nanga a „bigi ipi” fu disiten Kotoigi, èn a sa tan go doro na ini a ten di e kon, te ipi-ipi anbegiman fu Yehovah sa libi fu têgo (Openbaring 7:9; Hebrewsma 11:4). Wi na a disiten grupu fu getrow anbegiman fu Yehovah. Fu tru, wi kisi wan bigi gudu na yeye fasi!

18. Fa den marki nanga markitiki di wi poti na ini wi libi, e meki taki wi de aparti fu grontapu?

¹⁸ Fu de wan Kresten, wani taki sosrefi dati wi abi den marki, den fasi, den markitiki, nanga den gwenti di e sori taki wi na Kresten trutru. Dati na „A Pasi”, a wan-enkri fasi fa wi kan abi wan bun libi èn fa wi kan plisi Gado (Tori fu den Apostel 9:2; Efeisesma 4:22-24). Kresten e „overtoigi densrefi fu ala sani” èn den e ’tan hori densrefi na sani di bun srefisrefi’! (1 Tesalonikasma 5:21) Wi e frustan krin taki wan bigi difrenti de na mindri a tru Kresten bribi, nanga a grontapu di no sabi Gado moro. Yehovah e sori krin taki a tru anbegi de heri tra fasi leki  falsi bribi. Nanga yepi fu en profeiti Maleaki, a taki: „Fu tru, un pipel sa si baka, a difrenti na mindri wan regtfardiki sma nanga wan ogri sma, na mindri wan sma di e dini Gado nanga wan sma di no e dini en.”​—Maleaki 3:18.

19. Sortu sma tru Kresten no sa tron noiti?

¹⁹ A de tumusi prenspari fu meki bigi gi Yehovah na ini a bruya grontapu disi di lasi pasi. Ma san kan yepi wi fu tan hori na prakseri taki a de wan grani fu dini Gado? San kan yepi wi fu tan hori na prakseri san a wani taki fu de wan Kresten? A tra artikel o sori wan tu sani di kan yepi wi. Te yu o luku den sani dati, dan hori a dyaranti disi na prakseri: Noiti tru Kresten o tron sma di no e broko den ede nanga Gado.

[Futuwortu]

Yu e memre disi ete?

• Fa Kresten kan ’meki bigi gi Yehovah’?

• San yu leri fu na eksempre fu Moses nanga Asaf?

• Suma na ini Bijbel ten ben breiti srefisrefi fu dini Gado?

• Fa wi kan sori taki wi breiti fu de Kresten?

[Aksi fu a tori disi]

[Prenki na tapu bladzijde 14]

Wan pisi ten, Moses ben e tweifri na ensrefi

[Prenki na tapu bladzijde 15]

Furu sma fu owruten ben breiti nanga na aparti grani di den ben abi leki futuboi fu Yehovah