Wondru di yu si kaba!

A WORTU „wondru” wani taki ete wan sani, namku „wan tumusi aparti sani di pasa, noso di wan sma du”. Wi alamala si den sortu wondru disi, wondru di pasa sondro taki Gado ben abi wan sani fu du nanga disi.

Di libisma kon sabi moro fu den wet fu a naturu, dan den ben man du sani di sma fu fositen ben e si leki sani di no man srefisrefi. Fu eksempre, na ini a ten disi, sma e du sani nanga computer èn nanga telefisi, sabiman kon sabi sani fu a presi pe den stari de, èn sma e meki ala sortu nyunmodo sani. Ala den sani disi wi e si leki aladei sani, ma wán hondro yari pasa, moro furu sma ben o prakseri kande taki den sani disi no man.

Son sabidensiman kon si taki den no sabi ala sani fu den wondru di Gado du di a meki sani, èn fu dati ede den musu erken taki den no man taki moro dati wan sani no man. A wán sani di den kan taki now na dati kande wan sani no man. Na so fasi den e sori taki na ini a ten di e kon, nyun „wondru” ben sa kan pasa te a abi fu du nanga sabidensi.

Na a fosi presi, a wortu „wondru” abi fu du  nanga san ’libisani di hei moro libisma e du’; ma srefi te wi e luku a sani disi, dan wi kan taki dati ibriwan fu wi si wondru kaba. Fu eksempre, wi e si a son, a mun, nanga den stari, èn na wan ’libisani di hei moro libisma’ meki ala den sani disi; a sma dati na a Mekiman srefi. Boiti dati, suma kan fruklari ala sani di abi fu du nanga a fasi fa a skin fu libisma e wroko? Suma kan fruklari krinkrin fa na ede-tonton e wroko, noso fa a du kon taki wan pikin e gro ini en mama bere? A buku The Body Machine e taki: ’Den senwe di de na ini na ede-tonton èn na ini a bakabonyo, e tiri a fasi fa a skin fu libisma e wroko, èn den e meki taki ala sani na ini a skin kan wroko bun nanga makandra. Na so fasi a skin kon de wan wrokosani di meki na wan kefalek koni fasi, a de leki wan masyin di no e tan na wán presi nomo èn di man seti ala sani ensrefi, èn a de leki wan computer di man meki ala sani ensrefi; iya, a skin na wan kefalek moi mekisani èn furu sani fu en sma no man frustan krin ete.’ A Gado di meki ’a skin fu libisma’ du wan wondru trutru, wan wondru di e fruwondru wi ala ten baka. Tra wondru de tu di yu si, aladi yu no si den leki wondru kande.

Wan buku kan de wan wondru?

Bijbel na a wan-enkri buku di de fu feni na ala sei. Yu feni taki Bijbel na wan wondru? Wi kan taki dati wan „libisani di hei moro libisma” meki en? A tru taki libisma skrifi Bijbel, ma densrefi taki dati a no den eigi prakseri den skrifi, ma den skrifi den prakseri fu Gado (2 Samuel 23:1, 2; 2 Petrus 1:20, 21). Prakseri pikinso fu a tori disi. Yu ben abi sowan 40 man di ben libi na ini wan pisi ten fu 1600 yari. Ala den man disi ben abi difrenti fasi fu libi: son wan fu den ben de skapuman, trawan ben de srudati, fisiman, lantiman, datra, priester nanga kownu. Ma toku den ben man skrifi sani di abi fu du nanga wán boskopu fu howpu di de tru èn di fruteri soifri fa sani ben o pasa.

Fu di Yehovah Kotoigi ondrosuku Bijbel finifini, meki den no e si en leki „a wortu fu libisma, ma leki san a de trutru, leki a wortu fu Gado”, soleki fa na apostel Paulus ben skrifi (1 Tesalonikasma 2:13). Na ini den yari di pasa, den buku fu Yehovah Kotoigi tyari sani fu Bijbel kon na krin di sma no feni taki den e kruderi nanga makandra; den buku disi tyari kon na krin san den sani disi abi fu du nanga a boskopu di de fu feni na ini a heri Bijbel. A fasi fa sani na ini Bijbel e kruderi nanga makandra, na wan buweisi kaba taki na Gado meki sma skrifi en. *

Bijbel na a wan-enkri buku di sma ben du so furu muiti fu meki taki a no de moro. Ma toku a de ete, èn a heri Bijbel noso pisi fu en de fu feni srefi na ini moro leki 2000 tongo. A buku disi de ete èn den sani di skrifi na ini no kenki, èn dati e sori taki Gado ben abi wan sani fu du nanga en. Bijbel na wan wondru trutru!

Wan wondru di ’de libilibi èn di abi krakti’

Den wondru fu fositen, soleki te sma ben kon betre nanga yepi fu wan wondru èn te dedesma ben kon na libi baka, no e pasa moro na ini a ten disi. Ma wi kan bribi taki den sortu wondru disi o pasa baka na ini Gado en nyun grontapu di de na pasi e kon; na a ten dati wondru o pasa na heri grontapu. Den wondru sa gi sma frulekti fu têgo èn den sa du moro leki san wi kan frustan nownowde.

Na ini a ten disi srefi, Bijbel di wi kisi na wan  wondru fasi, kan du san wi e fruwakti fu wan wondru, fu di a e meki sma kenki a fasi fa den de, so taki den e tron moro betre sma. (Luku wan eksempre na ini a faki di nen „A krakti di Gado Wortu abi”, di de na tapu bladzijde 8.) Hebrewsma 4:12 e taki: „A wortu fu Gado de libilibi èn a abi krakti èn a srapu moro leki iniwan feti-owru di e koti na tu sei, èn a e boro go srefi so dipi taki a e prati sili nanga yeye, èn den skrufu fu a skin nanga a fatu na ini den bonyo fu den, èn a man fu si krin san na ati e denki èn abi na prakseri.” Iya, Bijbel na a sani di meki taki moro leki siksi milyun sma na heri grontapu, kenki a libi fu den. Den abi a firi now taki den e du wan bun sani nanga den libi èn den abi wan tumusi moi howpu gi a tamara.

Fu san ede yu no e gi Bijbel na okasi fu du wan wondru na ini yu libi?

[Futuwortu]

[Faki/​Prenki na tapu bladzijde 7]

A BEN DEDE KABA, NOSO A BEN DE NA LIBI ETE?

Soleki fa Yohanes 19:33, 34 e taki, dan Yesus ben dede kaba di „wan fu den srudati dyuku wan lansri go na ini Yesus seibere èn wantewante brudu nanga watra kon na doro”. Ma Mateyus 27:49, 50 e sori taki Yesus ben de na libi ete di a srudati du a sani disi. Fu san ede den tu tekst disi e difrenti?

A Wet fu Moses no ben e gi primisi taki sma meki wan ogriman tan anga heri neti na wan postu (Deuteronomium 21:22, 23). Fu dati ede a ben de so na ini a ten fu Yesus taki, efu wan ogriman di den ben anga na wan postu ben de na libi ete èn a dei ben o kon na wan kaba, dan a gwenti ben de fu broko den futu fu na ogriman, so taki a ben kan dede moro esi. A no ben o man opo ensrefi moro fu bro bun. Den srudati broko den futu fu den tu ogriman di ben anga na sei Yesus, ma den no ben broko den futu fu Yesus, èn disi e sori taki den ben denki taki Yesus ben dede kaba. Kande a srudati sutu wan lansri go na ini Yesus seibere fu di a ben wani de seiker taki Yesus ben dede kaba èn a no ben wani gi sma na okasi fu fruteri trawan taki Yesus ben kisi wan opobaka.

Den wortu di skrifi na Mateyus 27:49, 50 no e taki dati sani pasa na a fasi disi. A tekst e taki: „Wan tra man teki wan lansri, dan a sutu disi go na ini Yesus seibere, ne brudu nanga watra kon na doro. Yesus bari ete wan leisi nanga wan tranga sten, dan a dede.” Ma a pisi di skrifi nanga skoinsi letter no de fu feni na ini ala owruten Bijbel dokumenti. Furu sabiman e bribi taki bakaten, sma teki a pisi disi puru fu na Evangelie fu Yohanes èn den poti en na ini a buku Mateyus, ma den no poti en na a yoisti presi. Dati meki furu Bijbel e poti en na mindri aka; trawan e poti wan futuwortu fu tyari a pisi disi kon na krin, noso den e puru a heri pisi.

Westcott nanga Hort skrifi wan buku pe a heri Nyun Testamenti skrifi na ini Grikitongo, èn den e poti a pisi disi na mindri fo aka. Na a buku disi den brada gebroiki moro furu fu vertaal a Nyun Grontapu-vertaling. A buku disi e taki na ini wan futuwortu dati „furu sma no e tweifri taki den leriman fu wet poti [a pisi disi]”.

Fu di nofo buweisi de, meki wi kan bribi taki a sani di skrifi na ini Yohanes 19:33, 34 de tru èn taki Yesus ben dede kaba di a srudati fu Rome sutu a lansri go na ini en seibere.

 [Faki/​Prenki na tapu bladzijde 8]

A KRAKTI DI GADO WORTU ABI

Di Detlef ben de wan tini èn en papa nanga mama ben broko trow, a bigin gebroiki drugs nanga sopi, èn a ben e arki soso hebi rock poku. * A ben go moksi ensrefi nanga den wan di sma sabi leki „skinhead”, wan grupu yongusma di lobi du ogri nanga sma fu wan tra ras. Heri esi a ben kisi problema nanga skowtu, fu di a ben e du wan lo ogri.

Na ini 1992, siksitenti fu den skinhead disi go feti wan bigi feti nanga sowan 35 punkman; den sma disi na yonguwan di abi a gwenti fu arki soso punk rock poku èn den no e lespeki wet. A feti disi ben de na a noord-owstusei fu Doisrikondre na ini wan presi pe sma e go nyan èn e go dringi sopi. Wan fu den punkman ben nen Thomas; den fon en so te, taki a dede fu den mankeri di a kisi. Wan krutu ben hori, èn baka dati den seni wan tu fu den fesiman fu den skinhead go na strafu-oso èn Detlef ben de wan fu den. Nyunsu ben taki furu fu a krutu disi.

Syatu baka di Detlef komopo na ini strafu-oso, Yehovah Kotoigi gi en wan traktaat. A traktaat ben nen „Foe san ede a libi foeroe nanga someni problema?” Wantewante Detlef kon si taki den sani di a traktaat ben taki, ben de so trutru, èn a bigin studeri Bijbel nanga den Kotoigi. Disi ben meki taki en heri libi kon kenki. Sensi 1996, a de wan fayafaya Kotoigi fu Yehovah.

Siegfried, di ben de wan punkman fosi, ben de wan bun mati fu Thomas, a yonguman di den kiri. Bakaten, Siegfried tron wan Kotoigi tu èn now a de wan gemeente owruman. Di Siegfried go hori wan lezing na ini a gemeente fu Detlef, dan Detlef aksi en fu kon nyan wan sani na en (wi musu fu taki tu, dati wanwan leisi a mama fu Thomas e go na den konmakandra tu di e hori na ini a gemeente dati). Efu disi ben o de tin yari na fesi, dan a ben o muilek gi den tu man disi fu hori densrefi fu no feti nanga makandra, fu di den ben abi bita-ati gi makandra. Ma now ala sma kan si taki den lobi makandra leki brada.

Detlef nanga Siegfried e wakti a ten te den kan gi Thomas wan switikon te a o kisi wan opobaka fu libi na ini wan paradijs na grontapu. Detlef e taki: „Te mi e prakseri a sani disi, dan mi ai e furu nanga watra. Mi e sari trutru fu a sani di mi du.” Na a ten dati, den tu man disi wani yepi Thomas, soleki fa den e yepi tra sma na ini a ten disi fu kon sabi Yehovah èn fu prisiri nanga a howpu di Bijbel e gi.

Iya, dati na a krakti di Gado Wortu abi!

[Futuwortu]

[Prenki na tapu bladzijde 6]

A libisma skin na wan tumusi moi sani di Gado meki

[Sma di abi a reti fu a prenki]

Anatomy Improved and Illustrated, London, 1723, Bernardino Genga