Yu e teki yusrefi gersi nanga trawan?

WI ALAMALA miti wan sma di moi moro wi, noso di gersi fu pôpi moro wi, di man frustan sani moro esi leki wi, noso di e wroko moro bun na skoro. Kande trawan abi wan moro bun gosontu leki wi, noso kande den abi wan moro bun wroko, noso sani e waka moro bun gi den na ini a libi, noso kande a gersi leki den abi moro mati leki wi. Kande den abi moro gudu leki wi, moro moni, wan moro nyun wagi, noso kande a gersi leki den de moro koloku. Te wi e taki fu den sani disi, dan a de so taki wi e teki wisrefi gersi nanga tra sma? A de so, taki nomonomo wi musu teki wisrefi gersi nanga tra sma? Fu san ede wan Kresten ben sa wani wai pasi gi dati? Fa wi kan de tevrede nanga wisrefi, sondro fu teki wisrefi gersi nanga wan tra sma?

Fu san ede èn o ten wi mag teki wisrefi gersi nanga tra sma?

Wan reide fu san ede sma wani teki densrefi gersi nanga trawan, na taki a sani disi e meki den abi lespeki gi densrefi, noso a e meki taki den e kisi moro lespeki gi densrefi. Nofo tron a e prisiri sma te den e si taki a libi fu den e waka bun, neleki a di fu den speri fu den. Wan tra prakseri, na taki te wan sma e teki ensrefi gersi nanga trawan, dan dati e meki taki a sma no e tweifri so furu moro na ensrefi, èn taki a e frustan moro bun san a man du èn san a no man du. Wi e luku sortu marki tra sma ben doro na ini den libi. Efu den de leki wi na ini furu sani èn te den doro marki di den ben poti gi densrefi, dan a kan gi wi a firi taki wi tu kan doro den srefi sortu marki dati.

Nofo tron sma e teki densrefi gersi nanga tra sma di de a srefi leki den; kande a sma na wan mansma, noso wan umasma neleki den, kande a sma abi a srefi yari, kande a sma abi a srefi posisi na ini a libimakandra, èn kande den sabi makandra. Nofo tron, wi no o teki wisrefi gersi nanga wan sma efu wi e si taki a sma e difrenti furu fu wi. Kon meki wi taki en so, nofo tron wan tini meisje no sa teki ensrefi gersi nanga wan pôpi uma di gwenti waka modeshow, ma moro furu a sa teki ensrefi gersi nanga wan skoro mati; èn a pôpi uma no sa teki ensrefi gersi nanga a tini meisje.

Na ini sortu afersi wi e teki wisrefi gersi nanga tra sma? Wi e teki wisrefi gersi nanga trawan te a abi fu du nanga wan sani di a libimakandra e si leki wan prenspari sani, soleki koni, a moi di wan sma moi, gudu, nanga krosi. Ma wi lobi fu teki wisrefi gersi nanga tra sma te a abi fu du nanga sani di wisrefi lobi. Fu eksempre, te wi no lobi fu kibri kaw-ai, dan wi no sa dyarusu fu di wan mati fu wi abi moro kaw-ai leki wi.

Te sma e teki densrefi gersi nanga trawan, dan dati kan meki taki den e handri na difrenti fasi. Te wan sma e teki ensrefi gersi nanga trawan, dan a  kan meki taki a de tevrede nanga ensrefi. Tra sma baka, kan firi brokosaka kande. Te son sma e teki densrefi gersi nanga trawan, dan a kan meki taki a sma e warderi san a trawan du, noso a kan meki taki a e feti fu du sani moro bun leki a trawan. Wan tra sani di kan pasa na taki a sma no e firi ensrefi bun, noso taki a e si a trawan leki en feanti. Wan tu fu den firi disi kan du wi ogri, èn den no e kruderi nanga den eigifasi di wan Kresten musu abi.

Te sma e teki densrefi gersi nanga makandra, dan a kan meki taki den e strei nanga makandra

Furu sma di e suku fu sori taki den bun moro trawan, lobi fu strei nanga trawan. Den no de tevrede, solanga den no bun moro trawan. A no switi srefisrefi fu abi demakandra nanga den sortu sma disi. A matifasi nanga den sortu sma disi e pori, èn noiti yu kan abi wan bun banti nanga den. A no de so wawan taki den sma disi no abi sakafasi, ma furu tron den no e hori densrefi na a rai di Bijbel e gi taki den musu lobi den kompe, fu di a fasi disi fa den e tyari densrefi kan meki taki trawan e firi densrefi moro lagi leki den, èn a kan meki taki trawan e firi syen.​—Mateyus 18:1-5; Yohanes 13:34, 35.

Wi e hati sma firi te wi e meki den denki taki den lagi moro wi. Wan skrifiman e taki dati „te wi no man kisi spesrutu sani di wi wani, dan dati e hati moro te wi e si taki sma di de na ini a srefi situwâsi leki wi ben man kisi den gudu di wi ben wani”. Sobun, wan sma di lobi fu strei nanga trawan sa kon dyarusu, a sa atibron, èn a no sa lobi trawan fu den gudu di den abi. A no sa lobi trawan tu fu di na ekonomia situwâsi fu den betre moro di fu en, fu di den abi wan bun posisi nanga wan bun nen, fu di den e kisi furu bun sani na ini a libi, èn go so moro fara. Disi e meki taki sma e strei nanga makandra moro nanga moro, èn a e meki taki a wan ogri e tyari wan tra ogri kon. Bijbel e krutu ’a strei di sma e strei nanga makandra’.​—Galasiasma 5:26.

Son sma di e dyarusu e taki na wan lagi fasi fu den marki di wan tra sma ben man doro. Na so fasi den sma disi di e dyarusu, e pruberi fu kisi lespeki gi densrefi baka. A kan gersi leki a de wan pikin sani te wan sma e handri na a fasi disi, ma efu sma no e erken a problema èn no e pruberi fu dwengi a firi dati, dan a kan meki taki den sa du wan kefalek bigi ogri. Kon meki wi luku tu eksempre na ini Bijbel, pe dyarusu ben de wan problema.

Di Isak ben e libi na mindri den Filistiasma, dan Gado ben blesi en nanga „ipi-ipi skapu nanga kaw, nanga furu futuboi, èn dati meki den Filistiasma ben bigin dyarusu na en tapu”. Disi ben meki taki den ben tapu den watrapeti di Abraham, a papa fu Isak, ben diki, èn a kownu fu den ben aksi Isak fu gowe libi a kontren (Genesis 26:1-3, 12-16). A dyarusu fu den ben meki taki den ben du takru sani nanga Isak èn a ben tyari takru bakapisi kon. Den no ben man teki en moro taki a libi fu Isak ben waka bun na ekonomia sei.

Furu yarihondro na baka, David ben kon pôpi fu di a ben de wan bun fetiman. Den deki-ati sani di a ben du, ben meki taki den uma fu Israel ben prèise en, èn den ben singi: „Saul naki den dusundusun fu en trowe, èn David den tin dusundusun fu en.” Aladi Saul srefi ben kisi prèise, toku a ben si en leki wan syen sani di den uma ben teki en gersi nanga David, èn a ben kon dyarusu. Sensi a ten dati, a bigin si David leki en feanti. Syatu baka dati, a pruberi difrenti leisi fu kiri David. Iya, dyarusu kan meki wan sma du kefalek bigi ogri!​—1 Samuel 18:6-11.

Sobun, te wi e teki wisrefi gersi nanga trawan fu di wi e luku a deki-ati di den abi, noso den winimarki di den e kisi na ini a libi, dan wi musu luku bun taki wi no e kon dyarusu tapu den, noso taki wi no e bigin strei nanga den! Den firi disi kan meki taki wi e du takru sani, èn den no e kruderi nanga a fasi fa Gado e denki. Ma bifo wi e go ondrosuku fa wi kan kakafutu gi den sortu fasi disi, dan meki wi go luku wan tra sani di e meki taki sma e teki densrefi gersi nanga trawan.

Te wan sma e ondrosuku ensrefi èn te a de tevrede nanga ensrefi

’A de so taki mi koni, mi moi, mi abi nofo ondrofeni, mi de gosontu, mi na wan sma di trawan e lespeki, noso di sma lobi? Èn mi abi den fasi disi moro leki tra sma?’ Pikinmoro noiti wi ben o tanapu na fesi wan spikri èn aksi wisrefi den sortu  sani disi. Toku, soleki fa wan skrifiman e taki, dan „a de so trutru taki furu tron wi e poti den sortu aksi disi gi wisrefi, èn na ini wisrefi wi gi piki tapu den aksi disi, èn wi lobi den piki di wi e gi”. Wan sma di no sabi seiker sortu marki a kan doro, kande e sidon prakseri fu den sani disi sondro taki a wani strei nanga trawan èn sondro taki a e dyarusu. Na ondrosuku a e ondrosuku ensrefi nomo. Disi no abi fu de wan fowtu sani. Ma a no ben o de wan bun sani te wi ben o teki wisrefi gersi nanga trawan.

Difrenti sortu situwâsi e meki taki wi alamala no man du den srefi sortu sani. Ala ten a o gersi leki sma de di e du sani moro bun leki wi. Sobun, na presi fu dyarusu na den tapu, wi musu luku efu den sani di wi man du, e kruderi nanga den regtfardiki markitiki fu Gado, bika den markitiki fu Gado na wan bun yepi fu si san yoisti èn san bun. Yehovah e poti prakseri na ibriwan fu wi. A no abi fu teki wi gersi nanga nowan tra sma. Na apostel Paulus e gi wi a rai: „Meki ibri sma buweisi san na en eigi wroko, èn dan a sa abi wan reide fu prisiri fu ensrefi wawan, èn no te a teki ensrefi gersi nanga a tra sma.”​—Galasiasma 6:4.

Feti teige dyarusu firi

Fu di ala libisma de onvolmaakti, meki wi musu tan meki tranga muiti fu feti teige dyarusu firi. Aladi wi sabi taki Bijbel e taigi wi: „No wakti fu sori trawan lespeki, ma un musu sori trawan lespeki fosi”, toku a moro muilek fu du en. Paulus ben erken taki a abi a firi fu sondu. Fu feti teige a firi, a ben musu ’kofu [en] skin èn basi en neleki a de wan srafu’ (Romesma 12:10; 1 Korentesma 9:27). Kande disi wani taki dati wi musu feti teige den prakseri di wi abi fu strei nanga trawan, èn na presi fu dati, wi musu prakseri sani di de bun. A de fanowdu fu begi èn aksi Yehovah meki a yepi wi fu „no denki moro fu [wisrefi] leki san de fanowdu”.​—Romesma 12:3.

Te wi e studeri Bijbel èn e prakseri dipi fu sani, dan dati kan yepi wi tu. Fu eksempre, prakseri fu a Paradijs di Gado pramisi wi gi a ten di e kon. Na a ten dati, ala sma sa abi vrede, wan bun gosontu, furu nyanyan, moi oso, nanga wroko di e gi prisiri (Psalm 46:8, 9; 72:7, 8, 16; Yesaya 65:21-23). Yu denki taki drape wan sma sa abi a firi fu strei nanga wan trawan? Kwetikweti. Nowan reide sa de fu strei nanga trawan. A tru taki Yehovah no e fruteri wi ala sani finifini fu a fasi fa a libi sa de na a ten dati, ma wi abi reide fu bribi taki ala sma sa man du den sani di den lobi èn den sa man gebroiki ala a koni di den abi. Kande a wan sma wani stuka den sani soleki stari, noso tra sani di de na hemel, èn kande wan trawan wani meki moi krosi. Fu san ede a wan sma ben sa dyarusu tapu a trawan? Den sani di tra sma sa du, sa pusu wi moro fu du bun, èn den no sa pusu wi fu atibron na den tapu. A firi di sma abi fu strei nanga makandra, no sa de moro.

Efu disi na a libi di wi wani trutru, dan a no musu de so dan taki nownowde kaba wi musu abi a srefi fasi dati? Nownow kaba wi e prisiri fu a yeye paradijs, èn wi no abi furu fu den problema fu a grontapu disi. Fu di nowan sma sa strei nanga wan trawan na ini a nyun grontapu fu Gado, meki nownow kaba wi musu wai pasi gi a strei di sma e strei nanga trawan.

Ma a de wan fowtu sani fu teki wisrefi gersi nanga tra sma? Noso a kan taki son leisi a e fiti fu teki wisrefi gersi nanga tra sma?

A kan fiti son leisi fu teki wisrefi gersi nanga trawan

Furu leisi te sma ben teki densrefi gersi nanga trawan, dan a ben abi leki bakapisi taki den ben kisi bita-ati noso den ben brokosaka, ma a no ala leisi a abi fu de so. Luku san na apostel Paulus ben gi leki rai ini a tori disi: „Waka na baka den wan di nanga bribi èn nanga pasensi e kisi den pramisi” (Hebrewsma 6:12). A kan abi bun bakapisi te wi e du muiti fu waka baka den srefi eigifasi fu den  getrow futuboi fu Yehovah na ini owruten. A tru taki disi wani taki dati wi musu teki wisrefi gersi nanga den. Disi kan yepi wi fu si eksempre di wi wani waka na baka, noso wi kan si sortu sani wi musu du moro bun.

Luku na eksempre fu Yonatan. Wan sma ben kan taki dati a ben abi reide fu dyarusu. Kande leki a moro owru manpikin fu Kownu Saul fu Israel, Yonatan ben fruwakti fu tron kownu, ma Yehovah ben teki wan man di ben yongu 30 yari moro en, namku a yonguman David. Na presi fu abi bita-ati, Yonatan ben de trutru aparti fu di a ben tron wan bun mati fu David di Yehovah ben poti fu tron kownu, èn a ben horibaka gi en tu. Yonatan ben de wan man di abi trutru yeyefasi (1 Samuel 19:1-4). Yonatan no ben de leki en papa kwetikweti, bika en papa ben si David leki wan feanti. Ma Yonatan ben si taki Yehovah ben tiri na afersi èn a ben saka ensrefi ondro a wani fu Yehovah; a no ben teki ensrefi gersi nanga David èn a no ben taki: „Fu san ede na David musu tron kownu, na presi fu mi?”

Noiti wi musu si wi kompe Kresten leki feanti, neleki den ben o wani du sani moro bun leki wi, noso taki den wani teki a frantwortu fu wi. A no bun fu strei nanga makandra. Lepi Kresten na sma di e wroko nanga makandra, den abi wánfasi, den lobi makandra, èn den no e strei nanga makandra. „Lobi na a moro bigi feanti fu dyarusufasi”, na so Francesco Alberoni e taki, di e ondrosuku sani na ini a libimakandra. „Efu wi lobi wan sma, dan wi wani soso bun sani gi en, èn wi e prisiri te sani e waka bun gi en èn te a de koloku.” Sobun, efu wan tra sma na ini a Kresten gemeente kisi wan spesrutu grani, dan wi ben o sori lobi efu wi e breiti nanga dati. Na dati Yonatan ben du. Neleki Yonatan, wi sa kisi blesi efu wi e horibaka gi den sma di e dini Yehovah na wan getrow fasi èn di abi frantwortu na ini na organisâsi fu Yehovah.

A bun fu abi a yoisti warderi gi den moi eksempre di tra Kresten gi wi. Te wi e teki wisrefi gersi nanga den na wan fasi di fiti, dan dati kan pusu wi na wan yoisti fasi fu waka baka a bribi fu den (Hebrewsma 13:7). Ma efu wi no e luku bun, dan a de di wi wani de leki tra sma, kan meki taki wi e strei nanga den. Efu wi feni taki wan tra sma e du sani moro bun leki wi èn wi e pruberi fu lagi en, noso e suku fowtu na en, dan wi no wani kon tron leki en, ma na dyarusu wi e dyarusu.

Nowan onvolmaakti sma kan de wan tumusi bun eksempre gi trawan. Dati meki Bijbel e taki: „Teki na eksempre fu Gado leki pikin di a lobi.” Bijbel e taki sosrefi: „Krestes ben pina fu unu ede, èn ben libi wan eksempre gi unu fu waka soifri na ini den futumarki fu en” (Efeisesma 5:1, 2; 1 Petrus 2:21). Wi musu du muiti fu waka baka den eigifasi fu Yehovah nanga di fu Yesus, namku a lobi fu den, a switifasi fu den, nanga a sakafasi fu den. Wi musu teki ten fu ondrosuku wisrefi fu si efu wi abi den eigifasi fu den, efu wi e prakseri leki den, èn efu wi e du sani soleki fa den e du sani. Te wi e teki wisrefi gersi nanga den na a fasi disi, dan wi sa kisi wan moro bun libi, fu di a kan de wan bun tiri na ini wi libi, wi libi no sa bruya, wi kan de seiker taki sani sa waka bun gi wi, èn a kan yepi wi fu tron lepi Kresten man nanga uma (Efeisesma 4:13). Efu wi e du ala muiti fu waka baka a volmaakti eksempre fu den, dan wi no sa abi a firi fu teki wisrefi gersi nanga tra libisma.

[Prenki na tapu bladzijde 28, 29]

Kownu Saul ben kon dyarusu tapu David

[Prenki na tapu bladzijde 31]

Noiti Yonatan ben si a moro yongu David leki en feanti