Bun maniri ’e moi a leri fu Gado’

MARIA, wan yongu meisje na ini a foto Kransnoyarsk, Rosiakondre, e singi so bun taki en skoromisi poti en na ini a singi grupu fu a skoro. Syatu baka dati, Maria go na wan lespeki fasi na wan fu den skoromisi fu taigi en taki a no sa man singi wan tu fu den singi. Fu san ede? Fu di te a ben o singi sani di abi fu du nanga kerki, dan dati no ben o kruderi nanga den Bijbel leri fu en. A skoromisi fruwondru èn a aksi ensrefi: ’Fu san ede a no bun fu singi sani di e prèise Gado?’

Fu sori fu san ede a no wani singi wan sani di abi fu du nanga wan Dri-wánfasi Gado, dan Maria opo en Bijbel èn a sori en taki Gado nanga Yesus Krestes no de wán Gado, èn taki a santa yeye na a wroko krakti fu Gado (Mateyus 26:39; Yohanes 14:28; Tori fu den Apostel 4:31). Maria e fruteri: „A sani disi no ben abi takru bakapisi gi a matifasi fu mi nanga a skoromisi. Moro furu, wi abi heri bun leriman na a skoro fu wi. Den wani taki wi no musu frede fu taki san wi e denki.”

A fasi fa Maria ben tyari ensrefi ben meki taki den skoromisi nanga den skoromeester, nanga den tra skoropikin fu en klas, ben e lespeki en a heri skoroyari. Maria e taki: „Den Bijbel gronprakseri e yepi mi na ini mi libi. Na a kaba fu a skoroyari, mi ben kisi wan prijs fu di mi no e bedrigi trawan èn fu di mi ben tyari misrefi na wan bun fasi, èn mi papa nanga mama kisi wan brifi fu a skoro fu taigi den tangi taki den kweki na umapikin fu den na so wan bun fasi.”

Maria ben dopu tapu 18 augustus 2001. A e taki: „Mi breiti taki mi kan dini so wan kefalek bun Gado, Yehovah!” Yongu Kotoigi fu Yehovah na heri grontapu e du san Titus 2:10 e taki, pe skrifi: „Meki a leri fu wi Frulusuman, Gado, kon moi na ini ala sani.”

[Prenki na tapu bladzijde 32]

Wan brifi fu sori warderi, èn wan diploma fu gi grani

[Prenki na tapu bladzijde 32]

Maria nanga en papa nanga mama, baka di a dopu