Den „tan getrow ondro tesi”

NA A bigin fu april 1951, a tranga Sovyet tirimakti bigin frufolgu wan grupu Kresten na a westsei fu Sovyet-Unie. Den Kresten disi, di no ben du nowan ogri, ben de Yehovah Kotoigi. Dusundusun osofamiri, srefi pikin-nengre, uma di ben de nanga bere, nanga owrusma, ben musu go na ini den wagi fu loko, èn tutenti dei langa den ben de na pasi fu go na Siberia. A situwâsi na ini den wagi no ben bun kwetikweti. A tirimakti ben seni den sma disi gowe leki katiboman fu go tan na wan presi pe den ben musu libi wan tranga libi.

Na ini april 2001, sma tyari wan video kon na doro di e sori fa Yehovah Kotoigi ben e kisi kwinsi someni tenti yari langa fu a fositen Sovyet-Unie. A video dati ben de fu memre a sani disi di ben pasa 50 yari na fesi na ini Moskow. Na ini a felem disi, historia sabiman nanga sma di si den sani di ben pasa, e fruteri fa den Kotoigi ben e pasa den tesi, èn fa den Kotoigi ben e prisiri sosrefi, aladi den ben e kisi hebi kwinsi.

A felem disi nen Faithful Under Trials—Jehovah’s Witnesses in the Soviet Union (Yehovah Kotoigi na ini Sovyet-Unie tan getrow ondro tesi). Now, dusundusun sma na ini Rosiakondre èn na tra kondre si a felem disi, èn furu sma feni taki a felem disi na wan heri bun felem, sosrefi historia sabiman e taki so. Tu sabiman fu Rosiakondre di e libi na ini a kontren pe sma ben seni moro furu fu den Kotoigi osofamiri go leki katiboman, ben taki wan tu sani fu a video disi. Meki wi go luku san den taki:

„Mi feni taki a felem disi moi srefisrefi. Ala ten mi ben lobi den sma di abi a bribi fu unu, ma baka di mi luku a felem, dan mi kon kisi moro warderi srefi gi [Yehovah Kotoigi]. A felem disi seti heri bun! San mi ben lobi spesrutu fu a felem, na taki ibri sma fruteri san ensrefi ben ondrofeni. Aladi mi abi na Orthodox bribi, èn aladi mi no e prakseri fu kenki a bribi fu mi, toku mi lobi den Kotoigi. Mi ben sa wani abi wan fu den felem disi na a heiskoro pe mi e wroko. Mi nanga den tra leriman na a skoro teki a bosroiti fu sori den studenti fu wi a felem, èn wi sa gebroiki en sosrefi fu gi leri.”—Professor Sergei Nikolayevich Rubtsov, wan edeman fu na afdeling historia leri, na a State Pedagogical University, na ini Irkutsk, na Rosiakondre.

„Mi breiti nanga a felem disi. Te sma e meki wan felem di abi fu du nanga a kwinsi di sma e kwinsi trawan, dan ala ten a muilek srefisrefi fu tyari a tori kon na krin soleki fa sani waka trutru. Ma unu ben man du dati. Ala ten unu kan gi mi moro fu den felem fu unu.”—Professor Sergei Ilyich Kuznetsov, wan edeman fu na afdeling historia leri, na a Irkutsk State University, na Rosiakondre.

Sosrefi den Kotoigi fu Yehovah di e libi na ini Siberia ben warderi a felem disi trutru. Luku san wan tu fu den taki:

„Na a pisi ten di den sani di de fu si na ini a felem ben e pasa, dan furu sma na ini Rosiakondre no ben sabi soifri sortu sani Yehovah Kotoigi ben e du. Ma baka di den luku a felem, den kon si taki na organisâsi fu wi a no wan sekte kwetikweti, soleki fa den ben prakseri fositen. Tra sma di tron Kotoigi no so langa pasa, e taki: ’Noiti wi ben sabi  taki wi ben e libi èn ben e wroko sei na sei nanga Kresten brada di ondrofeni so furu sani!’ Baka di wan Kotoigi luku a felem, a taki dati a wani tron wan furuten pionier.”—Anna Vovchuk, di sma ben seni go na ini katibo na Siberia.

„Di a felem ben sori fa wan skowtu di ben e wroko kibrikibri, ben naki na a doro fu na oso fu wan Kotoigi, dan mi skin gro. A ben de neleki a ten di den skowtu ben kon naki na wi doro, èn mi e memre ete dati mi mama ben taki: ’Kande wan presi e bron.’ Ma a felem disi e memre mi tu taki furu Kotoigi nyan pina moro leki mi. Ala den sani disi di wi kon sabi, e gi wi moro krakti èn moro faya fu tan dini Yehovah.”​—Stepan Vovchuk, di sma ben seni go na ini katibo na Siberia.

„Mi na wan manpikin fu wan fu den Kotoigi di sma ben seni go na ini katibo na Siberia. Fu di disi de so, meki mi ben prakseri taki mi ben yere furu fu den tori fu a ten dati kaba. Ma baka di mi luku a felem disi, dan mi kon si taki pikinmoro mi no ben sabi noti. Di mi arki den interview, dan mi ai kon furu nanga watra. Now mi no e si den ondrofenitori leki tori nomo, ma mi e si den leki sani di pasa trutru. A felem meki mi kisi wan moro bun banti nanga Gado, èn a yepi mi fu de srekasreka fu pasa ala problema di kan miti mi na ini a ten di e kon.”​—Vladimir Kovash, fu Irkutsk.

„A felem disi ben naki mi ati moro leki wan tori di skrifi na tapu papira. Di mi ben e luku fa den interview ben hori nanga den brada, èn di mi ben e arki den sani di den ben e fruteri, dan mi ben firi leki mi sosrefi ben ondrofeni den sani dati makandra nanga den. Na eksempre fu a brada di ben de na strafu-oso, èn di ben e teken prenki na tapu karta fu seni go gi den yongu meisje fu en, gi mi deki-ati fu pruberi fu doro na ati fu mi eigi pikin nanga den tru tori fu Bijbel. Mi e taki unu tangi! A felem disi meki taki moro leki iniwan ten bifo, Yehovah Kotoigi na ini Rosiakondre e firi taki den na wan pisi fu na organisâsi fu Yehovah di de na heri grontapu.”​—Tatyana Kalina, fu Irkutsk.

„Wan odo e taki: ’Si na bribi’, èn dati seiker de so nanga a felem disi. A de leki den sani e pasa na yu fesi trutru, èn den sani dati abi so furu fu du nanga wi! Baka di mi luku a felem, mi ben abi furu ten fanowdu fu denki. A felem gi mi na okasi fu prakseri fa mi ben o du efu mi ben de wan fu den Kotoigi di sma ben seni go na ini katibo. Now te mi e teki a situwâsi fu mi gersi nanga di fu den, dan dati e yepi mi fu si den problema di wi abi na ini a ten disi, na wan heri tra fasi.”​—Lidia Beda, fu Irkutsk.

Teleki now, a video Faithful Under Trials kon na doro na ini 25 tongo, èn sma na heri grontapu lobi a felem disi. * A heri felem ben de fu si tapu difrenti telefisi station na ini Sint Petersburg, na ini Omsk, èn sosrefi na ini tra foto fu Rosiakondre. A ben de fu si tu na ini den Ukraini foto Vynnytsya, Kerch, Melitopol, èn na ini a kontren fu Lviv. A felem ben kisi prijs sosrefi fu organisâsi na ini difrenti kondre di abi a wroko fu luku sortu felem bun nofo fu kisi wan prijs.

A sani di e meki taki a felem disi abi so furu krakti tapu sma, na a eksempre fu den dusundusun sma di no de so prenspari gi trawan, ma di ben sori taki den na aparti sma fu di den ben abi trutru deki-ati èn krakti na yeye fasi, aladi den kisi frufolgu omeni yari langa. Yehovah Kotoigi na ini Sovyet-Unie sori trutru taki den tan getrow ondro tesi. Efu yu ben sa wani si a felem disi, dan Yehovah Kotoigi sa breiti fu tyari en gi yu. Grantangi pruberi fu miti wan fu den Kotoigi na ini a kontren fu yu.

[Futuwortu]

[Sma di abi a reti fu a prenki na tapu bladzijde 8]

Stalin: U.S. Army photo

[Sma di abi a reti fu a prenki na tapu bladzijde 9]

Stalin: U.S. Army photo