Den winimarki di wi sa abi te wi e meki vrede

ED BEN de fu dede, èn Bill ben e teige en. Tutenti yari na fesi, Ed ben teki wan bosroiti di meki taki Bill lasi en wroko, èn a sani dati meki taki den tu man disi di ben de bun mati fosi, no ben e taki nanga makandra moro. Now Ed pruberi fu aksi Bill pardon, so taki a ben kan dede na ini vrede. Ma Bill weigri fu arki en.

Pikinmoro 30 yari baka dati, di Bill srefi ben de fu dede, a fruteri fu san ede a no ben gi Ed pardon. „Ed no ben abi reide fu du a sani di a du nanga mi, bika mi ben de en bunbun mati. Mi no ben e firi fu meki sani bun baka nanga en, baka tutenti yari. . . . Kande san mi du no bun, ma na so mi ben e firi.” *

Furu tron a no de so, taki den sari sani disi e pasa te sma abi kesekese nanga makandra, ma nofo tron den kesekese disi e hati sma, noso den e meki taki sma e atibron nanga makandra. Prakseri wan sma di e firi soleki fa Ed ben e firi. Te a sma dati si taki a bosroiti di a ben teki, tyari trawan kon na ini problema, dan a sma dati  kande e libi nanga wan konsensi di e trobi en, èn a e sari srefisrefi taki en nanga a trawan no de mati moro. Toku, a e hati en te a e prakseri taki a mati fu en di ben e mandi na en tapu, e si a matifasi fu den leki wan soso sani.

Ma wan sma di e firi soleki fa Bill ben e firi, e feni taki ensrefi no du nowan ogri, èn a ben kan atibron trutru tapu a sma di du en wan ogri. A feni taki a sma di ben de en mati fosi, suku fu du en ogri fu espresi. Furu tron, a de so taki te tu sma abi wan kesekese, dan ibriwan fu den feni taki den no abi nowan fowtu ini a tori, ma taki a trawan suku a trobi. Na so a e pasa taki tu sma di ben de mati fosi, e bigin feti nanga makandra.

Den e feti nanga makandra sondro fu gebroiki fetisani di e meki babari, iya, a wan e drai en baka te a trawan e waka pasa, èn den no e spiti na makandra bowtu te den de makandra nanga tra sma. Den no e kon krosibei fu makandra, ma den e fufuru ai luku makandra, noso te den ai tuka nanga makandra, dan yu kan firi na bita-ati di den abi gi densrefi. Ma te den opo den mofo fu taki nanga makandra, dan den e taki sani di e go na wan sma ati, noso den e taigi makandra sani di e koti leki nefi.

Ma aladi a gersi leki den tu sma disi no e koti srefisrefi nanga makandra, toku den e kruderi nanga makandra na ini wan tu sani. Kande den sabi taki den abi seryusu problema èn taki a de wan sari sani taki den no de mati moro. A kan taki ibriwan fu den e sari taki wan kaba no man kon na a trobi, èn den ala tu sabi taki den musu du wan sani fu tyari wan kenki kon. Ma suma fosi sa du wan sani fu meki sani kon bun baka na den mindri? Nowan fu den tu wani du dati.

Tu dusun yari pasa, den apostel fu Yesus Krestes ben e meki bigi trobi nanga makandra son leisi (Markus 10:35-41; Lukas 9:46; 22:24). Wan leisi baka di den meki so wan trobi, dan Yesus aksi den: „Fu san unu ben haritaki nanga makandra na pasi?” Fu di den ben e syen, meki nowan fu den piki en (Markus 9:33, 34). Den leri fu Yesus ben yepi den fu seti a trobi di den ben abi nanga makandra. A rai fu en, èn a di fu wan tu fu en disipel, e yepi sma ete fu lusu trobi èn fu meki sani bun baka te den nanga wan mati fu den abi wan kesekese. Meki wi si fa dati e pasa.

Du muiti fu meki vrede

„Mi no wani taki nanga a sma dati. Mi no wani si en noiti moro.” Efu yu taki dati fu wan sma, dan yu musu du wan sani, soleki fa den Bijbel tori di e kon now sa sori.

Yesus ben leri sma: „Fu dati ede, te yu e tyari yu ofrandi go na a altari èn drape yu e memre taki yu brada abi wan sani teige yu, dan libi yu ofrandi drape na fesi na altari, èn gowe go meki vrede nanga yu brada fosi” (Mateyus 5:23, 24). A ben taki sosrefi: „Efu yu brada du wan sondu, go sori en san na en fowtu te yu nanga en wawan de” (Mateyus 18:15). Efu a de so taki yu afrontu wan sma, noso taki wan sma afrontu yu, awansi fa a no fa, den wortu fu Yesus e poti krakti na tapu taki yu musu go taki wantewante nanga a sma dati. Yu musu du disi „na wan safri-ati fasi” (Galasiasma 6:1). Yu no musu taki nanga a sma nanga a marki fu krin yu nen, noso fu dwengi en fu aksi yu pardon, ma yu musu taki nanga en nanga a marki fu meki vrede. A rai disi fu Bijbel e yepi?

Ernest na wan basi na ini wan bigi kantoro. * Furu yari langa, a wroko di a e du e aksi fu en taki a e seti ala sortu muilek afersi nanga ala sortu sma, èn taki a e tan wroko switi nanga den sma disi. A si o makriki a de taki trawan e kisi trobi nanga makandra. A e taki: „Son leisi mi ben abi kesekese nanga trawan. Ma te disi pasa, dan mi e sidon nanga a sma èn mi e taki fu a problema. Go langalanga na den. Go taki nanga den èn suku fu meki vrede. A sani disi e wroko alaten.”

 Alicia abi mati fu difrenti kulturu, èn disi na san a e taki: „Son leisi mi e taki wan sani, èn baka dati mi e kon si taki kande mi taki wan sani di no bun. Mi e go na a sma dati èn mi e aksi en pardon. Kande mi e aksi sma pardon tumusi furu, èn srefi efu mi no ben afrontu a trawan, toku mi e firi bun taki mi aksi en pardon. Na so fasi mi sabi taki mi nanga a sma dati no abi trobi.”

No meki noti tapu yu fu meki vrede

Furu tron te sma abi kesekese nanga makandra, dan den no man meki vrede, fu di wan tu sani e tapu den fu du dati. Oiti yu taki: „Fu san ede mi musu de a fosiwan fu meki vrede? Na en suku a trobi.” Noso oiti yu go na wan sma fu lusu wan problema, soso fu yere a sma dati taigi yu: „Mi no abi noti fu taigi yu”? Son sma e piki na so wan fasi fu di a sani di pasa e hati den. Odo 18:19 e taki: „Te sma du wan ogri nanga wan brada, dan a de moro muilek fu wini leki wan tranga foto; èn yu abi kesekese di de leki a postu di e sroto a doro fu wan toren pe sma e libi na ini.” Fu dati ede, hori den firi fu a trawan na prakseri. Efu a sma e taki grofu nanga yu, wakti wan syatu pisi ten, èn pruberi baka. Kande a „tranga foto” opo na a ten dati, èn kande a „postu di e sroto a doro” no de moro na tapu a doro di e gi pasi fu meki sani kon bun baka.

Wan tra sani di kan tapu sma fu meki vrede, kan de taki a sma e frede fu lagi ensrefi. Son sma e si en leki wan syen fu aksi trawan pardon, noso fu taki srefi nanga wan sma di du den wan ogri. A bun te wi e prakseri fu hori wi nen hei. Ma a de so taki a weigri di wi weigri fu meki vrede nanga trawan e hei wi nen, noso a e meki taki wi e lagi wisrefi? A kan taki na heimemre e meki taki wi e prakseri nomo fu hori wi nen hei?

A Bijbel skrifiman Yakobus e sori taki wan sma di lobi kesekese, trutru abi heimemre. Baka di a taki fu den „feti” nanga den „strei” di de na mindri son Kresten, a e taki moro fara: „Gado no lobi sma di abi heimemre, ma a e sori no-frudini bun-ati na sma di abi sakafasi” (Yakobus 4:1-3, 6). Fa heimemre e tapu sma fu meki vrede?

Te sma abi heimemre, dan dati e kori den fu di a e meki den bribi taki den bun moro trawan. Sma di abi heimemre feni taki den abi a reti fu taki efu trawan na bun sma noso takru sma. Fa den e du dati? Te den e kisi trobi nanga wan sma, dan furu tron den e feni taki a sma dati noiti no o kenki. Son sma di abi heimemre, e feni taki sma di de tra fasi leki den no warti fu lasi ten na tapu, èn noiti den no sa aksi den sma disi pardon na wan opregti fasi. Fu dati ede, den sma di abi heimemre furu tron e gi pasi taki trobi e tan, na presi taki den e lusu den trobi disi na a yoisti fasi.

Neleki fa wan sani kan tapu pasi gi oto nanga tra sani fu rei pasa na tapu wan bigi pasi, na so a de furu tron taki heimemre e tapu sma fu meki vrede. Sobun, efu yu si taki yu no e meki muiti fu pruberi fu meki vrede nanga wan trawan, dan a kan de so taki yu abi heimemre. Fa yu kan kenki a fasi dati? Na te yu e kweki a fasi di de kontrari fu heimemre, èn dati na sakafasi.

Handri nanga sakafasi

Bijbel e gi wi a seryusu rai fu abi sakafasi. „A bakapisi fu sakafasi nanga a frede gi Yehovah, na gudu èn glori èn libi” (Odo 22:4). Na Psalm 138:6 wi e leisi fa Gado e si sma di abi sakafasi èn fa a e si sma di abi heimemre: „Yehovah hei, èn toku a e si a sakafasiwan; ma den wan di abi bigimemre, a sabi soso fu farawe.”

Furu sma e feni taki den e lagi densrefi te den e sori sakafasi. Soleki fa a sori, dan den tiriman fu grontapu abi a srefi denki disi. Aladi heri nâsi e saka densrefi ondro a tiri fu politiek tiriman, toku den tiriman disi e weigri fu agri na wan saka fasi, taki den e meki fowtu. Te sma e yere taki wan tiriman e taki „Mi e aksi pardon”, dan a sani dati bun kaba fu bari na nyunsu. Di wan man di ben abi wan hei posisi na lanti fosi, aksi pardon no langa pasa, fu di a ben du noti fu tapu wan rampu di meki trawan lasi den libi, dan a sani dati bari na nyunsu.

Luku fa wan wortubuku e fruklari a wortu sakafasi: „Na te wan sma e saka ensrefi, noso te wan sma no e denki tumusi furu fu ensrefi . . . , èn dati de kontrari fu heimemre.” Sobun, a de wan heri tra sani fu abi sakafasi, leki te wan sma e lagi yu. Te wan sma e agri na wan saka fasi taki a meki wan fowtu, èn te a e aksi pardon na wan opregti fasi, dan dati no e gi en syen; na presi fu dati, a e hei a sma en nen. Bijbel e taki: „Bifo wan  fadon kon, na ati fu wan man de nanga heimemre, èn glori e waka na fesi sakafasi.”​—Odo 18:12.

Disi na san wan leriman ben taki fu politiekman di no e aksi pardon gi den fowtu di den meki: „A sari fu taki dati a gersi leki den politiekman disi e denki taki te wan sma e taki dati a meki fowtu, dan dati e sori taki a swaki. Sma di swaki èn di no abi frutrow na ini densrefi, no gwenti fu taki: ’Mi e aksi yu pardon’. A sma di abi wan bun ati èn di abi deki-ati no abi muiti fu taki: ’Mi meki wan fowtu’.” Na so a de tu nanga sma srefi di no de na ini politiek. Te yu e meki muiti fu abi sakafasi na presi fu heimemre, dan yu sa man meki vrede moro esi te yu abi wan trobi nanga wan trawan. Luku fa wan osofamiri kon si taki a sani disi tru.

Fu di Julie nanga en brada William no ben frustan makandra bun, meki den kon kisi wan kesekese nanga makandra. William atibron so te tapu Julie nanga en masra Joseph, taki a no ben wani abi noti moro fu du nanga den. A seni sosrefi ala den kado di a ben kisi fu Julie nanga Joseph na ini den yari di pasa, go baka gi den. Mun ben e pasa èn a brada disi di ben abi so wan bun banti nanga a sisa fu en, kon kisi bita-ati gi en sisa.

Ma Joseph bosroiti fu du san Mateyus 5:23, 24 e taki. A pruberi fu taki na wan saka fasi nanga en swagri, èn a skrifi brifi seni gi en, fu aksi en pardon taki a ben du sani di hati en. Joseph gi a wefi fu en deki-ati fu gi a brada fu en pardon. Baka wan pisi ten William kon si taki Julie nanga Joseph trutru ben wani meki vrede nanga en, èn a no ben atibron so furu moro nanga den. William nanga a wefi fu en go na Julie nanga Joseph, èn den alamala aksi makandra pardon, den brasa makandra, èn den tron mati baka.

Efu trutru yu winsi fu lusu wan trobi nanga wan sma, dan hori pasensi aladi yu e du san Bijbel e leri, èn pruberi fu meki vrede nanga a sma dati. Yehovah sa yepi yu. San Gado ben taigi Israel fu owruten, sa sori fu de tru gi yu: „O, efu yu trutru ben sa poti prakseri nomo na den komando fu mi! Dan a vrede fu yu ben sa tron leki wan liba.”​—Yesaya 48:18.

[Futuwortu]

[Prenki na tapu bladzijde 7]

Te wan sma e aksi wan trawan pardon, dan furu tron dati e meki taki den e tron mati baka