Ondrofenitori

Wi ben man preiki na farawe presi fu di wi ben e froisi doronomo

SOLEKI FA RICARDO MALICSI FRUTERI

Di mi lasi mi wroko fu di mi leki Kresten no e teki sei na ini feti, dan mi nanga mi osofamiri aksi Yehovah fu yepi wi fu seti sani gi a ten di e kon. Na ini den begi fu wi, wi ben taigi en taki wi wani du moro na ini wi diniwroko. Syatu baka dati, wi bigin nanga wan libi pe wi ben froisi go na aiti kondre di de na tu difrenti pisi fu grontapu. A bakapisi ben de taki wi ben man du wi diniwroko na farawe presi.

MI GEBORE na den Filippijnen na ini 1933, na ini wan osofamiri di ben de fu a Filippijnse Onafhankelijke Kerk (wan kerki na ini den Filippijnen). Ala den 14 sma fu wi osofamiri ben de fu a kerki dati. Di mi ben abi sowan 12 yari, mi aksi Gado na ini begi fu a yepi mi fu feni a tru anbegi. Wan fu den leriman fu mi ben poti mi na ini wan klas pe den e gi kerki-leri, èn mi ben tron wan fayafaya Lomsu. Noiti mi ben misi fu go na kerki tapu satra te sma ben e go taki sortu sondu den du, èn tapu sonde. Ma safrisafri mi ben bigin tweifri èn mi no ben de tevrede moro. Wan tu aksi ben trobi mi, soleki san e pasa te wan sma dede, san na a helfaya, èn san na a Dri-wánfasi. Den piki di den kerki fesiman ben gi no ben leri mi noti, èn mi no ben de tevrede nanga den piki.

Mi kisi piki di meki mi ati sidon

Di mi ben e studeri na heiskoro, dan mi tron wan memre fu wan grupu sma di ben meki taki mi bigin feti, dòbel, smoko, èn mi ben e du tra sani di no e fiti srefisrefi. Wan neti, mi miti a mama fu wan fu den skoromati fu mi. A ben de  wan Kotoigi fu Yehovah. Mi poti den srefi aksi gi en di mi ben poti gi den kerki leriman fu mi. Nanga yepi fu Bijbel a piki ala den aksi di mi ben abi, èn mi ben bribi taki den sani di a ben taki, de tru.

Mi bai wan Bijbel èn mi bigin studeri Bijbel nanga den Kotoigi. Syatu na baka, mi bigin fisiti ala den konmakandra fu Yehovah Kotoigi. Mi ben wani waka baka a koni rai fu Bijbel taki „takru kompe e pori bun gwenti”, èn dati meki mi no ben abi demakandra moro nanga den mati fu mi di no ben tyari densrefi na wan fasi di fiti (1 Korentesma 15:33). Disi ben yepi mi fu go na fesi nanga a bijbelstudie fu mi, èn te fu kaba mi gi mi libi abra na Yehovah. Baka di mi dopu na ini 1951, mi ben e dini wan pisi ten leki wan furuten dinari (pionier). Dan na ini december 1953, mi trow nanga Aurea Mendoza Cruz, di tron mi patna mi heri libi langa, èn a wroko getrow nanga mi na ini a diniwroko.

Wi e kisi piki tapu den begi fu wi

Wi ben wani fu dini leki pionier trutru. Ma a winsi di wi ben abi fu du moro na ini a diniwroko gi Yehovah, no ben kon tru wantewante. Toku wi ben tan aksi Yehovah fu gi wi na okasi fu du moro na ini en diniwroko. Ma a libi ben tranga gi wi. Toku, wi ben tan hori na prakseri sortu marki wi ben poti na yeye fasi, èn di mi ben abi 25 yari, mi tron gemeente dinari, noso a fesiman-opziener na ini wan gemeente fu Yehovah Kotoigi.

Fu di mi ben e kisi moro sabi fu Bijbel èn fu di mi ben e kon frustan den gronprakseri fu Yehovah moro bun, meki mi kon si taki mi no ben kan tan du mi grontapuwroko nanga wan krin konsensi, fu di mi leki Kresten no e teki sei na ini feti (Yesaya 2:2-4). Mi ben bosroiti fu tapu nanga a wroko. Disi ben de wan tesi tapu a bribi fu wi. Fa mi ben o sorgu gi den sani di mi osofamiri abi fanowdu? Agen wi taki nanga Yehovah Gado na ini begi (Psalm 65:2). Wi taigi Yehovah san na den sorgu nanga broko-ede di wi abi, ma wi ben taigi en tu taki wi e angri fu dini na wan presi pe moro Kownukondre preikiman de fanowdu (Filipisma 4:6, 7). Noiti wi ben denki taki wi ben o kisi someni difrenti okasi fu du disi!

Wi e bigin go na difrenti presi

Na ini april 1965, wi froisi go tan na Laos, fu di mi ben feni wroko drape na a Vientiane Internationaal opolanigron. Drape mi ben o wroko leki basi fu den sma di e gi yepi te wan opolani fadon, noso te wan faya de. Na ini a foto Vientiane, 24 Kotoigi ben de, èn wi ben prisiri fu du a preikiwroko nanga den zendeling èn nanga wan tu brada fu a kontren drape. Bakaten, mi ben musu go wroko na a Udon Thani opolanigron na ini Thailand. Nowan tra Kotoigi ben de na ini a foto Udon Thani. Ibri wiki wi osofamiri wawan ben e hori ala den alawiki konmakandra. Wi ben e preiki oso fu oso, wi ben e tyari gobaka, èn wi ben e bigin bijbelstudie.

Wi ben memre a deki-ati di Yesus ben gi den disipel fu en taki den musu „tan meki furu froktu” (Yohanes 15:8). Dati meki wi ben abi a fasti bosroiti fu waka baka na eksempre fu den èn wi tan preiki a bun nyunsu. Heri esi wi ben abi moi bakapisi. Wan meisje fu Thailand teki a waarheid èn a tron wi sisa na yeye fasi. Tu sma fu Noord-Amerika teki a waarheid, èn bakaten den tron Kresten owruman. Wi tan preiki a bun nyunsu moro leki tin yari na a noordsei fu Thailand. Wi breiti srefisrefi taki wan gemeente de now na ini a foto Udon Thani! Te now ete wan tu bun bakapisi e kon fu den waarheid siri di wi ben prani.

Ma a ben de wan sari taki wi ben musu froisi baka, èn wi ben begi „a Masra fu a kotiwroko” fu yepi wi fu tan du a preikiwroko (Mateyus 9:38). Wi ben musu go na Teheran, a mamafoto fu a kondre Iran. Disi ben de na ini a pisi ten di den Sjah ben e tiri a kondre.

Wi e preiki na ini muilek kontren

Di wi doro na ini Teheran, wi feni den yeye brada fu wi wantewante. Wi ben abi demakandra nanga wan pikin grupu Kotoigi di ben komoto fu 13 difrenti kondre. Wi ben abi fu fiti wisrefi na a situwâsi, so taki wi ben kan preiki a bun nyunsu na ini Iran. Aladi wi no ben kisi gens langalanga, toku wi ben musu luku bun.

 A wroko fu den sma di ben wani sabi moro fu Bijbel, ben meki taki wi ben musu hori bijbelstudie son leisi na mindrineti noso moro lati srefi, teleki musudei mamanten. Ma toku wi ben e prisiri fu si den bun bakapisi fu a tranga wroko dati! Wan tu osofamiri fu den Filippijnen èn fu Korea ben teki a Kresten waarheid èn den gi densrefi abra na Yehovah.

A tra presi pe mi ben musu go wroko, ben de Dhaka, na ini a kondre Bangladesy. Wi doro drape na ini december 1977. Disi ben de ete wan kondre pe a no ben makriki fu du a preikiwroko. Ma ala ten wi ben e hori na prakseri taki wi musu de fayafaya na ini wi preikiwroko. Nanga yepi fu a tiri fu a yeye fu Yehovah, wi ben man feni furu osofamiri di ben taki dati den na Kresten. Sonwan fu den ben e angri srefisrefi fu kon sabi a waarheid fu den Santa Buku fu Bijbel di e gi sma nyun krakti baka (Yesaya 55:1). A bakapisi ben de taki wi bigin furu bijbelstudie.

Wi tan hori na prakseri taki a de a wani fu Gado taki „ala sortu sma musu kisi frulusu” (1 Timoteyus 2:4). Koloku taki nowan sma ben tyari problema kon gi wi. Fu no meki sma abi wan takru denki fu wi, wi ben e sorgu fu taki na wan switi fasi nanga den sma. Neleki na apostel Paulus, wi pruberi tu fu „tron ala sani gi ala sortu sma” (1 Korentesma 9:22). Te sma ben aksi wi fu san ede wi kon fisiti den, dan wi ben piki na wan switi fasi, èn wi kon si taki furu fu den na sma di abi switifasi trutru.

Na ini Dhaka wi miti wan Kotoigi fu a presi drape èn wi gi en a deki-ati fu kon nanga wi na den Kresten konmakandra, èn bakaten na ini a preikiwroko. Na a ten dati, mi wefi ben e studeri Bijbel nanga wan osofamiri èn a ben kari den kon na den konmakandra fu wi. A lobi bun-ati fu Yehovah ben meki taki a heri osofamiri dati kon na ini a waarheid. Bakaten, den tu umapikin fu den yepi vertaal Bijbel publikâsi na ini Bengalitongo, èn furu famiriman fu den kon leri sabi Yehovah tu. Furu tra bijbelstudenti teki a waarheid. Furu fu den e dini now leki owruman, noso pionier.

Fu di Dhaka na wan foto pe bun furu sma e tan, meki wi kari wan tu famiriman fu wi fu kon yepi wi na ini a preikiwroko. Wan tu fu den ben wani èn den kon wroko nanga wi na ini Bangladesy. Wi breiti srefisrefi èn wi de Yehovah tangi trutru taki wi kisi na okasi fu preiki a bun nyunsu na ini a kondre dati! Wán sma nomo ben teki a waarheid na ini a bigin, ma now tu gemeente de na ini Bangladesy.

Na ini yuli 1982 wi ben musu froisi gowe fu Bangladesy. Nanga watra-ai wi gowe libi den brada nanga sisa. Syatu baka dati, mi feni wroko na a Entebbe Internationaal opolanigron na ini Uganda, èn wi ben o tan drape fo yari nanga seibi mun. San wi ben o man du na ini a kondre disi fu gi grani na a bigi nen fu Yehovah?

Wi e dini Yehovah na ini Owstu-Afrika

Di wi doro na a Entebbe Internationaal opolanigron, wan man na ini wan oto kon teki mi nanga mi wefi fu tyari wi go na wi tanpresi. Di wi ben e rei gowe fu na opolanigron, mi ben bigin preiki fu Gado Kownukondre gi a man di ben e rei na oto. A aksi mi: „Yu na wan Yehovah Kotoigi?” Di mi taki dati na so a de, dan a man taki: „Wan fu den brada fu yu e wroko na a toren fu na opolanigron.” Wantewante mi aksi en fu tyari mi go drape. Wi ben miti a brada di ben prisiri srefisrefi fu si wi, èn wi ben seti sani gi den konmakandra èn gi a preikiwroko.

Na a ten dati, 228 Kownukondre preikiman ben de nomo na ini Uganda. A fosi yari, wi ben sai den waarheid siri makandra nanga wan tu  tra brada na ini Entebbe. Fu di den sma drape lobi leisi, meki wi ben man prati furu publikâsi, èn hondrohondro tijdschrift sosrefi. Wi ben kari den brada fu a mamafoto Kampala, so taki den ben kan yepi wi fu preiki na ini a kontren fu Entebbe tapu satra nanga sonde. Na a fosi publikitaki di mi ben hori, feifi sma nomo ben de, namku mi nanga ete fo tra sma.

Na ini den dri yari baka dati, wi ondrofeni wan tu fu den moro prisiri momenti na ini wi libi di wi si taki den sma di wi ben gi leri, ben du san den ben leri èn den ben e go na fesi esi-esi (3 Yohanes 4). Na wan kring konmakandra, siksi bijbelstudenti fu wi teki dopu. Furu fu den bijbelstudenti taki dati den ben kisi deki-ati fu go na ini a furuten-diniwroko fu di den si taki wi e dini leki pionier, aladi wi abi wan furuten grontapuwroko.

Wi ben frustan taki a wrokope fu wi ben de wan presi pe wi ben kan abi bun bakapisi tu. Na wan okasi, mi go taki nanga wan brandweerman na a opolanigron, èn mi fruteri en fu a howpu di Bijbel e gi fu libi na ini wan paradijs grontapu. Mi sori en na ini en eigi Bijbel taki den libisma di e gi yesi na Gado, sa libi na ini vrede èn na ini wánfasi. Mi sori en sosrefi taki sma no sa pôti moro, ala sma o abi en eigi oso fu tan, èn nowan orloku, siki, noso dede o de moro (Psalm 46:9; Yesaya 33:24; 65:21, 22; Openbaring 21:3, 4). Di a man leisi disi na ini en eigi Bijbel, dan a ben wani kon sabi moro. Wantewante wi bigin nanga wan bijbelstudie. A ben fisiti ala den konmakandra. Syatu baka dati, a gi en libi abra na Yehovah èn a teki dopu. Bakaten, a go na ini a furuten diniwroko sosrefi.

Di wi ben de na ini Uganda, dan tu leisi den borgu opo densrefi teige a tirimakti drape, ma dati no ben tapu a wroko di wi ben e du gi Gado. Den osofamiri fu sma di ben e wroko gi bigi organisâsi di abi kantoro na ini difrenti kondre, ben musu froisi go tan siksi mun langa na a foto Nairobi, na ini Kenia. Wi di ben tan na ini Uganda, tan go doro na wi Kresten konmakandra èn na ini a preikiwroko, aladi wi ben musu wroko nanga koni èn wi ben musu luku bun.

Na ini april 1988, a wroko fu mi ben kaba èn wi froisi gowe baka. Wi ben prisiri srefisrefi di wi gowe libi a gemeente Entebbe, fu di wi ben si fa sani ben gro na yeye fasi drape. Na ini yuli 1997, wi ben abi na okasi fu fisiti Entebbe baka. Na a ten dati, wan tu fu den fositen bijbelstudenti fu wi ben e dini leki owruman. A ben prisiri wi srefisrefi taki 106 sma ben de na a Publiki Konmakandra!

Wi e froisi go na kontren pe a preikiwroko no ben du ete

Yu denki taki wi ben o kisi moro okasi fu du wi diniwroko? Iya, a tra wroko di mi ben kisi fu du ben de na a Mogadiscio Internationaal opolanigron na ini Somalia. Wi ben abi a fasti bosroiti fu gebroiki a nyun okasi disi bun fu preiki na ini kontren pe a preikiwroko no ben du ete.

Moro furu wi ben preiki gi sma di ben e wroko na den ambassade, sosrefi gi den wrokoman fu Filippijnen, nanga sma fu tra kondre. Furu tron wi ben miti den na wowoyo. Wi ben go luku den na oso sosrefi fu si fa sani e go nanga den. Fu man prati a waarheid fu Bijbel nanga tra sma, wi ben musu suku nyun fasi fu preiki, wi ben musu fiti wisrefi na a situwâsi drape, wi ben musu abi koni fu man si sani krin, èn wi ben musu frutrow dorodoro tu tapu Yehovah. Disi ben tyari bun bakapisi kon na mindri den sma  fu difrenti kondre. Baka tu yari, wi gowe libi Mogadiscio, leti bifo wan orloku bigin drape.

Baka dati, na Internationaal organisâsi di e meki opolani, seni mi go wroko na Yangon, na ini Mianmar. Wi ben kisi moi okasi baka fu yepi opregtisma fu kon leri sabi san Gado abi na prakseri fu du. Baka Mianmar, den seni wi go na Dar es Salaam, na ini Tansania. A ben moro makriki fu preiki a bun nyunsu oso fu oso na ini Dar es Salaam, bika drape wan birti ben de pe sma e taki Ingrisitongo.

Na ini ala den kondre pe wi ben e wroko, wi ben abi wan tu problema nomo na ini wi diniwroko, aladi na ini furu fu den kondre dati Yehovah Kotoigi no ben de fri fu du a wroko fu den. Nofo tron a wroko fu mi ben abi fu du nanga lanti, noso nanga bigi organisâsi di e wroko na difrenti tra kondre, èn fu dati ede sma no ben tweifri na den sani di wi ben du.

A grontapuwroko fu mi meki taki mi nanga mi wefi froisi fu a wan tanpresi go na a trawan, dritenti yari langa. Ma wi ben si a wroko fu mi soso leki wan fasi fu doro wan spesrutu marki. Ala ten a moro prenspari marki na ini wi libi ben de fu meki den afersi fu a Kownukondre fu Gado go na fesi. Wi e taki Yehovah tangi dati a yepi wi fu gebroiki den okasi bun di wi ben e froisi doronomo, èn dati wi ben abi a kefalek moi grani fu prati a bun nyunsu na farawe presi.

Wi e go baka pe wi ben bigin

Di mi ben abi 58 yari, mi teki a bosroiti fu go nanga pensyun moro fruku, èn fu drai go baka na Filippijnen. Di wi drai go baka, wi begi Yehovah fu meki a tiri den bosroiti di wi musu teki. Wi bigin dini na ini wan gemeente na ini a foto Trece Martires, na ini a distrikt Cavite. Biginbigin di wi doro drape, dan soso 19 preikiman fu Gado Kownukondre ben de drape. Ibri dei sani ben seti fu du a preikiwroko, èn furu sma bigin studeri Bijbel. A gemeente bigin gro. Wan pisi ten a ben de so, taki mi wefi ben abi 19 oso-bijbelstudie, èn mi ben abi 14 bijbelstudie.

Fosi yu denki, a Kownukondre zaal ben pikin tumusi. Wi begi Yehovah fu yepi wi ini a tori disi. Wan brada nanga en wefi bosroiti fu gi wan pisi gron, èn a bijkantoro ben feni en bun fu leni wi moni, so taki wi ben man bow wan nyun Kownukondre zaal. A nyun zaal ben abi furu krakti tapu a preikiwroko, èn ibri wiki moro nanga moro sma ben kon na den konmakandra. Nownowde wi e reis moro leki wán yuru langa fu go yepi wan tra gemeente di abi 17 preikiman.

Mi nanga mi wefi e warderi a grani di wi ben abi fu dini na ini so furu difrenti kondre. Te wi e prakseri baka fa wi ben e froisi fu a wan tanpresi go na a trawan, dan wi e prisiri srefisrefi fu sabi taki wi ben gebroiki a libi fu wi na a moro bun fasi, namku fu yepi tra sma fu kon leri sabi Yehovah!

[Karta na tapu bladzijde 24, 25]

(Efu yu wani si pe den sani disi skrifi, luku a tijdschrift)

TANSANIA

UGANDA

SOMALIA

IRAN

BANGLADESY

MIANMAR

LAOS

THAILAND

FILIPPIJNEN

[Prenki na tapu bladzijde 23]

Mi nanga mi wefi, Aurea