Wortu di e koti leki nefi—Fu san ede den e hati sma?

„San e meki taki unu e feti èn san e meki taki unu e strei nanga makandra?”​—YAKOBUS 4:1.

A BIJBEL skrifiman Yakobus no ben poti na aksi disi gi den srudati fu a legre fu Rome, di ben e feti na a ten dati fu teki kondre abra; a no ben e suku tu fu kon sabi fu san ede wan spesrutu grupu fu Dyu fetiman di sma ben sabi leki Sicarii, noso man di ben e kiri trawan nanga nefi, ben e feti teige a tirimakti fu a fosi yarihondro. Yakobus ben e taki fu kesekese di sma abi nanga makandra; a ben kan de tu sma srefi. Fu san ede a ben e taki fu dati? Fu di neleki fa a de nanga feti, na so trobi na mindri sma kan tyari takru bakapisi kon. Luku den Bijbel tori disi.

Den manpikin fu a famiri-edeman Yakob ben e teige Yosef, a brada fu den, so te, taki den seri en gi sma di ben o gebroiki en leki srafu (Genesis 37:4-28). Dan yu abi sosrefi Kownu Saul fu Israel di pruberi fu kiri David. Fu san ede? Fu di a ben dyarusu tapu David (1 Samuel 18:7-11; 23:14, 15). Na ini a fosi yarihondro, tu Kresten uma, namku Eodia nanga Sentike, ben pori a vrede na ini wan heri gemeente, fu di den ben abi wan kesekese nanga makandra.​—Filipisma 4:2.

No so langa pasa, mansma ben e koti a trobi fu den ini feti, èn den ben e waka go miti makandra nanga feti-owru, noso nanga gon. Furu tron a ben de so taki wán fu den fetiman disi ben e lasi en libi, noso a ben e malengri en heri libi langa. Na ini a ten disi, den wan di e feti nanga makandra, furu tron e gebroiki soso bita wortu fu taki sani di e hati trawan. Aladi brudu no e fadon kande, toku den sani di den sma disi e taki e hati trawan, èn den e pori a nen fu den. Furu tron den wan di no abi fowtu ini a tori, e pina leki bakapisi fu den „feti” disi.

Luku san pasa wan tu yari na fesi, di wan priester fu na Anglikan kerki krutu wan tra priester taki a no ben gebroiki a moni fu a kerki na wan reti fasi. Tra sma kon sabi fu a trobi disi, èn a sani disi meki taki a gemeente prati na ini tu grupu. Wan tu memre fu a kerki ben e weigri fu go na kerki te a priester di den no ben lobi, ben de a  fesiman fu a konmakandra. Den sma fu a kerki ben abi so furu bita-ati gi makandra, taki den ben e weigri fu taki nanga makandra te den ben de na kerki fu anbegi. Di sma taki dati a priester srefi di ben gi a trawan porinen, ben abi seks demakandra di no fiti, dan a trobi kon moro faya.

A Gran-beskopu fu Canterbury ben aksi den tu priester disi fu tapu nanga a tori èn a kari a feti di den ben e feti nanga makandra „wan takru siki” èn „wan syen di e pori a nen fu Wi Masra”. Na ini 1997, wán fu den priester agri fu go nanga pensyun. A trawan tan leki priester teleki a ben musu tapu nanga a wroko dati fu di a ben doro a yari pe wet e fruplekti sma fu go nanga pensyun. Ma a tan dini leki priester teleki a lasti momenti, ne a go nanga pensyun tapu 7 augustus 2001, a dei di a ben tapu 70 yari. A koranti The Church of England Newspaper ben taki dati a dei di a priester go nanga pensyun ben de a fesadei fu a „Santawan” Victricius. Suma ben de a „Santawan” Victricius? A ben de wan beskopu na ini a di fu fo yarihondro, èn soleki fa sma e taki, dan den ben fon en fu di a ben weigri fu feti na ini a legre. Disi na san a koranti taki fu sori fa a denki fu den tu priester disi ben e difrenti fu makandra: „A priester disi [di e go nanga pensyun ] no de wan man di ben o weigri fu feti nanga wan tra priester.”

Den priester dati ben kan wai pasi gi den problema di miti den èn di miti trawan sosrefi, efu den ben gi yesi na a rai di skrifi na ini Romesma 12:17, 18: „No pai wan sma ogri fu ogri. Du bun sani na fesi fu ala sma. Efu a kan, solanga a de na unu, abi vrede nanga ala sma.”

Fa a de nanga yu? Te wan sma du wan hati sani nanga yu, dan yu e bigin kosi a sma fu di yu e mandi na en tapu? Noso yu de wan sma di e luku bun fu no gebroiki wortu di e hati a sma so taki okasi sa de fu meki vrede baka? Te yu du sani di hati wan sma, dan yu e wai pasi gi a sma dati aladi yu e howpu taki baka wan pisi ten a sma sa frigiti san pasa? Noso yu e hasti yusrefi fu aksi a sma dati pardon? Efu na aksi yu e aksi pardon, noso efu na gi yu e gi trawan pardon, te yu e pruberi fu meki vrede, dan dati sa meki taki yu firi bun. A rai fu Bijbel kan yepi wi srefi fu lusu owru trobi, soleki fa na artikel di e kon sa sori.