A krakti di Yesus abi tapu sma na heri grontapu

„ALA den sani di den evangelietori e fruteri fu san Yesus ben taki di a ben de nanga wan tu sma nomo èn di a ben de nanga bun furu sma, na sani di a ben sa man taki na ini tu yuru nomo”, na so Edgar Goodspeed, wan man di e vertaal Bijbel, skrifi. „Ma toku, a pikinso leri dati di a ben gi sma, ben naki den ati so te, taki iniwan sma musu fu agri taki nowan enkri tra sma ben abi so furu krakti tapu trawan na heri grontapu, leki en.”

Di Yesus Krestes kaba en diniwroko na grontapu na ini a yari 33 G.T., dan no moro mendri leki 120 mansma nanga umasma ben de bakaman fu en (Tori fu den Apostel 1:15). Now, moro leki tu milyard sma e kari densrefi Kresten. Boiti dati, hondrohondro milyun sma e si Yesus leki wan profeiti. Iya, den leri fu en ben abi wan aparti sortu krakti tapu libisma.

Srefi kerki fesiman di no de Kresten, e agri taki Yesus abi furu krakti tapu sma na heri grontapu. Fu eksempre, a Dyu rabbi Hyman Enelow ben skrifi: „Yesus tron a moro pôpi sma na ini a kerki historia fu libisma, èn nowan tra sma ben hari sma prakseri èn ben abi so furu krakti tapu sma, leki en.” Enelow ben taki sosrefi: „Suma man taki o furu krakti Yesus abi tapu libisma? Te wi e luku a fasi fa a sori sma taki den musu lobi makandra, a trowstu di a ben gi sma, a bun di a du, èn a howpu nanga a prisiri di a gi sma, dan wi e si taki nowan enkri tra sma ben man du dati oiti. Fu ala den prenspari èn bun sma di libi na grontapu, nowan fu den ben abi so furu krakti tapu a  libi fu sma na heri grontapu, leki Yesus. Noiti ete wan tra sma ben hari a prakseri fu so furu sma.” A Hindu kerki fesiman Mohandas K. Gandhi ben taki: „Mi no sabi nowan enkri tra sma di du moro gi libisma, leki Yesus. Fu taki en leti, nowan fowtu de na a Kresten bribi.” Ma a ben taki moro fara: „A fowtu de na unu Kresten. Unu no e meki nowan muiti srefi fu libi akruderi un eigi leri.”

Na bun langa kaba, sma di e taki dati den na Kresten, sori taki den no e hori densrefi na den leri fu Yesus. Cecil John Cadoux, wan historia sabiman fu a Kresten bribi, ben kon si taki ’frukufruku kaba, sensi a pisi ten fu a yari 140 A.D., Kresten kerki fesiman ben kon si taki safrisafri a Kerki no ben e broko en ede moro nanga son fasi fu libi di no fiti kwetikweti’. A ben taki moro fara: „Fu di a kerki no ben e broko den ede moro nanga den bun gwenti nanga gronprakseri fu den fosi Kresten, meki safrisafri a bigin agri nanga a fasi fa grontapusma e tyari densrefi.”

A situwâsi disi ben kon moro ogri na ini a di fu fo yarihondro, di Kèizer Constantijn fu Rome teki a Kresten bribi. Cadoux ben skrifi: „Historia sabiman kon si taki a Kerki ben musu tyari bigi kenki kon, soso fu di a ben wani wroko makandra nanga Constantinus, èn sonwan fu den sabiman e sari srefi taki a sani disi pasa.” Na ini den hondrohondro yari di pasa sensi a ten dati, sma di e taki dati den na Kresten, du furu syen sani di gi Krestes porinen.

Fu dati ede, den sani di wi musu aksi wisrefi na: San Yesus leri sma trutru? Èn sortu krakti den leri fu en musu abi na wi tapu?

[Prenki na tapu bladzijde 3]

„Mi no sabi nowan enkri tra sma di du moro gi libisma, leki Yesus.”​—Mohandas K. Gandhi

[Prenki na tapu bladzijde 3]

„Nowan enkri tra sma ben abi so furu krakti tapu trawan na heri grontapu.”​—Edgar Goodspeed

[Sma di abi a reti fu a prenki]

Culver Pictures