Aksi fu leisiman

David nanga den man fu en ben nyan den santa brede di ben poti na fesi Yehovah. Disi wani taki dati wan sma kan pasa a wet fu Gado te a de na ini muilek situwâsi, sondro fu kisi strafu ?​—1 Samuel 21:1-6.

Soleki fa Lefitikus 24:5-9 e sori, dan den santa brede di ben poti na fesi Yehovah èn di den priester ben musu puru ibri Sabadei fu poti trawan, ben de gi den priester fu nyan. A gronprakseri di ben meki taki a fiti gi den priester fu nyan den brede disi, na taki den brede ben de santa, èn soso den mansma di ben du a diniwroko fu Gado, namku den priester, ben mag nyan den brede disi. A no ben o bun kwetikweti fu gi den brede disi na wan gewoon wrokoman, noso fu nyan den brede disi leki switi sani. Ma a priester Akimeilek no ben sondu di a prati den santa brede gi David nanga den man fu en.

A ben sori leki David ben musu du wan spesrutu wroko gi Kownu Saul. David nanga den man fu en ben abi angri. Akimeilek kon si taki den ben de krin akruderi a wet. Te yu e luku a wet finifini, dan den no ben mag nyan den brede di ben poti na fesi Yehovah, toku den ben hori densrefi na a marki fu a seti disi. Nanga a marki disi na prakseri, meki Akimeilek gi den primisi fu nyan den brede na a okasi disi. Srefi Yesus Krestes ben taki fu a tori disi fu sori taki noiti Gado ben abi na prakseri taki sma musu hori densrefi so finifini na a wet fu a Sabadei, soleki fa den Fariseiman ben du dati.​—Mateyus 12:1-8.

Ma den sani di kari na fesi no e sori taki sma kan pasa a wet fu Gado na ini muilek ten. Fu eksempre, di den srudati fu Israel ben feti nanga den Filistiasma, dan a ben e gersi leki den ben kisi fu du nanga wan seryusu problema. Kownu Saul ben taki: „Frufruktu a man de di e nyan brede fosi mofoneti fadon èn teleki mi teki refensi tapu den feanti fu mi!” Bijbel e taki: „Tapu a dei dati den ben tan naki den Filistiasma.” Den srudati ben weri fu a feti di den ben feti, èn angri ben e kiri den, ’èn a pipel bigin srakti meti tapu a gron èn den bigin nyan a meti nanga a brudu’ (1 Samuel 14:24, 31-33). Den ben sondu teige Yehovah fu di den pasa a wet fu En di ben abi fu du nanga brudu. Den sani di den ben du, no ben kruderi nanga a wan-enkri fasi fa Gado ben wani taki sma ben musu gebroiki brudu, namku „fu meki sani kon bun baka” te den sondu (Lefitikus 17:10-12; Genesis 9:3, 4). Nanga sari-ati, Yehovah ben teki spesrutu srakti-ofrandi fu a bun fu sma di ben sondu.​—1 Samuel 14:34, 35.

Iya, Yehovah e fruwakti taki wi e gi yesi na den wet fu en na ini ala situwâsi. Na apostel Yohanes e taki: „Disi na san a lobi fu Gado wani taki, dati wi e du san den komando fu en e taki.”​—1 Yohanes 5:3.

[Prenki na tapu bladzijde 30]

Ibri Sabadei den priester ben e poti nyun santa brede na fesi Yehovah na ini a Tabernakel