Aksi fu leisiman

Wan Kresten kan gi moni noso wan kado na wan lantiman di du wan wroko gi en, noso a de so taki sma kan si disi leki tyuku?

Awansi pe Kresten e libi, den e suku fu du ala sani na wan koni fasi na ini a presi pe den e libi. Den e hori na prakseri taki san sma kan feni bun èn san kan de akruderi wet na ini a wan kondre, no abi fu de sani di fiti, èn no abi fu de akruderi wet na ini wan tra kondre (Odo 2:6-9). Ma a no de fu taki, dati wan Kresten musu hori ala ten na prakseri taki iniwan sma di wani de ’wan fisitiman na ini a tenti fu Yehovah’ no musu gi tyuku, èn a no musu teki tyuku.​—Psalm 15:1, 5; Odo 17:23.

San na tyuku? Wan buku e taki: „Tyuku na wan warti sani di wan sma e gi noso wani fu gi na wan trawan di abi wan spesrutu frantwortu na ini a libimakandra. A sma disi, di abi wan spesrutu frantwortu, musu du wan sani di no fiti, noso a musu du wan sani teige a wet, so taki a kan du wan bun gi a sma di gi en a tyuku” (The World Book Encyclopedia). Sobun, awansi pe wan sma e libi, dan na tyuku a pai te a gi wan krutuman, noso wan skowtu moni noso wan kado, soso fu no meki den krutu sani na wan reti fasi, noso fu meki wan lantiman tapu en ai gi sani di no bun. Wan sma pai tyuku sosrefi te a gi wan trawan wan kado soso fu a trawan yepi en fosi, èn kande a e du dati soso fu meki a trawan poti en nen fosi tapu wan lijst aladi tra sma nen skrifi fosi di fu en, noso taki a e yepi en fosi den tra sma di e tanapu kaba na ini wan rij. Wan sma di e handri na so wan fasi e sori tu taki a no abi lobi.​—Mateyus 7:12; 22:39.

Ma wan sma pai tyuku te a e gi wan kado noso moni na wan wrokoman fu wan lantikantoro, so taki a kan yepi en fu kisi wan tu sani, noso fu sma no handri nanga en na wan fasi di no bun? Leki eksempre, na ini son kondre a kan taki lantiman no wani fu poti yu pikin na skoro, èn no wani fu meki sma go didon na ati-oso, noso poti stampu na ini den paspoort, solanga den no kisi wan moni. Noso den kan meki sma wakti bun langa, fosi den man kisi den papira di e gi den primisi fu du sani.

A gi fu wan kado noso moni èn a fasi fa sma e denki fu a tori disi, de tra fasi na ini difrenti kondre. Na ini son kondre pe a de wan gwenti fu pai a moni disi noso pe sma e fruwakti taki trawan gi den moni, son Kresten kan feni taki solanga den no e pasa a wet, dan den no e pasa den gronprakseri fu Bijbel te den e gi wan lantiman wan moni fu du en wroko. A kan taki na ini son kondre sma e si a moni disi leki wan kado di e meki taki a lantiman e kisi wan pikinso moro moni tapu san a e kisi fu lanti. Wan prenspari sani fu hori na prakseri na taki a no de a srefi te wan sma e gi wan trawan wan kado fu du wan sani gi en akruderi wet, èn te wan sma e gi trawan tyuku fu du wan kruka sani gi en.

Na a tra sei, di son Kotoigi fu Yehovah go seti den lanti papira tori, dan den weigri fu gi moni na skowtu èn na lantiman di e piki lantimoni noso na tra man nanga spesrutu frantwortu; den weigri fu du dati srefi na presi pe sma e si en leki wan gwenti fu gi moni. Fu di den sma drape sabi taki den Kotoigi na opregtisma, èn taki den no e bedrigi trawan, meki son leisi den e du son sani gi Kotoigi, sondro fu aksi wan sani. Ma gi tra sma den e du disi soso te den e kisi wan moni.​—Odo 10:9; Mateyus 5:16.

Fu taki en syatu, ibri futuboi fu Yehovah musu bosroiti gi ensrefi efu a sa gi wan kado noso moni fu meki sma du wan tu sani gi en, noso efu a sa gi wan kado noso moni fu no meki sma handri nanga en na wan fasi di no bun. A moro prenspari sani na taki a futuboi fu Yehovah e handri na wan fasi di no e pori a bun konsensi fu en èn a nen fu Yehovah, èn taki a e luku bun tu taki a no e handri na wan fasi di e meki taki tra sma naki futu.​—Mateyus 6:9; 1 Korentesma 10:31-33; 2 Korentesma 6:3; 1 Timoteyus 1:5.