Papa nanga mama, kibri a warti gudu di unu kisi

„Koni na wan sani di e kibri sma . . . [A] e hori den sma di abi en, na libi.”​—PREIKIMAN 7:12.

1. Fu san ede papa nanga mama musu si den pikin fu den leki kado?

PAPA nanga mama e meki wan nyun libisma kon gebore di gersi den èn di abi den srefi sortu maniri leki den. Bijbel e kari den pikin disi „wan gudu di e kon fu Yehovah” (Psalm 127:3). Te yu luku en bun, dan Yehovah na a Sma pe a libi komoto, sobun te a e gi pikin na papa nanga mama, dan a e gi den wan sani di de fu en (Psalm 36:9). Papa nanga mama, fa unu e si so wan warti kado di Gado gi unu?

2. San Manoa du di a kisi fu yere taki a ben o tron papa?

² A no de fu taki dati te wi kisi so wan kado, dan wi musu abi sakafasi èn wi musu de nanga tangi. Moro leki 3000 yari pasa, na Israelman Manoa ben tyari ensrefi na a fasi disi, di en wefi ben yere fu wan engel taki a ben o meki wan pikin. Di Manoa yere a bun nyunsu disi, dan a begi: „Gi mi pardon, Yehovah. Ma grantangi, meki a man fu a tru Gado di yu seni didyonsro, kon baka na wi, èn meki a fruteri wi san wi musu du nanga a pikin di o gebore” (Krutuman 13:8). Papa nanga mama, san unu kan leri fu na eksempre fu Manoa?

Fu san ede yepi fu Gado de fanowdu na ini a ten disi

3. Fu san ede a de fanowdu, spesrutu na ini a ten disi, fu suku yepi na Gado fu man kweki pikin?

³ Na ini a ten disi, papa nanga mama abi a yepi fu Yehovah fanowdu moro leki iniwan ten bifo, fu kan kweki den pikin fu den bun. Fu san ede?  We, na fu di Satan Didibri nanga den engel fu en trowe komoto fu hemel kon na grontapu. „Helu fu grontapu”, na so Bijbel e warskow, „bika Didibri saka kon na unu, èn a abi bigi atibron, fu di a sabi taki a abi wan syatu pisi ten nomo” (Openbaring 12:7-9, 12). Bijbel e taki dati Satan de „leki wan krasi lew, di e suku fu nyan wan sma” (1 Petrus 5:8). Nofo tron a de so, taki lew e onti den swaki meti, èn furu tron disi na den yongu meti. Fu dati ede, a de wan koni sani te Kresten papa nanga mama e meki Yehovah tiri den fu man kibri den pikin fu den. Omeni muiti unu e meki fu kibri un pikin?

4. (a) Te papa nanga mama sabi taki wan lew e waka lontu na ini a birti, dan san den o du wantewante? (b) San pikin abi fanowdu so taki ogri no miti den?

⁴ Efu yu ben sabi taki wan lew e waka lontu na ini a birti, dan a no de fu taki dati a fosi sani di yu ben o prakseri, na fu kibri den pikin fu yu. We, Satan de leki so wan ogri meti. A e suku fu kori a pipel fu Gado, so taki Gado no feni den bun moro (Yob 2:1-7; 1 Yohanes 5:19). A man kori pikin makriki. Dati meki pikin musu kon leri sabi Yehovah èn gi yesi na en, so taki den kan wai pasi gi den trapu fu Didibri. A de prenspari fu den kon sabi Bijbel. „Disi wani taki têgo libi”, na so Yesus taki, „fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes” (Yohanes 17:3). Boiti dati, den yonguwan abi koni fanowdu, san wani taki dati den musu man frustan san den leri èn taki den musu du dati tu. Fu di „koni srefi e hori den sma di abi en, na libi”, meki unu leki papa nanga mama musu poti a waarheid go dipi na ini na ati fu den pikin fu unu (Preikiman 7:12). Fa unu kan du disi?

5. (a) Fa wan sma kan yepi wan trawan fu kisi koni? (b) Fa a Bijbel buku Odo e sori taki koni na wan tumusi warti sani?

⁵ A no de fu taki dati yu kan leisi Gado Wortu gi den pikin fu yu, iya disi na wan sani di yu musu fu du. Ma efu yu wani yepi den fu lobi Yehovah èn fu gi yesi na en, dan moro de fanowdu. Yu musu yepi den fu kon frustan sosrefi san yu e leisi gi den. Fu gi wan eksempre: Kande bigisma e leri wan pikin taki te a wani abra strati, a musu luku fosi na ala tu sei efu oto no e kon. Ma toku son pikin no e gi yesi. Fu san ede? Kande na wanwan leisi nomo den bigisma fruteri en san kan pasa te oto naki en, noso kande den taki a tori nanga a pikin, ma den no taki en na so wan fasi dati a e frustan trutru sortu ogri kan miti en. Disi kan meki taki a pikin go du dondon sani so taki ongoloku pasa. A e teki ten, èn furu pasensi sosrefi fu yepi wan sma fu kisi koni. Ma koni na wan tumusi warti sani! „Den pasi fu [koni] na pasi fu prisiri”, na so Bijbel e taki, „èn ala den pasi fu en na vrede. A de wan bon fu libi gi den wan di e grabu en hori, èn den wan di e tan hori en steifi na sma di den sa taki dati den de koloku sma.”​—Odo 3:13-18; 22:15.

A leri di e meki sma kon koni

6. (a) Fu san ede a de so taki furu pikin no e handri na wan koni fasi? (b) Sortu feti e feti nownow?

⁶ Furu tron a de so, taki yonguwan e du sani di no bun. Disi no de so fu di den no leri san bun, ma na fu di a leri no doro na ati fu den. Didibri e feti fu wini na ati fu yonguwan. A e suku wan fasi fu meki na ogri grontapu disi abi krakti na den tapu. A e pruberi sosrefi fu wroko nanga den sondu firi fu den yonguwan, so taki den go du sani di no bun (Genesis 8:21; Psalm 51:5). Papa nanga mama musu frustan bun taki wan trutru feti e feti fu wini na ati fu den pikin fu den.

7. Fu san ede a no nofo fu taigi wan pikin nomo san bun, noso san no bun?

⁷ Nofo tron a de so taki te papa nanga mama taigi wan pikin san bun noso san no bun, dan den e denki taki den leri a pikin wan gronprakseri di o meki taki a o tyari ensrefi na wan fasi di fiti. Kande den e taigi a pikin taki a no bun fu lei, noso fu go fufuru, èn taki a no bun te sma abi seks demakandra nanga trawan aladi den no trow. Ma a pikin no musu gi yesi na en papa nanga mama soso fu di na den taigi en fu no du den sani disi. Den sani disi na wet fu Yehovah. A pikin musu leri taki a moro koni fasi fu libi, na fu gi yesi na den komando fu Gado.​—Odo 6:16-19; Hebrewsma 13:4.

8. Sortu leri kan yepi pikin fu handri na wan koni fasi?

⁸ A dangra fasi fa hemel nanga grontapu meki, den difrenti libisani di de, èn a fasi fa alenten nanga  dreiten e kon ibri tron baka, na sani di kan yepi wan yongu pikin fu frustan taki wan Mekiman de di abi ala koni (Romesma 1:20; Hebrewsma 3:4). Boiti dati, a pikin musu leri taki Gado lobi en, èn taki Gado seti sani nanga yepi fu a srakti-ofrandi fu En Manpikin, so taki a kan kisi têgo libi. A musu leri sosrefi taki a kan meki Gado firi prisiri te a e gi yesi na san A e taki. Na so fasi a pikin kan kisi a winsi fu dini Yehovah, awansi Didibri e pruberi fu tapu en.—Odo 22:6; 27:11; Yohanes 3:16.

9. (a) San de fanowdu fu man gi a leri di e kibri sma libi? (b) Sortu rai Bijbel e gi papa, èn san disi wani taki?

⁹ Efu yu wani gi yu pikin a leri di kan kibri en èn di kan meki taki a wani du san bun, dan yu musu meki ten gi a pikin, yu musu poti prakseri na en, èn yu musu seti sani na fesi. Papa nanga mama musu meki Gado tiri den ini a pisi tori disi. Bijbel e taki: „Unu, papa, . . . tan kweki [un pikin] nanga a trangaleri èn a seryusu frumane fu Yehovah” (Efeisesma 6:4). San dati wani taki? Den wortu „seryusu frumane” na ini a Grikitongo fu fositen, wani taki „poti frustan na ini”. Sobun fu taki en leti, papa e kisi a rai fu poti a frustan fu Yehovah na ini den pikin fu den. Dati sa kibri den yonguwan trutru! Efu pikin kon abi a denki fu Gado, sobun efu den e prakseri leki fa Gado e prakseri, dan dati sa kibri den fu no du sani di no bun.

Yepi den fu di yu lobi den

10. Sortu prenspari sani yu musu sabi efu yu wani gi yu pikin leri na wan bun fasi?

¹⁰ Ma efu yu wani taki yu pikin kweki na wan fasi di fiti, dan lobi musu de a sani di e meki taki yu yepi den. Wan prenspari sani, na taki un musu man taki bun nanga makandra. Pruberi fu kon sabi san e pasa na ini a libi fu yu pikin èn fa a e si sani. Te a pikin e firi switi èn korostu, dan gi en deki-ati fu taki fa a e firi. Son tron yu o skreki kande fu den sani di a e taki. Ma luku bun taki yu no sori en taki yu skreki èn no go na hei gi en. Na presi fu dati, arki bun fu frustan san a e taki.

11. Fa wan papa, noso wan mama kan poti a frustan fu Gado na ini en pikin?

¹¹ Iya, kande yu leisi Bijbel gi yu pikin, fu sori en taki den wet fu Gado e taki dati wan sma no musu du hurudu, èn kande yu du dati wan tu leisi kaba (1 Korentesma 6:18; Efeisesma 5:5). Kande disi meki taki a pikin fu yu kon frustan san Yehovah feni bun èn san a no feni bun. Ma moro de fanowdu fu man yepi wan pikin fu denki leki fa Yehovah e denki. Pikin abi yepi fanowdu fu kon frustan o prenspari den wet fu Yehovah de. Den musu abi na overtoigi taki den wet fu en bun gi wi, taki den e tyari wini kon, èn taki a de wan yoisti èn lobi-ati sani fu gi yesi na den. Soso te yu taki go taki kon nanga den pikin fu yu nanga yepi fu Bijbel, so taki den e si sani soleki fa Gado e si sani, dan yu kan taki dati yu poti a frustan fu Gado na ini den pikin fu yu.

12. Fa wan papa, noso wan mama kan yepi en pikin fu si seks demakandra na a yoisti fasi?

¹² Te unu e taki fu seks, dan kande yu kan aksi: „Yu denki taki wan sma no o de koloku te a e gi yesi na a wet fu Yehovah di e taki dati wan sma no musu abi seks demakandra fosi a trow?” Te a pikin gi wan piki, dan gi en deki-ati fu fruteri  fu san ede a piki so. Baka te unu luku taki Gado meki libisma so kefalek taki densrefi kan meki pikin, dan yu kan aksi en: „Yu denki taki a lobi-ati Gado fu wi ben o poti wet fu meki taki wi no man nyan bun fu a libi? Noso yu denki taki a poti den wet disi fu meki wi de koloku èn fu kibri wi?” (Psalm 119:1, 2; Yesaya 48:17) Meki a pikin fu yu fruteri fa a e prakseri fu a tori disi. Baka dati yu kan gebroiki wan tu eksempre fu sori en fa seks hurudu tyari sari nanga problema kon gi sma (2 Samuel 13:1-33). Te yu e taki go taki kon nanga a pikin, so taki a e frustan fa Gado e si sani èn so taki a e bigin denki na a fasi dati tu, dan yu du furu kaba fu ’poti a frustan’ fu Gado na ini en. Ma yu kan du wan tra sani tu.

13. Fu meki wan pikin kisi a winsi fu gi yesi na Yehovah, dan sortu sani a musu frustan?

¹³ A no de fu taki dati yu no o sori yu pikin nomo san kan pasa te wan sma e trangayesi Yehovah, ma yu o sori en tu taki a fasi fa wi e libi abi krakti tapu Yehovah. Sori yu pikin nanga yepi fu Bijbel taki wi kan meki Yehovah firi sari te wi no e du a wani fu en (Psalm 78:41). Yu kan aksi en: „Fu san ede yu no wani meki Yehovah firi sari?”, èn taigi en: „Satan, a feanti fu Gado, taki dati wi e dini Yehovah fu di wi wani kisi wini gi wisrefi; no fu di wi lobi en.” Dan fruteri en taki Yob ben meki Gado firi prisiri fu di a ben tan hori en soifri retifasi, èn fruteri en taki na so wan fasi a ben sori taki san Satan ben taki, na wan lei (Yob 1:9-11; 27:5). Yu pikin musu frustan taki a fasi fa a e tyari ensrefi kan meki Yehovah firi sari, noso a kan meki Yehovah firi prisiri (Odo 27:11). Yu kan leri yu pikin den sani disi èn furu tra prenspari sani tu, te yu gebroiki a buku Teki leri fu a Bigi Leriman. *

Bun bakapisi

14, 15. (a) Sortuwan fu den les na ini a Leriman-buku naki na ati fu wan lo pikin? (b) Sortu bun bakapisi yu ben abi di yu gebroiki a buku disi? (Luku sosrefi a faki na tapu bladzijde 18, 19.)

¹⁴ Wan granpapa di e leisi a Leriman-buku gi en granpikin fu seibi yari, skrifi taki a boi taigi en disi: „Mama ben taigi mi fu du wan sani, ma mi no ben wani du en. Ma dan mi memre a kapitel ’Sani o go bun nanga yu te yu e gi yesi’, ne mi go baka na en èn mi taigi en taki mi o gi yesi na en.” Wan trowpaar na ini Florida, Amerkankondre, ben taki fu a kapitel „Fu san ede wi no musu lei”, taki: „A kapitel abi aksi na ini di e meki taki den pikin o taki fa den e firi èn den o fruteri fu fowtu di den meki, di den no ben o fruteri sma noiti.”

¹⁵ A Leriman-buku abi moro leki 230 prenki, èn na ibri prenki, noso grupu fu prenki, wan sani skrifi di abi fu du nanga den sani di de fu si na tapu den prenki. „Furu tron a boi fu mi e tan luku wan prenki èn a no wani drai a bladzijde srefi”, na so wan mama taki di e warderi a buku disi  trutru. „Den prenki no e hari den pikin nomo, ma den e leri den pikin wan sani; den prenki e meki sosrefi taki den pikin e bigin poti aksi. Na wan fu den prenki pe yu e si fa wan pikin e luku telefisi na ini wan dungru kamra, a boi fu mi aksi: ’Mama, san a boi e du?’ A poti na aksi na so wan fasi taki mi ben sabi dati a ben e frustan taki a boi na tapu a prenki no ben e du wan bun sani.” Den wortu di skrifi na a prenki disi na: „Suma kan si ala san wi e du?”

Tumusi prenspari leri gi a ten disi

16. Sortu tumusi prenspari sani pikin musu leri na ini a ten disi, èn fu san ede?

¹⁶ Pikin musu sabi fa den kan gebroiki den syenpresi na wan bun fasi èn fa den no musu gebroiki en. Ma a no ala ten a makriki fu taki den tori disi. Wan uma di e skrifi sani gi koranti, ben taki dati a gro kon bigi na ini wan ten pe sma ben e feni taki yu no abi maniri te yu e kari den syenpresi na den nen. A ben skrifi fu a fasi fa a e gi leri na den pikin fu en: „Mi o abi fu leri fu no syen moro fu taki fu den tori disi.” Fu taki en leti, te papa nanga mama e syen fu taki fu sani di abi fu du nanga seks, dan dati no e kibri wan pikin. Sma di wani du ogri nanga pikin na seks sei, man kori den pikin moro esi te den pikin no sabi noti fu seks. A buku Teki leri fu a Bigi Leriman e taki fu a tori disi na wan lespeki fasi di kan tyari wini gi den pikin. Te yu e fruteri wan pikin fu sani di abi fu du nanga seks, dan dati no wani taki dati yu e leri en fu go du ’bigisma sani’. Ma te yu no fruteri en fu den sani disi, dan dati kan meki taki a go du ’bigisma sani’.

17. Fa a Leriman-buku e yepi papa nanga mama fu leri den pikin sani di abi fu du nanga seks?

¹⁷ Na ini kapitel 10, di e taki fu den ogri engel di ben kon na grontapu èn di ben meki pikin, dan wan aksi skrifi drape gi a pikin, namku: „Yu sabi san na seks demakandra?” Na wan lespeki èn makriki fasi a buku e gi piki tapu na aksi disi. Bakaten, kapitel 32 e fruteri fa fu kibri pikin so taki sma no kan du ogri nanga den na seks sei. Furu sma skrifi brifi pe den e taki dati a de tumusi prenspari fu leri pikin den sani disi. Wan mama ben skrifi: „A wiki di pasa, di Javan, a boi fu mi, ben go na a datra fu en, dan a datra aksi mi efu wi ben abi takimakandra nanga Javan fu sori en san na a yoisti fasi fu gebroiki en syenpresi. A ben fruwondru fu yere taki wi ben du disi nanga yepi fu a nyun buku di wi kisi.”

18. San a Leriman-buku e taki fu a grani di sma e gi na sani di e prenki a kondre fu den?

 ¹⁸ Wan tra kapitel e taki fu a Bijbel tori fu den dri Hebrew yonguman Sadrak, Meisak, nanga Abedneikow, di ben weigri fu boigi gi wan popki di ben e prenki a kondre Babilon (Danièl 3:1-30). Kande son sma no man frustan san a gi di sma e gi grani na wan popki abi fu du nanga na odi di sma e gi na wan fraga, soleki fa a Leriman-buku e sori. Ma luku san a skrifiman Edward Gaffney ben abi fu taki di wan nyunsuman fu a tijdschrift U.S. Catholic aksi en wan tu sani. A ben taki dati a fosi dei di a meisje fu en ben komoto na skoro, a taigi en taki a ben leri wan „nyun begi na skoro”, sobun a aksi en fu taki a begi disi meki a yere. „A poti en anu na en ati”, na so Gaffney taki, „èn nanga prisiri a bigin taki, ’Mi e pramisi fu tan getrow na a fraga . . . ’” Gaffney taki moro fara: „Wantronso mi ai opo. Den Yehovah Kotoigi ben abi leti. Frukufruku kaba den pikin e leri ’wan nyun sortu bribi’ na skoro, namku taki den musu de loyaal na a kondre fu den, awinsi san e pasa.”

A muiti fu yu no de fu soso

19. Sortu wini a abi te papa nanga mama e gi leri na den pikin fu den?

¹⁹ Fu tru, a muiti di yu e du fu gi leri na den pikin fu yu, no de fu soso. Na ini a foto Kansas, na Amerkankondre, wan mama en ai bigin lon watra di a leisi wan brifi di en manpikin ben seni gi en. A manpikin ben skrifi: „Mi e firi koloku  trutru taki mi kweki na so wan fasi taki now mi kan libi wan bun libi sondro tumusi furu bruya. Mi musu prèise yu nanga Papa trutru fu dati” (Odo 31:28). A buku Teki leri fu a Bigi Leriman kan yepi furu tra papa nanga mama fu gi leri na den pikin fu den, so taki den kan kibri a tumusi warti gudu disi di den kisi.

20. San papa nanga mama musu memre ala ten, èn sortu krakti disi musu abi na den tapu?

²⁰ Den pikin fu wi musu kisi ala a ten di wi man gi den, èn wi musu du muiti fu poti prakseri na den, so furu leki wi man. Den de yongu fu wan syatu pisi ten nomo. Gebroiki ibri okasi fu de nanga den èn fu yepi den. Disi no sa hati yu noiti. Den o kon lobi yu trutru. Memre ala ten taki yu pikin na wan kado di Gado gi yu. Iya, den de warti gudu trutru! (Psalm 127:3-5) Sobun, sorgu bun gi den, neleki te yu ben o abi fu gi frantwortu na Gado fu a fasi fa yu e kweki den, bika te yu luku bun, dan dati na yu frantwortu trutru.

[Futuwortu]

San yu ben sa piki?

• Fu san ede a de prenspari taki papa nanga mama kibri den pikin fu den, spesrutu na ini a ten disi?

• Sortu leri kan yepi wan sma fu kon koni?

• Fu sortu tumusi prenspari sani yu musu taki nanga den pikin fu yu na ini a ten disi?

• Fa a Leriman-buku yepi papa nanga mama fu gi leri na den pikin fu den?

[Aksi fu a tori disi]

[Faki/​Prenki na tapu bladzijde 18, 19]

Wan buku gi ala sma

A buku Teki leri fu a Bigi Leriman ben meki spesrutu fu yepi papa nanga mama, noso tra bigisma leisi èn taki makandra nanga den pikin fu den, fu den tori di Yesus Krestes ben e leri sma. Ma toku, bigisma di leisi a buku gi densrefi e taki dati den e warderi den sani di den leri fu a buku trutru.

Wan man na ini Texas, Amerkankondre, ben taki: „A buku Teki leri fu a Bigi Leriman, na wan buku di makriki fu leisi, èn a e gi deki-ati na ala sma awansi omeni yari wi abi. Mi srefi, di abi 76 yari, kisi deki-ati fu a buku. Mi dini Yehovah sensi mi yongu yari, èn mi e taki unu tangi trutru.”

Wan uma di ben leisi a buku na ini Londen, Ingrisikondre, ben taki: „A no de fu taki dati den tumusi moi prenki na ini a buku o hari a prakseri fu pikin-nengre èn fu bigisma srefi. Den aksi na ini a buku bun srefisrefi èn a buku seti na wan heri moi fasi. A de moi fu si fa a buku e taki fu tori di no de so makriki, soleki a tori na ini kapitel 32 di nen: ’Fa Yesus ben kisi kibri’.” Na uma e taki te fu kaba: „A no de fu taki dati a buku disi ben meki spesrutu gi den pikin fu Yehovah Kotoigi, ma toku mi e prakseri taki den sma di e gi leri na skoro nanga tra sma sosrefi, sa breiti srefisrefi fu kisi wan fu den buku disi. Mi e angri fu gebroiki a buku disi na ini a ten di e kon.”

Wan uma fu Massachusetts, Amerkankondre, ben taki fu den furu „prenki di fiti trutru na den tori”. A ben skrifi: „Mi kon si taki aladi a buku meki gi pikin-nengre, toku den tori na ini a buku kan yepi wi leki bigisma sosrefi fu prakseri fu a banti di wi abi nanga Yehovah.”

„San! Disi na wan kefalek moi buku!” na so wan uma fu Maine, Amerkankondre, ben taki. „A buku no de gi yonguwan nomo, ma a de gi wi alamala di de pikin fu Gado. A naki mi ati trutru, fu di a doro den moro dipi firi fu mi èn a meki mi firi korostu. Mi e firi taki mi de trutru krosibei fu Yehovah di de leki mi Tata. Fu di Yehovah yepi mi meki mi no e firi den sari sani moro di ben pasa na ini den yari di pasa, èn a meki mi kon si krin san a abi na prakseri.” A e taki te fu kaba: „Mi e taigi ala sma: ’Grantangi, leisi a buku.’”

Wan uma fu Kyoto, Yapan, ben skrifi taki di a ben e leisi a buku gi den granpikin fu en, dan den ben aksi en sani soleki: „’San a boi dati e du? Fu san ede den trawan e kosi a pikin meisje? San a mama disi e du? San a lew disi wani du?’ A buku e leri wi den sani di wi wani sabi, fu dati ede meki mi lobi a buku moro leki iniwan tra buku di mi ben kan feni na wan presi pe sma e go fu leni buku.”

Wan papa na ini Calgary, Kanada, ben taki dati di a kisi a buku, a bigin leisi en wantewante gi en umapikin fu siksi yari èn gi en manpikin fu neigi yari. „Den pikin ben lobi a buku wantewante”, na so a papa skrifi. „Den pikin fu mi ben e luku makandra nanga mi èn den ben e piki den aksi nanga den heri ati. Den ben e firi leki den abi wan prati na a studie, èn disi gi den na okasi fu taki fa densrefi e denki. Den kon de fayafaya fu studeri, èn mi umapikin e taki dati a wani studeri a nyun buku ibri neti.”

Baka di wan papa studeri a buku wan leisi nanga a manpikin fu en, a ben taki: „Mi nanga mi manpikin taki omeni yuru langa fu Yehovah nanga den sani di a abi na prakseri. A ben abi furu aksi fu den tori di de na ini a buku. Baka di a winsi mi wan bun neti rostu, dan a aksi mi wan sani di ben meki taki mi ben wani krei: ’Papa o ten wi kan luku a buku disi baka? Mi abi so furu aksi, èn mi wani kon sabi ala sani fu Yehovah.’”

[Prenki na tapu bladzijde 15]

Papa nanga mama, san unu kan leri fu na eksempre fu Manoa?

[Prenki na tapu bladzijde 16]

Yonguwan, san unu kan leri fu na eksempre fu den dri Hebrewman?

[Prenki na tapu bladzijde 17]

Den prenki èn den sani di skrifi na den prenki na ini a „Leriman” buku, na tumusi bun wrokosani fu gi leri

Sortu lei Ananias e fruteri Petrus?

Suma kan si ala san wi e du?