Wan man fu Afrika di ben abi sakafasi èn di ben lobi Gado Wortu

SMA di e go na Afrika, nofo tron e fruwondru fu si o makriki a de fu bigin taki nanga den sma drape fu Bijbel tori. Sma e arki wantewante te aksi poti soleki: „San na a Kownukondre fu Gado?”, noso „Fa den problema leki angriten, siki, feti nanga ogridu sa lusu fu têgo?” Nanga prisiri furu sma sa gi wan freimdesma na okasi fu sori den fa Bijbel e gi piki tapu den aksi disi. Furu tron disi e meki taki sma e studeri Bijbel doronomo. Èn te den studenti e go na fesi na yeye fasi, dan den e tron dopu Kresten.

Na ini Tori fu den Apostel 8:26-40, Bijbel e taki fu wán fu den fosi sma fu Afrika di handri na a fasi disi. A ben de wan man fu Etiopia di ben teki pasi go na Yerusalem fu go anbegi a tru Gado, Yehovah.

Soleki fa a prenki na ondrosei e sori, dan na Etiopiaman e drai go baka na oso na ini en asiwagi, aladi a e leisi na ini wan bukulolo di opo. Wan freimdesma e go na en, èn e aksi en: „Yu sabi san yu e leisi?” Nanga sakafasi na Etiopiaman e taki dati a abi yepi fanowdu, èn a e begi a freimdesma, di ben de a Kresten preikiman Filipus, fu kon na en na ini na asiwagi. Baka dati a e aksi Filipus fu fruklari den bijbeltekst di a ben leisi didyonsro. Filipus e fruklari taki a profeititori di a ben leisi, abi fu du nanga a dede fu a Mesias, Yesus Krestes, di no ben dede so langa ete. Filipus e fruteri tra sani tu di abi fu du nanga „a bun nyunsu fu Yesus,” èn seiker a fruteri tu fu na opobaka fu Yesus.

Di na Etiopiaman yere den tumusi moi tru tori disi, dan a ben wani tron wan disipel fu Yesus, èn a e aksi: „San e tapu mi fu dopu?” Baka di na Afrikan man disi di abi sakafasi, teki dopu, dan nanga prisiri a drai go baka na oso, èn Bijbel no e taki moro fu en.

Na ini a ten disi, Yehovah Kotoigi e leri milyunmilyun sma na heri grontapu fu a srefi „bun nyunsu”. Na ini a ten disi sowan siksi milyun oso-bijbelstudie e hori sondro taki sma abi fu pai fu dati.