Ondrofenitori

Wan pikin di ben de en wawan e feni wan lobi-ati Tata

SOLEKI FA DIMITRIS SIDIROPOULOS FRUTERI

„Teki a gon, èn sutu”, na so wan ofsiri bari gi mi, aladi a ben e trusu wan gon gi mi. Mi no bruya, ma mi weigri fu teki a gon. Den srudati di ben e tanapu e luku san e pasa, skreki di den si fa kugru bigin frei pasa mi, fu di na ofsiri ben e sutu kon na mi tapu. Mi ben denki taki mi ben o dede leti drape. Koloku taki mi tan na libi. Ma disi no ben de a fosi leisi di mi libi ben de na ini kefar.

MI PAPA nanga mama ben de fu wan pikin grupu Grikisma di ben e libi krosibei fu Kayseri, wan foto na ini Kapadosia, na Torkukondre. Soleki fa a sori, dan son sma fu a kontren disi teki a Kresten bribi na ini a fosi yarihondro G.T. (Tori fu den Apostel 2:9) Ma na a bigin fu a di fu 20 yarihondro, furu sani kon kenki.

Wan loweman tron wan pikin di no abi papa nanga mama

Mi gebore na ini 1922, èn wan tu mun baka dati, grupu sma di ben abi difrenti gwenti nanga kulturu bigin feti nanga makandra, èn dati meki mi famiri lowe go na Grikikondre. Mi papa nanga mama di ben frede srefisrefi, libi ala sani na baka, boiti a beibi fu den di ben abi wan tu mun nomo, èn dati ben de mi. Baka di bigi problema miti den, den doro na ini wan dorpu di nen Kiria, krosibei fu Drama, na a noordsei pisi fu Grikikondre, ma sani no ben e waka bun nanga den kwetikweti.

Di mi ben abi fo yari, dan mi pikin brada gebore, èn baka dati mi papa dede. A ben abi 27 yari nomo, ma fu di a ben pina so hebi na ini den muilek ten di pasa, meki en skin ben kon swaki. Mi mama ben pina hebi tu, èn syatu baka dati en sosrefi dede. Mi nanga mi brada wawan ben tan na baka, èn wi no ben abi notinoti. Sma seni wi go na difrenti fu den presi pe den e kweki pikin di no abi papa nanga mama, èn di mi ben abi  12 yari, den poti mi na ini wan fu den presi disi na ini Tesalonika, pe mi bigin leri fu meki masyin.

Na a ten di mi ben e gro kon bigi na ini den presi disi pe sma no ben abi nowan firi gi pikin, dan mi aksi misrefi fu san ede son sma ben e pina so furu, èn fu san ede someni ogri ben e pasa nanga den. Mi aksi misrefi fu san ede Gado ben e gi pasi taki sma ben e ondrofeni den sari sani disi. A leri di wi ben e kisi fu Bijbel, ben sori wi taki Gado abi ala makti, ma wi no ben kon sabi fu san ede ogri de, èn fu san ede a de na ala sei. Wan sani di furu sma ben gwenti fu taki, na taki a Griki Orthodox Kerki na a moro bun kerki di de. Mi ben aksi sma a sani disi: „Efu na Orthodox bribi na a moro bun bribi di de, dan fu san ede ala sma no abi na Orthodox bribi?” Ma mi no kisi wan bun piki tapu na aksi dati.

Toku a ben de so, taki a leriman fu wi ben abi dipi lespeki gi Bijbel, èn a meki wi kon frustan krin taki Bijbel na wan santa buku. A driktoro fu a presi pe mi ben e tan, ben abi dipi lespeki gi Bijbel tu, ma toku a ben e weigri fu teki prati te kerki ben e hori, èn mi no ben sabi fu san ede. Di mi aksi sma fu san ede a ben e weigri fu du dati, dan den taigi mi taki fosi, a man disi ben e studeri nanga Yehovah Kotoigi, wan bribi di mi no ben sabi.

Mi ben abi 17 yari, di mi klari a leri di mi ben kisi na a presi pe mi ben e tan na ini Tesalonika. A di fu Tu Grontapufeti ben bigin, èn den Nazi ben teki a makti abra na ini Grikikondre. Sma ben e dede na strati fu di den ben de nanga angribere. Fu di mi ben wani tan na libi, meki mi lowe go na den boitipresi fu go yepi gronman du a wroko fu den, èn na so fasi mi ben man wroko wan pikin moni.

Bijbel e gi piki tapu den aksi fu mi

Di mi drai go baka na Tesalonika na ini april 1945, dan a sisa fu wan fositen mati fu mi kon luku mi. Di mi ben de wan pikin-nengre, dan mi nanga a mati dati ben e libi makandra na difrenti fu den presi pe sma e kweki pikin di no abi papa nanga mama. Paschalia taigi mi taki en brada no ben de fu feni na nowan presi, èn a aksi mi efu mi ben sabi pe a ben de. Di mi ben e taki nanga en, dan a fruteri mi taki en ben de wan Kotoigi fu Yehovah èn a taki dati Gado e poti prakseri na libisma.

Fu di mi ben mandi srefisrefi nanga Gado, meki mi taigi Paschalia wan lo sani fu sori en taki mi no ben e agri nanga en. Fu san ede mi pina sensi di mi ben de wan pikin-nengre? Fu san ede mi no ben abi wan papa nanga mama moro? Pe Gado de te wi abi en tranga fanowdu? A aksi mi: „Yu de seiker taki na Gado e meki den sani disi pasa?” A gebroiki en Bijbel fu sori mi taki Gado no e meki sma pina. A yepi mi fu kon si taki a Mekiman lobi libisma èn taki heri esi a sa meki sani kon moro bun. A gebroiki bijbeltekst soleki Yesaya 35:5-7 nanga Openbaring 21:3, 4 fu sori mi taki heri esi orloku, feti, siki, nanga dede no sa de moro, èn taki getrow sma o libi na grontapu fu têgo.

Mi feni wan famiri di yepi mi

Mi ben kon sabi taki a brada fu Paschalia lasi en libi, di guerilla fetiman ben e feti nanga makandra. Mi go na en famiri fu trowstu den, ma na presi fu dati den trowstu mi nanga yepi fu Bijbel. Wan tra leisi mi go baka na den fu kisi moro trowstu fu Bijbel, èn fosi yu denki mi tron wan memre fu wan pikin grupu Yehovah Kotoigi di ben e kon makandra na wan kibri fasi fu studeri èn fu anbegi Gado. Aladi nowan sma ben wani abi wan sani fu du nanga den Kotoigi, toku mi ben teki a fasti bosroiti fu tan bumui nanga den.

Na ini a grupu dati fu Kresten di abi sakafasi, mi ben kon sabi fa a de fu abi wan switi, lobi-ati famiri, èn na dati mi ben misi ala den yari. Den ben e horibaka gi mi na yeye fasi èn den yepi mi, wan sani di mi ben abi so tranga fanowdu. Den ben de mati di no ben e prakseri densrefi nomo èn den ben e broko den ede nanga mi, iya, den ben de klariklari fu yepi mi èn fu trowstu mi (2 Korentesma 7:5-7). Ma a moro prenspari sani, na taki den yepi mi fu kon moro krosibei na Yehovah, di mi ben si now leki mi lobi-ati hemel Tata. San ben naki mi ati, na a lobi nanga a sari-ati fu en, èn taki a ben e broko en ede trutru nanga sma (Psalm 23:1-6). Te fu kaba, mi ben feni wan famiri na yeye fasi èn wan lobi-ati Tata! A sani disi naki mi ati srefisrefi. Fosi yu denki, mi gi mi libi abra na Yehovah, èn na ini september 1945, mi teki dopu.

 A go di mi ben e go na den Kresten konmakandra, no meki wawan taki mi kisi moro sabi, ma a tranga a bribi fu mi sosrefi. Fu di oto noso tra sani no ben de fu tyari wi go na presi, meki nofo tron furu fu wi ben e waka fu a dorpu fu wi go na a konmakandra presi di ben de siksi nanga afu kilometer moro fara. Te wi ben de na pasi, dan wi ben e taki fu yeye afersi, èn mi noiti no sa frigiti den takimakandra dati. Na a kaba fu 1945, di mi yere taki na okasi ben de fu du furuten preikiwroko, dan mi bigin pionier. A ben de tumusi prenspari fu abi wan tranga banti nanga Yehovah, fu di a bribi fu mi, èn sosrefi a soifri retifasi fu mi ben o kisi tesi dorodoro.

Sma gens wi, ma sani waka tra fasi leki san den fruwakti

Nofo tron a ben de so, taki skowtu ben e broko kon na ini a konmakandra presi fu wi, èn den ben e hori gon gi wi. Na srudati ben abi a makti na ini Grikikondre, fu di wan borgufeti ben de na ini a kondre. Difrenti grupu guerilla fetiman bigin feti nanga makandra na wan tumusi ogri-ati fasi. Disi ben gi den kerki fesiman na okasi fu overtoigi den tiriman taki wi na Komunist, èn fu dati ede den bigin frufolgu wi na wan tumusi ogri-ati fasi.

Na ini wan pisi ten fu tu yari, den sroto wi someni leisi, èn siksi leisi wi ben musu koti strafu, iya, wi koti strafu fu fo mun srefi. Ma den strafu-oso ben furu kaba nanga sma di ben e koti strafu, fu di den no ben horibaka gi a tirimakti fu Grikikondre, èn dati meki den lusu wi baka. Now di wi ben kon fri, sondro taki wi ben fruwakti dati, dan wi gebroiki a fri dati fu tan preiki. Ma baka wan pisi ten den sroto wi baka, èn dati pasa dri tron na ini a srefi wiki. Wi ben sabi taki den ben seni furu fu wi brada go na farawe èilanti pe a gron ben de so drei taki noti no ben e gro drape. A bribi fu mi ben tranga nofo fu man pasa a tesi dati?

Sani ben kon muilek srefisrefi gi mi di mi ben musu sori mi fesi na skowtu ibri dei. Fu di den tiriman ben wani sabi san mi ben e du, meki den seni mi go na a dorpu Evosmos, krosibei fu Tesalonika, pe wan skowtu-oso ben de. Mi yuru wan kamra krosibei fu a skowtu-oso, èn fu man feni moni, mi bigin go wroko na sma oso fu krin kopro beki nanga kopro patu. Aladi mi ben e pionier na ini den tra dorpu ini a birti, a wroko di mi ben e du na sma oso ben gi mi na okasi fu preiki na sma oso sondro taki skowtu ben sabi san mi ben e du. A bakapisi ben de taki furu sma yere a bun nyunsu èn den ben prisiri nanga en. Te fu kaba, moro leki tin fu den gi den libi abra na Yehovah, èn den tron anbegiman fu en.

Tin yari, aiti strafu-oso

Skowtu ben e tan luku san mi e du te na a kaba fu 1949, èn baka dati mi drai go baka na Tesalonika, aladi mi ben e angri fu go doro nanga a furuten diniwroko. Di mi ben prakseri taki den tesi fu mi ben kon na wan kaba, dan na ini 1950, mi kisi a komando fu go na ini a legre, wan sani di mi no ben fruwakti. Fu di mi na wan Kresten, meki mi no ben wani teki prati na ini feti, noso orloku, èn dati meki mi ben abi a fasti bosroiti fu no „leri orloku” (Yesaya 2:4). Na so, wan langa pisi ten bigin taki mi ben musu nyan pina na ini wan tu fu den moro ogri strafu-oso fu Grikikondre.

A pisi ten disi bigin na ini a foto Drama. Di mi ben de na strafu-oso drape wan tu wiki kaba, dan den nyun srudati di ben kon na ini a legre ben musu leri fa fu sutu gon. Wan dei, den tyari mi go na a presi pe den srudati ben e leri sutu. Wan fu den ofsiri trusu wan gon gi mi èn a gi mi a komando fu sutu. Di mi weigri, a bigin sutu kon na mi tapu. Di den tra ofsiri si taki mi no ben de fu gi yesi na a komando, den bigin naki mi bun tranga kofu. Den leti sikaret, èn den kiri den na ini mi anu. Baka dati, den sroto mi na ini wan pikin kamra pe mi wawan ben musu tan. Den ben du disi dri dei langa. Fu di den ben bron mi anu nanga sikaret, meki mi anu ben e hati mi srefisrefi,  èn furu yari baka dati yu ben kan si den soromarki ete na tapu mi anu.

Bifo mi ben musu go na fesi srudati-krutu, den tyari mi go na wan legrekampu na ini Iráklion, na Kreita. Drape den fon mi kefalek, fu di den ben wani meki mi lasi mi soifri retifasi. Fu di mi ben frede taki mi no ben o man hori mi soifri retifasi, meki mi begi mi hemel Tata fayafaya, èn mi aksi en efu a ben kan tranga mi. Den wortu fu Yeremia 1:19 kon na ini mi prakseri, namku: „Fu tru den sa feti nanga yu, ma den no sa wini yu, bika ’mi de nanga yu’, na so Yehovah taki, ’fu frulusu yu’.” A „vrede fu Gado” di e gi kowru-ati, meki taki mi no ben e frede moro, èn mi no ben e bruya moro. Mi ben frustan taki a de wan koni sani fu poti mi frutrow dorodoro tapu Yehovah.—Filipisma 4:6, 7; Odo 3:5.

Na a krutu di ben hori baka dati, mi kisi fu yere taki mi ben musu koti strafu teleki mi dede. Sma ben e si Yehovah Kotoigi leki a moro bigi „feanti fu a kondre”. Mi bigin koti a strafu fu mi na ini a Itsedin strafu-oso, di ben de krosibei fu Canea. Drape den sroto mi na ini wan pikin kamra pe mi wawan ben musu tan. Itsedin ben de wan owru fortresi, èn a pikin kamra pe mi ben e tan na ini ben lai nanga alata. Mi ben e domru mi heri skin na ini wan owru pritipriti bedikrosi, fu kibri mi skin gi den alata di ben e waka na mi tapu. Mi kon siki hebi na den fokofoko fu mi. Datra taigi mi taki mi ben musu sidon na ini a son, èn na so fasi mi ben man taki nanga furu strafuman na tapu a dyari. Ma mi kon moro siki, èn baka di den fokofoko fu mi bigin puru furu brudu, den tyari mi go na a ati-oso fu Iráklion.

Mi famiri na yeye fasi, namku den Kresten brada nanga sisa fu mi, ben de drape baka fu yepi mi di mi ben abi den fanowdu (Kolosesma 4:11). Den brada fu Iráklion ben e kon luku mi furu tron, èn den ben e trowstu mi èn den ben e gi mi deki-ati. Mi taigi den taki mi ben abi buku nanga tijdschrift fanowdu fu preiki gi sma di ben wani kon sabi moro. Den tyari wan kofru kon gi mi di ben meki na so wan fasi taki mi ben kan kibri den buku na ondrosei fu en, sondro taki wan sma ben o man sabi dati. Mi ben breiti trutru taki na ini a pisi ten di mi ben de na ini den strafu-oso dati, mi ben kan yepi sowan siksi strafuman fu tron tru Kresten.

Na ini a pisi ten dati, a feti di sma fu a kondre ben e feti nanga makandra, ben kon na wan kaba èn na presi taki mi ben musu tan na ini strafu-oso teleki mi dede, mi ben musu koti strafu soso tin yari now. A lasti pisi fu mi strafu, mi koti na ini Rethimno strafu-oso, Genti Koule strafu-oso, nanga Cassandra strafu-oso. Baka di mi koti strafu sowan tin yari langa na ini aiti strafu-oso, dan den lusu mi, èn mi drai go baka na Tesalonika pe den lobi Kresten brada nanga sisa fu mi gi mi wan waran switikon.

 Sani e go bun nanga mi na yeye fasi fu di den Kresten brada e yepi mi

Na a ten di den lusu mi, den Kotoigi na Grikikondre ben man anbegi Gado na wan moro fri fasi. Wantewante mi teki na okasi fu go baka na ini a furuten diniwroko. Syatu baka dati, mi kisi wan tra blesi, fu di mi leri sabi wan getrow Kresten sisa di nen Katina. A sisa disi ben lobi Yehovah èn a ben e wroko tranga na ini preikiwroko. Wi trow na ini oktober 1959. Fu di mi umapikin Agape gebore, èn fu di mi ben abi mi eigi Kresten osofamiri now, meki mi ben man frigiti den takru sani di mi ben ondrofeni leki wan pikin di no abi papa nanga mama. Ma san ben de moro prenspari, na taki na osofamiri fu wi ben e prisiri fu dini wi lobi-ati hemel Tata, Yehovah, di ben e kibri wi èn sorgu wi bun.​—Psalm 5:11.

Fu di mi no ben abi nofo moni fu sorgu mi osofamiri, meki mi ben musu tapu nanga a pionierwroko, ma mi horibaka gi mi wefi, aladi a ben e go doro nanga a furuten diniwroko. Na ini 1969, wan tumusi prenspari sani pasa na ini mi Kresten libi, di wan kongres fu Yehovah Kotoigi ben hori na ini Neurenberg, Doisrikondre. Fu di mi ben sreka misrefi fu go drape, meki mi aksi lanti fu den gi mi wan paspoort. Di mi wefi go na den skowtu fu aksi den fu san ede mi no ben kisi mi paspoort ete baka tu mun, dan wan ofsiri hari wan heri ipi papira puru na ini a la fu en tafra, èn a taki: „Yu e aksi wan paspoort gi a sma disi, so taki a kan go na Doisrikondre fu dwengi sma fu teki a bribi fu en? A no o kisi en! A man disi na wan ogriman.”

Fu di Yehovah yepi mi èn fu di wan tu brada horibaka gi mi, meki den poti mi nen na ini wan paspoort di ben de gi wan heri grupu, èn na so fasi mi ben man go na a tumusi moi kongres dati. Moro leki 150.000 sma ben de drape, èn mi ben man si krin taki a yeye fu Yehovah ben e tiri a yeye famiri disi di ben komopo na difrenti kondre, èn a ben meki sosrefi taki den ben de wán. Te mi ben o kon moro owru, mi ben o abi moro warderi gi den Kresten brada fu wi.

Na ini 1977, mi lobi wefi èn mi getrow patna dede. Mi ben du ala muiti fu kweki mi umapikin soleki fa Bijbel e sori wi, ma mi no ben abi fu du dati mi wawan. Agen mi famiri na yeye fasi, kon yepi mi. Ala ten mi sa warderi a yepi di den brada gi mi na ini a muilek ten dati. Sonwan fu den froisi srefi fu kon tan nanga wi wan pisi ten, so taki den ben kan luku mi umapikin. Noiti mi sa frigiti a lobi dati di ben sori taki den ben gi densrefi sondro fu aksi wan sani baka.​—Yohanes 13:34, 35.

Agape gro kon bigi èn a trow nanga wan brada di nen Elias. Den abi fo boi, èn den alamala de na ini waarheid. Na ini den yari di pasa, mi kisi wan berurtu wan tu leisi, èn mi kon moro swaki. Mi umapikin nanga en osofamiri e sorgu mi bun. Aladi mi no abi wan bun gosontu, toku furu sani de ete di e gi mi prisiri. Mi kan memre a ten ete di pikinmoro wán hondro brada nomo ben de na ini heri Tesalonika, èn kibrikibri den ben e kon makandra na ini oso fu sma. Now, sowan feifi dusun fayafaya Kotoigi de na ini a kontren dati (Yesaya 60:22). Na den kongres, yongu brada e kon na mi èn den e aksi: „Yu sabi ete di yu ben e tyari tijdschrift kon na wi oso?” Aladi a kan taki a papa nanga mama fu den no ben e leisi den tijdschrift dati, toku den pikin fu den ben e leisi den, èn den go na fesi na yeye fasi!

Te mi e si fa na organisâsi fu Yehovah e gro, dan mi sabi taki a no fu soso mi kisi ala den tesi. Ala ten mi e fruteri den granpikin fu mi, èn sosrefi tra yonguwan fu memre den hemel Tata na ini den yongu yari fu den, bika te den e du dati, dan a no sa gowe libi den noiti (Preikiman 12:1). Yehovah meki den wortu fu en kon tru, èn na so a tron gi mi „wan Tata fu den boi di no abi papa” (Psalm 68:5). Aladi a de so taki di mi ben yongu, mi ben de mi wawan fu di mi no ben abi wan papa nanga wan mama, toku mi feni wan lobi-ati Tata te fu kaba!

[Prenki na tapu bladzijde 22]

Mi ben e wroko leki wan boriman na ini a strafu-oso na Drama

[Prenki na tapu bladzijde 23]

Mi nanga Katina tapu a trowdei fu wi na ini 1959

[Prenki na tapu bladzijde 23]

Wan bigi konmakandra di ben hori na ini wan busi krosibei fu Tesalonika, na ini den yari baka 1965

[Prenki na tapu bladzijde 24]

Nanga na umapikin fu wi na ini 1967