Aksi fu leisiman

Na apostel Paulus ben du wan sani di no e kruderi nanga a Kresten bribi, di a taki na fesi a Sanhedrin: „Mi na wan Fariseiman”?

Fu man frustan san Paulus ben fruklari na ini Tori fu den Apostel 23:6, dan wi musu luku san skrifi na ini den tekst lontu a vers disi.

Baka di wan bigi grupu Dyu ben lontu Paulus na ini Yerusalem, dan Paulus ben taki nanga den ipi sma. A ben taki dati a ben ’kisi leri fu Gamalièl na ini [Yerusalem], èn a ben leri a Wet fu den afo finifini’. Di Paulus opo taki gi ensrefi, dan den ipi sma arki en fu wan pisi ten, ma di den kon kisi atibron bakaten, dan a srudati komandanti di ben de nanga Paulus, tyari en go na a tanpresi fu den srudati. Di a ben de fu wipi Paulus, ne Paulus taki: „A fiti taki unu e wipi wan Romesma sondro taki unu krutu en?”​—Tori fu den Apostel 21:27–22:29.

A dei baka dati, a komandanti tyari Paulus go na fesi a gran krutu fu den Dyu, a Sanhedrin. Paulus ben luku den bun èn a ben si taki den sma na ini a Sanhedrin ben de Saduseiman nanga Fariseiman. Ne a taigi den: „Un man, brada, mi na wan Fariseiman, wan manpikin fu den Fariseiman. Den e krutu mi fu di mi e bribi na ini wan opobaka.” Leki bakapisi fu dati, den Fariseiman nanga den Saduseiman bigin meki trobi nanga makandra, „bika den Saduseiman no e bribi na ini wan opobaka èn den no e bribi tu na ini engel noso na ini yeye, ma den Fariseiman e fruteri ala sma taki den e bribi na ini ala den sani disi”. Sonwan di ben de na ini a grupu fu den Fariseiman opo èn den bigin meki bigi trobi, èn den taki: „Wi no feni taki a man disi du wan ogri.”​—Tori fu den Apostel 23:6-10.

Fu di sma ben sabi Paulus leki wan fayafaya Kresten, meki a no ben man overtoigi a Sanhedrin taki a ben de wan Fariseiman trutru. Den Fariseiman di ben de drape, no ben o teki sei gi wan Fariseiman di no e bribi ala den leri fu den. Fu dati ede, di Paulus taigi den sma taki en ben de wan Fariseiman, dan dati no ben wani taki dati a ben e agri nanga ala sani fu den, èn den Fariseiman di ben de drape ben frustan den wortu fu Paulus na a fasi dati.

Di Paulus taki dati a ben kisi krutu fu na opobaka howpu ede, dan a ben sori krin taki na a fasi disi wawan a ben de leki den Fariseiman. Di den ben haritaki fu na opobaka, dan den sani di Paulus ben e bribi ben kruderi moro nanga a bribi fu den Fariseiman, leki nanga a di fu den Saduseiman di no ben e bribi na ini na opobaka.

Den sani di Paulus ben e bribi leki Kresten no ben de kontrari den sani di den Fariseiman ben e bribi, sani soleki na opobaka, engel, nanga son sani di ben skrifi na ini a Wet (Filipisma 3:5). Sobun, fu di Paulus nanga den Fariseiman ben e agri nanga makandra fu den tori disi, meki Paulus ben man taki dati a ben de wan Fariseiman, èn na a fasi disi wawan den sma fu a Sanhedrin ben frustan den wortu fu Paulus. Fu di Paulus ben abi a Dyu bribi fosi, meki a ben gebroiki disi fu man puru a fowtu denki di a Gran krutu fu den Dyu ben abi fu en.

Ma a moro bigi buweisi di wi abi taki Paulus no du wan sani di no e kruderi nanga a bribi fu en, na taki Yehovah ben feni en bun ete. A neti baka di Paulus taki „Mi na wan Fariseiman”, dan Yesus ben taigi Paulus: „Hori deki-ati! Bika neleki fa yu ben fruteri den sma na ini Yerusalem finifini fu den sani di abi fu du nanga mi, na so yu musu gi kotoigi tu na ini Rome.” Fu di Gado ben feni Paulus bun, meki wi kan taki dati Paulus no ben du sani di no e kruderi nanga a Kresten bribi fu en.​—Tori fu den Apostel 23:11.