Frutrow na ini a wortu fu Yehovah

„Mi frutrow na ini a wortu fu yu.”​—PSALM 119:42.

1. San yu kan fruteri fu a skrifiman fu Psalm 119 èn fu a fasi fa a ben e firi?

A SKRIFIMAN fu Psalm 119 ben lobi a wortu fu Yehovah trutru. Kande na a kownu manpikin Heskia fu Yuda skrifi a psalm disi. Te wi e luku fa skrifiman skrifi fu den firi fu en, dan a musu fu de so taki na Heskia skrifi a psalm disi nanga yepi fu a santa yeye. Heskia ben „e tai hori na Yehovah doronomo” na a ten di a ben e tiri leki kownu fu Yuda (2 Kownu 18:3-7). Awinsi suma skrifi a psalm disi, wan sani wi sabi seiker: A skrifiman ben sabi taki a ben de na nowtu na yeye fasi.​—Mateyus 5:3.

2. Sortu prenspari sani e kon na krin na ini Psalm 119, èn fa a singi disi skrifi?

² Wan prenspari sani di e kon na krin na ini Psalm 119, na a waarde fu a wortu, noso a boskopu fu Gado. * Fu di a kan taki a skrifiman ben wani yepi sma fu hori a psalm disi na ede, meki ibri tron a poti wan tra letter fu a Hebrew alfabet na a bigin fu ibriwan fu den vers fu a singi disi. Sobun, a fosi vers e bigin nanga a fosi letter fu a Hebrew alfabet, a di fu tu vers e bigin nanga a di fu tu letter, èn na so a e go doro te na a lastiwan fu ala den 176 vers. Na ini a Hebrewtongo fu fositen, a psalm disi ben abi 22 pisi, èn ibriwan fu den pisi ben abi aiti lin di e bigin nanga a srefi letter. A psalm disi e taki fu a wortu fu Gado, a wet fu en, den frumane fu en, a fasi fa a e du sani, den komando fu en, den krutubosroiti fu en, èn sosrefi fu tra sani. Na ini na artikel disi èn na ini a wan di e kon, wi sa taki fu Psalm 119 èn wi sa gebroiki wan soifri vertaling fu den Hebrew Buku fu Bijbel fu du dati. Te wi e denki dipi fu den ondrofenitori fu futuboi fu Yehovah na ini den ten di pasa èn na ini a ten disi, dan dati o meki wi frustan moro bun san a singi disi, di skrifi nanga yepi fu a santa yeye, wani taki. A o meki wi kisi moro warderi tu gi a Bijbel, a Wortu di Gado meki sma skrifi.

Te wi e gi yesi na a wortu fu Gado dan wi sa de koloku

3. Fruklari san a wani taki fu de sondro fowtu, èn gi wan eksempre fu disi.

³ Efu wi wani de koloku trutru, dan wi musu gi yesi na a wet fu Gado (Psalm 119:1-8). Te wi e du disi, dan Yehovah o si wi leki sma di de „sondro fowtu na tapu a pasi fu den” (Psalm 119:1). Fu de sondro fowtu no wani taki dati wi no e meki fowtu noiti, ma a wani taki dati wi e meki ala muiti fu du a wani fu Yehovah Gado. Noa „ben sori fu de sondro fowtu na mindri den sma fu en ten” fu di a ben de wan man di ben e „waka nanga a tru Gado”. A getrow famiri-edeman dati nanga en osofamiri ben pasa a Frudu libilibi, fu di a ben e libi soleki fa Yehovah ben wani (Genesis 6:9; 1 Petrus 3:20). Na so a de tu taki wi o man pasa a kaba fu a grontapu disi libilibi te wi ’e hori wisrefi finifini na den komando fu Gado’, bika na so fasi wi e du a wani fu en.​—Psalm 119:4.

4. O ten wi sa de koloku èn o ten sani sa waka bun gi wi?

 ⁴ Yehovah no sa libi wi noiti efu wi e ’prèise en nanga wan opregti ati èn efu wi e tan hori wisrefi na den wet fu en’ (Psalm 119:7, 8). Gado no ben gowe libi na Israel fesiman Yosua, di ben teki a rai fu ’leisi na ini a wetbuku dei nanga neti so taki a ben kan handri soifri akruderi ala sani di skrifi na ini’. Dati meki sani ben e waka bun gi Yosua èn a ben man handri na wan koni fasi (Yosua 1:8). Na a kaba fu en libi, Yosua ben e prèise Gado ete, èn a ben kan memre den Israelsma na a sani disi: „Unu sabi heri bun nanga un heri ati èn nanga un heri sili, taki no wán wortu fu ala den bun wortu di Yehovah, un Gado, taigi unu, tan sondro fu kon tru” (Yosua 23:14). Neleki fa a ben de nanga Yosua èn nanga a skrifiman fu Psalm 119, na so wi kan feni koloku, èn sani sa waka bun gi wi te wi e prèise Yehovah èn te wi e frutrow na ini a wortu fu en.

A wortu fu Yehovah e hori wi krin

5. (a) Fruteri fa wan sma kan tan krin na yeye fasi. (b) Sortu yepi de gi wan yongu sma di du wan seryusu sondu?

⁵ Wi kan de krin na yeye fasi te wi e tan na ai soleki fa a wortu fu Gado e sori wi (Psalm 119:9-16). Wi kan du disi, srefi te wi papa nanga mama no de wan bun eksempre gi wi. Aladi a papa fu Heskia ben e anbegi kruktugado, toku Heskia ben „krin en pasi”, kande fu di a no ben teki den gwenti fu den sma fu tra nâsi. Fa a de te wan yongu sma di e dini Gado na ini a ten disi e du wan seryusu sondu? We, te a abi berow, te a e begi, te a e teki a yepi fu en papa nanga mama, èn te a e teki a yepi fu lobi-ati Kresten owruman, dan dati kan yepi en fu de leki Heskia, èn a sa man ’krin en pasi èn tan na ai’.​—Yakobus 5:13-15.

6. Sortu uma ben ’krin den pasi èn ben tan na ai akruderi a wortu fu Gado’?

⁶ Aladi Rakab nanga Rut ben e libi langa ten bifo Psalm 119 skrifi, toku den ben ’krin den pasi’. Fosi, Rakab ben de wan huru-uma fu Kanan, ma bakaten sma kon sabi en leki wan uma di abi wan tranga bribi èn di ben e anbegi Yehovah (Hebrewsma 11:30, 31). A Moab-uma Rut ben gowe libi den gado fu en, a go dini Yehovah, èn a ben e hori ensrefi na a Wet di Yehovah ben gi Israel (Rut 1:14-17; 4:9-13). Den tu uma disi di no ben de Israelsma ’ben tan na ai akruderi a wortu fu Gado’, èn den ben kisi a tumusi moi grani fu tron afo fu Yesus Krestes.​—Mateyus 1:1, 4-6.

7. Fa a tan di Danièl nanga dri tra Hebrew yonguman tan krin na yeye fasi meki taki den kon de wan moi eksempre gi tra yonguwan?

⁷ Aladi „den firi di libisma abi na ini den ati, takru fu sensi den yongu yari fu den”, toku yongusma kan abi wan krin fasi fu libi, srefi na ini a kruktu grontapu disi di de na ini a makti fu Satan (Genesis 8:21; 1 Yohanes 5:19). Di Danièl nanga dri tra Hebrew yonguman ben de katiboman na ini Babilon, dan den ’ben tan na ai akruderi a wortu fu Gado’. Fu eksempre, den no ben wani doti densrefi „nanga den switisani fu a kownu” (Danièl 1:6-10). Den Babilonsma ben e nyan meti di no ben krin, èn a Wet fu Moses ben e  krutu a sani disi (Lefitikus 11:1-31; 20:24-26). Te den Babilonsma ben e srakti meti, dan a no ala ten den ben e meki a brudu lon komoto fu den meti, èn fu nyan wan meti sondro taki a brudu fu en lon komoto na ini a skin, na wan sani di no ben e kruderi nanga a wet di Gado ben gi fu brudu (Genesis 9:3, 4). Fu dati ede, a no de fu fruwondru taki den fo Hebrewman disi no ben wani nyan den switisani fu a kownu! Den yonguman disi di ben abi frede gi Gado, ben tan krin na yeye fasi èn na so den kon de wan moi eksempre gi tra yonguwan.

Gado wortu e yepi wi fu tan getrow

8. Sortu fasi fu denki wi musu abi, èn san wi musu sabi efu wi wani frustan a wet fu Gado èn hori wisrefi na dati?

⁸ Fu man tan getrow na Yehovah, a de prenspari taki wi lobi a wortu fu Gado (Psalm 119:17-24). Efu wi de leki a psalm skrifiman di skrifi sani nanga a krakti fu a santa yeye, dan wi o angri fu frustan „den wondrusani” fu a wet fu Gado. Wi o ’angri doronomo gi den krutubosroiti fu Yehovah’ èn wi o ’lobi den frumane fu en’ (Psalm 119:18, 20, 24). A de so taki wi ’kweki wan angri gi a soifri merki di de fu a wortu’, awansi wi gi wisrefi abra na Yehovah no so langa pasa? (1 Petrus 2:1, 2) Wi musu frustan den moro prenspari leri fu Bijbel, so taki wi kan frustan a wet fu Gado moro bun, èn so taki wi kan hori wisrefi na dati.

9. San wi musu du te den sani di libisma e aksi fu wi no e kruderi nanga a wet fu Gado?

⁹ A kan taki wi lobi den wet fu Gado, ma fa wi o du te son „granman” abi wan sani fu krutu wi? (Psalm 119:23, 24) Na ini a ten disi, a de so furu tron taki sma di abi makti e pruberi fu dwengi wi fu gi yesi na den wet fu libisma, na presi fu gi yesi na den wet fu Gado. Te den sani di libisma e aksi fu wi no e kruderi nanga a wani fu Gado, dan san wi o du? A lobi di wi abi gi a wortu fu Gado sa yepi wi fu tan getrow na Yehovah. Neleki den apostel fu Yesus Krestes di ben kisi frufolgu, wi o taki: „Wi musu gi yesi na Gado leki tiriman, moro leki na libisma.”​—Tori fu den Apostel 5:29.

10, 11. Gi wan eksempre fa wi kan tan hori wi soifri retifasi na Yehovah, srefi na ini den moro muilek situwâsi.

¹⁰ Wi kan tan getrow na Yehovah, srefi na ini den moro muilek situwâsi (Psalm 119:25-32). Efu wi wani tan hori wi soifri retifasi na Gado, dan wi musu de klariklari fu teki leri, èn wi musu begi Gado fayafaya fu sori wi san fu du. Wi musu teki „a pasi fu getrowfasi” sosrefi.​—Psalm 119:26, 30.

¹¹ Heskia, di skrifi Psalm 119 kande, ben teki „a pasi fu getrowfasi”. A ben du disi, aladi a ben de na mindri sma di ben e anbegi kruktugado, èn kande den sma fu a kownu-oso ben e spotu en tu. A ben musu fu de so taki ’en sili no ben man sribi fu sari ede’ fu di a ben de na ini so wan situwâsi (Psalm 119:28). Ma Heskia ben e frutrow na ini  Gado, a ben de wan bun kownu, èn a ben du „san reti na ini Yehovah ai” (2 Kownu 18:1-5). Te wi e frutrow na ini Gado, dan wi sosrefi kan horidoro te wi e kisi tesi, èn wi kan tan hori wi soifri retifasi na Gado.​—Yakobus 1:5-8.

A wortu fu Yehovah e gi deki-ati

12. Fa wi kan gebroiki Psalm 119:36, 37 na ini wi eigi libi?

¹² Te wi e meki a wortu fu Gado tiri wi, dan dati e gi wi a deki-ati di wi abi fanowdu fu man horidoro te tesi e miti wi na ini a libi (Psalm 119:33-40). Nanga sakafasi wi e suku rai na Yehovah so taki wi kan hori wisrefi na en wet ’nanga wi heri ati’ (Psalm 119:33, 34). Neleki a psalm skrifiman, wi e aksi Gado: „Boigi mi ati go na den frumane fu yu, èn no boigi en go na wini di de fu kisi”, dati wani taki, wini di de fu kisi na wan bedrigi fasi (Psalm 119:36). Neleki na apostel Paulus, wi e „du ala sani na wan opregti fasi” (Hebrewsma 13:18). Efu wi wrokobasi wani wi fu du wan kruka sani, dan wi musu teki deki-ati fu tan du a wani fu Gado, èn Yehovah sa blesi wi ala ten te wi e handri na a fasi dati. Fu taki en leti, a e yepi wi fu basi ala takru denki di wi ben sa kisi. Fu dati ede, meki wi begi: „Drai mi ai gowe so taki den no e si sani di no warti” (Psalm 119:37). Noiti wi musu si den sani di no warti èn di Gado no lobi kwetikweti, leki sani di wi ben sa wani srefisrefi (Psalm 97:10). Tu fu den sani di a begi disi e yepi wi fu du, na fu wai pasi gi sani di abi fu du nanga seks tori, èn gi sani di abi fu du nanga afkodrei.​—1 Korentesma 6:9, 10; Openbaring 21:8.

13. Fa den disipel fu Yesus ben kisi deki-ati fu man preiki sondro fu frede, aladi sma ben e frufolgu den?

¹³ Te wi abi soifri sabi fu a wortu fu Gado, dan dati e gi wi e a frutrow di wi abi fanowdu fu man gi kotoigi na wan deki-ati fasi (Psalm 119:41-48). Iya, wi abi deki-ati fanowdu fu man ’piki a sma di e gi wi porinen’ (Psalm 119:42). Ten na ten, a kan de so, taki wi e du leki den disipel fu Yesus di ben e kisi frufolgu. Den ben begi: „Yehovah,  . . . meki den srafu fu yu tan taki a wortu fu yu sondro frede.” San ben de a bakapisi? „Den alamala ben kon furu nanga a santa yeye èn den ben e taki a wortu fu Gado sondro frede.” A srefi Almakti Masra e gi wi deki-ati fu taki en wortu sondro fu frede.​—Tori fu den Apostel 4:24-31.

14. San e yepi wi fu gi kotoigi na wan deki-ati fasi, neleki fa Paulus ben du dati?

¹⁴ Efu wi lobi „a wortu fu waarheid” trutru, èn efu wi e ’tan hori wisrefi na a wet fu Gado doronomo’, dan wi sa kisi a deki-ati di wi abi fanowdu fu man gi kotoigi, sondro fu frede taki wi o kisi syen (Psalm 119:43, 44). Te wi de fayafaya studenti fu a Wortu di Gado meki sma skrifi, dan wi o man ’taki fu den frumane fu en na fesi kownu’ (Psalm 119:46). Begi, èn sosrefi a yeye fu Yehovah o yepi wi tu fu taki den yoisti sani na wan fasi di fiti (Mateyus 10:16-20; Kolosesma 4:6). Na wan deki-ati fasi, Paulus ben taki fu den frumane fu Gado na fesi tiriman na ini a fosi yarihondro. Fu eksempre, a ben gi kotoigi na Granman Feliks fu Rome, di ben „arki san a ben abi fu fruteri fu a bribi na ini Krestes Yesus” (Tori fu den Apostel 24:24, 25). Paulus ben gi kotoigi sosrefi na fesi Granman Festus, nanga Kownu Agrepa (Tori fu den Apostel 25:22–26:32). Te Yehovah e horibaka gi wi, dan wi sosrefi kan de deki-ati kotoigi di noiti „no e syen gi a bun nyunsu.”​—Romesma 1:16.

Gado Wortu e gi wi trowstu

15. Fa Gado Wortu kan gi wi trowstu te tra sma e spotu wi?

¹⁵ A Wortu fu Yehovah e gi wi trowstu trutru (Psalm 119:49-56). Son ten wi abi trowstu tranga fanowdu. Aladi wi e opo taki na wan deki-ati fasi leki Kotoigi fu Yehovah, toku „heimemre-sma”, noso sma di e du sani di e sori taki den no e lespeki Gado, ’e spotu wi dorodoro son leisi’ (Psalm 119:51). Ma te wi e begi, dan kande wi e memre wan tu moi sani di skrifi na ini Gado Wortu, èn na so fasi wi e ’feni trowstu gi wisrefi’ (Psalm 119:52). Te wi e begi fayafaya, dan wi e memre kande wan wet noso wan gronprakseri fu Bijbel di e gi wi a trowstu nanga a deki-ati di wi abi fanowdu na ini wan muilek situwâsi.

16. San den futuboi fu Gado no du aladi sma frufolgu den?

¹⁶ Den sma di no ben e lespeki Gado èn di ben e spotu a psalm skrifiman, ben de den Israelsma, iya, sma fu wan nâsi di ben gi ensrefi abra na Gado. Dati ben de wan bigi syen! Ma meki wi de tra fasi leki den sma disi, iya, meki wi abi a fasti bosroiti fu no gowe libi a wet fu Gado noiti (Psalm 119:51). Aladi den Nazi ben e frufolgu  dusundusun futuboi fu Gado na ini den yari di pasa, èn aladi tra sma ben e handri nanga den na wan srefi sortu fasi, toku den futuboi disi weigri fu gowe libi den wet nanga den gronprakseri di de fu feni na ini Gado Wortu (Yohanes 15:18-21). Èn a no de wan hebi fu gi yesi na Yehovah, bika den wet fu en de leki poku di e trowstu wi.​—Psalm 119:54; 1 Yohanes 5:3.

Abi warderi gi a wortu fu Yehovah

17. San wi sa du te wi abi warderi gi a wortu fu Gado?

¹⁷ Te wi e libi soleki fa a wortu fu Gado e taki, dan wi e sori taki wi abi warderi gi a wortu dati (Psalm 119:57-64). A psalm skrifiman ben ’pramisi fu hori ensrefi na den wortu fu Yehovah’, èn srefi ’na mindrineti a ben e opo fu taki Gado tangi gi den regtfardiki krutubosroiti fu En’. Efu wi e wiki te neti, dan dati ben o de wan moi okasi fu begi Gado èn fu taki en tangi! (Psalm 119:57, 62) A warderi di wi abi gi a wortu fu Gado e meki taki wi e du muiti fu kisi leri fu Gado, èn a e meki wi tron koloku ’mati’ fu den wan di e frede Yehovah’, namku den sma di abi bigi lespeki gi Gado (Psalm 119:63, 64). Iya, moro bun mati no de fu feni na ini a grontapu disi.

18. Fa Yehovah e gi piki tapu den begi fu wi te ’den tetei fu den ogrisma e lontu wi’?

¹⁸ Te wi e begi Yehovah nanga wi heri ati èn te wi e aksi en na wan saka fasi fu gi wi leri, dan wi e ’safu a fesi fu en’ fu di wi wani taki a feni wi bun. Wi musu begi, spesrutu te ’den tetei fu den ogrisma e lontu wi’ (Psalm 119:58, 61). Yehovah man koti den tetei fu feanti, èn a man fri wi so taki wi kan go doro nanga a wroko di wi e du fu preiki a Kownukondre èn fu meki disipel (Mateyus 24:14; 28:19, 20). Disi pasa ibri tron baka na ini kondre pe lanti ben tapu a wroko fu wi.

Abi bribi na ini a wortu fu Gado

19, 20. Fa a kan de wan bun sani fu kisi kwinsi?

¹⁹ Te wi e bribi na ini Gado èn na ini a wortu fu en, dan dati e yepi wi fu horidoro na ini muilek ten, èn a e yepi wi tu fu tan du a wani fu en (Psalm 119:65-72). Aladi den sma di no abi lespeki gi Gado, ben ’taki lei fu pori a nen’ fu a psalm skrifiman, toku a ben singi: „A bun gi mi taki mi kisi kwinsi” (Psalm 119:66, 69, 71). Fa a kan de wan bun sani gi iniwan futuboi fu Yehovah taki a e kisi kwinsi?

²⁰ Te wi e kisi kwinsi, dan a no de fu taki dati wi e begi Yehovah fayafaya, èn disi e meki taki wi e kon moro krosibei na en. Kande wi o teki moro ten fu studeri a Wortu fu Gado di a meki sma skrifi, èn kande wi o meki moro muiti fu du san a Wortu disi e taki. Disi sa meki taki wi sa abi wan moro koloku libi. Ma a kan de so taki te wi e kisi kwinsi, wi e handri na wan fasi di e tyari kon na krin taki wi abi wan tu takru fasi. Kande a sa kon na krin taki wi no abi pasensi, noso taki wi abi heimemre. San wi musu du dan? Nanga yepi fu fayafaya begi, nanga yepi fu a Wortu fu Gado èn a yeye fu en, wi kan basi den takru fasi disi, so taki wi e kisi tra fasi di e fiti wan Kresten, neleki te wi ben o weri tra krosi (Kolosesma 3:9-14). Boiti dati, a bribi fu wi e kon moro tranga te wi e horidoro na ini muilek ten (1 Petrus 1:6, 7). Paulus ben kisi wini di a horidoro na ini muilek ten, fu di den tesi di a ben e kisi, ben e meki taki a ben abi Yehovah moro tranga fanowdu (2 Korentesma 1:8-10). Te wi e kisi kwinsi, dan wi e suku fu kisi wini fu a situwâsi dati?

Frutrow tapu Yehovah ala ten

21. San e pasa te Gado e meki den sma di abi heimemre kisi syen?

²¹ A wortu fu Gado e gi wi wan bun reide fu san ede wi kan frutrow tapu Yehovah (Psalm 119:73-80). Te wi e frutrow a Mekiman fu wi trutru, dan wi no sa abi fu syen gi nowan sani. Ma den sani di tra sma e du, e meki taki wi abi trowstu  fanowdu, èn kande wi e firi fu begi den wortu disi: „Meki den sma di abi heimemre kisi syen” (Psalm 119:76-78). Te Yehovah e meki den sma disi kisi syen, dan den ogri di den e du, e kon na krin èn a nen fu en e kon santa. Wi kan de seiker taki den sma di e frufolgu a pipel fu Gado, no e kisi nowan wini kwetikweti. Fu eksempre, na ini a ten di pasa den no ben man tapu a wroko fu Yehovah Kotoigi, èn noiti den no sa man du dati tu, bika den Kotoigi e frutrow tapu Gado nanga den heri ati.​—Odo 3:5, 6.

22. Fa a psalm skrifiman ben de „leki wan godo fu metibuba di de na ini smoko”?

²² A wortu fu Gado e meki wi kisi moro frutrow na ini Gado te sma e frufolgu wi (Psalm 119:81-88). Fu di den sma di abi heimemre ben e frufolgu a psalm skrifiman, meki a ben e firi „leki wan godo fu metibuba di de na ini smoko” (Psalm 119:83, 86). Na ini Bijbel ten, sma ben e meki godo fu metibuba fu poti watra, win, nanga tra watra-watra sani na ini. Te sma no ben e gebroiki den godo disi, dan son leisi den godo ben e krempi te den ben e anga den krosibei fu a faya di ben e bron na ini a brantmiri fu wan kamra pe a smoko no ben man komoto na ini. A de so taki problema, noso frufolgu e meki yu firi „leki wan godo fu metibuba di de na ini smoko”? Efu disi de so, dan frutrow tapu Yehovah, èn begi en: „Meki mi tan na libi fu di yu abi lobi bun-ati, so taki mi kan tan hori misrefi na a frumane fu yu mofo.”​—Psalm 119:88.

23. Na sortu sani wi poti prakseri di wi luku Psalm 119:1-88, èn san wi kan aksi wisrefi aladi wi de fayafaya fu poti prakseri na Psalm 119:89-176?

²³ Den sani di wi luku na ini a fosi pisi fu Psalm 119, e sori taki Yehovah e sori lobi bun-ati gi den futuboi fu en, fu di den e frutrow tapu a wortu fu en, èn fu di den lobi den wet, den frumane, nanga den komando fu en (Psalm 119:16, 47, 64, 70, 77, 88). A e prisiri taki den wan di de getrow na en, e tan na ai soleki fa a wortu fu en e sori (Psalm 119:9, 17, 41, 42). A no de fu taki dati yu de fayafaya fu poti prakseri na a tra pisi fu a moi psalm disi, ma fosi wi go du dati, dan aksi yusrefi: ’Mi e meki a wortu fu Yehovah skèin leti na tapu mi pasi trutru?’

[Futuwortu]

San yu ben sa piki?

• Fa wi kan de koloku trutru?

• Fa a wortu fu Yehovah e hori wi krin na yeye fasi?

• Na sortu fasi a wortu fu Gado e gi deki-ati nanga trowstu?

• Fu san ede wi musu abi bribi na ini Yehovah èn na ini a wortu fu en?

[Aksi fu a tori disi]

[Prenki na tapu bladzijde 11]

Rut, Rakab, nanga den Hebrew yonguman di ben de na ini katibo na ini Babilon, ben ’tan na ai akruderi a wortu fu Gado’

[Prenki na tapu bladzijde 12]

Na wan deki-ati fasi, Paulus ’ben taki fu den frumane fu Gado na fesi kownu’