Wi kan leri sani now èn fu têgo

A DOISRI datra Ulrich Strunz ben skrifi wan tu buku di nen Forever Young (Yongu fu têgo). Na ini den buku disi a ben taki dati te sma e du sani fu lusu a skin, te den e nyan gosontu nyanyan, èn te den e libi na wan fasi di fiti, dan dati kan meki taki den e kisi wan moro bun gosontu, èn kande den sa libi moro langa. Toku a no e pramisi den sma di leisi den buku fu en taki den o man libi fu têgo trutru te den e fiti a rai fu en.

Ma wan sortu sabi de di e sori wi taki wi kan kisi têgo libi. Te yu luku en bun, dan efu trutru yu ben man libi fu têgo, dan yu ben o man kon sabi bun sani fu têgo. Wan leisi di Yesus ben e begi, dan a taigi Gado: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes” (Yohanes 17:3). Meki wi luku fosi san den wortu „têgo libi” wani taki, èn baka dati wi sa luku san na a spesrutu sabi dati èn fa yu kan kisi en.

Soleki fa Bijbel e taki, dan heri esi a Mekiman sa kenki grontapu kon tron wan trutru paradijs pe sma sa man libi wan langa libi. Tumusi bigi sani o pasa te Gado e tyari a Paradijs dati kon, iya, neleki fa a ben de di a Frudu kon na ini a ten fu Noa. Mateyus kapitel 24, vers 37 te go miti 39, e sori taki Yesus e gersi a ten fu wi nanga „a ten fu Noa”, pe sma „no ben poti prakseri” na a seryusu situwâsi di den ben de na ini. Den no ben poti prakseri sosrefi na a boskopu di Noa ben e preiki. Ne „a dei doro di Noa go na ini na ark”, èn a Frudu kiri ala sma di no ben poti yesi na a sabi di Noa ben wani prati nanga den. Noa nanga den wan di ben de makandra nanga en na ini na ark, tan na libi.

 Yesus ben sori taki wan srefi sortu „dei” e kon na ini a ten fu wi. Den wan di e kon sabi den sani di abi fu du nanga a dei disi, èn di e poti prakseri na den sani dati sosrefi, no sa abi a howpu wawan taki den sa tan na libi, ma den sa abi a howpu tu fu libi fu têgo. Boiti dati, den dedewan di de na ini Gado en prakseri sa kisi wan opobaka, èn den sa libi sondro fu frede taki den sa abi fu dede baka (Yohanes 5:28, 29). Luku san Yesus ben taki fu den tu sani disi. Di a ben e taki nanga Marta fu na opobaka fu den dedewan, dan a taki: „A sma di e poti bribi na ini mi, sa kon na libi, awansi a dede; èn ibriwan sma di e libi èn e poti bribi na ini mi, kwetikweti no sa dede noiti”. Ala den buweisi e sori taki a „dei” disi de heri krosibei, èn dati wani taki dati kande yu „no sa dede noiti”.​—Yohanes 11:25-27.

Baka dati, Yesus aksi Marta: „Yu e bribi dati?” A piki: „Iya, Masra.” Efu Yesus ben o aksi yu a srefi sani dati tide, dan san yu ben o piki? Kande yu ben o feni en muilek fu bribi taki yu man libi sondro fu dede oiti. Ma srefi efu yu ben o denki so, dan toku a musu de so taki dati yu ben sa wani bribi dati. Prakseri omeni sani yu ben kan leri efu yu ’no ben o dede noiti’! Prakseri fa yu ben o prisiri fu kon sabi èn du ala den sani di yu e winsi now taki yu ben man du, ma noiti yu no e feni ten fu du den sani dati! Èn prakseri nomo fa a ben o de fu miti den lobiwan fu yu baka di ben dede! San na a sabi di kan meki taki den sani disi o pasa trutru te wi e du san wi e leri, èn fa yu kan kisi a sabi dati?

Wi man kisi sabi di e gi libi

A de so taki wi no man kisi a sabi di abi fu du nanga Gado èn nanga Krestes? Nôno. A tru taki noiti wi sa kaba fu kon sabi sani di abi fu du nanga den wroko fu a Mekiman. Toku, di Yesus ben sori taki „sabi” kan tyari „têgo libi” kon, dan a no ben e taki fu a sabi di abi fu du nanga den stari nanga tra sani na hemel, noso nanga iniwan tra sortu sabi. Odo kapitel 2 vers 1 nanga 5, e sori taki den „wortu” nanga „den komando” di skrifi na ini Bijbel, na den moro prenspari sani fu kisi „a sabi fu Gado srefi”. Èn Yohanes 20:30, 31 e sori taki te a abi fu du nanga Yesus, dan den sani di skrifi na ini Bijbel na ala sani di wi abi fanowdu fu „kan kisi libi”.

Fu dati ede, a sabi fu Yehovah èn Yesus Krestes di skrifi na ini Bijbel, nofo fu sori yu fa fu kisi têgo libi. Nowan tra buku no de leki Bijbel. Na wan switi fasi a Mekiman poti en yeye na mansma tapu fu skrifi a buku disi na so wan fasi, taki srefi sma di no teki heiskoro èn di no abi furu okasi fu teki leri, kan kon sabi nofo sani fu man kisi têgo libi. Na so a de tu, taki wan sma di man leri bun èn di abi nofo ten nanga moni, ala ten sa man leri wan nyun sani fu den Buku fu Bijbel di Gado meki sma skrifi. Taki yu man leisi na artikel disi, na wan buweisi taki yu abi a koni fu leri sani, ma fa yu musu gebroiki a koni dati?

Na heri grontapu, na eksempre fu furu sma sori taki a moro bun fasi fa wan sma kan kon kisi a sabi disi, na te a e kisi wan bijbelstudie fu wan tra sma di e frustan a sabi dati kaba. Neleki fa Noa ben pruberi fu meki den sma fu en ten kon sabi spesrutu sani, na so Yehovah Kotoigi de klariklari fu kon na yu oso fu studeri Bijbel nanga yu. Kande den o gebroiki a brochure San Gado e aksi foe wi?, noso a buku di abi wan nen di fiti, namku Sabi di e tjari joe go na têgo libi. * Srefi efu yu abi muiti fu bribi taki  na ini a Paradijs grontapu, getrowsma „no sa dede noiti kwetikweti”, toku yu kan leri fu poti frutrow na ini a pramisi disi nanga yepi fu den artikel disi di e taki fu Bijbel tori. Sobun, efu yu ben sa wani fu libi fu têgo, noso efu yu ben sa wani kon sabi nomo efu yu kan bribi trutru taki yu kan libi fu têgo, dan san yu musu du? Teki na okasi disi fu studeri Bijbel.

O langa wan bijbelstudie e teki? A brochure di kari na fesi, abi 32 bladzijde, èn a de fu kisi na ini hondrohondro tongo. Boiti dati, a abi 16 syatu les nomo. Efu yu kan poti wán yuru nomo wan wiki na wan sei, dan wan tu mun nomo sa de fanowdu fu studeri den moro prenspari Bijbel tori nanga yepi fu a buku Sabi di e tjari joe go na têgo libi. Den publikâsi disi yepi furu sma fu kisi bun furu sabi èn fu kisi wan dipi lobi gi Gado. A Mekiman sa blesi den wan di lobi en trutru, èn na so fasi den sa man kisi têgo libi.

Iya, yu man kisi sabi di e gi libi, èn a sabi dati makriki fu kisi. A Bijbel vertaal na ini moro leki 2000 tongo, aladi na ini son tongo, pisi fu a buku disi vertaal nomo. Yehovah Kotoigi na ini 235 kondre e prisiri fu yepi yu èn fu gi yu Bijbel publikâsi, so taki yu kan kisi moro nanga moro sabi.

A muiti di yu e meki fu studeri

A banti di yu abi nanga Gado na wan sani na mindri yu nanga a Mekiman. Yu wawan kan sorgu taki a banti dati no e pori, èn yu wawan kan tranga a banti dati. A de so tu taki Gado wawan kan gi yu têgo libi. Dati meki yu musu tan studeri a Wortu fu en di skrifi na ini Bijbel. Te yu e meki wan sma kon na yu oso doronomo, dan kande yu sa feni en moro makriki fu poti ten na wan sei fu studeri.

Fu di Bijbel nanga den bijbelstudie publikâsi abi „a sabi fu Gado srefi”, meki a de wan heri bun sani te yu e sorgu taki den publikâsi disi e tan bun (Odo 2:5). Na so fasi yu sa abi den furu yari langa. Efu yu e libi na ini wan pôti kondre, dan kande yu no kisi furu buku na skoro, fu di a ben de so moro furu taki yu ben musu arki èn luku sani fu man teki leri. Fu gi wan eksempre, na ini Benin, sma e taki moro leki 50 tongo. Son leisi a de so taki sma man taki fo noso feifi tongo heri bun, aladi noiti den no hori wan buku na ini den anu fu leri den tongo disi. A de wan blesi taki yu man leri sani fu di yu e arki, e luku, èn e poti prakseri na sani. Toku, yu sa si taki buku kan de wan bigi yepi gi yu te yu e studeri.

Awansi yu oso noso yu kamra pikin, pruberi fu feni wan bun presi fu poti yu Bijbel nanga den tra Bijbel publikâsi fu yu. Poti den pe yu sa man feni den makriki èn pe den no sa priti noso kroiki.

Osofamiri studie

Efu yu na wan papa noso wan mama, dan yu musu meki muiti fu yepi yu pikin fu kisi a srefi sabi di yu e kisi. Na ini pôti kondre, papa nanga mama furu tron abi a gwenti fu leri den pikin fu den furu fu den koni di den abi fanowdu na ini a libi. Kande den e leri den fu bori, fu go suku udu, fu tyari watra, fu kweki meti, fu fisi, èn fu feni sani di den abi fanowdu na wowoyo. Den sani disi e leri den pikin trutru fa fu yepi densrefi na ini a libi. Ma furu papa nanga mama no e leri den pikin a sabi di kan gi den têgo libi.

Awansi na ini sortu situwâsi yu de, kande yu e feni taki yu no abi ten fu studeri Bijbel. A Mekiman e frustan dati tu. Luku san a ben taki wan langa ten bifo, fu sori den fa den musu gi den pikin fu den leri fu den pasi fu en: „Yu musu poti den go dipi na ini a manpikin [noso umapikin] fu yu èn taki fu den te yu e sidon na ini yu oso èn te yu e waka na pasi èn te yu e go didon èn te yu e opo” (Deuteronomium 6:7). Te yu leisi den wortu disi, dan fu san ede yu no e pruberi fu seti yu eigi programa fu gi yu pikin leri? Luku fa yu kan du dati:

1. „Te yu e sidon na ini yu oso”: Pruberi fu abi takimakandra doronomo na oso nanga  den pikin fu yu, kande ibri wiki, neleki fa wan tra sma kande du nanga yu. Yehovah Kotoigi e gi sma Bijbel publikâsi di bun fu gi leri na pikin di abi difrenti yari.

2. „Te yu e waka na pasi”: Teki ibri okasi fu taki nanga yu pikin fu Yehovah, neleki fa yu e leri den fu kon sabi den koni di den sa abi fanowdu na ini a libi, noso neleki fa yu e gi den rai ibri leisi.

3. „Te yu e go didon”: Begi nanga yu pikin ibri neti.

4. „Te yu e opo”: Furu osofamiri kisi moi bakapisi fu di den e poti prakseri na wan bijbeltekst ibri mamanten. Yehovah Kotoigi e gebroiki a pikin buku Ondrosuku den Buku fu Bijbel ala dei * fu du dati.

Na ini pôti kondre, furu papa nanga mama e meki ala muiti fu sorgu taki wan fu den pikin fu den e kisi bun grontapuleri. Na so wan fasi a pikin sa man sorgu a papa nanga mama fu en te den kon owru. Ma efu yu e studeri Bijbel èn e yepi ala yu pikin fu du a srefi sani, dan yu sa kisi a sabi di sa meki taki yu nanga yu heri osofamiri e libi fu têgo.

Oiti a dei sa kon taki wi sa sabi ala sani? Nôno. Aladi a grontapu fu wi e tan dribi fu a wan presi go na a trawan na ini a bigi universum fu wi, wi sa tan leri moro sani. Iya, Preikiman 3:11 e taki: „Ala sani [Gado] meki moi na en ten. Srefi ten di no skotu a poti na ini den ati, so taki libisma noiti no sa kon sabi a wroko finifini di a tru Gado meki fu sensi a bigin te na a kaba.” A leri di wi e leri sabi sani, na wan prisiri sani di noiti sa kon na wan kaba.

[Futuwortu]

[Prenspari pisi na tapu bladzijde 5]

„Disi wani taki têgo libi, fu den e teki sabi . . .”

[Prenki na tapu bladzijde 7]

Yepi yu osofamiri fu teki sabi now èn fu têgo