A wini na wan tumusi moi fasi

YU E kisi gens fu yu bribi ede, kande na wroko, na skoro, na ini yu osofamiri, noso fu di den tirimakti poti wet fu tapu na anbegi fu yu? Efu dati de so, no lasi-ati. Furu Kotoigi fu Yehovah ben miti den sortu tesi disi, ma toku den komoto leki winiman na ini den tesi dati. Luku na eksempre fu Erna Ludolph.

Erna gebore na ini Lübeck, Doisrikondre, na ini a yari 1908. A ben de a wan-enkri sma na ini en osofamiri di ben e dini Yehovah. A libi ben kon muilek srefisrefi gi Kotoigi fu Yehovah di Hitler bigin tiri na ini 1933. Den sma na a presi pe Erna ben e wroko, ben krutu en fu di a ben e weigri fu gi odi na a fasi fa den bakaman fu Hitler musu du dati. Disi ben meki taki den Nazisma poti en na strafu-oso. A tan aiti yari langa na ini difrenti strafu-oso èn na ini den strafuman kampu na Hamburg-Fuhlsbüttel, Moringen, Lichtenburg, nanga Ravensbrück. Di Erna ben de na Ravensbrück, dan wan sani pasa di meki taki a komoto leki winiman.

Wan aparti yepiman

Professor Friedrich Holtz nanga en wefi, Alice, ben e libi na ini Berlijn. Den no ben de memre fu a Nazi partèi èn den no ben horibaka gi den denki di den sma fu a partèi dati ben abi. Ma den ben de famiri fu wan heihei SS-srudati di ben abi a frantwortu fu luku den strafuman na ini wan tu strafuman kampu. Sobun, di a professor nanga en wefi ben e suku wan sma fu yepi nanga osowroko, dan a SS-srudati gi den primisi fu teki wan fu den umasma na ini a strafu-oso. Na so a du kon taki na ini maart 1943, Alice go na Ravensbrück fu suku wan sma di ben kan yepi nanga osowroko. Suma a ben teki leki yepiman? We, Erna Ludolph. Erna ben go tan nanga famiri Holtz, èn den ben libi bun nanga en. Baka na orloku, a froisi nanga a srefi famiri dati go na a foto Halle, na a Saale-liba. Ma drape Erna ben miti gens baka, èn disi leisi a ben kisi gens fu den Socialist tirimakti na ini Owstu Doisrikondre. Na ini 1957 a famiri ben de fruplekti fu froisi go na West Doisrikondre, èn Erna froisi makandra nanga den. Now Erna ben de fri fu anbegi en Gado.

Fa Erna wini na wan tumusi moi fasi? Fu di Erna ben e tyari ensrefi na wan bun fasi èn fu di a ben e preiki a Bijbel boskopu na wan koni fasi, meki Alice Holtz nanga den feifi pikin fu en tron dopu Kotoigi fu Yehovah. Boiti dati, erfu granpikin fu Alice na Kotoigi tu. Nownowde, tu fu den e dini na a bijkantoro fu Yehovah Kotoigi na ini Selters, na Doisrikondre. „Wan prenspari reide fu san ede wi famiri de na ini waarheid, na fu di Erna ben de wan bun eksempre”, na so Susanne taki, di de wan fu den umapikin fu Alice. Erna ben kisi furu blesi fu di a horidoro. Fa a de nanga a situwâsi pe yu de na ini? Te yu e tan getrow èn e horidoro na ini muilek situwâsi, dan yu kan abi den srefi sortu blesi. Iya, te yu e tyari yusrefi na wan bun fasi èn yu e preiki na wan koni fasi, dan dati kan yepi yu fu wini na wan tumusi moi fasi. *

[Futuwortu]

[Prenki na tapu bladzijde 31]

Erna Ludolph (a e sidon) nanga den memre fu famiri Holtz